Каноны. 1 апреля.

Канон святой праведной Софии, княгине Слуцкой

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 5:

Свята́я пра́ведная ма́ти Софи́е,/ нетле́нием моще́й и чуде́с сия́нием почти́ тя Бог;/ и мы, помина́юще твое́ пра́ведное житие́,/ мо́лим тя испроси́ти/ телесе́м на́шим здра́вие// и душа́м спасе́ние.

Велича́ние:

Велича́ем тя,/ свята́я пра́ведная княги́не Софи́е,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Стихи́ра, глас 6:

Возсия́ днесь со́лнца светле́йше,/ свяще́нное твое́ торжество́, Софи́е пра́ведная,/ земли́ Слу́цкия похвало,/ су́щим во тьме ду́ши озаря́ющее,/ мрак же бесо́вский всегда́ отгоня́ющее,// досточу́дная.

Кано́н, глас 8.

Песнь 1

Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Изра́иля же беглеца́, пешехо́дца спасе́,// песнь Бо́гови воспева́юща.

Припев: Святая мати Софие, моли Бога о нас.

Стра́стными бу́рями всю́ду погружа́ему, и помышле́нии грехо́вными коле́блему,/ ко приста́нищу ти́хому Христо́вых за́поведей, моли́твами твои́ми, пра́ведная Софи́е, мя напра́ви,/ да досто́йно тя воспою́.

Припев: Святая мати Софие, моли Бога о нас.

Боже́ственными добро́тами просвеще́на, богоблаже́нная Софи́е,/ Сло́ву Преве́чному уневе́стилася еси́, пожи́вши богоуго́дне,/ и Того́ живоно́сным стопа́м после́довала еси́, ве́ру правосла́вную житие́м твои́м утвержда́ющи.

Сла́ва Отцу́ и Сы́ну и Свято́му Ду́ху:

Боже́ственных оте́ц наказа́нию после́довала еси́, сла́вная Софи́е,/ и сих нра́ву чи́сте поревнова́ла еси́, по зако́ну Бо́жию пра́ведно пожи́вши,/ до́брыми де́лы Бо́гу угоди́вши, богому́драя, и и́стинным смире́нием.

И ны́не и при́сно и во ве́ки веко́в. Ами́нь.

Богоро́дичен: Боже́ственную ста́мну и трапе́зу, Хлеб живо́тный поне́сшую,/ неде́ланную ни́ву, го́ру святу́ю, Богоро́дицу Де́ву пе́сньми просла́вим.

Песнь 3

Ирмос: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Припев: Святая мати Софие, моли Бога о нас.

В Небе́сныя черто́ги светоза́рныя всели́вшися,/ исцеле́ния нам ре́ки источа́еши, прему́драя Софи́е, стра́стная тече́ния изсуша́ющи.

Припев: Святая мати Софие, моли Бога о нас.

Украси́лася еси́ жела́нием кра́йним, жела́ющи Христа́,/ премно́жеством благосе́рдия пло́тию обнища́вшаго,/ и после́довала еси́ живо́тным Его́ словесе́м, жите́йская вся кра́сная возненави́девши.

Сла́ва Отцу́ и Сы́ну и Свято́му Ду́ху:

Позлаще́нне криле́ доброде́тели стяжа́вши,/ на высоту́ Небе́сную возлете́ла еси́, блаже́нная Софи́е, я́ко голуби́ца непоро́чная.

И ны́не и при́сно и во ве́ки веко́в. Ами́нь.

Богоро́дичен: Род челове́ческий спасе́ся, Всенепоро́чная, всесла́вным Рождество́м Твои́м:/ те́мже чтим Тя, и благоче́стно ублажа́ем, Пречи́стая Де́во Богора́дованная.

Седа́лен, глас 4:

Добро́тами боже́ственными преукра́шена/ и нетле́нием святы́х моще́й твои́х от Бо́га просла́влена, пра́ведная Софи́е,/ к Нему́ в нетле́нный черто́г вошла́ еси́,/ иде́же мо́лишися непреста́нно спасти́ся от вся́кия беды́ любо́вию тя почита́ющим.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная Де́во,/ еди́на Безле́тное Сло́во Бо́жие в ле́то ро́ждшая:/ Того́ со святы́ми и честны́ми апо́столы, му́ченики и проро́ки, и преподо́бными/ моли́ дарова́ти нам очище́ние и ве́лию ми́лость.

Пе́снь 4.

Ирмос: Услы́шах Го́споди,/ смотре́ния Твоего́ та́инство:/ разуме́х дела́ Твоя́,// и просла́вих Твое́ Божество́.

Припев: Святая мати Софие, моли Бога о нас.

Све́тлое твое́ торжество́, све́том Ду́ха Бо́жия сия́ющее,/ озаря́ет ду́ши на́ша, ве́рою пою́щих тя, Софи́е пра́ведная.

Припев: Святая мати Софие, моли Бога о нас.

Чудесы́ боже́ственными уве́рила еси́ неве́дущих Влады́ку Христа́,/ и к позна́нию Того́ обрати́ла еси́ пре́лести тьму оста́вльших.

Сла́ва Отцу́ и Сы́ну и Свято́му Ду́ху:

Да́ры Христу́ принесла́ еси́, моли́твы и труды́ воздержа́ния:/ сего́ ра́ди прия́ла еси́ Небе́сное Ца́рство, Софи́е, и ве́чнующее наслажде́ние.

И ны́не и при́сно и во ве́ки веко́в. Ами́нь.

Богоро́дичен: Смири́вши спаси́ мя, высокому́дрием живу́щаго,/ ро́ждшая Возне́сшаго смири́вшееся естество́ на́ше, Пречи́стая.

Пе́снь 5

Ирмос: У́тренююще вопие́м Ти,/ Го́споди, спаси́ ны:/ Ты бо еси́ Бог наш,// ра́зве Тебе́ ино́го не ве́мы.

Припев: Святая мати Софие, моли Бога о нас.

Рука́ма твои́ма преподо́бно воздвиза́емыма к Зижди́телю,/ ма́ти Софи́е, вра́жия шата́ния низложи́ла еси́.

Припев: Святая мати Софие, моли Бога о нас.

Удержа́в ру́ку твою́ десну́ю Вы́шний,/ наста́вил тя есть, ма́ти, к Небе́сному наслажде́нию.

Сла́ва Отцу́ и Сы́ну и Свято́му Ду́ху:

Стезю́ те́сную проше́дши в житии́ твое́м,/ к широте́ приспе́ла еси́ ра́йстей, Софи́е всечестна́я.

И ны́не и при́сно и во ве́ки веко́в. Ами́нь.

Богоро́дичен: И́же Богоро́дицу Тя неве́дущии, Богома́ти,/ Све́та не и́мут ви́дети Ро́ждшагося из Тебе́, Пречи́стая.

Песнь 6

Ирмос: Ри́зу мне пода́ждь све́тлу,/ одея́йся све́том я́ко ри́зою,// многоми́лостиве Христе́ Бо́же наш.

Припев: Святая мати Софие, моли Бога о нас.

Умертви́вши двиза́ния плотска́я, над страстьми́ вельми́ воцари́лася еси́,/ и ны́не, всечи́стая Софи́е, в безстра́стных живе́ши све́тлостех.

Припев: Святая мати Софие, моли Бога о нас.

О́бразу Спа́сову навы́кла еси́ покланя́тися, сла́вная,/ де́лы и словесы́ твои́ми спаси́тельная Его́ соблюда́ющи уче́ния.

Сла́ва Отцу́ и Сы́ну и Свято́му Ду́ху:

О́блак тя Христо́с показа́, ма́ти Софи́е,/ дождь источа́ющий живо́тный ве́рою притека́ющим к тебе́, пресла́вная.

И ны́не и при́сно и во ве́ки веко́в. Ами́нь.

Богоро́дичен: Красе́н па́че всех челове́к Сын Твой, Пречи́стая, добро́тою Божества́,/ а́ще и плоть бысть нас ра́ди.

Конда́к, глас 4:

Прииди́те, вся ру́сския жены́,/ святу́ю Софи́ю восхва́лим,/ уподо́бившуюся му́дрым де́вам,/ еле́й благода́ти Ду́ха Свята́го стяжа́вшим;/ те́мже умудри́ ю́ Госпо́дь/ подвиза́тися во утвержде́ние святы́я правосла́вныя ве́ры/ и соблюда́ти Це́рковь Его́/ незы́блему от ересе́й и раско́лов,/ сего́ ра́ди благода́рне воспои́м ей:/ ра́дуйся, гра́да Слу́цка и всея́ земли́ на́шея// ра́досте и утвержде́ние.

И́кос:

Струи́ мне сло́ва даждь, Бо́же мой, и исто́чник благочи́ния сотвори́ мой ум,/ и благослови́ язы́к мой, да воспою́ уго́дницу Твою́ Софи́ю богому́друю,/ ю́же венча́л еси́ бла́гостию Твое́ю:/ а́ще бо Сам не да́си ми сло́ва досто́йнаго,/ ка́ко принесу́ дар, ни́щий сый,/ те́мже пода́ждь ми си́лу, испове́дати ея по́двиги,/ кре́пко бо зве́ри мы́сленныя победи́ла есть./ Моли́твами ея́, Спа́се, утверди́ и моя́ помышле́ния.

Песнь 7

Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Припев: Святая мати Софие, моли Бога о нас.

О добро́те тле́ющей, Софи́е блаже́нная, зде небрегла́ еси́,/ сматря́ющи та́мо су́щая воздая́ния и свет,/ и сла́ву Бо́жию нестаре́ющуюся и красоту́, и Боже́ственное селе́ние.

Сла́ва Отцу́ и Сы́ну и Свято́му Ду́ху:

Ра́зум боголюби́в стяжа́ла еси́, Софи́е,/ и, во пло́ти су́щи, А́нгелом уподо́билася еси́, бдя́щи бо́дренне и любо́вию пою́щи:/ благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богоро́дичен: Виждь скорбь мою́, Де́во, ю́же ми наведе́ мно́жество зол мои́х,/ и родства́ о́гненнаго исхити́ мя, вопию́щаго:/ благослове́н еси́, Го́споди Бо́же, во ве́ки.

Песнь 8

Ирмос: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Припев: Святая мати Софие, моли Бога о нас.

Укра́шена сия́нием чистоты́, и чи́стым житие́м просвеще́на,/ Софи́е Богому́драя, предстои́ши Христу́ Бо́гу на́шему.

Припев: Святая мати Софие, моли Бога о нас.

Боле́зни разли́чныя врачу́ет челове́ков, и отгоня́ет бесо́вския напа́сти/ те́ло твое́ свято́е, в ра́це пресла́вно храни́мое.

Сла́ва Отцу́ и Сы́ну и Свято́му Ду́ху:

Свяще́нная же́ртва принесла́ся еси́, и приноше́ние све́тлое, пра́ведная княги́не Софи́е,/ я́ко кади́ло благоуха́нное, всех Влады́це Христу́ Бо́гу на́шему.

И ны́не и при́сно и во ве́ки веко́в. Ами́нь.

Богоро́дичен: Без истле́ния Сло́во па́че словесе́ родила́ еси́,/ тле́ния вся́каго нас избавля́ющее:/ сего́ ра́ди Тя, Де́во, ве́рою велича́ем.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв челове́к.// Те́мже Пречи́стую Богоро́дицу ве́рнии велича́ем.

Припев: Святая мати Софие, моли Бога о нас.

Возжеле́ла еси́ добро́ту мы́сленную Христо́ву, и чи́сто возлюби́ла еси́ Его́./ Где почива́еши? где ли пасе́ши? –/ те́пле вопия́ла еси́, – да почи́ю у Тебе́, и в Твои́х све́тлостех наслажду́ся,/ велича́ющи Твою́ бла́гость.

Припев: Святая мати Софие, моли Бога о нас.

Ра́зум име́ла еси́ в твое́й души́, и смире́ние, и боже́ственную кро́тость,/ ве́ру несумне́нну, и наде́жду и любо́вь, я́же к Бо́гу,/ всено́щными моли́твами предстоя́вши Ему́,/ и Небе́сными све́тлостьми, блаже́нная Софи́е, озаря́ема и просвеща́ема.

Сла́ва Отцу́ и Сы́ну и Свято́му Ду́ху:

Днесь собра́шася лю́дие/ хвала́ми возвели́чити Го́спода, возвели́чившаго твое́ свято́е торжество́:/ в не́мже помина́й нас, помина́ющих тя,/ предстоя́щи Христу́, пра́ведная Софи́е и всечестна́я.

И ны́не и при́сно и во ве́ки веко́в. Ами́нь.

Богоро́дичен: Пощади́ мя, Бо́же, рожде́йся от Де́вы, егда́ ся́деши суди́ти дела́ моя́,/ и Тоя́ моли́твами пре́зри беззако́ния и грехи́ моя́, я́ко Благ и Многоми́лостив.

Свети́лен:

Кня́зя утаи́вшися студа́, и сего́ в прему́дростнем о́бразе показа́ безу́мна,/ жена́ су́щи душе́ю и те́лом, возсия́ла еси́ я́ко муж ра́зумом и ве́рою,/ ма́ти Софи́е, жен пра́ведных украше́ние.

Сла́ва, и ны́не, Богоро́дичен:

День мне возсия́й разу́мнаго весе́лия,/ Ты бо еси́, Чи́стая, свет и живо́т, су́щих во тьме:/ вся бо, а́ще хо́щеши, твори́ти мо́жеши, я́ко су́щи всех Влады́чица.

Моли́тва

О свята́я пра́ведная ма́ти на́ша, блаже́нная княги́не Софи́е, приими́ ми́лостивно приноше́ние ве́ры, наде́жды и любве́ на́шея и вознеси́ е́ ко Го́споду, и я́коже в земне́м животе́ твое́м была́ еси́ помо́щница и засту́пница всем правосла́вным христиа́ном земли́ твоея́, та́ко и ны́не укрепи́ нас тве́рдо и непоколеби́мо до сме́рти стоя́ти за ве́ру правосла́вную, согре́й сердца́ на́ша любо́вию ко Го́споду и Пречи́стей Его́ Ма́тери. Умоли́ Христа́ Бо́га на́шего, да сохрани́т Це́рковь Свою́ Святу́ю от раско́лов и ересе́й, да утверди́т в ней дух пра́выя ве́ры и благоче́стия, дух ве́дения и любве́, дух ми́ра и ра́дости ве́чныя, да вся ча́да ея́ ду́хом и и́стиною покланя́ются Ему́, да укрепи́т ве́рных в благоче́стии и свя́тости жи́зни, да обрати́т отпа́дших от Правосла́вныя Це́ркве во свята́я не́дра ея́.

О свята́я ма́ти, гра́да Слу́цка похвало́ и ра́досте, умоли́ Го́спода, да изба́вит град твой и всю страну́ на́шу от гла́да, тру́са, пото́па, огня́, меча́, наше́ствия иноплеме́нных и междоусо́бныя бра́ни, от смертоно́сныя я́звы, да низпо́слет прави́телем на́шим усе́рдие, му́дрость и ве́рность, да управля́ют и су́дят по во́ле Его́, да храня́т установле́ния Святы́я Це́ркве. Испроси́ всем с ве́рою притека́ющим к ра́це святы́х моще́й твои́х ми́рное житие́, тишину́, просвеще́ние умо́в и серде́ц, соблюди́ их от ко́зней вра́жиих, от собла́знов ми́ра, во зле лежа́щаго, и от вся́кия ско́рби и ну́жды, обрати́ нас к покая́нию и исправле́нию, да́руй заблу́ждшим и́стины позна́ние, неду́гующим исцеле́ние. Сохрани́ нас благода́тными твои́ми моли́твами от всех враго́в ви́димых и неви́димых и изба́ви от вся́каго зла, да просла́вим во вся дни жи́зни на́шея Отца́, и Сы́на, и Свята́го Ду́ха, и твое́ заступле́ние во ве́ки веко́в. Ами́нь.