Каноны. 1 апреля.

Канон святым мученикам Хрисанфу и Дарии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченицы Твои́, Го́споди,/ во стра́даниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии мученицы Хрисанфо и Дария, моли́те Бо́га о нас.

Венце́м, па́че зла́та сия́ющим, му́чениче, украша́емь и муче́ния сия́я добро́тами, Влады́це предстои́ши, о на́с моля́ся, тя́ чту́щих, досточу́дне.

Припев: Святии мученицы Хрисанфо и Дария, моли́те Бо́га о нас.

Уязви́лся еси́ сла́дким жела́нием, му́чениче, Зижди́теля твоего́ и, кра́сная ми́ра презре́в, си́лу всю́ по́дал еси́ твоего́ се́рдца, Хриса́нфе, к Жела́емому ти́ усе́рдно.

Сла́ва Отцу́ и Сы́ну и Свято́му Ду́ху:

Ве́рою воору́жся, низложи́л еси́ многоко́зненнаго, тебе́ прило́жшаго, му́чениче, же́нскою сла́стию прельсти́ти, и чистоты́ че́стен сосу́д, Хриса́нфе, бы́л еси́.

И ны́не и при́сно и во ве́ки веко́в. Ами́нь.

Богородичен: Естество́м Боже́ственным непристу́пный, присту́пен мне́ яви́ся, от Тебе́, Де́во, пло́ть прие́мь, Его́же Да́рия жела́ющи, терпели́вно пострада́ и неве́стнически Тому́ приведе́ся.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии мученицы Хрисанфо и Дария, моли́те Бо́га о нас.

Зла́то, искуше́но муче́ний огне́м, бы́л еси́, ца́рских, Хриса́нфе, нося́й страда́ний изображе́ние.

Припев: Святии мученицы Хрисанфо и Дария, моли́те Бо́га о нас.

Ри́торов оста́вль глумле́ние, плени́цами улови́лся еси́ ученико́в, Хриса́нфе, прея́сне тебе́ умудри́вшаго.

Сла́ва Отцу́ и Сы́ну и Свято́му Ду́ху:

Повину́лася еси́ Рачи́телю, невестоводя́щему тя́ Христу́, всему́драя, честны́я ра́ди ве́ры, рачи́теля плотска́го оста́вльши.

И ны́не и при́сно и во ве́ки веко́в. Ами́нь.

Богородичен: Пло́тию ро́ждься из утро́бы Твоея́, Де́во, Иису́с, Чи́стая, неве́сту чи́сту, му́ченицу Себе́ Да́рию обруча́ет.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии мученицы Хрисанфо и Дария, моли́те Бо́га о нас.

Ду́ха облиста́ющия зари́ чи́стое се́рдце твое́ всего́ светоза́рна тя́, му́чениче, соде́лаша, усе́рдно зову́ща: сла́ва си́ле Твое́й, Го́споди.

Припев: Святии мученицы Хрисанфо и Дария, моли́те Бо́га о нас.

Истка́нную тя́ Боже́ственныя благода́ти свы́ше, Творе́ц облече́ нетле́нною ри́зою, непоро́чно соблю́дша те́ло, блаже́нне, и я́ко победи́теля венча́.

Припев: Святии мученицы Хрисанфо и Дария, моли́те Бо́га о нас.

До́блестию се́рдца оттря́сл еси́ сла́сти теле́сныя, добро́тою несравни́тельною Боже́ственною наслажда́емь, и, ра́дуяся, соверши́л еси́ муче́ния твоего́ по́двиг.

Сла́ва Отцу́ и Сы́ну и Свято́му Ду́ху:

Обожи́лася еси́ по прича́стию, страстоно́сице, Боготво́рнаго соедине́ния, и в небе́сныя всели́лася еси́ черто́ги, ра́дующися, я́ко непоро́чна неве́ста Влады́ки тва́ри.

И ны́не и при́сно и во ве́ки веко́в. Ами́нь.

Богородичен: Соблю́д Тя́ Де́ву, я́ко пре́жде рождества́, по рождестве́, Пречи́стая, из Тебе́ воплоти́ся недомы́сленный, Да́рию му́ченицу неве́сту Себе́ приводя́.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии мученицы Хрисанфо и Дария, моли́те Бо́га о нас.

Восхище́н у́м от ве́щных творя́, вя́жемь, зло́бу вра́жию, страстоно́сче, разори́л еси́, блаже́нне.

Припев: Святии мученицы Хрисанфо и Дария, моли́те Бо́га о нас.

Чистоты́ рачи́тель бы́в свяще́ннейший, претвори́л еси́ де́вы огнепа́льную любо́вь ко Го́споду, прехва́льне.

Сла́ва Отцу́ и Сы́ну и Свято́му Ду́ху:

Пове́ржена зря́ и нога́ми спопира́ема мучи́теля, ра́дованною мы́слию Влады́ку, преблаже́нне, велича́л еси́.

И ны́не и при́сно и во ве́ки веко́в. Ами́нь.

Богородичен: Кто́ мо́жет Твое́ сказа́ти та́инство, о Всечи́стая! Бо́га Сло́ва, па́че ума́ бо и сло́ва, сугу́ба естество́м, родила́ еси́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии мученицы Хрисанфо и Дария, моли́те Бо́га о нас.

Пою́ща Влады́ку все́х, приснопа́мятне, све́т с небесе́, всю́ду тя́ окружи́в, просвети́, заключе́на в те́мнейшей хра́мине, Хриса́нфе.

Припев: Святии мученицы Хрисанфо и Дария, моли́те Бо́га о нас.

Ри́м тя́, муче́нием честны́м сла́вимаго, златови́дну я́коже звезду́, стяжа́в, му́чениче, украша́ется по́двиги и боже́ственными твои́ми, Хриса́нфе, чудесы́.

Сла́ва Отцу́ и Сы́ну и Свято́му Ду́ху:

Красна́, преудо́брена же и пресла́вна, му́ченице Да́рия де́ва, показа́вшися Сло́ву красне́йшему, уневе́стилася еси́ боле́зньми вся́кими теле́сными.

И ны́не и при́сно и во ве́ки веко́в. Ами́нь.

Богородичен: Мла́да Тя́ я́ко Де́тища Де́ва роди́, Преве́чнаго Сло́ва, Его́же жела́юще, отрокови́цы Се́ю в сле́д Тебе́, все́х Царю́, неве́стнически приведо́шася.

Седа́лен, гла́с 3.

Красне́йшую добро́ту возжеле́л еси́, и ви́димыя добро́ты прете́кл еси́, и приве́л еси́ Христу́ златы́ми вои́стинну словесы́ твои́ми, Хриса́нфе блаже́нне, Да́рию сла́вную, страда́ния претерпе́вшую и томи́теля посра́мльшую. С не́юже вся́ ны́ помина́й, ве́рою соверша́ющия па́мять ва́шу.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии мученицы Хрисанфо и Дария, моли́те Бо́га о нас.

Цве́т му́чеников златови́ден ты́ бы́л еси́, собо́р же страда́льцев приве́л еси́ Христу́ боже́ственными словесы́ твои́ми и чудесы́, му́чениче богоприя́тне, с ни́миже ве́рно тя́ ны́не ублажа́ем.

Припев: Святии мученицы Хрисанфо и Дария, моли́те Бо́га о нас.

В хлеви́не скве́рней затворе́на, на́га тя́, блаже́нне, Боже́ственными благово́нии, сла́вою светови́дною Иису́с просвеща́ет, Его́же чи́стою мы́слию, всему́дре, возлюби́л еси́.

Сла́ва Отцу́ и Сы́ну и Свято́му Ду́ху:

Зве́ря храни́теля тебе́ де́вства Христо́с посла́, па́губу нечести́вых отгоня́ща я́ве, песнопою́щей тебе́, всехва́льная: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: По существу́ Боже́ственному Сы́й неопи́сан, в не́дрех Твои́х, Де́во, бы́сть по на́м пло́тию опису́емь. Благослове́на Ты́ в жена́х еси́, Пренепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии мученицы Хрисанфо и Дария, моли́те Бо́га о нас.

Тве́рдым, блаже́нне, по́мыслом проти́вяся суему́дренному, строга́ния претерпе́л еси́ теле́сная и, свеща́ми опаля́емь, неопали́мь пребы́л еси́, со о́троки воспева́я, Хриса́нфе: благослови́те, вся́ дела́ Госпо́дня, Го́спода.

Припев: Святии мученицы Хрисанфо и Дария, моли́те Бо́га о нас.

Прему́дростию укра́шен Христо́вою, обуи́л еси́ нему́дрых шата́ние, и у́м льсти́ваго посрами́л еси́, Еву прельсти́вшаго, плени́в благоче́стно сего́ ору́жие, му́дре, и приве́л еси́ неве́сту Бо́гу, избра́нну ве́ры ра́ди.

Припев: Святии мученицы Хрисанфо и Дария, моли́те Бо́га о нас.

Едине́нием души́ плотска́го избежа́сте совокупле́ния, чи́стыя сосу́ды Вседержи́теля яви́стеся и в хра́м принесо́стеся небе́сный, страда́льцы, вопию́ще Христу́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Во́лею Бо́жиею плотски́я стра́сти удержа́вше, о́гнь испепели́ша му́к Хриса́нф и Да́рия росо́ю Ду́ха и венце́в жи́зни улучи́ша, пою́ще: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Яко ши́пок посреди́ те́рния жите́йскаго, Пречи́стая, Бо́г обре́т Тя́, нескве́рную, всели́ся во утро́бу Твою́ чи́стую и благово́ния та́инственнаго ми́р испо́лни, взыва́ющий: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы Хрисанфо и Дария, моли́те Бо́га о нас.

Священносло́вящу Боже́ственная, Боже́ственное во́инство тебе́ приложи́ся, ле́сти скве́рныя изба́влься, и мече́м непоро́чныя же́ртвы на́с ра́ди, я́ко овча́ти, му́ченицы Поже́ршемуся принесо́шася.

Припев: Святии мученицы Хрисанфо и Дария, моли́те Бо́га о нас.

Яви́стеся посреди́ звере́й, я́коже а́гнцы, страстоте́рпцы, воплоще́ние пропове́дающе Боже́ственное Излия́вшагося да́же и до пло́ти, и боле́зньми неболе́зненную кончи́ну боже́ственне насле́довасте.

Припев: Святии мученицы Хрисанфо и Дария, моли́те Бо́га о нас.

Дне́сь све́тло пра́зднует вся́к гра́д же и страна́, Ри́м созыва́ет гра́д, боже́ственныя стра́сти и боре́ния, я́ко всечрежде́ние невеще́ственное, предлага́ющи ва́с, святи́и.

Сла́ва Отцу́ и Сы́ну и Свято́му Ду́ху:

Взя́ти бы́сте к безме́рней сла́ве, Хриса́нфе му́чениче и Да́рия, и вседержи́тельному Сло́ву, венцено́сцы, вку́пе предстоите́, о на́с моля́щеся, блажа́щих ва́с всегда́.

И ны́не и при́сно и во ве́ки веко́в. Ами́нь.

Богородичен: Трепе́щет по́мысл и се́рдце, помышля́юще Твое́ рождество́ недомы́слимое, Отрокови́це: Бо́га бо Сло́ва чревоноси́ла еси́, избавля́ющаго Тобо́ю вся́кия ну́жды чту́щия Тя́.

Молитва мученикам Хрисанфу и Дарии Римским

О, святи́и и преблаже́ннии страстоте́рпцы, му́ченицы Христо́ви Хриса́нфе и Да́рие! К ва́м у престо́ла Бо́жия предстоя́щим и моли́твенникам на́шим те́плым, ско́рым помо́щникам мы́, недосто́йнии, прибега́ем. Услы́шите ны́не сие́ моле́ние на́ше и умоли́те возлю́бленнаго ва́ми Го́спода на́шего Иису́са Христа́, Его́ же вы́ испове́дали в тя́жких муче́ниих свои́х пред безу́мными мучи́тели и гони́тели свято́й ве́ры Христо́вой, о на́с недосто́йных гре́шных. Вы́ у́бо ра́ди ве́ры Христо́вой мно́ги муче́ния претерпе́ли и умерщвлены́ бы́ша, Це́рковь Христо́ву украси́сте и венца́ми безсме́ртныя сла́вы увенча́ннии, в неизглаго́ланней ра́дости с ли́ки а́нгельскими в небе́сных селе́ниях водворя́етеся, Боже́ственным све́том облиста́еми. Яви́ти и на́м многомо́щное заступле́ние: ве́ру Христо́ву в чистоте́ сохрани́ти, в злострада́ниях и искуше́ниях му́жество прояви́ти, в жите́йских потре́бах дово́льство, в моли́твах постоя́нство и любо́вь к Бо́гу и бли́жним всегда́ име́ти. Наста́вите на́с, святи́и му́ченицы, моли́твами ва́шими на пу́ть спасе́ния, укрепи́те стопы́ на́ша тве́рдо и непоколе́блемо ходи́ти путе́м за́поведей Госпо́дних, вразумля́я заблу́ждшия, да́руя неду́гующим исцеле́ние, бе́дствующим избавле́ние, в супру́жестве живу́щим покрови́тельство, все́м же на́м вся́ ко спасе́нию поле́зная. Я́ко да ва́шими моли́твами наставля́еми и предста́тельством укрепля́еми, просла́вим Спаси́теля на́шего Го́спода Иису́са Христа́. Ему́ же подоба́ет вся́кая сла́ва, че́сть и поклоне́ние, со безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.