Каноны. 18 апреля.

Канон святым мученикам Феодулу и Агафоподу и иже с ними.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченицы Твои́, Го́споди,/ во стра́даниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии мученицы, моли́те Бо́га о нас.

Боже́ственным муче́ния венце́м увя́зшеся, просвеще́ни добро́тою мы́сленною, Влады́це предстоите́, о на́с моля́щеся, прекра́снии великому́ченицы.

Припев: Святии мученицы, моли́те Бо́га о нас.

Красно́ к Бо́гу творя́ще, му́дрии, присвое́ние, безле́потныя зло́бы себе́ благоче́стно удали́сте и с ли́ки, ра́дующеся, страстоте́рпец причто́стеся.

Сла́ва Отцу́ и Сы́ну и Свято́му Ду́ху:

Во́д Животворя́щаго Ду́ха су́ще испо́лнены, неразу́мия дре́вле зно́ем та́ющия напои́сте благодея́нием, святи́и, Боже́ственным повину́ющеся веле́нием.

И ны́не и при́сно и во ве́ки веко́в. Ами́нь.

Богородичен: Спа́са и Вседе́теля Го́спода во чре́ве носи́ла еси́, Его́же Агафопо́д вку́пе со сла́вным Феоду́лом пропове́да, су́ща Бо́га и Челове́ка, Де́во Ма́ти Всенепоро́чная.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии мученицы, моли́те Бо́га о нас.

Глаго́лы твои́х плени́ц, препе́нся, вра́г паде́ и я́вственно обличи́ся, му́чениче страстоте́рпче Феоду́ле.

Припев: Святии мученицы, моли́те Бо́га о нас.

Любо́вию су́щею к Бо́гу укрепи́в ду́шу, показа́л еси́ всю́ вра́жию си́лу, му́чениче Агафопо́де, некре́пку.

Сла́ва Отцу́ и Сы́ну и Свято́му Ду́ху:

Исцеле́ния ве́рным от приснотеку́щих пото́ков точа́ще, исто́чник страсте́й, сла́внии, Боже́ственною си́лою изсуша́ете.

И ны́не и при́сно и во ве́ки веко́в. Ами́нь.

Богородичен: Избавля́ющаго челове́ки от плене́ния вра́жия, Чи́стая, Изба́вителя родила́ еси́, пло́тию на́шею обложе́на.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии мученицы, моли́те Бо́га о нас.

Яко свети́льницы возсия́вше пресве́тлии муче́ния светлостьми́, вселе́нныя исполне́ние просвеща́ют сла́внии му́ченицы, пре́лести омрача́юще зломы́слие.

Припев: Святии мученицы, моли́те Бо́га о нас.

Блаже́нную супру́гу, благоу́мную и прии́мшую вене́ц муче́ния, Ангели почуди́шася, и челове́цы похвали́ша терпе́ния до́блесть.

Сла́ва Отцу́ и Сы́ну и Свято́му Ду́ху:

Ра́дуяся, Феоду́л вопия́ше: в пу́ть теку́, Го́споди, Твои́х свиде́тельств и наслажда́юся бога́тно Твоего́ сия́ния, ку́пно с тве́рдым Агафопо́дом.

И ны́не и при́сно и во ве́ки веко́в. Ами́нь.

Богородичен: Вити́йствующе воплоще́ние Влады́ки, из Твоея́ возсия́вша утро́бы, Богоро́дице, му́ченицы сла́внии спаси́тельное испи́ша пи́во муче́ния, ра́дующеся.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии мученицы, моли́те Бо́га о нас.

Но́ги твоя́ я́ве на правоте́ поста́вил еси́, прехва́льне Агафопо́де, честна́го муче́ния, враги́ препина́ющия.

Припев: Святии мученицы, моли́те Бо́га о нас.

Во́ду жи́зни, страстоно́сцы, теку́щую в се́рдцы стяжа́вше, сла́вный коне́ц водо́ю прия́сте.

Сла́ва Отцу́ и Сы́ну и Свято́му Ду́ху:

Тече́ние и́дольскаго преще́ния изсуши́сте, вве́ржени, страда́льцы, во глубину́ морску́ю и во́лею умерщвле́ни.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, души́ моея́ озлобле́ния уврачи́, ро́ждшая Всеблага́го Сло́ва, вся́ ублажа́ющаго.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии мученицы, моли́те Бо́га о нас.

Во́д живото́чных су́ще испо́лнени, достохва́льную кончи́ну потопле́нием во́д прия́сте, зло́бы в ни́х предста́теля потопи́вше.

Припев: Святии мученицы, моли́те Бо́га о нас.

Благода́тию и си́лою Бо́жиею соблюда́еми, не преврати́стеся пожре́ти ме́рзким куми́ром, но же́ртву Влады́це себе́ чи́сту принесо́сте.

Сла́ва Отцу́ и Сы́ну и Свято́му Ду́ху:

Ору́жия вра́жия в ва́с изнемого́ша, изощре́ныя бо стре́лы ва́шего му́жества вонзо́сте, страда́льцы, в се́рдце его́ до́блественно.

И ны́не и при́сно и во ве́ки веко́в. Ами́нь.

Богородичен: Исцели́ души́ моея́ стра́сти, Всенепоро́чная, безстра́стия ро́ждши Исто́чник, и уста́ви томи́тельство непреста́нно смуща́ющих, Чи́стая, се́рдце мое́.

Седа́лен, гла́с 8.

Бра́тия по благода́ти Ду́ха, единонра́внии ве́рою благочести́вою, су́ще святи́и, вои́стинну великоимени́тии, в моли́твах и поще́ниих житие́ проходя́ще, лю́ди привлеко́сте к Боже́ственному позна́нию. Те́мже, до́блии во́ини, пре́лесть му́жески плени́сте и, зако́нно пострада́вше, венцы́ получи́сте. Моли́те Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять ва́шу.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии мученицы, моли́те Бо́га о нас.

Ра́зумом Боже́ственным в леви́тскую оде́жду оде́ялся еси́, сию́ муче́ния све́тлостию свяще́нно светле́йшу соде́лав, и ны́не предстои́ши, Агафопо́де, Сло́ву ра́дуяся.

Припев: Святии мученицы, моли́те Бо́га о нас.

Первому́ченика слу́жбою украша́емь, Сло́ву пожре́нному, блаже́нне, служи́ти, Агафопо́де, сподо́бился еси́, благослове́н еси́, — вопия́, — в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Единоу́мием еди́но мы́сляще, досточу́днии, еди́н сме́рти иску́с за Христа́ претерпе́сте, зову́ще: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Преукра́шену доброде́телей, Чи́стая, све́тлостию, Сло́во, доброде́телию покры́вый небеса́, обре́т Тя́, всели́ся в Тя́, Пренепоро́чная, и челове́ческое естество́ онебеси́.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии мученицы, моли́те Бо́га о нас.

Словесы́ твои́ми ле́сть помрача́я, му́дре Феоду́ле, му́дростию благода́тною озаря́емь, просия́л еси́, пред суди́щем благоче́стие возглаша́я и злочести́вых загражда́я уста́, зовы́й: благослови́те, вся́ дела́ Госпо́дня, Го́спода.

Припев: Святии мученицы, моли́те Бо́га о нас.

Скры́ти морска́я глубина́ ва́ша телеса́ ника́коже возмо́же, святи́и, на су́шу бо сия́ издае́т Боже́ственным манове́нием неистле́нна, источа́юща на́м ди́вная чудеса́, вопию́щим: вся́ дела́ благослови́те Госпо́дня Го́спода.

Припев: Святии мученицы, моли́те Бо́га о нас.

Ве́сь порабо́тився тебе́ ра́ди в ра́бии о́бразе я́вльшемуся, сла́вне, и по сме́рти промышле́ние сирота́м явля́ешися творя́ и вдова́м, Влады́чнее законоположе́ние исполня́я, я́ко благоразу́мен ра́б Госпо́день, преблаже́нне Феоду́ле.

Сла́ва Отцу́ и Сы́ну и Свято́му Ду́ху:

Пелены́ ва́ша, и ра́ны, и боре́ния Фессалоники́я чти́т, того́ бо воспита́ние яви́стеся, и в то́м блаже́нную кончи́ну, я́ко страда́льцы, вои́стинну прия́сте, и Це́рковь перворо́дных че́стно ны́не уясня́ете.

И ны́не и при́сно и во ве́ки веко́в. Ами́нь.

Богородичен: Не премени́в естества́, Христо́с из Тебе́ во всего́ челове́ка облече́ся, Богора́дованная Влады́чице, Его́же стра́сть Феоду́л и Агафопо́д кре́пце изобрази́вше, вопию́т: вся́ дела́, благослови́те Госпо́дня Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы, моли́те Бо́га о нас.

Се́ ны́не что́ добро́, — вопия́ху, — или́ что́ красно́, страстоте́рпцы, но е́же жи́ти во гра́де жива́го Бо́га, соблю́дше благоче́стия соу́з, да́же до сме́рти нереши́мь?

Припев: Святии мученицы, моли́те Бо́га о нас.

Яко свиде́тельства тече́ние сконча́вше, страда́льцы, ликостоя́ние вы́шних чино́в ва́с восприя́т, неувяда́ющими, сла́внии, венча́еми венцы́.

Припев: Святии мученицы, моли́те Бо́га о нас.

Дне́сь све́тло пра́зднует сла́вная Фессалоники́я, вся́к гра́д и страну́ созыва́ющи в па́мять ва́шу с высо́ким пропове́данием, о Агафопо́де и Феоду́ле!

Сла́ва Отцу́ и Сы́ну и Свято́му Ду́ху:

Взя́стеся к неизрече́нней сла́ве светоявле́нно, я́коже страстоте́рпцы, ея́же сподо́битися ве́рою ва́шу соверша́ющим па́мять всегда́, я́ко дерзнове́ние иму́ще, моли́теся, пречестни́и.

И ны́не и при́сно и во ве́ки веко́в. Ами́нь.

Богородичен: Све́том мя́ Твоего́ благоутро́бия, во тме́ неразу́мия лежа́щаго, озари́, еди́на, Светода́вца Ро́ждшая, Изба́вителя и Го́спода, святы́я венча́ющаго.

Молитва

Святи́и му́ченицы Агафопо́де и Феоду́ле! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.