Каноны. 17 апреля.
Канон преподобномученикам Вениамину архимандриту и Никифору иеромонаху Соловецким
![Преподобномученикам Вениамину архимандриту и Никифору иеромонаху Соловецким Преподобномученикам Вениамину архимандриту и Никифору иеромонаху Соловецким](img_i/029.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 5:
Преподóбнии новомýченицы Вениами́не и Ники́форе,/ дóбрым пóдвигом во оби́тели Соловéцтей просия́вше,/ настáвницы брáтии в завéтех и́ноческих яви́лися естé/ и, от безбóжник беды́ и изгнáние претерпе́вше,/ в плáмени огня́ дýши своя́ Влады́це Христý предáли естé,/ Емýже ны́не предстоя́ще,// моли́те спасти́ся душа́м на́шим.
Велича́ние:
Велича́ем вас,/ преподобному́ченицы Вениами́не и Ники́форе,/ и чтим честна́я страда́ния ва́ша,/ я́же за Христа́// претерпе́ли есте́.
Стихи́ра, глас 6:
Где твое́, сме́рте, жа́ло?/ Где твоя́, а́де, побе́да?/ Всу́е и́щете ве́рных Госпо́дних пожре́ти,/ вла́сти же не и́мате,/ победи́л бо есть вы Спас душ на́ших Христо́с Бог,/ дарова́в живо́т ве́чный всем земноро́дным,/ ве́рным Ца́рство Свое́ запове́да,/ Того́ насле́дницы Вениами́н и Ники́фор/ житие́м пра́ведным и кончи́ною му́ченическою яви́шася./ Ны́не, па́мять тех воспева́юще,/ нача́ло ве́чнаго жития́ их в Бо́зе пра́зднуем// и к по́мощи их моли́твенней взыва́ем.
Кано́н, глас 6.
Песнь 1
Ирмос: Волно́ю морско́ю/ Скры́вшаго дре́вле/ гони́теля мучи́теля,/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Сподо́би, Го́споди, просла́вити по достоя́нию преподобному́чеников Солове́цких, Вениами́на и Ники́фора,/ ти́и бо, си́лою Христо́вою вооружи́вшеся,/ искуше́нием вра́жиим противоста́ша/ и со́нма му́чеников украше́ние пресве́тлое яви́шася.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
От ко́рене благочести́ваго произше́д, свя́те Вениами́не,/ ве́ре Христо́ве и любви́ Боже́ственней измла́да прилежа́л еси́/ и, боле́зни и труды́ благоду́шно претерпева́я,/ посреде́ мяте́жей мно́гих до конца́ сия́ сохрани́л еси́.
Сла́ва Отцу́ и Сы́ну и Свято́му Ду́ху:
От святы́я ико́ны Вседержи́теля глас услы́шав, о́тче Вениами́не,/ мирска́я вся отри́нул еси́/ и ко ото́ку Солове́цкому стопы́ своя́ напра́вил еси́,/ иде́же, во оби́тели святе́й всели́вся,/ в послуша́ние Бо́гу всеце́ло себе́ вдал еси́.
И ны́не и при́сно и во ве́ки веко́в. Ами́нь.
Богородичен: Путь ко спасе́нию откры́ла еси́ нам, Богоро́дице,/ жития́ непоро́чнаго о́браз чисте́йший явля́ющи./ Те́мже, на Тя взира́юще и Тебе́ моля́щеся,/ из глубины́ серде́чныя взыва́ем:/ я́звы грехо́в и стру́пы страсте́й на́ших исцели́ слеза́ми покая́ния.
Песнь 3
Ирмос: Тебе́, на вода́х/ пове́сившаго всю зе́млю неодержи́мо,/ тварь, ви́девши на ло́бнем ви́сима,/ у́жасом мно́гим содрага́шеся,/ несть свят,// ра́зве Тебе́, Го́споди, взыва́ющи.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
По́двиги мно́гими подвиза́вся, Вениами́не всеблаже́нне,/ восходи́л еси́ от си́лы в си́лу/ и, к мона́шескому чи́ну и са́ну свяще́нному сопричте́н быв,/ служе́ние твое́ усе́рдно соверша́л еси́/ под покро́вом первонача́льников оби́тели Солове́цкия,/ к ни́мже умиле́нною душе́ю моли́твы простира́л еси́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Мно́гих ра́ди доброде́телей и кро́ткаго твоего́ ду́ха, богоблаже́нне Вениами́не,/ нача́льник Си́йския оби́тели поста́влен был еси́, иде́же, Боже́ственным Покро́вом Пресвяты́я Тро́ицы/ и предста́тельством преподо́бнаго Анто́ния, первонача́льника оби́тели сея́, укрепля́емь,/ до́бре потруди́лся еси́,/ путеводя́ ста́до Христо́во ко спасе́нию.
Сла́ва Отцу́ и Сы́ну и Свято́му Ду́ху:
Нестрое́нию во оби́тели Солове́цтей бы́вшу,/ избра́ша тя бра́тия в наста́вника духо́внаго себе,/ ве́дуще тя благонра́вием и послуша́нием укра́шена,/ любо́вию к Бо́гу и бли́жним обдержи́ма/ и му́дрость духо́вную стяжа́вша, Вениами́не достохва́льне.
И ны́не и при́сно и во ве́ки веко́в. Ами́нь.
Богородичен: Обре́тши благода́ть у Сы́на Твоего́ заступа́ти немощны́й род челове́ческий, Богоро́дице,/ неусы́пно назира́еши лю́ди христиа́нския,/ и́ноком наипа́че покрови́тельствуеши,/ я́ко а́нгельскому чи́ну подража́телем,/ Сама́ бо вы́шши а́нгельскаго жи́тельство нам яви́ла еси́.
Седа́лен, глас 5:
Пла́мень о́гненный проше́дше, преподобному́ченицы,/ ве́чнаго поко́я сла́дость обрели́ есте́/ и, по́двиг во Христе́ жи́тельства му́жественне соверши́вше,/ пра́ведною кро́вию блаже́нство ра́йское сниска́ли есте́./ Мо́лим вас, святи́и:/ моли́теся за ны ко Го́споду,/ по́прище жития́ на́шего нам досто́йно проити́,/ стрел вра́жиих избе́гнути/ и ве́чныя поги́бели изба́витися.
Сла́ва, и ны́не, Богородичен:
Засту́пницу Тя и́мамы пред Бо́гом, Пречи́стая Дево,/ не пре́зри раб Твои́х, на предста́тельство Твое́ наде́ющихся,/ моле́ние на́ше приими́ и по́мощь с Небесе́ низпосли́,/ да спасе́ние душ на́ших обря́щем.
Пе́снь 4.
Ирмос: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,// я́ко Всеси́лен.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Повеле́нию Госпо́дню повину́яся,/ крест настоя́тельства оби́тели Солове́цкия, тя возрасти́вшей, со смире́нием прия́л еси́, Вениами́не достоблаже́нне./ Егда́ же си́ла вра́жия безу́мно на Це́рковь Правосла́вную воста́,/ страда́ния, предугото́ванная тебе́, безро́потне восприя́л еси́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
До́брое жи́тельство попра́вше,/ не́цыи от и́нок солове́цких послуша́нию не поревнова́ша/ и, самохоте́нием ме́сто супоста́ту в се́рдце свое́м да́вше,/ скорбь ве́лию оби́тели Солове́цтей и богоизбра́нному Вениами́ну, настоя́телю своему́, сотвори́ша,/ ду́шу свою́ за о́вцы своя́ положи́ти хотя́щему.
Сла́ва Отцу́ и Сы́ну и Свято́му Ду́ху:
Ду́хом в Го́рняя простира́яся,/ до́льними скорбьми́ обремене́н быва́ше, Вениами́не преподо́бне,/ но моли́твою и любо́вию бу́рю мяте́жа посреде́ непокори́вых/ во оби́тели дре́вней укроща́л еси́, о́тче богому́дре,/ ста́до разобще́нное и́ноков во еди́но собира́я/ и Бо́га в Тро́ице Неразде́льнаго о поми́ловании умоля́я.
И ны́не и при́сно и во ве́ки веко́в. Ами́нь.
Богородичен: Мо́лим Тя, Богоро́дице Де́во, вра́жиими злоде́йствы обурева́емии:/ сете́й злоухищре́нных свободи́,/ мучи́тельства страсте́й нас изба́ви,/ мир Бо́жий в ду́ши на́ша водвори́,/ терпе́нием Христо́вым снабдева́ющи.
Пе́снь 5
Ирмос: Богоявле́ния Твоего́, Христе́,/ к нам ми́лостивно бы́вшаго,/ Иса́ия, Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Оте́честву земно́му в чи́не во́инстем че́стно послужи́в, богоблаже́нне Ники́форе,/ во́инству Христо́ву приобщи́тися и еди́ному Бо́гу порабо́тати зело́ возжела́л еси́/ и, во оби́тель Солове́цкую всели́вся,/ досто́йно в чи́не и́ночестем и са́не иере́йстем Го́сподеви послужи́л еси́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Обе́ты и́ноческия усе́рдно исполня́я,/ наста́вника ти Бо́гом да́ннаго Вениами́на любо́вию почита́л еси́, Ники́форе прехва́льне,/ те́мже и, стезе́ю страстоте́рпческою вку́пе ше́ствовав,/ му́ченичества красото́ю с ним украси́лся еси́.
Сла́ва Отцу́ и Сы́ну и Свято́му Ду́ху:
Тве́рдо Христа́ испове́давше/ и напа́сти вра́жия ни во что́же вмени́вше,/ пострада́ти за Того́ сподо́билися есте́, Вениами́не и Ники́форе,/ уничиже́ние от беззако́нных,/ изгна́ние из оби́тели, во юдо́ль муче́ний нечести́выми обраще́нныя,/ труды́ поднево́льныя, поноше́ния и клевету́,/ вся претерпе́ли есте́, преподо́бнии.
И ны́не и при́сно и во ве́ки веко́в. Ами́нь.
Богородичен: Над земле́ю Ру́сскою Покро́в держа́вный распросте́рши,/ не оста́вила еси́ нас от злодея́ний льсти́ваго поги́бнути, Засту́пнице Всеми́лостивая./ Помози́ нам и ны́не ве́ру и́стинную без стра́ха испове́дати/ и Правосла́вия побо́рником бы́ти.
Песнь 6
Ирмос: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию Да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,// ми́лость сию́ оста́вили есте́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Егда́ мрак безбо́жия пости́же зе́млю Ру́сскую/ и Солове́цкую оби́тель в темни́цу обрати́,/ тогда́ многоско́рбная сердца́ ва́ша испо́лнишася боле́зней и скорбе́й,/ я́же и до конца́ му́жественне понесли́ есте́, Христо́вы страстоте́рпцы,/ Про́мысл Бо́жий благи́й во всем разумева́юще.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Не́мощь челове́ческую ве́дуще,/ все упова́ние на Бо́га всеце́ло возложи́ли есте́, преподо́бнии,/ и, со смире́нием и кро́тостию пра́ведное Его́ попуще́ние восприи́мше,/ ве́рность Влады́це и зва́нию вы́шнему досто́йно сохрани́ли есте́./ Не оста́вите у́бо нас, святи́и,/ па́мять ва́шу све́тло почита́ющих.
Сла́ва Отцу́ и Сы́ну и Свято́му Ду́ху:
Преподо́бным отце́м поревнова́вше/ и испове́дником ве́ры, за Христа́ страда́ния с ра́достию прие́мшим, после́довавше,/ соприча́стницы Солове́цким новому́чеником яви́стеся/ и Це́рковь Ру́сскую по́двиги све́тло украси́сте, богому́дрии.
И ны́не и при́сно и во ве́ки веко́в. Ами́нь.
Богородичен: Влады́чице ми́ра, Ма́ти Всепе́тая,/ приими́ серде́чную моли́тву раб Твои́х, во умиле́нии Ти приноси́мую,/ и не лиши́ нас ми́лостиваго Твоего́ заступле́ния,/ но, я́ко Блага́я, спаси́ ду́ши на́ша.
Конда́к, глас 7.
Божéственными страдáнии,/ я́же за Христá претерпе́вше,/ отцы́ всеблажéннии,/ я́ко злáто в горни́ле дýши своя́ во огни́ очи́стили естé/ и во оби́тели гóрния ко Влады́це своемý ны́не пресели́лися есте́./ Сегó рáди прилéжно чтим и ублажáем вас,// преподобномýченицы Вениами́не и Ники́форе.
И́кос:
Благода́тию Госпо́днею на по́двиг испове́днический избра́ннии, Вениами́не и Ники́форе,/ преподо́бием и пра́вдою Бо́гу потруди́лися есте́ во святе́й оби́тели Солове́цтей,/ си́лою же вра́жиею во времена́ безбо́жная от нея́ удале́ннии,/ в моли́тве, и терпе́нии, и тве́рдом упова́нии дни жития́ своего́ провожда́ли есте́./ Смире́нию же кре́стному прилежа́вше,/ ра́достне сла́вили есте́ Го́спода, вся воскреси́вшаго Собо́ю,/ и, страда́льческую смерть прие́мше во дни Святы́я Па́схи,/ красото́ю му́ченическою украси́лися есте́ во Ца́рствии Спа́са на́шего./ Сего́ ра́ди приле́жно чтим и ублажа́ем вас,/ преподобному́ченицы Вениами́не и Ники́форе.
Песнь 7
Ирмос: Неизрече́нное чу́до:/ в пе́щи Изба́вивый преподо́бныя о́троки из пла́мене/ во гро́бе мертв, бездыха́нен полага́ется/ во спасе́ние нас пою́щих:/ Изба́вителю Бо́же,// благослове́н еси́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Я́ко пусты́нницы, во изгна́нии пребыва́ли есте́, Вениами́не и Ники́форе,/ труды́ и моли́твами подвиза́ющеся день и нощь/ и славосло́вие Бо́гу в Тро́ице Единосу́щному и Неразде́льному возсыла́юще:/ Изба́вителю Бо́же, благослове́н еси́.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Ме́сто по́двигов после́дних в де́брех се́верных избра́ли есте́, досточу́днии,/ иде́же, мно́го потруди́вшеся,/ житие́ земно́е му́ченически сконча́ли есте́./ Ны́не Престо́лу Всевы́шняго предстои́те и победоно́сно взыва́ете:/ Изба́вителю Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Земны́я юдо́ли го́рести во мно́жестве позна́вше,/ благ неизрече́нных ны́не наслажда́етеся, Христо́ви страстоте́рпцы,/ ве́рен бо Госпо́дь, обетова́вый Ца́рствие Небе́сное лю́бящим Его́ и вопию́щим:/ Изба́вителю Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Заве́та ве́чнаго Богоизбра́нная Таи́ннице,/ и Ца́рства Христо́ва Всеми́лостивая Врата́рнице!/ Го́спода и Влады́ку веко́в умоли́ о нас немощны́х, озлобле́нием вра́жиим му́чимых,/ Ты бо, Благосе́рдая Ма́ти, Помо́щница те́плая/ и Хода́таица живота́ ве́чнаго христиа́ном при́сно явля́ешися.
Песнь 8
Ирмос: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в вы́шних Живы́й/ и во гроб мал странноприе́млется./ Его́же, о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Четыредеся́тницу святу́ю по́стнически соверши́вше,/ Па́сху Госпо́дню воспева́ли есте́, ду́хом пламене́юще./ Огнь же мучи́тельный, челове́ки зло́бными разжже́нный, му́жественне претерпе́вше,/ в Черто́г украше́нный внидо́сте,/ Христа́ воскре́сша пою́ще и превознося́ще во вся ве́ки.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Па́мять ва́шу пра́зднующе, новому́ченицы святи́и, ра́дуемся и ликовству́ем,/ днесь бо Па́сха ва́ша соверша́ется от земли́ в селе́ния Небе́сная восхо́дом невозбра́нным,/ вы же, я́ко ве́рнии служи́телие Христо́ви,/ насле́дницы благослове́ннии Небе́снаго Оте́чества яви́стеся,/ пою́ще и превознося́ще Го́спода во вся ве́ки.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Ве́рою и тве́рдым испове́данием ве́чнаго блаже́нства достиго́сте, преподо́бнии Вениами́не и Ники́форе,/ сме́ртию бо страда́льческою к Животу́ безсме́ртному преста́вилися есте́/ и кро́вию безви́нною багряни́цу Це́ркве Правосла́вныя украси́ли есте́,/ пою́ще и превознося́ще Го́спода во вся ве́ки.
Сла́ва Отцу́ и Сы́ну и Свято́му Ду́ху:
Тро́ичен: Триипоста́сный Бо́же,/ Сло́вом сотвори́вый вся́ческая и Ду́хом к животу́ призва́вый земна́я и небе́сная!/ Ты челове́ческое естество́ в подо́бие Свое́ созда́л еси́,/ оскверне́нное же грехо́м Кро́вию Христа́ Твоего́ па́ки возста́вил еси́,/ Его́же, о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Послужи́вши Та́йне Бо́жией, челове́ческому разуме́нию непостижи́мей,/ сподо́би нас благода́ти Сы́на Твоего́, Пренепоро́чная,/ не́мощь на́шу укрепи́,/ житие́ уны́лое ми́лостию Твое́ю обогати́/ и ску́дную моли́тву на́шу Ду́ха Свята́го животво́рными дыха́нии раствори́.
Песнь 9
Ирмос: Не рыда́й Мене́, Ма́ти,/ зря́щи во гро́бе,/ Его́же во чре́ве без се́мене зачала́ еси́, Сы́на:/ воста́ну бо и просла́влюся,/ и вознесу́ со сла́вою непреста́нно, я́ко Бог,// ве́рою и любо́вию Тя велича́ющия.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Благода́рною душе́ю сла́вяще Творца́ и Бо́га,/ испове́дником и страстоте́рпцем Христо́вым приобщи́лися есте́, Вениами́не и Ники́форе./ Сердцеве́дец же Госпо́дь страда́льческия ра́ди кончи́ны/ венцы́ му́ченическими украси́ вас./ Те́мже помина́йте нас, ве́рою и любо́вию вас велича́ющих.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Я́коже Вениами́н, еди́н от сыно́в Изра́илевых, юне́йший бе в дому́ отца́ своего́,/ та́ко и ты, Вениами́не преподобному́чениче, после́дний нача́льник в Солове́цтей оби́тели был еси́./ И, я́коже Вениами́н, священнонача́льник Петрогра́дский,/ ты и́менем Христо́вым злоде́йства вра́жия препобеди́л еси́./ Те́мже помина́й нас, ве́рою и любо́вию тя велича́ющих.
Сла́ва Отцу́ и Сы́ну и Свято́му Ду́ху:
Ча́шу страда́ний му́жественне испи́вше,/ венцы́ неувяда́емыми украси́лися есте́ во Ца́рствии Небе́снем, досточти́мии Вениами́не и Ники́форе./ Те́мже моли́те о оби́тели ва́шей Солове́цтей,/ да ми́р и любо́вь Госпо́дня во ве́ки с не́ю пребыва́ет,/ и нас помина́йте, ве́рою и любо́вию вас велича́ющих.
И ны́не и при́сно и во ве́ки веко́в. Ами́нь.
Богородичен: Ца́рства Бо́жия би́сер драгоце́нен/ да возсия́ет в душа́х на́ших Твои́ми мольба́ми,/ Пречи́стая Де́во, Нача́льника жи́зни ве́чныя Ма́ти./ Помози́ нам, Блага́я,/ да, терпе́нием ду́ши стяжа́вше,/ воскресе́ния све́тлую ра́дость невозвра́тно Тобо́ю обря́щем.
Свети́лен, глас 3:
Све́том Христо́вым просвеща́еми,/ мрак беззако́ния попра́ли есте́, преподо́бнии,/ и испове́данием Трисо́лнечнаго Све́та тьму а́дову посрами́ли есте́,/ муче́ния же от сыно́в поги́бели прие́мше,/ безпеча́льное жи́тельство насле́довали есте́./ Те́мже, све́тлости святы́х прича́стницы яви́вшеся,/ ми́ру просвеще́ние испроси́те/ и душа́м на́шим ве́лию ми́лость.
Сла́ва, и ны́не, Богородичен:
Свет Живота́ ве́чнаго возсия́ нам Тобо́ю, Благода́тная Мари́е,/ пло́тию бо родила́ еси́ Жизнода́вца Бо́га,/ смерть попра́вшаго, мир Собо́ю обнови́вшаго/ и всем ве́рным Воскресе́ние да́рующаго.
Моли́тва
O досточýдная двóице отéц преподóбных, новомýчеников и страстотéрпцев Соловéцких, богомýдре Вениами́не начáльниче монáхов и вéрный егó помóщниче Ники́форе! Вы, благонрáвием и твéрдою вéрою благодáть у Бóга сниска́вше, и́ноком óбраз и́стиннаго служéния яви́ли есте́, наставля́юще их в путéх прáведных неуклóнно ходи́ти. Си́лою Бóжиею и вéлиею любóвию вáшею нестроéния в житии́ брáтстем укроща́юще, в ми́ре и благочéстии святýю оби́тель Соловéцкую до концá соблюдáли естé. Егдá же во дни гонéний лю́тых на Цéрковь Бóжию мрак беззакóний нáйде на свято́е ме́сто сие́, вы, стрáха не убоявшеся, в пóдвизе исповéдания вéры Христóвы свéтло просия́ли естé. В земли́ Архáнгельстей кончи́ну мýченическую во изгнáнии приéмше, в рáдость вéчную Цáрствия Небéснаго невозбрáнно возшли́ есте́. Те́мже мóлим вас, уго́дницы Христо́вы: сохрани́те оби́тель Солове́цкую невреждéнну от враг ви́димых и неви́димых, нам же помози́те пóдвигом дóбрым подвизáтися и дни своя́ на земли́ в ми́ре и покая́нии скончáти, да сподо́бимся насле́дницы бы́ти Ца́рствия Небе́снаго, иде́же вку́пе с ва́ми досто́йни яви́мся прославля́ти в Тро́ице сла́вимаго Бо́га, Отца́, и Сы́на, и Свята́го Ду́ха. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобномученикам Вениамину архимандриту и Никифору иеромонаху Соловецким Преподобномученикам Вениамину архимандриту и Никифору иеромонаху Соловецким](img_b/029.jpg)