Каноны. 15 апреля.
Канон преподобному Титу чудотворцу, иеромонаху.
![Преподобному Титу чудотворцу Преподобному Титу чудотворцу](img_i/023.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 8:
В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Ти́те, дух твой.
Кано́н. Гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Преподобне отче Тите, моли́ Бо́га о нас.
Всего́ мя, страстьми́ плотски́ми лю́те угле́бша и истле́вша сластьми́, сокро́вище сы́й безстра́стия, Ти́те, моли́твами твои́ми спаси́.
Припев: Преподобне отче Тите, моли́ Бо́га о нас.
Боже́ственное Ду́ха избра́ние, Бо́гу прине́слся еси́ от пеле́н ма́терних и Неискусому́жныя Богоро́дицы таи́нник и служи́тель бы́л еси́.
Припев: Преподобне отче Тите, моли́ Бо́га о нас.
Яко воздержа́ния сла́дость сса́в, отри́нул еси́ го́ресть страсте́й, отону́дуже па́че ме́да и со́та, о́тче, наслажда́еши ду́ши на́ша.
Сла́ва Отцу́ и Сы́ну и Свято́му Ду́ху:
Но́ваго я́ко Па́влова тя́ ученика́, Ти́те, восхваля́ем: о́наго бо ревни́тель подвиго́в показа́лся еси́, богоблаже́нне, и с ни́м венцы́ восприя́л еси́.
И ны́не и при́сно и во ве́ки веко́в. Ами́нь.
Богородичен: Сло́во Безма́терне из Отца́, безо́тчее сие́ в после́дняя богому́жно родила́ еси́, еди́на Богома́ти, я́ко превы́шши всея́ тва́ри.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.
Припев: Преподобне отче Тите, моли́ Бо́га о нас.
Миро освяще́ния от по́стнических, преподо́бне, арома́т, весьма́ сложи́лся еси́ в воню́ благоуха́ния Бо́гу.
Припев: Преподобне отче Тите, моли́ Бо́га о нас.
Ору́жие — воздержа́ние и щи́т — моли́тву, преподо́бне, име́я при́сно, нача́ла тмы́, обличи́в, посрами́л еси́.
Сла́ва Отцу́ и Сы́ну и Свято́му Ду́ху:
В зако́нех поще́ния поуча́яся, стра́сти погрузи́л еси́, я́коже други́я фараони́ты, пото́ком сле́з твои́х.
И ны́не и при́сно и во ве́ки веко́в. Ами́нь.
Богородичен: Ми́лостива бы́ти мне́ молю́ при́сно, Влады́чице, Твои́ми моли́твами из Тебе́ Рожде́ннаго, в де́нь Су́дный.
Седа́лен, гла́с 1.
Пости́вся на земли́, я́ко безпло́тен, Ти́те, умори́л еси́ врага́ и низложи́л еси́ вку́пе собо́р ересе́й правосла́вными твои́ми уче́нии. Те́мже, дне́сь всесвяту́ю твою́ па́мять пра́зднующе, ра́достно воспева́ем тебе́ Возвели́чившаго.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Упова́ние христиа́н, Пресвята́я Де́во, Его́же родила́ еси́, Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Преподобне отче Тите, моли́ Бо́га о нас.
Гное́ние, блаже́нне, грехо́вное все́ оплева́л еси́ и стрело́ю воздержа́ния де́монския полки́ уязви́л еси́.
Припев: Преподобне отче Тите, моли́ Бо́га о нас.
Чистоты́ жела́нием ду́шу уязви́в, те́пле после́довал еси́ Христу́ и вше́л еси́ в черто́г сла́вы, всеблаже́нне.
Припев: Преподобне отче Тите, моли́ Бо́га о нас.
Яко цветни́к благоуха́ннейший и доброде́телей ра́й одушевле́н, воздержа́нием процве́л еси́, и́мже вся́ пита́еши, честву́ющия тя́.
Сла́ва Отцу́ и Сы́ну и Свято́му Ду́ху:
Законополо́жника воздержа́ния и неле́стный о́браз кро́тости, я́ко Моисе́я тя́ и Дави́да, вои́стинну стяжа́вше вси́, о́тче, ублажа́ем.
И ны́не и при́сно и во ве́ки веко́в. Ами́нь.
Богородичен: Херуви́м превы́шшу Тя́ и серафи́м, пое́м, Всенепоро́чная, Его́же бо трепе́щут вся́ческая, пло́тию Влады́ку носи́ла еси́ на объя́тиих Твои́х.
Пе́снь 5
Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.
Припев: Преподобне отче Тите, моли́ Бо́га о нас.
Угаси́в вся́ стра́сти росо́ю подвиго́в твои́х, Ти́те блаже́нне, бога́тно вже́г огне́м любве́ и ве́ры воздержа́ния свети́льник, и просвеще́ние безстра́стия, и дне́ сы́н бы́л еси́.
Припев: Преподобне отче Тите, моли́ Бо́га о нас.
Ве́ры гро́зд боже́ственным возде́ланием, о́тче, воспита́л еси́, и в точи́ла вложи́л еси́, и изгне́л еси́ боле́зньми воздержа́ния и, ча́шу испо́лнив духо́вную поще́ния, весели́ши сердца́ ста́да твоего́.
Сла́ва Отцу́ и Сы́ну и Свято́му Ду́ху:
Претерпе́в до́блественне прило́ги и ра́ны неви́димых вра́г, показа́лся еси́ сто́лп терпе́ния, утвержда́я ста́до твое́ па́лицею боже́ственною на па́житех воздержа́ния и на воде́ воспита́я, блаже́нне.
И ны́не и при́сно и во ве́ки веко́в. Ами́нь.
Богородичен: Яко приста́нище Тя́ вси́, сте́ну, и утвержде́ние, и предста́тельницу на́м, и к Ца́рствию непосты́дный вхо́д иму́ще, наде́жди на́шея не отпа́сти, мо́лимся, ма́терними Твои́ми мольба́ми, Всенепоро́чная.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Преподобне отче Тите, моли́ Бо́га о нас.
Разруши́в страсте́й мглу́ и мра́чную тму́, де́нь восто́ка и све́т во стезя́х твои́х возсия́л еси́, преподо́бне, от мно́гих по́двиг и бе́д, су́щих по ве́ре.
Припев: Преподобне отче Тите, моли́ Бо́га о нас.
Весьма́ изступи́л еси́ к Бо́гу жела́нием воздержа́ния, ми́р оста́вив, и миродержа́теля восхи́тил еси́, богоприя́тне, преми́рнаго Ца́рства наслажде́ние.
Припев: Преподобне отче Тите, моли́ Бо́га о нас.
Собра́л еси́ в души́ боже́ственное бога́тство Ду́ха: непоро́чную моли́тву, чистоты́ целому́дрие, бде́ние спротяже́нное, воздержа́ния боле́зни, и́миже до́м позна́лся еси́ Бо́га.
Сла́ва Отцу́ и Сы́ну и Свято́му Ду́ху:
Ве́щи до́льния, му́дре, прете́кл еси́ ху́дость, невеще́ственною же моли́твою у́м впери́л еси́ и вы́шняго прия́тия насле́дник яви́лся еси́ жития́ соверше́нством.
И ны́не и при́сно и во ве́ки веко́в. Ами́нь.
Богородичен: Зачала́ еси́ вои́стинну Боже́ственное Сло́во во утро́бе Твое́й и Сие́ преесте́ственно, Всенепоро́чная, родила́ еси́, Его́же моли́твами уми́лостиви от бе́д вся́ изба́вити рабы́ Твоя́.
Конда́к, гла́с 4.
Жития́ молву́ оста́вил еси́ и ти́хо, все́ житие́ твое́ пожи́в, му́дре, к Бо́гу преше́л еси́, чудоно́сне о́тче на́ш, Ти́те преподо́бне.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Преподобне отче Тите, моли́ Бо́га о нас.
Не оскверни́вся грехми́, река́ воздержа́ния, о́тче, показа́лся еси́ на́м, стра́сти потопля́я и скве́рну очища́я вопию́щих ве́рно: оте́ц на́ших Бо́же, благослове́н еси́.
Припев: Преподобне отче Тите, моли́ Бо́га о нас.
Ны́не с невеще́ственными ли́ки бесе́дуя, богоблаже́нне, и све́тлости вы́шняго гоще́ния непреста́нно наслажда́яся, уще́дри пою́щия: оте́ц на́ших Бо́же, благослове́н еси́.
Припев: Преподобне отче Тите, моли́ Бо́га о нас.
Во испове́дании ве́ры, о́тче, пре́был еси́ невра́щен, Христа́ бо вообража́я пло́тию и напису́я, покланя́ешися и зове́ши: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Иису́са Влады́ки на телеси́, о́тче, нося́ я́звы, и мене́, уя́звеннаго стрело́ю велиа́ра, уврачу́й, зову́ща: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Па́че естества́ и сло́ва Влады́ку все́х чревоноси́ла еси́ и пита́еши от сосе́ц Твои́х, все́м благовре́менную уготовля́юща трапе́зу, Его́же приле́жно, Чи́стая, о на́с моли́.
Пе́снь 8.
Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.
Припев: Преподобне отче Тите, моли́ Бо́га о нас.
Сто́лп тя́ вдохнове́н я́ко вои́стинну, и о́браз воздержа́ния, о́тче, стяжа́вше, вси́ твою́ па́мять честву́ем по до́лгу.
Припев: Преподобне отче Тите, моли́ Бо́га о нас.
Ли́к ра́дуется мона́шествующих, и лику́ет преподо́бных собо́р и пра́ведных: вене́ц бо досто́йно с си́ми прия́л еси́.
Припев: Преподобне отче Тите, моли́ Бо́га о нас.
Укра́шен доброде́тельми, в черто́зе неизрече́нныя сла́вы восклони́лся еси́, пе́снь воспева́я Христу́ во ве́ки вся́.
Сла́ва Отцу́ и Сы́ну и Свято́му Ду́ху:
Оде́ждею свяще́нною оде́явся и соверша́я же́ртвы безкро́вныя, же́ртва прине́слся еси́ Бо́гу во ве́ки.
И ны́не и при́сно и во ве́ки веко́в. Ами́нь.
Богородичен: Во утро́бе Твое́й су́щаго пре́жде Тебе́ заче́нши, Богома́ти Чи́стая Де́во, родила́ еси́ несказа́нно Бо́га и Царя́.
Песнь 9
Ирмос: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.
Припев: Преподобне отче Тите, моли́ Бо́га о нас.
Вра́чь неду́гующих во страсте́х от Бо́га показа́лся еси́, потреби́тель же, блаже́нне, и отгони́тель лука́вых де́монов, те́мже тя́ блажи́м.
Припев: Преподобне отче Тите, моли́ Бо́га о нас.
Зе́млю я́ко тле́ния жили́ще оста́вил еси́, о́тче, и в зе́млю всели́лся еси́ кро́тких, и с ни́ми ра́дуешися, боже́ственныя наслажда́яся сла́дости.
Припев: Преподобне отче Тите, моли́ Бо́га о нас.
Уста́в непоро́чен ве́ры и воздержа́ния о́браз иму́ще по́двиги твоя́, непреста́нно Зижди́теля в пе́снех велича́ем.
Сла́ва Отцу́ и Сы́ну и Свято́му Ду́ху:
Дне́сь де́нь пра́здничный, созыва́ет бо Ти́т мона́шествующих стада́ на ликова́ние духо́вное и чрежде́ние и пи́щу нетле́нныя жи́зни.
И ны́не и при́сно и во ве́ки веко́в. Ами́нь.
Богородичен: В Тя́ всели́выйся, Всенепоро́чная, роди́ся, Иже пе́рвее родонача́льным злонра́вно запе́нша, человекоуби́йцу низложи́в, и вся́ ны́ спасе́.
Молитва
О свяще́нная главо́, преподо́бне о́тче, преблаже́нне а́вво Ти́те, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Титу чудотворцу Преподобному Титу чудотворцу](img_b/023.jpg)