Каноны. 14 апреля.

Канон преподобному Варсонофию Оптинскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глaс 4. (Творе́ние Васи́лия иеромона́ха:)

Во́ине до́блественный и изря́дный,/ све́том открове́ния, я́ко Па́вел, озаре́нный,/ вся во уме́ты Христа́ ра́ди вмени́л еси́,/ и́ноческим по́двигом подвиза́лся еси́,/ тече́ние сконча́в и ве́ру соблю́д,/ те́мже зове́м ти:/ спаса́й нас моли́твами твои́ми,// преподо́бне Варсоно́фие, о́тче наш.

Ин тропа́рь, глас 3:

Красото́ Це́ркве Ру́сския,/ утвержде́ние ста́рчества О́птинскаго,/ и́ноческих заве́тов блюсти́телю,/ оружено́сче Госпо́день ве́рный,/ преподо́бне о́тче Варсоно́фие,/ мече́м моли́твы зми́я победи́вый,/ вы́шния по́чести о Христе́ дости́гл еси́,/ те́мже моли́ся Тому́:/ Отече́ству на враги́ побе́ду дарова́ти// и спасти́ ду́ши на́ша.

Кано́н преподо́бнаго, глас 4.

Песнь 1

Ирмос: Триста́ты кре́пкия,/ Рожде́йся от Де́вы,/ безстра́стия во глубине́,/ души́ трича́стное потопи́, молю́ся,/ да Тебе́ я́ко в тимпа́не,/ во умерщвле́нии телесе́// побе́дное воспою́ пе́ние.

Припев: Преподобне отче Варсонофие, моли Бога о нас!

Смиренному́дрия венце́м да украси́тся во́ин Христо́в, присносла́вный Варсоно́фий, Боже́ственным смире́нием уязви́вый прего́рдых бесо́в, и мра́чная собра́ния их разгна́вый биче́м моли́твенным: тому́ побе́дное ны́не воспои́м пе́ние.

Припев: Преподобне отче Варсонофие, моли Бога о нас!

Триста́ты кре́пкия страсте́й, о́тче доблему́дре Варсоно́фие, потопи́л еси́ вода́ми сле́зными, и разжже́нныя стре́лы врага́ угаси́л еси́, во умерщвле́нии телесе́ своего́ противля́яся сопроти́внаго прираже́ниям.

Сла́ва Отцу́ и Сы́ну и Свято́му Ду́ху:

Ра́достно во след Царя́ Христа́ поте́к, а́нгельскому во́инству поревнова́л еси́, и доспе́хи во́ина земна́го, я́ко вся мирска́я, с себе́ совле́к, и в безстра́стие восхоте́в облещи́ся, Варсоно́фие, и́ноческому полку́ сочета́лся еси́.

И ны́не и при́сно и во ве́ки веко́в. Ами́нь.

Богоро́дичен: А́нгельское во́инство Тебе́ слу́жит, и Херуви́м и Серафи́м Тя сла́вят мно́жества, чистоте́ Твое́й дивя́тся Престо́ли, Си́лы же и Вла́сти пропове́дуют Твою́ держа́ву, Влады́чице, я́ко родила́ еси́ всех Влады́ку и Спа́са.

Песнь 3

Ирмос: Утверди́ся се́рдце мое́ в Го́споде,/ даю́щем моли́тву моля́щемуся,/ я́ко лук си́льных изнемо́же,// и немощству́ющии препоя́сашася си́лою.

Припев: Преподобне отче Варсонофие, моли Бога о нас!

Треволне́ния ми́ра избе́г, скит О́птинский избра́л еси́, Варсоно́фие, я́ко при́стань безмо́лвную, ста́рцем Амвро́сием при́званный, и ста́рцу Анато́лию быв ча́до послуша́ния, те́мже и утверди́ся се́рдце твое́ во Го́споде.

Припев: Преподобне отче Варсонофие, моли Бога о нас!

Исполи́ны страсте́й и бесо́в полцы́ изнемого́ша, моли́твою бо препоя́сався и и́менем Госпо́дним вооружи́вся, тех побора́л еси́, Варсоно́фие во́ине до́блий, Го́спода на по́мощь призыва́я.

Сла́ва Отцу́ и Сы́ну и Свято́му Ду́ху:

Лука́вствие врага́ изобличи́л еси́, святооте́ческий име́я свети́льник разсужде́ния, в се́рдце же мир Христо́в: те́мже вся стре́лы лука́ваго невре́дны тебе́ сотвори́шася, богому́дре, и лук того́ сокруши́ся.

И ны́не и при́сно и во ве́ки веко́в. Ами́нь.

Богоро́дичен: А́ще и во гресе́х есмь, и уста́ и́мам скве́рная, но не премолчу́, Пречи́стая, благодея́ния Твоя́ безме́рная пе́ти, Тобо́ю бо утвержда́ется се́рдце мое́ во Го́споде.

Седа́лен, глас 5:

Заре́ю бде́ний твои́х просвети́л еси́ но́щи, я́коже дни, и свя́то соверши́в житие́ твое́, со святы́ми ны́не живе́ши, освяще́ние посыла́я тя блажа́щим, преподо́бне о́тче Варсоно́фие.

Сла́ва, и ны́не, Богоро́дичен:

Де́во Пречи́стая, Покро́в бу́ди на Тя упова́ющим, от разли́чных напа́стей, обстоя́ний и бед лю́тых свобожда́ющи и моля́щи Сы́на Твоего́ спасти́ся душа́м на́шим.

Песнь 4

Ирмос: Вознесе́на Тя ви́девши Це́рковь на кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Припев: Преподобне отче Варсонофие, моли Бога о нас!

Терпе́нием, я́ко скала́, пребы́л еси́, ю́же бу́ря не поколеба́ бесо́вская, утверди́в бо себе́ сама́го на ка́мени ве́ры, вы́ну ко Христу́ взыва́л еси́, о́тче Варсоно́фие: сла́ва си́ле Твое́й, Го́споди.

Припев: Преподобне отче Варсонофие, моли Бога о нас!

Анато́лия ста́рца учениче́, преподо́бне Варсоно́фие, О́птинских оте́ц благода́тный прее́мниче, иску́с сугу́б проше́д и в ме́ру тех дости́г, ста́рцем по ду́ху насле́довал еси́, взыва́я: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

О́птина пу́стынь и скит, и вся ча́да твоя́, тя ви́девше, я́ко сораспя́лся еси́ Христу́, послуша́ние понесы́й до сме́рти, да соде́лаешися соверше́н пред кончи́ною, вку́пе взыва́ху с тобо́ю, преподо́бне: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Пречи́стая и всекра́сная Де́во Мари́е, Со́лнце Пра́ведное нам возсия́вшая, И́же свет подае́т и ра́дость ми́ру, досто́йно Тя сла́вим, Богора́дованная.

Песнь 5

Ирмос: Ре́вность прии́мет лю́ди ненака́занныя,/ законопресту́пныя евре́и,/ и огнь поя́ст супоста́ты Твоя́,/ я́ко Тя распя́таго,// лестца́ именова́ша.

Припев: Преподобне отче Варсонофие, моли Бога о нас!

Твои́м доброде́телем диви́шася А́нгели, лю́дие же ненака́заннии тя льсти́вым именова́ху, оба́че ты, преподо́бне Варсоно́фие, не лю́ди, но грехи́ ненави́девый, то́кмо люби́ти и добро́ твори́ти призыва́л еси́.

Припев: Преподобне отче Варсонофие, моли Бога о нас!

И́стинный послу́шник быв, Варсоно́фие, и па́стырь до́блий яви́лся еси́, моли́твы по́двиг от ста́рца твоего́ унасле́довал еси́, да лю́ди Бо́жия вои́стину наста́виши, и от огня́ засту́пиши, льсти́вым враго́м разжже́ннаго.

Сла́ва Отцу́ и Сы́ну и Свято́му Ду́ху:

Назна́менуй нас кресто́м честны́м, той бо я́ко жезл восприя́л еси́ на по́прищи земне́м, Христа́ и дре́вних преподо́бных в моли́твах призыва́я, и не посра́млен был еси́, и́мже и по́прище твое́ духо́вное освяти́ся.

И ны́не и при́сно и во ве́ки веко́в. Ами́нь.

Богоро́дичен: Свяще́нную па́мять во́ина Твоего́, и́ноческое ополче́ние ко бра́ни подвиза́ет, Влады́чице: те́мже ра́дуйся, Взбра́нная Воево́до на́ша, Тебе́ зове́м, Де́во Мари́е, Богоблаже́нная.

Песнь 6

Ирмос: В ки́те, Христе́, тридне́вновав Ио́на,/ прописа́ Тя Безсме́ртнаго,/ я́ко ме́ртва во́лею,// в се́рдце земне́м тридне́вновавша.

Припев: Преподобне отче Варсонофие, моли Бога о нас!

Красоту́ и благоле́пие во всем возлюби́вый, па́че же возлюби́л еси́ красоту́ духо́вную, и по́двигом кре́стным ду́шу твою́ преобрази́л еси́, я́ко сокрове́нный се́рдца челове́к в тебе́ яви́ся, ле́потою Ду́ха Свята́го укра́шенный.

Припев: Преподобне отче Варсонофие, моли Бога о нас!

А́ще и не млад прише́л еси́ подвиза́тися, оба́че младе́нчески иска́л еси́ заступле́ния, Варсоно́фие, и обре́л еси́ ста́рцев о́пытных, скрыв себе́ от ми́ра в скиту́, безмо́лвием наслажда́яся, да обновле́н изы́деши к но́вому житию́.

Сла́ва Отцу́ и Сы́ну и Свято́му Ду́ху:

Го́рняя му́дрствуя при́сно, и́стинный мудре́ц яви́лся еси́, возлюби́вый Христа́, Прему́дрость И́стинную: те́мже мно́зи челове́цы, Бо́га и́щущии, преле́стная мудрова́ния тобо́ю оста́виша и во́лю Бо́жию твори́ти научи́шася.

И ны́не и при́сно и во ве́ки веко́в. Ами́нь.

Богоро́дичен: О́птинский град соблюди́, Пречи́стая, и́же созида́шеся ста́рцы богому́дрыми, и утверди́ свяще́нныя хра́мы Твоя́, Богоблагода́тная, да пропове́дуется ми́ру сла́ва Бо́жия.

Конда́к, глас 4.

Яви́лся еси́ ста́рчества благочести́ваго столп о́гненный,/ любве́ Ева́нгельския сия́ние,/ проро́чествуя, назида́я и утеша́я,/ подая́ челове́ком от грехо́в врачева́ние,// преподо́бне Варсоно́фие, о́тче наш.

И́кос:

Возвести́те нам, А́нгели Бо́жии, тишину́ моли́тв скита́ О́птинскаго храня́щии: ки́их воздыха́ний ста́рческих слы́шатели бы́сте, коли́ко исцеле́ний и благода́рных слез стра́ждущих ви́десте? Жития́ бо и по́двига преподо́бных оте́ц бы́сте свиде́тели, от ни́хже еди́наго ны́не с ва́ми ублажа́юще, си́це рцем: ра́дуйся, любве́ Ева́нгельския сия́ние, преподо́бне Варсоно́фие, о́тче наш.

Песнь 7

Ирмос: Спасы́й во огни́ авраа́мския Твоя́ о́троки,/ и халде́и уби́в,/ я́же пра́вда пра́ведно уловля́ше,/ препе́тый Го́споди// Бо́же оте́ц на́ших, благослове́н еси́.

Припев: Преподобне отче Варсонофие, моли Бога о нас!

В восто́чныя страны́ тече́ние соверши́л еси́, Варсоно́фие, и светоно́сных слове́с твои́х та́мо возсия́ша лучи́, во́ини же, Та́йнам Христо́вым прича́стнии, благода́рне взыва́ху: Бо́же оте́ц на́ших, благослове́н еси́.

Припев: Преподобне отче Варсонофие, моли Бога о нас!

Е́же и́ноческия уста́вы дре́вних отце́в соблюда́я, мона́шескаго жития́ взыску́ющым наста́вник был еси́, оба́че и архиере́и к тебе́ притека́ху, богому́дре, и тобо́ю наставля́еми, взыва́ху: Бо́же оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

Не на си́лу свою́ упова́л еси́, о́тче, а́ще и иску́сен во́ин быв, оба́че ве́дый кова́рство вра́жие, я́ко о́троцы во огни́ к Бо́гу взыва́л еси́: ны́не помози́ нам, Спа́се, разори́ халде́йское нече́стие, Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Цевни́це Дави́дова, с на́ми воспо́й Богоневе́стную дщерь Изра́ильскую, и язы́ки пригласи́ воспе́ти Той: Емману́илева Ма́ти, благослове́нна еси́, я́ко откры́ Госпо́дь Пра́вду Свою́.

Песнь 8

Ирмос: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Припев: Преподобне отче Варсонофие, моли Бога о нас!

Ева́нгельски ду́шу твою́ за о́вцы положи́ти хотя́, на крест послуша́ния возше́л еси́, доблему́дре Варсоно́фие, о́браз я́ве в себе́ предначерта́в, па́стыря и а́гнца, Христу́ Пастыренача́льнику подо́бяся.

Припев: Преподобне отче Варсонофие, моли Бога о нас!

Ми́ра вели́кое смяте́ние предре́кл еси́, о гоне́нии Це́ркве Бо́жия я́ве предуказа́в, и преда́ния и́ноческая призыва́л еси́ храни́ти, вра́жию бо си́лу победи́т си́ла Бо́жия, те́мже наставля́л еси́, Варсоно́фие: благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Утвержда́я на стезя́х спаси́тельных ве́рныя, и́же притека́ху к тебе́, Варсоно́фие о́тче, ско́рби претерпе́л еси́ от лжебра́тии, оба́че доброде́телию препоя́сався, смире́нно взыва́л еси́: благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Высока́, Богоро́дице, та́йна, я́ко из утро́бы Твоея́ Со́лнце яви́ся в мир незаходи́мое, и лучи́ де́вства непостижи́маго осия́ша челове́ческое естество́, те́мже, благоче́стия рачи́тели, благослови́те Де́ву и Ма́терь Го́спода.

Песнь 9

Ирмос: Бог Госпо́дь, и яви́ся нам,/ соста́вите пра́здник,/ и веселя́щеся,/ прииди́те возвели́чим Христа́,/ с ва́иями и ве́твьми, пе́сньми зову́ще:// благослове́н Гряды́й во и́мя Го́спода Спа́са на́шего.

Припев: Преподобне отче Варсонофие, моли Бога о нас!

Я́ко зла́то искуше́но во огни́ скорбе́й, чист яви́лся еси́ Влады́це твое́му, Варсоно́фие, и я́ко ка́мень многоце́нный, огране́н руко́ю иску́сною, в диади́ме О́птинстей укрепле́н, ны́не сия́еши в пренебе́сней сокро́вищнице Го́спода Спа́са на́шего.

Припев: Преподобне отче Варсонофие, моли Бога о нас!

Звезда́ еси́, о́тче, О́птинская, путеводя́щая в го́рний Иерусали́м: а́ще и тьма накры́ет нас в стране́ дале́че, но на тебе́ взира́юще, па́ки поспеши́м ко Отцу́, да во вре́мя свое́ веселя́щеся вни́дем в дом Го́спода Спа́са на́шего.

Сла́ва Отцу́ и Сы́ну и Свято́му Ду́ху:

Е́же от Христа́ прия́л еси́ дарова́ние, преподо́бне, зна́мения твори́ти и чудеса́, я́ко глухо́му и немо́му о́троку слух и уста́ отве́рзл еси́: те́мже и ду́ши на́ша исцели́, к целому́дрию приводя́ па́мять твою́ чту́щих и велича́ющих Го́спода Спа́са на́шего.

И ны́не и при́сно и во ве́ки веко́в. Ами́нь.

Богоро́дичен: Младе́нца Боже́ственнаго ро́ждши, во объя́тиях Того́ носи́ла еси́, и от сосцу́ пита́ла еси́, Богоро́дице, со А́нгелы у я́слей воспевающи: сла́ва в вы́шних Бо́гу, возвели́чившему Де́ву, я́ко Ма́терь Го́спода Спа́са на́шего.

Свети́лен.

Не́бо звезда́ми украси́вый, я́ко Бог, и зе́млю на́шу любо́вию ста́рцев О́птинских озари́вый, Соде́телю всех, пою́щия Тя спаса́й.

Сла́ва: Победоно́сно светонося́й свети́льник разсужде́ния, озари́л еси́ и́ноком путь спаси́тельный, наста́ви и нас гре́шных, о́тче Варсоно́фие, да ча́да све́та нарече́мся.

И ны́не, Богоро́дичен: Сла́досте А́нгелов, скорбя́щих ра́досте, христиа́н Предста́тельнице, Де́во Ма́ти Госпо́дня, заступи́ нас, и изба́ви ве́чных мук.

Моли́тва

О преподо́бне и богоно́сне о́тче Варсоно́фие, ста́рче О́птинский, вседе́тельныя любве́ Бо́га Отца́ Безнача́льнаго честно́е зерца́ло! Кре́стныя любве́ Сы́на Бо́жия смире́нный подража́телю, дарода́тельныя любве́ Бо́га Ду́ха Свята́го сосу́де избра́нный! Моли́ у́бо, о́тче, о нас, под кров моли́тв твои́х прибега́ющих, да огне́м любве́ Бо́жия к покая́нию просвети́мся, и дух теплохла́дности, малоду́шия и лицеме́рия от душ на́ших изве́ргше, на де́лание за́поведей Его́ до ве́чера жи́зни на́шея устреми́мся: плоды́ же покая́ния поне́ на ста́рость прине́сше, да вни́дем в ра́дость Го́спода на́шего, иде́же ты в незаходи́мей сия́еши сла́ве, прославля́я Соде́теля и Соверши́теля вся́ческих Бо́га, в Тро́ице покланя́емаго во ве́ки веко́в. Ами́нь.