Каноны. 14 апреля.

Канон мученику Авраамию Болгарскому, Владимирскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Дне́сь, благове́рнии лю́дие, соше́дшеся,/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жию,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т/ и ны́не предстои́т Ему́/ и мо́лится о гра́де сем/ и о всех нас, чту́щих па́мять его́.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Припев: Святый мучениче Авраа́мие, моли́ Бо́га о нас.

Неисче́тне в ми́лости, Христе́ Спа́се ми́ра,/ вразуми́ нас, недосто́йных пра́зднственно соверши́ти па́мять страда́льца Твоего́./ Ты же, страстоте́рпче, пода́ждь нам ра́зум чист вся жите́йская презре́ти/ и еди́наго на потре́бу спасе́ния иска́ти.

Припев: Святый мучениче Авраа́мие, моли́ Бо́га о нас.

Преве́чный Бог дарова́ тебе́ си́лу/ вра́жия возноше́ния сокруши́ти и вся му́ки претерпе́ти,/ ты же нам, гре́шным, пода́ждь ра́зум похва́льная тебе́ принести́/ и моли́ся за всех, тя восхваля́ющих.

Сла́ва Отцу́ и Сы́ну и Свято́му Ду́ху:

Богому́дре страстоте́рпче Христо́в Авраа́мие,/ не возгнуша́йся нас, греха́ми оскверне́нных,/ и не отри́ни сего́ тебе́ от нас ма́лаго хвале́ния,/ но приими́ е и о всех, воспева́ющих тя, Го́споду моли́ся,/ да вси па́мять твою́, ра́дующеся, пра́зднуем.

И ны́не и при́сно и во ве́ки веко́в. Ами́нь.

Богородичен: Яви́ милосе́рдие Твое́, Госпоже́ Пречи́стая, на ны недосто́йныя,/ я́ко к Тебе́ прибега́ем с пла́чем серде́чным и вопие́м:/ поми́луй нас, Еди́на всех гре́шных спасе́ние.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Припев: Святый мучениче Авраа́мие, моли́ Бо́га о нас.

Наста́ честна́я па́мять твоя́, страстоте́рпче Авраа́мие,/ в ней же, лику́юще, воспева́ем тя и лобыза́ем честны́я мо́щи твоя́,/ вся́ких дарова́ний духо́вных нас сподобля́ющия.

Припев: Святый мучениче Авраа́мие, моли́ Бо́га о нас.

От честны́х моще́й твои́х мно́гое исцеле́ние источа́еши, му́чениче,/ и град, в не́мже храни́тся нетле́нное те́ло твое́,/ от вся́ких бед покрыва́еши,/ сего́ ра́ди любо́вию па́мять твою́, страстоте́рпче, пра́зднуем.

Сла́ва Отцу́ и Сы́ну и Свято́му Ду́ху:

Несу́щий мо́щи твоя́ от Бо́лгарския страны́ во град Влади́мир/ не зна́яху тяготы́ ни но́щию, ни днем./ Мы же ны́не, точи́ло о́крест ра́ки твое́й стоя́ще, мо́лим тя:/ сохраня́й чту́щия па́мять твою́ от вся́ких бед.

И ны́не и при́сно и во ве́ки веко́в. Ами́нь.

Богородичен: Су́ще во гресе́х мно́зех, к Тебе́ вопие́м, Всепречи́стая:/ очи́сти ны Твои́м милосе́рдием, да не поги́бнем до конца́,/ Ты бо всех скверн Очисти́теля родила́ еси́.

Ин конда́к, глас 3:

Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник/ и уча́стник Бо́жия благода́ти.

Седа́лен, гла́с 3.

Дне́сь све́тло пра́зднуется па́мять твоя́, му́чениче Авраа́мие:/ возбужда́еши бо всех к весе́лию чудесы́ твои́ми/ и непреста́нными о нас к Бо́гу моли́твами.

Пе́снь 4.

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Припев: Святый мучениче Авраа́мие, моли́ Бо́га о нас.

Христо́во благоуха́ние яви́лся еси́, му́чениче,/ в спаса́емых тобо́ю от неду́гов душе́вных же и теле́сных,/ те́мже вси правове́рнии сла́вят Го́спода,/ Его́же ра́ди от злове́рных болга́р пострада́л еси́.

Припев: Святый мучениче Авраа́мие, моли́ Бо́га о нас.

Мо́щи твоя́, му́чениче,/ утвержда́ют обита́телей страны́ сея́ в ве́ре и благоче́стии;/ те́мже и мы с любо́вию вопие́м ти:/ ра́дуйся, страстоте́рпче и чудотво́рче Авраа́мие.

Сла́ва Отцу́ и Сы́ну и Свято́му Ду́ху:

Покрови́теля жи́зни на́шей и моли́твенника к Бо́гу/ почита́ем тя, страстоте́рпче Авраа́мие:/ на стезю́ нас покая́ния напра́ви,/ му́чеников соприча́стниче, А́нгелов сограждани́не пресла́вне.

И ны́не и при́сно и во ве́ки веко́в. Ами́нь.

Богородичен: Ка́ко присту́пим к Тебе́, Херуви́м и Серафи́м честне́йшей,/ и ка́ко воззри́м на Тя, обремене́ннии грехи́ мно́гими?/ Но, о Пречи́стая Влады́чице,/ Сама́ очи́сти ны и ве́чныя му́ки изба́ви.

Пе́снь 5

Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Припев: Святый мучениче Авраа́мие, моли́ Бо́га о нас.

По пренесе́нии святы́х моще́й твои́х во град Влади́мир, му́чениче Авраа́мие,/ вели́кий кня́зь Гео́ргий с подру́жием свои́м и ча́ды и вси обита́тели гра́да/ па́мять твою́ усе́рдно всегда́ творя́ху,/ зна́юще тя на Небесе́х Христу́ предстоя́ща/ и непреста́нно покрыва́юща почита́ющих тя,/ и́хже и ны́не сохраня́й от всех бед.

Припев: Святый мучениче Авраа́мие, моли́ Бо́га о нас.

Пла́мень угаси́ на́ших плотски́х обурева́ний и нечи́стых на́ших помышле́ний,/ да пла́мене гее́нскаго огня́ твои́ми моли́твами, Авраа́мие, изба́вимся.

Сла́ва Отцу́ и Сы́ну и Свято́му Ду́ху:

Ду́шу и помышле́ние к тебе́ простира́ем, страстоте́рпче Авраа́мие:/ согре́й на́ше се́рдце любо́вию, я́же к Бо́гу,/ да зако́ну Его́ усе́рдно после́дующе,/ пре́йдем по́прище на́шего жития́ непреткнове́нно.

И ны́не и при́сно и во ве́ки веко́в. Ами́нь.

Богородичен: Бо́га родила́ еси́ Ты, Пречи́стая, восхоте́вшаго спасти́ гре́шники,/ к Нему́же и́маши всегда́ мно́гое дерзнове́ние, я́ко Ма́ти:/ моли́ся о нас Ему́,/ любо́вию воспева́ющих Тя, Влады́чице.

Пе́снь 6.

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Припев: Святый мучениче Авраа́мие, моли́ Бо́га о нас.

Ви́дя тя иско́нный враг, мно́гия доброде́тели на земли́ творя́ща,/ злове́рных болга́р подви́же на тя,/ да приобщи́шися скве́рней ве́ре их,/ ты же кро́вию запечатле́л еси́ пра́вую ве́ру твою́/ и си́це Небе́сное Ца́рствие восприя́л еси́.

Припев: Святый мучениче Авраа́мие, моли́ Бо́га о нас.

Пречестно́е те́ло твое́, страстоте́рпче Авраа́мие,/ обогаща́ет всех не земны́м и тле́нным бога́тством, но Небе́сным,/ его́же кро́вию дости́гл еси́,/ те́мже и нас получи́ти то сподо́би, любо́вию воспева́ющих тя.

Сла́ва Отцу́ и Сы́ну и Свято́му Ду́ху:

Омы́вся кро́вию, я́ко водо́ю,/ и всех мучи́телей ужаси́в кре́пким твои́м за Христа́ страда́нием,/ ны́не на Небеси́ лику́еши/ и та́мо за всех ве́рных неусы́пно мо́лишися,/ да тве́рдо содержа́т Правосла́вную ве́ру.

И ны́не и при́сно и во ве́ки веко́в. Ами́нь.

Богородичен: Соблюди́ христиа́нское жи́тельство, Богоро́дице,/ гре́шных к покая́нию обрати́,/ чи́сты вся поста́ви пред Сы́ном Твои́м, Пренепоро́чная Де́во,/ и сподо́би нас моли́твами Твои́ми Небе́снаго Ца́рствия.

Конда́к, гла́с 8.

Я́ко многоце́нное сокро́вище,/ принесено́ бы́сть от Бо́лгарския страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу/ и моля́ Его́ о спасе́нии душ на́ших.

Икос:

Я́ко пресве́тлая звезда́, в Бо́лгарстей земли́ возсия́л еси́/ благи́ми твои́ми дея́нии и апо́стольскою про́поведию, страстоте́рпче Авраа́мие,/ и та́мо же му́чен был еси́ за Христа́./ Ны́не же чудесы́, я́ко све́тлыми луча́ми, сия́вши,/ боля́щим исцеле́ние подае́ши, здра́вствующим же ра́дование и весе́лие./ Те́мже дне́сь соше́дшеся, ве́рно зове́м ти:/ ра́дуйся, избра́нниче Госпо́день,/ всея́ Росси́йския земли́ засту́пниче и всем Христиа́ном помо́щниче.

Пе́снь 7.

Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Припев: Святый мучениче Авраа́мие, моли́ Бо́га о нас.

Вся на́ша земля́ возра́довася,/ зря́щи тя, от всех ве́рных срета́ема/ и благода́рными гла́сы, а́ки мусики́йскими труба́ми, восхваля́ема,/ и дне́сь ра́дуется, с на́ми лику́ющи и па́мять твою́ прославля́ющи.

Припев: Святый мучениче Авраа́мие, моли́ Бо́га о нас.

Кре́пость и исцеле́ние приима́ху от Тебе́, му́чениче Авраа́мие, немощству́ющии пло́тию,/ ско́рбнии же ду́хом и удруче́ннии печа́льми жите́йскими/ обрета́ху душе́вное утеше́ние в умиле́нием призыва́нии свята́го и́мене твоего́,/ прославля́юще ди́внаго во святы́х Свои́х Христа́ Бо́га на́шего.

Сла́ва Отцу́ и Сы́ну и Свято́му Ду́ху:

Весели́ся, Богоспаса́емый гра́де Влади́мире,/ и наслажда́йтеся, вси ве́рнии, Христо́ва благоуха́ния/ от святы́х моще́й страстоте́рпца Авраа́мия,/ я́же не то́кмо теле́сныя боле́зни исцелева́ют,/ но и душе́вныя стра́сти вся врачу́ют.

И ны́не и при́сно и во ве́ки веко́в. Ами́нь.

Богородичен: Ум наш плени́ в послуша́ние ве́ры,/ дух и ду́шу всесоверше́нны соблюди́/ и те́ло в прише́ствие Го́спода на́шего Иису́са Христа́ непоро́чно сохрани́/ моли́твами Твои́ми, Богороди́тельнице.

Пе́снь 8.

Ирмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Припев: Святый мучениче Авраа́мие, моли́ Бо́га о нас.

Си́лою Бо́жиего укрепля́емь, отрази́л еси́ сове́ты беззако́нных,/ и́же ру́це твоя́ и но́зе неща́дно отсека́ху./ Те́мже и главу́ прекло́нь под меч, вопия́л еси́:/ благослови́те, вся дела́ Госпо́дня, Го́спода.

Припев: Святый мучениче Авраа́мие, моли́ Бо́га о нас.

Устраши́ти тя не возмого́ша неве́рнии,/ ниже́ поколеба́ти тве́рдаго ума́ твоего́ отреще́ся Христа́,/ я́ко адама́нт, пребы́л еси́ кре́постию ве́ры твое́й, поя́ непреста́нно:/ благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Прииди́те, вси правове́рнии,/ воспросла́вим па́мять страстоте́рпца Авраа́мия/ и облобыза́ем с ве́рою честны́я мо́щи его́,/ источа́ющия цельбы́ неду́гов душе́вных вку́пе и теле́сных всем воспева́ющим:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Победи́, Пречи́стая, врага́ ви́димыя и неви́димыя,/ низложи́ти нас тща́щихся,/ и страсте́й нас вся́ких изба́ви, да пое́м торже́ственне:/ благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Припев: Святый мучениче Авраа́мие, моли́ Бо́га о нас.

Ве́лия сла́ва ты еси́ на́ша и похвала́,/ страстоте́рпче Христо́в Авраа́мие:/ вели́ку бо ве́ру во Христа́ Иису́са име́я,/ второ́е крести́лся еси́ в Него́ кро́вию твое́ю/ и дости́гл еси́ Небе́снаго жития́,/ его́же улучи́ти сподо́би и нас моли́твами твои́ми.

Припев: Святый мучениче Авраа́мие, моли́ Бо́га о нас.

Псалмы́ и пе́сньми восхваля́ем тя, му́чениче,/ озаря́еши бо нас всегда́ чудесы́ твои́ми,/ и́хже кто дово́лен исчести́, ра́зве Да́вый тебе́ сия́?/ Ему́же моли́ся, да спасе́т вся лю́ди,/ с ве́рою и любо́вию соверша́ющия святу́ю па́мять твою́.

Сла́ва Отцу́ и Сы́ну и Свято́му Ду́ху:

Вои́стинну никто́же, притека́яй к тебе́, му́чениче Христо́в Авраа́мие,/ то́щь благода́ти твоея́ отхо́дит,/ ея́же и нас испо́лни, мо́лимся.

И ны́не и при́сно и во ве́ки веко́в. Ами́нь.

Богородичен: Вои́стинну и́стиннаго Бо́га пло́тию, Богоро́дице, родила́ еси́,/ Его́же ми́лостива нам в де́нь Суда́ соде́лай,/ да безконе́чно с Ним Тя велича́ем.

Свети́лен.

Све́та немерца́ющаго дости́гл еси́, му́чениче Авраа́мие,/ за кре́пкое твое́ страда́ние Христо́вы ра́ди ве́ры от злове́рных,/ и ны́не, пребыва́я во Ца́рствии Небе́снем,/ ра́дуешися и весели́шися со все́ми му́ченическими ли́ки./ Моли́ о нас, чту́щих святу́ю па́мять твою́.

Сла́ва, и ны́не, Богоро́дичен:

Свет нам возсия́ пресве́тлый от Твоея́ де́вственныя утро́бы,/ Христо́с Бог наш, Пречи́стая Влады́чице,/ те́мже Тя мо́лим, Цари́цу и Богоро́дицу:/ моли́ Сы́на Твоего́ и Бо́га на́шего,/ да, прости́в нам согреше́ния на́ша,/ спасе́т нас, я́ко Благ и Человеколю́бец.

Молитва

Святы́й му́чениче Авраа́мие, до́блий во́ине Христа́, Царя́ Небе́снаго, в ско́рбех и напа́стех пресла́вный наш помо́щниче и защи́тниче! Ничто́же возмо́же отлучи́ти тя от любве́ ко Го́споду Иису́су: ни ле́стная обеща́ния благ вре́менных, ни преще́ния, ни му́ки от злых враго́в святе́йшия Христо́вы ве́ры; ты, я́ко лев, изше́л еси́ на бра́нь проти́ву волко́в мы́сленных, духо́в зло́бы, подви́гших на тя, ра́ди до́браго твоего́ испове́дания, единоплеме́нный тебе́ наро́д болга́рский, и, я́ко о́гненная стрела́, тех порази́л еси́ си́лою благода́ти Свята́го Ду́ха и кре́пкия, я́ко сме́рть, любве́ твоея́ к Бо́гу. А́ще и пролия́л еси́ кро́вь твою́ за Христа́ Бо́га на́шего, погуби́в вре́менную жи́знь, оба́че безсме́ртною душе́ю, я́ко оре́л, воспари́л еси́ в Го́рния оби́тели Отца́ на́шего, насле́довав там ве́чную жи́знь, сла́ву и блаже́нство неизрече́нное, и оста́вив нам нетле́нныя оста́нки твоя́, я́ко крин многоце́нный и благоуха́нный. Ве́руем, страстоте́рпче святы́м, я́ко, предстоя́ со А́нгелы и все́ми святы́ми Престо́лу сла́вы Триипоста́снаго Бо́га, усе́рдныя и Богоприя́тныя возно́сиши моли́твы не то́кмо о нас и о гра́де на́шем, но и о всей святе́й Христо́вой Це́ркви и правосла́вием оте́честве Росси́йстем. Ве́руем, пресла́вный чудотво́рче, я́ко ты, си́лою Всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние всем, с ве́рою к тебе́ притека́ющим, наипа́че же испра́шиваеши кончи́ну с покая́нием тебе́ чту́щим и благосе́рдно помога́вши немощны́м младе́нцем, да вси от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Те́мже ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя, до́брый на Небеси́ наш моли́твенниче и засту́пниче: помога́й нам, гре́шным и смире́нным, твои́ми моли́твами во всех ско́рбех, ну́ждах и обстоя́ниих на́ших, сохраня́й нас и град сей от вся́каго зла и вся́кия напа́сти, наипа́че же споспешеству́й ве́чному спасе́нию на́шему и всех, прося́щих от Тебе́ по́мощи и заступле́ния. Ей, смире́нно мо́лим тя, уго́дниче Бо́жий: моли́ Христа́ Бо́га на́шего, да даст Он мир и тишину́ всем правосла́вным Христиа́ном и да отврати́т от нас вся́кий гнев, на ны дви́жимый, да изба́вит нас от сете́й вра́жиих, томле́ния во у́зах греха́ и муче́ний а́дских и да сподо́бит нас, недосто́йных, одесну́ю Себе́ ста́ти на Суде́ Свое́м пра́ведном и вни́ти в ве́чный поко́й святы́х Его́, иде́же пра́зднующих глас непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми безконе́чно прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную. Ами́нь.