Каноны. 13 апреля.

Канон иной священномученику Ипатию, епископу Гангрскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, глас 3:

В прекра́сном Це́ркве апо́стольский вертогра́де/ из ю́на во́зраста всеси́льною десни́цею Бо́жиею насади́лся еси́,/ Богоблаже́нне о́тче Ипа́тие,/ и в ней, я́ко ве́рен первосвяще́нник,/ ве́рно Богонача́льное и Всетворя́щее Тро́ическое Еди́нство/ пропове́дал еси́ во Вселе́нском Собра́нии,/ Ду́ха же Свята́го в доброде́телех испо́лнен быв,/ ве́лия чудеса́ сотвори́в,/ муче́нием за ве́ру Христо́ву сконча́вся,/ прише́л еси́ в Небе́сный град,/ иде́же Триипоста́снаго Бо́га зря,/ моли́ о честву́ющих тя,/ да в Го́рнем Иерусали́ме со святы́ми жи́ти сподо́бимся.

Ин тропа́рь, глас 4:

Богови́дное досточу́дных доброде́телей зерца́ло,/ Богоправи́мое Правосла́вныя ве́ры пра́вило/ и утвержде́ние Це́ркве Христо́вы,/ за ню́же и страда́л еси́, всечу́дне о́тче Ипа́тие,/ чудесы́, Богодарова́нными тебе́, ве́сь мир удиви́в,/ душеспаси́тельныя по́льзы сотвори́л еси́,/ и ны́не ве́рно призыва́ющим тя во вся́ких беда́х и напа́стех/ испроси́ нам у Го́спода Бо́га/ по́мощь и спасе́ние ве́чное душа́м.

Кано́н. Гла́с 3.

Пе́снь 1.

Ирмос: Ди́вно, сла́вно творя́й чудеса́/ Ты еси́, Бо́же,/ бе́здну оземлени́вый, и колесни́цы потопи́вый,/ и лю́ди спасы́й, пою́щия Тебе́,/ я́ко Царю́ на́шему и Бо́гу.

Припев: Святый священномучениче Ипатие, моли́ Бо́га о нас.

Бо́га Тя Всетворца́ разуме́в вседу́шно, возлюби́л е́сть измла́да,/ доброде́тельми обогати́ся всеблаже́нный Ипа́тий, иера́рх чудоде́льный, Твое́ю благода́тию,/ его́же мольба́ми спаси́ пою́щия Тебе́.

Припев: Святый священномучениче Ипатие, моли́ Бо́га о нас.

О́гнь любве́ Бо́жия в чистолю́бном се́рдце твое́м объя́в,/ де́монскаго злостра́стия пагубоно́сное те́рние попали́л еси́, блаже́нне о́тче./ Те́мже вся благочести́выя научи́л еси́ пе́ти Царя́ Небе́снаго, Бо́га.

Сла́ва Отцу́ и Сы́ну и Свято́му Ду́ху:

Глаго́лом Ева́нгельским научи́вся,/ после́довал еси́ Боговоплоти́вшемуся Сы́ну Бо́жию Иису́су,/ кре́пко бо от злочести́вых за Него́ пострада́в, иера́рше Ипа́тие,/ ны́не в Небесе́х Его́ зря,/ моли́ изба́вити ны от бед, пою́щия Ему́.

И ны́не и при́сно и во ве́ки веко́в. Ами́нь.

Богородичен: А́нгельское все чинонача́лие удиви́ся,/ зря в Тебе́, Пречи́стая, Бо́га Сло́ва все́льшася,/ Его́же, Преблагослове́нная Де́во Мари́е, преесте́ственно родила́ еси́./ В Небе́снем блаже́нстве су́щи,/ предста́тельствуй о нас, пою́щих Тя.

Пе́снь 3.

Ирмос: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Припев: Святый священномучениче Ипатие, моли́ Бо́га о нас.

Ца́рствующаго все́ми Го́спода, Единосу́щна Отцу́,/ пропове́дал еси́ Сы́на Предве́чнаго, в собо́рном ли́ке святы́х оте́ц/ богому́дренно, о́тче, утвержде́ние сотво́рь, пое́ши:/ не́сть свят, па́че Бо́га Триипоста́сна.

Припев: Святый священномучениче Ипатие, моли́ Бо́га о нас.

А́нгела преудо́бренна в церко́вней иера́рхии тя, досточу́дне Ипа́тие, иму́ще, мо́лим:/ в плодоноше́ние утверди́ души́ на́ша,/ духоро́дне пе́ти в Тро́ице Всесвята́го и Пра́веднаго Го́спода.

Сла́ва Отцу́ и Сы́ну и Свято́му Ду́ху:

Росо́ю Боже́ственнаго Ду́ха преизоби́льно напои́вся,/ разли́чна чудотворе́ния во сла́ву Пра́веднаго Бо́га/ в по́мощь ве́рным лю́дем показа́л еси́, блаже́нне,/ и́миже стяжа́ти да́руй и нам плод Его́ хвале́ния.

И ны́не и при́сно и во ве́ки веко́в. Ами́нь.

Богородичен: Язы́к всяк не возмо́жет по достоя́нию хвали́ти Тя, Богома́ти Мари́е,/ Тро́ичная бо Ипоста́сь – Бог Сло́во –/ всели́ся в чре́во Твое́, пожи́в с челове́ки Тобо́ю,/ в Богоразу́мие наста́вль, пе́ти Человеколю́бца Го́спода.

Седа́лен, глас 8.

Богоукрепле́нный столп Правосла́вия,/ ерети́чествующих со́нмищ ариа́нскаго неду́га 54 и Нова́та 55 злоде́йства искорени́тель,/ Богоблаже́нне о́тче Ипа́тие,/ во утвержде́ние Христо́вы Це́ркве яви́лся еси́./ За ню же от враго́в, церквоненави́стных новатиа́н,/ в проездоте́сном пути́ неча́янно бие́ние, ра́ны и сме́рть прие́мь,/ возше́л еси́ душе́ю ко Христу́ Бо́гу в Небе́сную оби́тель./ Но и уби́йцам твои́м, му́чимым де́монами, проще́ние дарова́/ и мно́гая от неду́г свободи́л еси́./ Те́мже Христу́ Бо́гу моли́ся о воспева́ющих па́мять твою́,/ дарова́ти всем ве́лию ми́лость.

Сла́ва, и ны́не, Богоро́дичен:

Все А́нгельское Го́рнее священнонача́лие превозшла́ еси́, Богоневе́сто Де́во Мари́е,/ Бог у́бо Сый престо́л Себе́ Тя соде́ла,/ во пречи́стом чре́ве Твое́м заи́мствова от крове́й Твои́х пло́ть,/ в не́йже се́де одесну́ю Бо́га Отца́, я́ко Единосу́щный,/ па́дшее на́ше челове́ческое естество́ возста́ви/ и соедини́ Себе́ ве́рующия в Него́ и велича́ющия Тя./ Те́мже блажа́т Тя, Госпоже́, вси ро́ди:/ на Небесе́х – вся Небе́сныя си́лы,/ на земли́ – правове́рующия лю́ди./ Пода́ждь всем нам безконе́чное ра́дование.

Пе́снь 4.

Ирмос: Приосене́нную го́ру Авваку́м прозря́ше,/ пречи́стую Твою́ утро́бу, Чи́стая./ Тем взыва́ше:/ от ю́га прии́дет Бог/ и Святы́й от го́ры приосене́нныя ча́щи.

Припев: Святый священномучениче Ипатие, моли́ Бо́га о нас.

Призре́ Госпо́дь свы́ше на твое́ Боголюби́вое се́рдце/ и осени́ тя, избра́ннаго Своего́ иера́рха,/ благода́тию Свое́ю в прославле́ние И́мене Своего́ свята́го,/ Его́же возгласи́л еси́:/ прии́де Бог спасти́ челове́ка.

Припев: Святый священномучениче Ипатие, моли́ Бо́га о нас.

Е́здяй на у́мных и безпло́тных колесни́цах А́нгельских сил/ и всели́выйся носи́тися в утро́бу Пречи́стыя Де́вы,/ из Нея́же воплоти́ся Бог Сый,/ пропове́дан быв тобо́ю, о́тче, во спасе́ние.

Сла́ва Отцу́ и Сы́ну и Свято́му Ду́ху:

Твое́, блаже́нне о́тче Ипа́тие, рачи́тельство/ ко Всетворцу́ Бо́гу неусы́пное бы́сть,/ вся бо сладостра́стия ми́ра вмени́в уме́ты/ и на верх горы́ доброде́тели возше́д,/ присеня́й нас, моля́щих тя, благода́тне.

И ны́не и при́сно и во ве́ки веко́в. Ами́нь.

Богородичен: Изоби́льно благода́ть Свою́ Присносу́щный Бог/ излия́ на Тя, Богома́ти Пречи́стая,/ очи́стив бо Ду́хом, селе́ние Невмести́мый Себе́ во Твое́й утро́бе сотвори́,/ Его́же моли́ спасти́ ны.

Пе́снь 5

Ирмос: Све́том Твои́м Невече́рним, Христе́,/ озари́, Бо́же, смире́нную мою́ ду́шу/ и наста́ви на страх Твой,/ зане́ свет повеле́ния Твоя́.

Припев: Святый священномучениче Ипатие, моли́ Бо́га о нас.

Че́стно ше́ствие честно́му тебе́ иера́рху бы́сть от Го́спода,/ и́бо в труднохожде́нии нощи́ свет Боже́ственный от во́ды, я́ко свещу́, возжже́,/ безбе́ден пу́ть восприя́л еси́./ Те́мже и нам озари́тися моли́.

Припев: Святый священномучениче Ипатие, моли́ Бо́га о нас.

Удиви́шася наро́ди живу́щей в тебе́, о́тче, благода́ти Бо́жией,/ я́ко го́рькия и непи́тныя во́ды в сла́дость претвори́л еси́,/ и, на́ша у́бо горькоро́дныя страсти́ истреби́в,/ благода́тными напо́й вода́ми.

Сла́ва Отцу́ и Сы́ну и Свято́му Ду́ху:

Ду́ха Свята́го си́лою/ богоде́йственно в цельбу́ ве́рным христолю́бцам исто́чник те́плых вод изве́д,/ изведи́ ны от грехо́вныя тьмы́/ ко врачу́ющему вся Исто́чнику – Христу́.

И ны́не и при́сно и во ве́ки веко́в. Ами́нь.

Богородичен: О́блак дожделию́щий премно́гих дарова́ний/ во утоле́ние жа́жды от зно́я стра́стного порабоще́нным яви́лася еси́, Пречи́стая Де́во,/ моли́ Сы́на Твоего́,/ да вспоко́ит ны в воде́ милосе́рдия Его́, чту́щия Тя.

Пе́снь 6.

Ирмос: Возведи́ от тли мя, Го́споди Бо́же мой,/ Ио́на вопия́ше;/ и аз вопию́ Ти:/ из глубины́ изба́ви мя, Спа́се, мно́гих мои́х зол/ и к све́ту Твоему́, молю́ся, наста́ви.

Припев: Святый священномучениче Ипатие, моли́ Бо́га о нас.

Призыва́емь о́тче Ипа́тие, ве́рующими Христу́ Бо́гу,/ скороше́ствовав во вся́ких ско́рбех и напа́стех,/ тем безме́здно врачевство́ дарова́л еси́./ Те́мже от смертоно́сныя тли нас изба́ви.

Припев: Святый священномучениче Ипатие, моли́ Бо́га о нас.

О́браз Бо́жий, вои́стинну в человекотво́рстве Небеснора́йский, блаже́нне, показа́лся еси́:/ сла́вим бо благотворе́ньми Бо́га,/ от тли ерети́ческих злочти́лищ к све́ту благоче́стия мно́гия лю́ди наста́вил еси́.

Сла́ва Отцу́ и Сы́ну и Свято́му Ду́ху:

Доброде́тельное Богоподо́бие стяжа́в,/ изря́ден па́стырь Га́нгрския Це́ркве был еси́, всече́стне./ Таковы́я подо́бство и свобо́дство от мно́гих на́ших зол пода́ждь нам, мо́лимся.

И ны́не и при́сно и во ве́ки веко́в. Ами́нь.

Богородичен: Ааро́нов жезл процве́тший/ богозна́менно Тя прообрази́ Браконеиску́сную Де́ву:/ Цве́та бо, Све́та всего́ ми́ра, Богочелове́ка Христа́ израсти́вши,/ всем спасе́ние подае́ши ми́лостивно.

Конда́к, глас 2.

Оби́тель Триипоста́снаго Божества́,/ достоблаже́нне о́тче Ипа́тие, быв,/ во вселе́нную Всетворца́ Бо́га воскли́кнул еси́./ Благода́рственне же чудоде́йствуя,/ вшел еси́ в Небе́сныя оби́тели,/ та́мо моли́ Всесвяту́ю Тро́ицу, мо́лим тя,/ исцели́ти телеса́ и души́ на́ша/ в Богосозда́нную на́шу красоту́.

Конда́к, глас 4.

О всеблаже́нный чудотво́рче Ипа́тие,/ предстоя́й в Небесе́х Всетворя́щей Боже́ственней Тро́ице,/ с ли́ки Го́рними богоприя́тне и всера́достне возно́сиши хвалы́./ Приими́ от нас сие́ тебе́ хвалорадостносло́вие./ И моли́ Го́спода изба́вити ны от вся́ких грехо́в, напа́стей же и боле́зней/ и дарова́ти Ца́рствие Небе́сное всю́ду пою́щим:/ аллилу́ия.

Пе́снь 7.

Ирмос: Трие́ о́троцы в пещи́, Тро́ицу прообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших.

Припев: Святый священномучениче Ипатие, моли́ Бо́га о нас.

Те́плаго моли́твенника и Богому́драго тя архиере́я самоде́ржец слы́шав,/ на отгна́ние стра́шнаго зми́я призва́ из па́ствы твоея́,/ прише́дша же, ра́достне чествова́,/ благословя́ Бо́га оте́ц на́ших.

Припев: Святый священномучениче Ипатие, моли́ Бо́га о нас.

Естествови́дный вели́кий змий, ца́рская сокро́вища обдержа́вший,/ не сме́яше на тя зи́нути, о́тче,/ я́ко и де́моны го́нятся тобо́ю,/ первоада́мовым бо Богода́нным де́йством в поко́рстве тебе́ сожже́ся той.

Сла́ва Отцу́ и Сы́ну и Свято́му Ду́ху:

Лю́дие новори́мстии и сам ца́рь,/ ви́дяще, о всеблаже́нне, такова́го стра́шна шестодесятоло́котнаго зми́я,/ от Тебе́ пресла́вно исчезнове́нна,/ тя же в благода́ти Бо́жией неврежде́нна,/ сла́дце вопия́ху:/ отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Языкосло́вие провозгласи́ ца́рствующий проро́к,/ Дще́рь Царе́ву Тя, Боговлады́чице, бы́ти./ Мы же, ви́девше Тя и Ма́терь Царя́ Небе́снаго, всеусе́рдно вопие́м:/ я́ко Всемо́щная, сохрани́ нас от зми́я а́дскаго,/ Чи́стая Благослове́нная.

Пе́снь 8.

Ирмос: А́нгелами немо́лчно в Вы́шних сла́вимаго Бо́га,/ Небеса́ небе́с, земля́, и го́ры, и хо́лми, и глубина́,/ и ве́сь род челове́ческий,/ пе́сньми Того́, я́ко Созда́теля и Изба́вителя, благослови́те/ и превозноси́те во вся ве́ки.

Припев: Святый священномучениче Ипатие, моли́ Бо́га о нас.

Наде́жду крепча́йшую во Всеще́дром Творце́ на́шем Бо́зе положи́в,/ на ерети́ческая собо́рища всеусе́рдно стал еси́, Богому́дре Ипа́тие,/ посрами́в же ариа́нское вредосла́вие,/ Христа́ возсла́вил еси́.

Припев: Святый священномучениче Ипатие, моли́ Бо́га о нас.

Единоро́днаго Сы́на Бо́жия, Еди́ну Тро́ичну Ипоста́сь,/ пло́ть и ду́шу у́мную всечелове́чество прии́мшаго,/ я́сно во ве́сь мир возгласи́л еси́, чудотво́рче,/ вся ве́рныя научи́в благослови́ти Его́ во ве́ки.

Сла́ва Отцу́ и Сы́ну и Свято́му Ду́ху:

Се́мя сло́ва Ева́нгельскаго/ непреста́нно в се́рдце христиа́н правосла́вных се́ял еси́, блаже́нне,/ не то́кмо бо правове́рныя угобзи́в на ни́ве благоче́стия,/ но и от ерети́ческих со́нмищ многопло́дство сотвори́л еси́/ хвали́ти Бога́тых во ве́ки.

И ны́не и при́сно и во ве́ки веко́в. Ами́нь.

Богородичен: Еди́ну во всем творе́нии Свое́м/ Бог Сло́во избра́ Тя, Богоневе́сто, селе́ние Себе́,/ из Тебе́ роди́ся пло́тию преесте́ственне, я́ко ве́сть Сам,/ Его́же, Преблагослове́нная, моли́ па́дшия ны возроди́ти благода́тию,/ пе́ти Его́ и Тя во ве́ки.

Песнь 9

Ирмос: Купино́ю и огне́м пропи́санную в Сина́и/ законополо́жнику Моисе́ю/ и Бо́жий во чре́ве неопа́льно заче́ншую О́гнь,/ Всесве́тлую и Негаси́мую Свещу́,/ су́щую Богоро́дицу пе́сньми чту́ще, велича́ем.

Припев: Святый священномучениче Ипатие, моли́ Бо́га о нас.

А́нгел земны́й и челове́к Небе́сный вои́стинну был еси́, уго́дниче Христо́в, Ипа́тие,/ твои́ми бо труды́ и Богому́дрыми зри́тельствы Це́рковь благоукраси́ся/ и люде́м душеспаси́тельныя по́льзы мно́ги сотвори́шася.

Припев: Святый священномучениче Ипатие, моли́ Бо́га о нас.

Ра́зумом соверше́нным и Богоподо́бными де́лы/ в чудотворе́ниих всему́ ми́ру возсия́л еси́,/ я́ко со́лнце, о́тче досточу́дне,/ исцеле́ния разли́чна пода́в и де́моны от стра́ждущих челове́к отгоня́я,/ к Со́лнцу Пра́вды возше́л еси́,/ отню́дуже ны призира́й.

Припев: Святый священномучениче Ипатие, моли́ Бо́га о нас.

Ерети́чествующия вражде́бники подви́же на тя, Богоно́се, дре́вний змий диа́вол,/ и́же в путеше́ствии твое́м, ра́ди Правосла́вия твоего́, окая́нный умертви́ша,/ но бо́лее тя и по сме́рти Госпо́дь Бог просла́ви,/ Его́же моли́ от враго́в изба́витися нам.

Сла́ва Отцу́ и Сы́ну и Свято́му Ду́ху:

Объя́т вели́кий страх и де́монское муче́ние уби́йцы твоя́, свя́те,/ Бо́жиим бо гне́вом вси возбесне́ша./ Ты же, милосе́рдствуя, о́ныя исцели́в, проще́ние дарова́л еси́,/ и мно́гия у гро́ба твоего́ цельбы́ да́ждь нам ми́лостивно.

И ны́не и при́сно и во ве́ки веко́в. Ами́нь.

Богородичен: Назира́й свы́ше христиа́нское сосло́вие, Богороди́тельнице Де́во Чи́стая,/ и в достоя́ние ве́чнаго блаже́нства упра́ви и от скорбе́й и бед,/ мы́сленных страсте́й избавля́ющи ны,/ да, пе́сньми чту́ще, Тя велича́ем.

Свети́лен.

Небе́сною Богоприя́тныя моли́твы цельбо́ю/ теле́сныя челове́ков не́мощи преесте́ственно исцели́вый/ и пресла́вная чудеса́ Богодарова́нною си́лою сотвори́вый,/ досточу́дный Ипа́тие, моли́ о нас Христа́ Бо́га,/ да в век всера́достный цельбу́ нам да́рует.

Моли́тва

Трисо́лнечного Све́та светоза́рная звездо́, вводя́щая в мир Трисо́лнечный Свет апо́стольскими твои́ми, Богоева́нгельскаго пропове́дания священноуче́нии, священному́чениче, иера́рше Христо́в, Богоблаже́нне Ипа́тие. Ты прия́л еси́ от Святы́е Тро́ицы равноапо́стольную благода́ть, серафи́мскую в горе́честии к Бо́гу любо́вь, я́ко же верхо́внейший апо́столов Петр, и херуви́мскую многоочи́тую во уче́нии прему́дрость, я́ко же вторы́й Па́вел. Просвети́вый прему́дрым твои́м благоче́стия уче́нием тьмочи́сленныя наро́ды, присноусе́рдно подража́я всеми́рнаго Учи́теля, Го́спода Бо́га и Спа́са на́шего Иису́са Христа́. Его́ же ра́ди всесмире́нно молю́ богоподража́тельное оте́ческое твое́ благоутро́бие: при́зри ми́лостивно богосве́тлыми очи́ма твои́ма на су́щее недосто́инство мое́, я́ко всечадолюби́вый по Бо́зе оте́ц, и присноусе́рдный на́шего спасе́ния наста́вниче, и всех в Го́рних правонеизме́нный строи́тель, адама́нтная Правосла́вию стена́ и пресве́тлый столп, вводя́щий второно́ваго Изра́иля во всепросветле́йший Го́рний Сио́н. Потщи́ся вско́ре помоществова́ти на бра́нех во́инству на́шему. Проси́ же при́сно у Святы́я Тро́ицы всем правосла́вным христиа́ном ми́ра и тишины́, душе́вного спасе́ния и многоле́тняго в телеси́ здра́вия, возду́ха благорастворе́ния, земли́ благопло́дия, непло́дствующим благоча́дия, и в зако́не Госпо́днем воспита́ния, и всех благи́х умноже́ния. А по́сле жития́ коему́ждо жи́зни сея́ сподо́би святы́ми твои́ми моли́твами улучи́ти христиа́нскую кончи́ну бла́гу, непосты́дну и ми́рну, со всепреподо́бнейшим испове́данием и со прича́стием Святы́х Безсме́ртных Небе́сных и Животворя́щих Христо́вых Та́ин, и с молитвома́слием безпрепя́тное возду́шных мыта́рств проше́ствие, насле́дие со святы́ми всера́достныя присносу́щныя жи́зни, в ней же ку́пно со А́нгельскими чи́нми непреста́нныя хвалы́ вознесе́м Отцу́ со Единоро́дным Его́ Сы́ном и с Пресвяты́м, Благи́м и Животворя́щим Его́ Ду́хом, и тебе́, вели́кое твое́ оте́ческое ми́лостивое заступле́ние, ны́не, и при́сно, и во ве́ки веко́в. Ами́нь.