Шрифт

Каноны. 13 апреля.

Канон священномученику Ипатию, епископу Гангрскому.

Священномученику Ипатию, епископу Гангрскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, глас 3:

В прекра́сном Це́ркве апо́стольский вертогра́де/ из ю́на во́зраста всеси́льною десни́цею Бо́жиею насади́лся еси́,/ Богоблаже́нне о́тче Ипа́тие,/ и в ней, я́ко ве́рен первосвяще́нник,/ ве́рно Богонача́льное и Всетворя́щее Тро́ическое Еди́нство/ пропове́дал еси́ во Вселе́нском Собра́нии,/ Ду́ха же Свята́го в доброде́телех испо́лнен быв,/ ве́лия чудеса́ сотвори́в,/ муче́нием за ве́ру Христо́ву сконча́вся,/ прише́л еси́ в Небе́сный град,/ иде́же Триипоста́снаго Бо́га зря,/ моли́ о честву́ющих тя,/ да в Го́рнем Иерусали́ме со святы́ми жи́ти сподо́бимся.

Ин тропа́рь, глас 4:

Богови́дное досточу́дных доброде́телей зерца́ло,/ Богоправи́мое Правосла́вныя ве́ры пра́вило/ и утвержде́ние Це́ркве Христо́вы,/ за ню́же и страда́л еси́, всечу́дне о́тче Ипа́тие,/ чудесы́, Богодарова́нными тебе́, ве́сь мир удиви́в,/ душеспаси́тельныя по́льзы сотвори́л еси́,/ и ны́не ве́рно призыва́ющим тя во вся́ких беда́х и напа́стех/ испроси́ нам у Го́спода Бо́га/ по́мощь и спасе́ние ве́чное душа́м.

Кано́н. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святый священномучениче Ипатие, моли́ Бо́га о нас.

Боже́ственнаго страда́льца, му́драго святи́теля, чуде́с исто́чника, па́стыря до́браго, Це́ркве утвержде́ние пе́сньми велегла́сно я́ко свети́льника всеми́рнаго вси́ восхва́лим, ра́дующеся.

Припев: Святый священномучениче Ипатие, моли́ Бо́га о нас.

Боже́ственная река́, наводни́вшая, преблаже́нне, чи́стую твою́ ду́шу, источи́ на́м пречи́сты во́ды, всему́дре, мно́гих чуде́с, то́ки изсуша́ющия му́тных страсте́й, Ипа́тие.

Припев: Святый священномучениче Ипатие, моли́ Бо́га о нас.

Умертви́в плотски́я сла́сти воздержа́нием, жи́знь и́стинную — Христа́, на́с ра́ди уме́рша, Ипа́тие, име́л еси́, вну́трь в души́ твое́й живу́ща и вся́ твоя́ к Нему́ ше́ствия направля́юща.

Сла́ва Отцу́ и Сы́ну и Свято́му Ду́ху:

Се́рдце и ду́шу Тро́ицы соде́лал еси́ нескве́рнен хра́м, хра́мы же свяще́нныя Го́споду в хвалу́, преподо́бне священному́чениче, созда́л еси́, спаси́телен бы́в прави́тель ста́ду твоему́.

И ны́не и при́сно и во ве́ки веко́в. Ами́нь.

Богородичен: Спа́са и Бо́га от чи́стых Твои́х крове́й воплоти́ла еси́, Чи́стая, показа́вшаго на́м му́драго святи́теля Своего́, Пречи́стая, спаси́тельна и те́пла засту́пника, чу́днаго вои́стинну Ипа́тия.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Святый священномучениче Ипатие, моли́ Бо́га о нас.

Все́м се́рдцем ко исто́чнику до́брых отлучи́лся еси́ и отту́ду све́тло богате́йшими сия́я, о́тче свяще́нне, Боже́ственными светлостьми́.

Припев: Святый священномучениче Ипатие, моли́ Бо́га о нас.

Зако́ны Боже́ственными огражде́н, беззако́нных собо́рище си́лою, о́тче, Боже́ственною истреби́л еси́ ересе́й, спаса́я ста́до твое́, о́тче Ипа́тие.

Припев: Святый священномучениче Ипатие, моли́ Бо́га о нас.

От вы́шния пресве́тлыя свещи́ Ду́ха просвеща́емь, му́дре, но́щию преходя́щим свещи́ тя́ яви́ша, от воды́ озаря́юще.

Сла́ва Отцу́ и Сы́ну и Свято́му Ду́ху:

Отце́в боже́ственных ли́к соисполня́я блаже́нный, его́же собра́ Христо́с, Собо́ра Пе́рваго, блаже́нне, яви́лся еси́, сдавля́я пребезу́мнаго Ария.

И ны́не и при́сно и во ве́ки веко́в. Ами́нь.

Богородичен: Изба́ви мя́ вся́каго прило́га сопроти́внаго змиина́, Ма́ти Де́во Чи́стая, и се́рдце мое́ просвети́, ве́рою Тя́ сла́вящаго, Всенепоро́чную.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Святый священномучениче Ипатие, моли́ Бо́га о нас.

Неле́стно сло́во и уче́ние и́скренно соблюда́я, пропове́дал еси́ Сло́во, Отцу́ Соприсносу́щно, ариому́дренную пре́лесть победи́в, священному́чениче, чудотво́рче досточу́дне.

Припев: Святый священномучениче Ипатие, моли́ Бо́га о нас.

Горча́йшия от го́р теку́щия во́ды зна́мением то́кмо цельбоно́сны показа́л еси́, во́ду жи́ву стяжа́в в се́рдцы твое́м, в ве́чную, о́тче, жи́знь теку́щую.

Припев: Святый священномучениче Ипатие, моли́ Бо́га о нас.

Свяще́нствовав преподо́бно и зако́нне пострада́в, свяще́нство показа́л еси́ све́тльшее кровьми́, излия́нными за любо́вь истощи́вшаго Кро́вь честну́ю за челове́ческое избавле́ние.

Сла́ва Отцу́ и Сы́ну и Свято́му Ду́ху:

Не укосне́вши благода́ть на тебе́, чудеса́ содева́ющи, де́моном го́рьким предаде́ го́рько и безбо́жно умертви́вшия тя́, всеблаже́нне му́чениче Христо́в свяще́ннейший.

И ны́не и при́сно и во ве́ки веко́в. Ами́нь.

Богородичен: Дарова́ний Твои́х струи́, и исто́чницы исцеле́ний, и Боже́ственнаго бога́тства раздая́ния подава́ются от живонача́льныя дла́ни, Богоневе́сто, ро́ждшагося от Твоея́ утро́бы Вседержи́теля.

Пе́снь 5

Ирмос: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Святый священномучениче Ипатие, моли́ Бо́га о нас.

Ума́ превосхо́дит твоея́ благода́ти постиже́ние, язы́к изрещи́ не мо́жет твои́х чуде́с безме́рныя пучи́ны, му́чениче, святи́телю и па́стырю, га́нгряном удобре́ние и свети́льниче всея́ тва́ри.

Припев: Святый священномучениче Ипатие, моли́ Бо́га о нас.

Уби́л еси́ зми́я, огню́ препосла́в, показа́л еси́ в тебе́ Боже́ственную благода́ть, богате́йше все́льшуюся и тя́ пред царе́м и все́ми просла́вльшую людьми́, свяще́ннейше.

Припев: Святый священномучениче Ипатие, моли́ Бо́га о нас.

Печа́ть и храни́теля сокро́вищу вообрази́, о́тче, ца́рь твою́ ико́ну, се́ю почита́я тя́ и я́ве провозвеща́я, я́ко приноси́мая че́сть на первообра́зное прехо́дит, Ипа́тие.

Сла́ва Отцу́ и Сы́ну и Свято́му Ду́ху:

Вельми́ подвиза́ся, вельми́ и просла́вися, чудеса́ соверша́я священнообра́зно, неду́ги отгоня́, прогоня́я де́моны, упражня́я си́х наве́ты, побежда́я ересе́й губи́тельное зломы́слие.

И ны́не и при́сно и во ве́ки веко́в. Ами́нь.

Богородичен: Му́дрость родила́ еси́ Бо́жию Ипоста́сную, Пречи́стая Де́во Богоро́дице, святы́я всему́дры показа́вшую, те́мже зло́бы мудреца́ паде́ шата́ние и лю́тая злоухищре́ния.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святый священномучениче Ипатие, моли́ Бо́га о нас.

Возше́л еси́ на высоту́ доброде́телей, Ипа́тие, и прибли́жился еси́, блаже́нне, к чисте́йшему исто́чнику Боже́ственных дарова́ний, и чуде́с пучи́ну источи́л еси́.

Припев: Святый священномучениче Ипатие, моли́ Бо́га о нас.

Вене́ц тебе́ ка́меней мета́ния бы́ша и к небе́сней высоте́ и степе́ни, о́тче, и ле́ствица, е́юже возше́д, и Бо́гу присво́ился еси́ ясне́йше.

Припев: Святый священномучениче Ипатие, моли́ Бо́га о нас.

Исцеле́ния твоя́ ра́ка источа́ет при́сно, благослове́ние же, о́тче, честны́я твоея́ пе́рсти прие́млемо, изве́стно, я́ко пра́х, истнева́ет зло́бу.

Сла́ва Отцу́ и Сы́ну и Свято́му Ду́ху:

Зако́нне пострада́в и я́ко му́ченик почествова́лся еси́, во глубоча́йшей же ста́рости к твои́м преше́л еси́, ра́дуяся, отце́м и вене́ц твои́х трудо́в прия́л еси́ от Христа́ досто́йно.

И ны́не и при́сно и во ве́ки веко́в. Ами́нь.

Богородичен: О, чудесе́, все́х чуде́с нове́йшаго! Яко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Седа́лен, гла́с 1.

Возсия́л еси́ в ми́ре, святи́телю Ипа́тие, чудесы́ просвеща́я ве́рно приходя́щия к тебе́; пострада́в же кро́вию, му́дре, мно́жае присво́ился еси́ Христу́ и лику́еши со Ангелы на небесе́х, о на́с моля́ся. Сла́ва укре́пльшему тя́ Бо́гу, сла́ва Венча́вшему тя́, сла́ва Де́ющему тобо́ю все́м исцеле́ния.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святый священномучениче Ипатие, моли́ Бо́га о нас.

Уста́ ника́коже на тя́ отве́рзе по́лзаяй зми́й, раболе́пно же на о́гнь идя́ше, повину́яся, приснопа́мятне, стра́шному повеле́нию твоему́, оте́ц на́ших, — вопию́щу, — Бо́же, благослове́н еси́.

Припев: Святый священномучениче Ипатие, моли́ Бо́га о нас.

Крове́й проли́тием, е́же от сле́з совоку́пль, еди́но от обою́ пи́во, му́дре, соверши́л еси́, тебе́ помина́ему пи́щному, досточу́дне, пото́ку во ве́ки, му́чеником похвало́.

Сла́ва Отцу́ и Сы́ну и Свято́му Ду́ху:

Во цве́тник честны́х боле́зней твои́х входя́ще, блаже́нне, благоуха́ем ду́шу, благово́ние тя́ Христо́во ве́дуще, и вопие́м, Ипа́тие: препе́тый Го́споди, Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богородичен: Неискусобра́нная Чи́стая, без се́мене заче́ншая Отцу́ Единосу́щнаго и ро́ждшая пло́тию, Богоневе́сто, от святы́х крове́й Твои́х, моля́щи ны́не не преста́й спасти́ вся́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Припев: Святый священномучениче Ипатие, моли́ Бо́га о нас.

Гла́с тво́й, све́ту сраствори́вся и Боже́ственными осия́н светлостьми́, тму́ ересе́й, всему́дре, разори́ и ко дню́ напра́ви правосла́вия лю́ди, вопию́щия: Го́спода по́йте, дела́, и превозноси́те Его́ во вся́ ве́ки.

Припев: Святый священномучениче Ипатие, моли́ Бо́га о нас.

Красне́йший, я́ко тро́сть, я́влься, язы́к тво́й, всему́дре, написа́ зако́н благода́тию, вся́ на дска́х ве́тхия погла́ждши о́бразы, Ипа́тие, те́мже тя́ я́ко му́дра кни́жника песносло́вим во вся́ ве́ки.

Припев: Святый священномучениче Ипатие, моли́ Бо́га о нас.

Сто́лп о́гнен боже́ственный и к высоте́ небе́сней взе́млемь, забра́ло непрекло́нное, стена́ неразори́ма, Це́ркве утвержде́ние, святи́телей степе́нь, му́чеников кра́сная ле́пота, чудоно́сный Ипа́тий да почте́н бу́дет.

Сла́ва Отцу́ и Сы́ну и Свято́му Ду́ху:

Ви́дети сподо́бился еси́, Его́же жела́л еси́, разре́шшимся и́стины въявле́нием: еще́ бо и те́плей кро́ви ка́плющи, к жела́нию после́днему, му́чениче, восте́кл еси́, с му́ченическими и преподо́бных ли́ки боже́ственными лику́я во вся́ ве́ки.

И ны́не и при́сно и во ве́ки веко́в. Ами́нь.

Богородичен: Мно́гими содержи́маго беда́ми и молво́ю греха́ бе́дствуемаго, к безво́лненному стремле́нию тишины́ мя́ Ду́ха, Богороди́тельнице Чи́стая, Влады́чице, ны́не наста́ви, приста́нище бо еси́ христиа́н, те́мже Тя́ пое́м во вся́ ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святый священномучениче Ипатие, моли́ Бо́га о нас.

Яко ши́пок, я́ко кри́н свяще́нный сладково́нен, святи́телю, я́ко кипари́с, я́ко мѵ́ро Боже́ственно и благово́нно, ра́ка твоя́ благово́нствует чудесы́, злосмра́дныя неду́ги отгоня́щи, священному́чениче всече́стне.

Припев: Святый священномучениче Ипатие, моли́ Бо́га о нас.

Собесе́дник яви́лся еси́ проро́ков, му́чеников же свяще́нных, кро́вию уже́ до́бре сконча́вшихся, святы́х и преподо́бных равностоя́телен и все́х пра́ведных соприча́стник, су́щих от ве́ка, досточу́дне.

Припев: Святый священномучениче Ипатие, моли́ Бо́га о нас.

Па́мять твоя́ дне́сь на́м возсия́ светле́йши со́лнца, све́том невеще́ственным сердца́ на́ша просвеща́ющая, ве́рою тя́ в не́й блажа́щих, Ипа́тие, и моле́бно восхваля́ющих тя́.

Сла́ва Отцу́ и Сы́ну и Свято́му Ду́ху:

Све́том твои́м озари́ на́ша, Ипа́тие, помышле́ния, соверша́ющих твою́ па́мять боже́ственную и светоно́сную, и изба́ви огня́, и му́ки, и вся́каго искуше́ния мольба́ми твои́ми благоче́стно тя́ блажа́щия.

И ны́не и при́сно и во ве́ки веко́в. Ами́нь.

Богородичен: Возвы́си благода́ть Твою́, Чи́стая, возвели́чи мольбу́ и приведи́ чи́ны Ангельския Влады́це, апо́стол же и проро́к ли́ки и вся́ пра́ведники с му́ченики, я́ко да спасе́мся, чту́щии Тя́.

Молитва священномученику Ипатию, епископу Гангрскому

Трисо́лнечного Све́та светоза́рная звездо́, вводя́щая в мир Трисо́лнечный Свет апо́стольскими твои́ми, Богоева́нгельскаго пропове́дания священноуче́нии, священному́чениче, иера́рше Христо́в, Богоблаже́нне Ипа́тие. Ты прия́л еси́ от Святы́е Тро́ицы равноапо́стольную благода́ть, серафи́мскую в горе́честии к Бо́гу любо́вь, я́ко же верхо́внейший апо́столов Петр, и херуви́мскую многоочи́тую во уче́нии прему́дрость, я́ко же вторы́й Па́вел. Просвети́вый прему́дрым твои́м благоче́стия уче́нием тьмочи́сленныя наро́ды, присноусе́рдно подража́я всеми́рнаго Учи́теля, Го́спода Бо́га и Спа́са на́шего Иису́са Христа́. Его́ же ра́ди всесмире́нно молю́ богоподража́тельное оте́ческое твое́ благоутро́бие: при́зри ми́лостивно богосве́тлыми очи́ма твои́ма на су́щее недосто́инство мое́, я́ко всечадолюби́вый по Бо́зе оте́ц, и присноусе́рдный на́шего спасе́ния наста́вниче, и всех в Го́рних правонеизме́нный строи́тель, адама́нтная Правосла́вию стена́ и пресве́тлый столп, вводя́щий второно́ваго Изра́иля во всепросветле́йший Го́рний Сио́н. Потщи́ся вско́ре помоществова́ти на бра́нех во́инству на́шему. Проси́ же при́сно у Святы́я Тро́ицы всем правосла́вным христиа́ном ми́ра и тишины́, душе́вного спасе́ния и многоле́тняго в телеси́ здра́вия, возду́ха благорастворе́ния, земли́ благопло́дия, непло́дствующим благоча́дия, и в зако́не Госпо́днем воспита́ния, и всех благи́х умноже́ния. А по́сле жития́ коему́ждо жи́зни сея́ сподо́би святы́ми твои́ми моли́твами улучи́ти христиа́нскую кончи́ну бла́гу, непосты́дну и ми́рну, со всепреподо́бнейшим испове́данием и со прича́стием Святы́х Безсме́ртных Небе́сных и Животворя́щих Христо́вых Та́ин, и с молитвома́слием безпрепя́тное возду́шных мыта́рств проше́ствие, насле́дие со святы́ми всера́достныя присносу́щныя жи́зни, в ней же ку́пно со А́нгельскими чи́нми непреста́нныя хвалы́ вознесе́м Отцу́ со Единоро́дным Его́ Сы́ном и с Пресвяты́м, Благи́м и Животворя́щим Его́ Ду́хом, и тебе́, вели́кое твое́ оте́ческое ми́лостивое заступле́ние, ны́не, и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Священномученику Ипатию, епископу Гангрскому