Каноны. 12 апреля.

Канон преподобному Иоанну, Лествичнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Иоа́нне, о́тче на́ш, моли́ Христа́ Бо́га спасти́ся душа́м на́шим.

Ин тропа́рь, гла́с 4:

Яко боже́ственную ле́ствицу, обрето́хом, Иоа́нне преподо́бне, твоя́ боже́ственныя доброде́тели, к небеси́ возводя́щия на́с: доброде́телей бо ты́ бы́л еси́ проображе́ние. Те́м моли́ Христа́ Бо́га, да спасе́т ду́ши на́ша.

Кано́н. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Иоанне, моли́ Бо́га о нас.

Во све́т невеще́ственный и у́мный от се́тования веще́ственных восте́к, Иоа́нне преподо́бне, моли́твами твои́ми, су́щими ко Го́споду, просвети́ мя.

Припев: Преподобне отче Иоанне, моли́ Бо́га о нас.

Яко воздержа́ния сла́дость сса́в, отри́нул еси́ го́ресть страсте́й, те́мже па́че ме́да и со́та услажда́еши, о́тче, чу́вства на́ша.

Сла́ва Отцу́ и Сы́ну и Свято́му Ду́ху:

Возше́д на высоту́ доброде́телей и долере́вностныя поплева́в сла́сти, сла́дость яви́лся еси́ спасе́ния, преподо́бне о́тче, па́стве твое́й.

И ны́не и при́сно и во ве́ки веко́в. Ами́нь.

Богородичен: Прему́дрость и Сло́во Отчее несказа́нно ро́ждшая, души́ моея́ лю́тую уврачу́й я́зву и се́рдца боле́знь укроти́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподобне отче Иоанне, моли́ Бо́га о нас.

Попали́л еси́ у́глем поще́ния, преподо́бне, страсте́й те́рние и гре́еши мона́шествующих состоя́ния.

Припев: Преподобне отче Иоанне, моли́ Бо́га о нас.

Миро освяще́ния, от по́стнических, преподо́бне, арома́т ве́сь сложи́лся еси́ в воню́ благоуха́ния Бо́жия.

Сла́ва Отцу́ и Сы́ну и Свято́му Ду́ху:

В зако́нех обуче́ния поуча́яся, стра́сти погрузи́л еси́, я́коже ины́я ны́не фараони́ты, тече́нием сле́з твои́х.

И ны́не и при́сно и во ве́ки веко́в. Ами́нь.

Богородичен: Уста́ви мое́ нестоя́нное помысло́в, Чи́стая, смуще́ние, Ма́ти Бо́жия, к Сы́ну Твоему́ направля́ющи движе́ние.

Конда́к, гла́с 1.

Плоды́ присноцвету́щия, от твоея́ кни́ги принося́ уче́ния, прему́дре, услажда́еши сердца́, си́м с трезве́нием вне́млющих, блаже́нне: ле́ствица бо е́сть, ду́ши возводя́щая от земли́ к небе́сней и пребыва́ющей сла́ве ве́рою чту́щих тя́.

Та́же, седа́лен, гла́с 8.

Виде́нием и дея́нием преесте́ственне просия́в, облиста́еши уче́ньми, зако́ны на́м положи́л еси́ богому́дрыя, блаже́нне, доброде́телей добро́ты степе́ни поста́вль и зло́бы ле́сти показа́в и ловле́ния. Отону́дуже возво́диши твои́м после́дующия боже́ственным уче́нием от страсте́й к безстра́стию, Иоа́нне равноа́нгельне, моли́ Христа́ Бо́га прегреше́ний оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и, я́ко младе́нца, дои́ши Зижди́теля и Го́спода. Те́мже, Ангельский и челове́ческий ро́д, досто́йно сла́вим пресвято́е Рождество́ Твое́, и согла́сно вопие́м Ти́: моли́ Христа́ Бо́га согреше́ний оставле́ние дарова́ти, покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Иоанне, моли́ Бо́га о нас.

Яко цве́тник благово́ннейший и доброде́телей ра́й одушевле́нный, воздержа́ние процве́л еси́, и́мже вся́ пита́еши, чту́щия тя́.

Припев: Преподобне отче Иоанне, моли́ Бо́га о нас.

Законоположи́теля обуче́ния и мона́хов пра́вило кротча́йшее, я́ко Моисе́я тя́ и Дави́да, и́стинно стяжа́вше, о́тче, ублажа́ем.

Сла́ва Отцу́ и Сы́ну и Свято́му Ду́ху:

Насажде́н на вода́х воздержа́ния, яви́лся еси́, блаже́нне, розга́, о́тче, благоцве́тнейшая, благоче́стия гро́зды произнося́щая.

И ны́не и при́сно и во ве́ки веко́в. Ами́нь.

Богородичен: Под ле́том бы́вша, от Отца́ безле́тно возсия́вша, Богома́ти, на́м родила́ еси́, Его́же моли́ спасти́ пою́щия Тя́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Иоанне, моли́ Бо́га о нас.

Погаси́в вся́ стра́сти росо́ю подвиго́в твои́х, о́тче блаже́нне, оби́льно вже́г огне́м любве́ и ве́ры воздержа́ния свети́льник, и просвеще́ние безстра́стия, и дне́ сы́н бы́л еси́.

Припев: Преподобне отче Иоанне, моли́ Бо́га о нас.

Ве́ры гро́зд боже́ственным земледе́ланием твои́м, о́тче, воспита́л еси́, и в точи́ла вложи́л еси́, и изгне́л еси́ труды́ обуче́ния, и, ча́шу испо́лнив духо́вную воздержа́ния, весели́ши сердца́ па́ствы твоея́.

Сла́ва Отцу́ и Сы́ну и Свято́му Ду́ху:

Претерпе́в до́блественно прило́ги и я́звы неви́димых враго́в, яви́лся еси́ сто́лп терпе́ния, утвержда́я па́ству твою́ па́лицею боже́ственною на па́житех воздержа́ния и на воде́ воспитова́я, блаже́нне.

И ны́не и при́сно и во ве́ки веко́в. Ами́нь.

Богородичен: Ре́чем Твои́х усте́н, Всечи́стая, после́дующе, Тя́ ублажа́ем: с Тобо́ю бо вои́стинну вели́чия сотвори́вый Госпо́дь возвели́чи Тя́, и и́стинную Бо́жию Ма́терь рожде́йся из чре́ва Твоего́ показа́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Иоанне, моли́ Бо́га о нас.

Собра́л еси́ в души́ Боже́ственное бога́тство Ду́ха — непоро́чную моли́тву, чистоту́, че́стность, бде́ние всегда́шнее, воздержа́ния труды́. Имиже до́м позна́лся еси́ Бо́жий.

Припев: Преподобне отче Иоанне, моли́ Бо́га о нас.

Вещества́ до́льняго, прему́дре, прете́кл еси́ ху́дость, невеще́ственною же моли́твою у́м впери́в, и вы́шняго упокое́ния яви́лся еси́ насле́дник соверше́нством жития́.

Сла́ва Отцу́ и Сы́ну и Свято́му Ду́ху:

По́тами по́стническими у́глие стре́л вра́жиих угаси́л еси́ вои́стинну и, о́гнь ве́ры вже́г, попали́л еси́ неве́рия ересе́й шата́ния.

И ны́не и при́сно и во ве́ки веко́в. Ами́нь.

Богородичен: Возсия́ от Сио́на вы́шняго благоле́пие предложе́нием пло́ти по соедине́нию неизрече́нному, из Тебе́, Неискусобра́чная, обложе́нное, и ми́р просвети́.

Конда́к, гла́с 4.

На высоте́ Госпо́дь воздержа́ния и́стинна тя́ положи́, я́коже звезду́ неле́стную, световодя́щую концы́, наста́вниче Иоа́нне, о́тче на́ш.

Икос:

До́м Бо́жий я́ко вои́стинну тебе́ самаго́ соде́лал еси́, о́тче, боже́ственными твои́ми доброде́тельми я́ве украси́в, я́ко зла́то све́тлое, ве́ру, наде́жду и любо́вь и́стинную, Боже́ственныя зако́ны излага́я, воздержа́нием обучи́вся, я́ко безпло́тен, ра́зум, му́жество, целому́дрие стяжа́в, смире́ние, и́мже возвы́сился еси́. Те́мже и, просвети́вся моли́твами непреста́нными, виде́нии та́йными впери́лся еси́ и небе́сныя прия́л еси́ селе́ния, наста́вниче Иоа́нне, о́тче на́ш.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобне отче Иоанне, моли́ Бо́га о нас.

На зла́це вы́шняго Ца́рствия ста́до, о́тче, воспита́л еси́ и, жезло́м догма́тов зве́ри отгна́в ересе́й, воспе́л еси́: оте́ц на́ших Бо́же, благослове́н еси́.

Припев: Преподобне отче Иоанне, моли́ Бо́га о нас.

В го́рний вше́л еси́ неве́стнический черто́г Ца́рства Христо́ва, оде́ждею облече́н, досто́йною зва́вшаго, в не́мже и возле́гл еси́, вопия́: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Невла́жная грехми́ река́ яви́лся еси́ воздержа́ния, о́тче, по́мыслы потопля́я и скве́рну очища́я вопию́щих ве́рою: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Из чре́ва Твоего́ про́йде воплоти́выйся, Де́во, все́х Госпо́дь. Те́мже Тя́, Богоро́дицу, му́дрствующе правосла́вно, Сы́ну Твоему́ зове́м: оте́ц на́ших Бо́же, благослове́н еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподобне отче Иоанне, моли́ Бо́га о нас.

Сто́лп тя́ одушевле́нный я́ко вои́стинну и о́браз воздержа́ния, о́тче, стяжа́вше, вси́ твою́ па́мять почита́ем, Иоа́нне.

Припев: Преподобне отче Иоанне, моли́ Бо́га о нас.

Мно́жество ра́дуется мона́хов, и лику́ет преподо́бных собо́р и пра́ведных, вене́ц бо досто́йно с си́ми прия́л еси́.

Сла́ва Отцу́ и Сы́ну и Свято́му Ду́ху:

Укра́шен доброде́тельми, в неве́стник неизрече́нныя сла́вы возше́л еси́, пе́снь воспева́я Христу́ во ве́ки.

И ны́не и при́сно и во ве́ки веко́в. Ами́нь.

Богородичен: По́мощи я́же от Тебе́ тре́бующия не пре́зри, Де́во, пою́щия и превознося́щия Тя́ во ве́ки.

Песнь 9

Ирмос: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Припев: Преподобне отче Иоанне, моли́ Бо́га о нас.

Вра́чь боля́щих в прегреше́ниих от Бо́га, блаже́нне, губи́тель же яви́лся еси́ и прогони́тель лука́вых духо́в, те́мже тя́ ублажа́ем.

Припев: Преподобне отче Иоанне, моли́ Бо́га о нас.

Зе́млю, я́коже тли́ жили́ще, оста́вил еси́, о́тче, и в земли́ всели́лся еси́ кро́тких, и с ни́ми весели́шися, боже́ственныя наслажда́яся сла́дости.

Сла́ва Отцу́ и Сы́ну и Свято́му Ду́ху:

Дне́сь де́нь пра́зднственный вся́ бо созыва́ет мона́шествующих стада́ в ли́к духо́вный, трапе́зу и сне́дь нетле́нныя жи́зни.

И ны́не и при́сно и во ве́ки веко́в. Ами́нь.

Богородичен: В Тебе́ всели́вся, Всенепоро́чная, пре́жде родонача́льники злонра́внаго прельсти́вшаго человекоуби́йцу низложи́вый роди́ся и вся́ ны́ спасе́.

Свети́лен.

Ми́ра пристра́стия, я́ко от скве́рны уклони́лся еси́ и, а́лчбою пло́ть увяди́в, обнови́л еси́ души́ кре́пость, преподо́бне, и сла́вою обогати́лся еси́ небе́сною, приснопа́мятне. Те́мже не преста́й моля́ся о на́с, Иоа́нне.

Богородичен:

Госпо́дственно Богоро́дицу Тя́ испове́дуем, Влады́чице, Тобо́ю спа́сшиися, и́бо Бо́га неизрече́нно родила́ еси́, разо́ршаго Кресто́м сме́рть, к Себе́ же привле́кшаго преподо́бных собо́ры, с ни́миже Тя́ восхваля́ем, Де́во.

Молитва

О свяще́нная главо́, преподо́бне о́тче, преблаже́нне а́вво Иоанне, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.