Каноны. 10 апреля.

Канон преподобному Стефану чудотворцу, игумену Триглийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Стефа́не, дух твой.

Стихи́ры свята́го Стефа́на, гла́с 4.

Мона́х и́стиннейший, / звезда́ светле́йшая / и исто́чник бы́в умиле́ния, / любве́ яви́лся еси́ испо́лнен / и кро́ток, и ти́х, / сострада́телен и смире́н, / беззло́бив, непоро́чен, о́тче Стефа́не. / Сего́ ра́ди Христо́с тя́ / преподо́бных поставля́ет стадо́м па́стыря, / чудоде́йствии почита́ема.

Бде́ние всено́щное / и воздержа́ние неизрече́нно, / моли́тву нему́тну, / житие́ боже́ственно, / ве́ру, наде́жду и́скренню, / правосла́вну му́дрость, / чу́дно пребыва́ние / и велича́йшее сострада́ние, о́тче, име́л еси́, / и у́мер, и пре́жде конца́ облиста́в во зна́мениих пресла́вных. / Те́мже тя́ почита́ем, преподо́бне Стефа́не.

Яко звезду́ многосве́тлу, / и я́ко со́лнце незаходи́мо, / и я́ко не́бо одушевле́нное, / боже́ственными чудесы́, я́ко звезда́ми, укра́шено, / и я́ко цве́тник благово́нный, и ра́й сла́дости, / я́ко исто́чник свяще́ния, / я́ко превели́ка врача́ немощству́ющих, / я́ко па́стыря и до́браго на́шего предста́теля, / восхваля́ем тя́, Стефа́не.

Сла́ва, и ны́не, богоро́дичен, гла́с то́йже:

Ту́чами Ду́ха Пресвята́го, Пречи́стая, / мою́ мы́сль ороси́, / Яже ка́плю ро́ждшая, Христа́, / неизче́тно безме́рная беззако́ния челове́ков / щедро́тами измы́вшую, / изсуши́ исто́чник страсте́й мои́х / и пото́ка мя́ сподо́би / пи́щи живы́я при́сно / моли́твами Твои́ми.

Кано́н, свята́го Стефа́на. Глас 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Преподобне отче Стефане, моли́ Бо́га о нас.

Боже́ственную па́мять твою́, богому́дре о́тче, ве́рно пра́зднующе, все́х Го́спода при́сно сла́вим, тя́ просла́вльшаго мно́гими, Стефа́не, чудесы́.

Припев: Преподобне отче Стефане, моли́ Бо́га о нас.

Ум тво́й, манове́нии боже́ственными, всему́дре, обожа́емь, всеконе́чно отврати́ся от страсте́й пло́ти и Ангела тя́ на земли́ показа́, Стефа́не.

Припев: Преподобне отче Стефане, моли́ Бо́га о нас.

Подъя́л еси́ по́стничества боле́зни, о́тче, и стра́сти умертви́л еси́ пло́ти неудобоудержа́нныя, и в безстра́стие, я́ко во оде́жду све́тлу, я́ве оде́ялся еси́.

Сла́ва Отцу́ и Сы́ну и Свято́му Ду́ху:

Распе́н у́ды твоя́ воздержа́нием, Христу́, о́тче, пожи́л еси́, Кресто́м сме́рть погу́бльшему и исцеле́ний оби́льною благода́тию обогати́вшему тя́.

И ны́не и при́сно и во ве́ки веко́в. Ами́нь.

Богородичен: Зачала́ еси́, Пречи́стая, неизрече́нным сло́вом вся́ содержа́щаго земны́я концы́ и Сего́ родила́ еси́, Его́же моли́ приле́жно поми́ловати ны́.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Преподобне отче Стефане, моли́ Бо́га о нас.

Де́лы честны́ми и исправле́нии доброде́тельными, о́тче, просия́л еси́, я́коже звезда́ всесве́тлая, мона́шествующих собо́ру и просвети́л еси́ чуде́сными сия́нии подсо́лнечную.

Припев: Преподобне отче Стефане, моли́ Бо́га о нас.

Си́лою благода́ти Ду́ха враги́ безпло́тныя низложи́л еси́, и возне́слся еси́ благосла́вно смире́нною му́дростию, и чуде́с самоде́латель, о́тче му́дре, бы́л еси́.

Сла́ва Отцу́ и Сы́ну и Свято́му Ду́ху:

Ерети́чествующих, о́тче, уста́ и́стины сло́вом загради́л еси́ и, гоне́ния претерпе́в, вене́ц боже́ственный восприя́л еси́, кроме́ я́звы бы́в, му́дре, му́ченик изря́днейш.

И ны́не и при́сно и во ве́ки веко́в. Ами́нь.

Богородичен: Да Бо́г Челове́к бу́дет, Бо́г бы́сть Челове́к, из Тебе́, еди́ныя Чи́стыя, нача́ло прие́м Безнача́льный. Сего́ ра́ди Тя́, Де́во, ве́рнии, ублажа́ем.

Пе́снь 4.

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди.

Припев: Преподобне отче Стефане, моли́ Бо́га о нас.

Ка́плями свяще́нных твои́х сле́з напои́вся, дре́во яви́лся еси́, Стефа́не, плодови́то, му́дре, плоды́ принося́ доброде́телей благово́нныя, и чудеса́ безчи́сленна источа́еши. Те́мже благоче́стно тя́ почита́ем.

Припев: Преподобне отче Стефане, моли́ Бо́га о нас.

Яко боже́ственный зри́тся ра́й, му́дре, хра́м, име́я твои́х моще́й ра́ку, цве́ты разли́чныя принося́ чуде́с, и́миже сердца́ наслажда́ются ве́рою, Стефа́не, при́сно хва́лящих тя́.

Сла́ва Отцу́ и Сы́ну и Свято́му Ду́ху:

Слепы́я разреша́еши и уставля́еши лю́тыя челове́ков неду́ги в сла́ву Христо́ву, от Него́же, благода́тию трудо́в обогати́вся, возвели́чился еси́, просвети́лся еси́ и просла́вился еси́, сла́во мона́шествующих, о́тче на́ш.

И ны́не и при́сно и во ве́ки веко́в. Ами́нь.

Богородичен: Свята́я Богоро́дице, освяти́ ны, Яже Пресвята́го ро́ждши пло́тию, уподо́битися восхоте́вша челове́ком, и небе́снаго жи́тельства вся́ покажи́, Пречи́стая, прича́стники моли́твами Твои́ми.

Пе́снь 5

Ирмос: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Преподобне отче Стефане, моли́ Бо́га о нас.

Миродохнове́нен бы́в боже́ственными доброде́тельми, источи́л еси́, му́дре, по успе́нии ми́ро благово́нное, удивля́емь ве́рными челове́ки, любо́вию честву́ющими тя́.

Припев: Преподобне отче Стефане, моли́ Бо́га о нас.

Велича́йшими показа́нии чуде́с стра́шных, Стефа́не всему́дре, просия́л еси́ и пре́жде сме́рти, досточу́дне, и по изше́ствии, и свяще́нном твое́м погребе́нии.

Сла́ва Отцу́ и Сы́ну и Свято́му Ду́ху:

Свя́то соверши́в твое́ житие́ о Христе́, Стефа́не богому́дре, о́тче на́ш, со святы́ми всели́лся еси́ и ны́не освяща́еши ве́рою честву́ющия тя́.

И ны́не и при́сно и во ве́ки веко́в. Ами́нь.

Богородичен: Ро́ждши, Пренепоро́чная, Бо́га Емману́ила, Челове́ка я́ве за милосе́рдие бы́вша, Сего́ моли́ я́ко Человеколю́бца, Чи́стая, уще́дрити согре́шшия.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́.

Припев: Преподобне отче Стефане, моли́ Бо́га о нас.

Исправля́еши, о́тче, хромы́я, вооча́еши слепы́я, ходи́ти же твори́ши разсла́бленныя, о Христе́, и отгоня́еши лука́выя ду́хи, Стефа́не преподо́бне.

Припев: Преподобне отче Стефане, моли́ Бо́га о нас.

Струя́ истека́ет при́сно, я́ко от исто́чника чи́ста, от честны́я твоея́ ра́ки исцеле́ний бога́тно, блаже́нне, страсте́й изсуша́ющи вся́к пото́к.

Сла́ва Отцу́ и Сы́ну и Свято́му Ду́ху:

Чу́ден чудоде́латель и па́стырь и́стинен, о́тче Стефа́не, я́влься, сохраня́й при́сно ста́до твое́, е́же совокупи́л еси́ мно́гими по́ты твои́ми.

И ны́не и при́сно и во ве́ки веко́в. Ами́нь.

Богородичен: На Тя́, я́ко до́ждь на руно́, соше́д, Богоро́дице, Спа́с, изсуши́ я́ве то́ки безбо́жия, ду́ши же напои́в при́сно чту́щих Тя́.

Седа́лен, гла́с 1.

Яко со́лнце, све́тло возсия́вши, о́тче, па́мять твоя́, ве́рных сердца́ просвеща́ет, стра́сти отгоня́ющи и тмы́ изъе́млющи. Юже ве́рою чи́стою соверша́ющия покры́й, сохрани́ от искуше́ний жите́йских на́с, о́тче Стефа́не.

Пе́снь 7.

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Преподобне отче Стефане, моли́ Бо́га о нас.

Священноде́йствовал еси́, я́коже тебе́ сама́го у́глием по́стническаго пребыва́ния, ве́сь Христо́во показа́лся еси́, о́тче, благово́ние и ве́рных ли́ца благово́нствуеши при́сно, чудоде́йствуя па́че ума́.

Припев: Преподобне отче Стефане, моли́ Бо́га о нас.

Правосла́вия сия́я блиста́нии, отгна́л еси́ тму́ ересе́й, му́дре, и, гоне́ния на ле́та мно́жайшая претерпе́в, му́ченик без кро́ве бы́л еси́. Те́мже ве́рно тя́ восхваля́ем.

Припев: Преподобне отче Стефане, моли́ Бо́га о нас.

Терпе́ние стяжа́в мно́гое, воздержа́ние, ве́ру и любо́вь и́стинну, яви́лся еси́ оте́ц сиро́т, вдови́ц предста́тель сострада́телен и смире́н, Стефа́не, мона́хов сла́во и похвало́.

Сла́ва Отцу́ и Сы́ну и Свято́му Ду́ху:

Твоему́ удиви́ся по́лк злоу́мных всено́щному стоя́нию и моли́твенному пожда́нию, слеза́м и воздыха́нию к Зижди́телю и́стинней любви́, и́миже низложи́л еси́ те́х, Стефа́не, кова́рствия.

И ны́не и при́сно и во ве́ки веко́в. Ами́нь.

Богородичен: Ка́ко пита́еши млеко́м Сы́на безо́тча, пита́ющаго вся́ко дыха́ние, Ма́ти Чи́стая? Ка́ко на рука́х но́сиши содержа́щаго вся́? Па́че ума́ чу́до Твое́. Те́м пое́м при́сно вели́чия Твоя́.

Пе́снь 8.

Ирмос: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Преподобне отче Стефане, моли́ Бо́га о нас.

Преподо́бно преподо́бная, всеблаже́нне, соверша́я, преподо́бным сочта́лся еси́ и все́м избра́нным, с ни́миже тя́ почита́ем и ра́це моще́й твои́х покланя́ющеся, Стефа́не о́тче богоно́се.

Припев: Преподобне отче Стефане, моли́ Бо́га о нас.

Ума́ чистоту́ стяжа́в, му́дре, Ду́ха зерца́ло бы́л еси́ красно́, Сего́ явле́ния прие́мля и лю́ди просвеща́я твои́ми уче́нии.

Припев: Преподобне отче Стефане, моли́ Бо́га о нас.

Ви́дится пресла́вное, всеблаже́нне, тобо́ю, всему́дре, соверша́емое: от еди́наго бо твоего́ жена́ виде́ния прису́щаго е́й неду́га отре́шшся, пра́во ше́ствоваше.

Сла́ва Отцу́ и Сы́ну и Свято́му Ду́ху:

Тро́ичен: Воспои́м Безнача́льнаго Отца́, и Сы́на, и Ду́ха Свята́го, неразде́льное нача́ло, присносу́щную держа́ву, Триипоста́сное Естество́, еди́ну сла́ву и еди́но Ца́рство.

И ны́не и при́сно и во ве́ки веко́в. Ами́нь.

Богородичен: Вопло́щся Безпло́тный из Тебе́ боголе́пне, Его́же моли́, Пречи́стая, стра́сти пло́ти моея́ умертви́ти и оживи́ти мою́ умерщвле́нную ду́шу грехми́.

Песнь 9

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Преподобне отче Стефане, моли́ Бо́га о нас.

Стопа́м после́дуя, богоно́се, благоче́стно и преподо́бно пожи́вшим на земли́, кро́ток, незло́бив яви́лся еси́, сострада́телен, и смире́н, и ти́х, Стефа́не, и любве́ испо́лнен Боже́ственныя, сего́ ра́ди тя́ ве́рно восхваля́ем.

Припев: Преподобне отче Стефане, моли́ Бо́га о нас.

Якоже сладково́нное мѵ́ро, я́ко пречи́стый кри́н, я́ко ши́пок, о́тче, благоцвету́щь, благово́ние испуща́еши от честны́я твоея́ ра́ки безчи́сленных врачева́ний, злосмра́дныя неду́ги отгоня́ ве́рою приступа́ющих тебе́ те́пле.

Припев: Преподобне отче Стефане, моли́ Бо́га о нас.

Тя́, па́стыря боже́ственнаго и подража́теля вели́каго Началопа́стыря Христа́, мо́лим, богому́дре: су́щия твоего́ ста́да ны́не о́вцы, на́с спаса́й от лука́вых волко́в святы́ми хода́тайствы твои́ми при́сно.

Сла́ва Отцу́ и Сы́ну и Свято́му Ду́ху:

Всесвята́я твоя́ па́мять, я́коже со́лнце ве́лие, возсия́вши, све́тло озаря́ет тва́рь, ю́же соверша́юще благоче́стно, вопие́м ти́, Стефа́не: моли́твами твои́ми все́х мы́сли озари́в, покры́й и сохрани́ ны́.

И ны́не и при́сно и во ве́ки веко́в. Ами́нь.

Богородичен: Грехолюби́в сы́й в нераде́нии жи́в, и Суди́ща, Чи́стая, неумы́тнаго трепе́щу, на не́мже мя́ соблюди́ Твои́ми святы́ми мольба́ми, Богоневе́сто, неосужде́нна, да я́ко Предста́тельницу при́сно ублажа́ю Тя́.

Молитва

О свяще́нная главо́, преподо́бне о́тче, преблаже́нне а́вво Стефане, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.