Каноны. 10 апреля.
Канон святому преподобномученику Евстратию Печерскому.
![Святому преподобномученику Евстратию Печерскому Святому преподобномученику Евстратию Печерскому](img_i/014.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 7:
По́стником и му́чеником яви́лся еси́ похвала́, преподо́бне Евстра́тие, пре́жде бо воздержа́нием пло́ть умертви́в, после́довал еси́ Христу́, нося́ кре́ст сво́й. Последи́ же и са́м на кре́ст вознесе́н бы́в и копие́м в ре́бра прободе́н, в ру́це Бо́жии ду́шу преда́л еси́. Колесни́цею о́гненною возноси́мь на небеса́, сугу́бо венча́лся еси́ от Христа́ Бо́га и Спа́са ду́ш на́ших.
Стихи́ра, гла́с 6:
Дне́сь гора́ Пече́рская весели́тся, содержа́щая мо́щи твоя́, я́ко многоце́нное сокро́вище, и просвеща́ется заря́ми твои́х страда́ний, цве́ты пе́сней духо́вных тебе́ нося́ще и глаго́люще: уго́дниче Христо́в, о́тче на́ш Евстра́тие, предстоя́ все́х Влады́це, непреста́й моля́ся о на́с ко Го́споду, низпосла́ти душа́м на́шим ве́лию ми́лость.
Кано́н, гла́с 1.
Пе́снь 1.
Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.
Припев: Преподобномучениче Евстратие, моли́ Бо́га о нас.
Воскресе́ния дне́ и прича́стник све́та хотя́ бы́ти, преподо́бне, в де́нь стра́сти Влады́чни возне́слся еси́ на кре́ст, и сообрази́лся еси́ стра́сти Христо́вей, победи́в ми́р, и ны́не, прича́стник сы́й сла́вы неизрече́нныя, весели́шися, побе́дную пе́снь пою́щи.
Припев: Преподобномучениче Евстратие, моли́ Бо́га о нас.
Ничто́же в ми́ре се́м многомяте́жном возлюби́л еси́, преподо́бне, я́ко Кре́ст Христо́в, и, того́ име́я в похвалу́, со апо́столом взыва́л еси́: мне́ да не бу́дет хвали́тися, то́кмо о Кресте́ Госпо́днем. О не́мже весели́шися, пе́снь побе́дную пою́щи.
Припев: Преподобномучениче Евстратие, моли́ Бо́га о нас.
Ко кресту́ пригвожде́н сы́й от иуде́й, всеблаже́ннейший о́тче, пригвозди́л еси́ вся́ теле́сныя стра́сти, я́ко тебе́ со апо́столом глаго́лати: мне́ ми́р распя́тся, и а́з ми́ру. Те́мже досто́йно ны́не с Воскре́сшим весели́шися, побе́дную пою́щи.
Сла́ва Отцу́ и Сы́ну и Свято́му Ду́ху:
От любостра́стнаго Еги́пта ми́ра сего́ изше́д, о кресте́ всебу́рное того́ безмяте́жно преше́л еси́ мо́ре, свя́те, вопреки́ же написа́в пригвожде́нныма дла́ньма, погрузи́л еси́ мы́сленнаго фарао́на с возду́шными во́и и ны́не ра́дуешися, побе́дную пою́щи.
И ны́не и при́сно и во ве́ки веко́в. Ами́нь.
Богородичен: Любостра́стнаго ми́ра сего́ изше́д, а́ки от Еги́пта, возвраща́юся на пе́рвая, да чре́ву угожда́ю, пита́яся ско́тски; да́ждь ми́, Богоневе́стная Де́во, поне́ ма́ло уклони́тися от си́х, да, свобо́дь сы́й, принесу́ Ти́ хвале́ние, побе́дную пою́щи.
Пе́снь 3.
Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.
Припев: Преподобномучениче Евстратие, моли́ Бо́га о нас.
Прииди́те ко Мне́, вси́ тружда́ющиися, — Ре́кшему после́довал еси́, о́тче, и Того́ Кресто́м разгна́л еси́ враги́ мы́сленныя, и́же, до конца́ побежде́нни, возврати́шася со студо́м. Моли́ и о на́с, да и мы́ проти́ву те́х ополче́ния ста́нем, на сие́ бо о Христе́ утвержда́емся.
Припев: Преподобномучениче Евстратие, моли́ Бо́га о нас.
Кре́ст возложи́в на ра́мо, свя́те, ве́рою несумне́нною к Еди́ному любо́вию привяза́лся еси́, да Христа́ приобря́щеши, и Того́ по жела́нию обре́л еси́ те́сною стезе́ю, ю́же проше́л еси́, не запе́нся, имы́й кре́ст держа́ву и утвержде́ние.
Припев: Преподобномучениче Евстратие, моли́ Бо́га о нас.
Облеки́йся во и́ноческий о́браз, ми́ра обнажи́лся еси́, блаже́нне, и, ле́гце проше́д пу́ть, во обетова́нную зе́млю, в Пече́рскую оби́тель, точа́щую, а́ки ме́д и млеко́, уче́ния богоно́сных оте́ц, от ни́хже напита́вся, бы́л еси́ кре́пок, те́х уче́нием сотвори́, да и мы́ утвержда́емся.
Сла́ва Отцу́ и Сы́ну и Свято́му Ду́ху:
Глаго́лом моли́твы и посто́м чу́вственнаго врага́ покори́в ду́ху, смире́нием же и послуша́нием мы́сленнаго Амали́ка победи́в, бы́л еси́, о́тче, уго́ден Влады́це своему́ и от Него́ прия́л кре́ст, ору́жие непобеди́мое, о не́мже и мы́ утвержда́емся.
И ны́не и при́сно и во ве́ки веко́в. Ами́нь.
Богородичен: Коле́блемь сы́й вра́жиими прило́ги вы́ну, утвержде́ния не имы́й а́з, стра́стный, к Тебе́ прибега́ю, Ма́ти Бо́жия: Ты́ бо еси́ ве́рным Необори́мая Стена́, о не́йже утвержда́емся.
Седа́лен, гла́с 2:
Победоно́снаго страда́льца прииди́те, лю́дие, воспое́м па́мять, пе́сньми и пе́нии де́нь весе́лия его́ провожда́юще, от плаче́внаго бо удо́лия сего́ к неконча́емей ра́дости пре́йде, и, предстоя́ Влады́чню престо́лу, вопие́т к на́м: подража́тели мне́ быва́йте, я́коже а́з Христу́, Иже пода́ст все́м бога́тую Свою́ ми́лость.
Сла́ва, и ны́не, Богородичен:
В ми́ре стра́стное житие́ имы́й, обурева́юся смертоно́сных ве́тров волна́ми, Ко́рмчия ро́ждшая, Христа́, к ти́хому приста́нищу упра́ви живо́т мо́й, молю́ся, и пода́ждь ми́ бога́тую Твою́ ми́лость.
Пе́снь 4.
Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.
Припев: Преподобномучениче Евстратие, моли́ Бо́га о нас.
Ве́дый, преподо́бне, невоздержа́ния ра́ди пе́рваго во а́д все́льшагося челове́ка, приложи́лся еси́ воздержа́нию и поще́нию зе́льному и отсю́ду стяжа́л и́мя по́стник, зане́ сло́вом Бо́жиим па́че, не́жели бра́шном, пита́лся еси́, пою́щи Христу́, я́ко Всеси́лен.
Припев: Преподобномучениче Евстратие, моли́ Бо́га о нас.
Вы́шняго попуще́нием плене́н, свя́те, бы́в от по́ловцов, апо́стольски взыва́л еси́: свобо́дь е́сть, и́же пленя́ет у́м сво́й в послуша́ние Христо́во. Те́м в ско́рби не изнемо́гал еси́, но па́че, судьба́м Бо́жиим дивя́ся, славосло́вил еси́ Христа́, я́ко Всеси́лен.
Припев: Преподобномучениче Евстратие, моли́ Бо́га о нас.
Пре́даннаго Иису́са всегда́ нося́ на те́ле свое́м о́браз, про́дан бы́л еси́ в гре́ческую зе́млю, во гра́д Ко́рсун, не́коему богоуби́йце иуде́янину, и то́й тебе́ тща́шеся отврати́ти от любве́ Бо́жия, ея́же ра́ди и на сме́рть гото́в бы́л еси́, пою́щи: воскре́се Христо́с, я́ко Всеси́лен.
Сла́ва Отцу́ и Сы́ну и Свято́му Ду́ху:
Затворе́н бы́в в темни́це с про́чими христиа́ны и гла́дом му́чимь от евре́ина, терпя́, сла́дце ре́кл еси́: кто́ мя разлучи́т от любве́ Христо́вы? ни гла́д, ни сме́рть, ни теснота́ — вся́ бо ма́ла су́ть сия́ к хотя́щей сла́ве яви́тися в на́с, пою́щих: воскре́се Христо́с, я́ко Всеси́лен.
И ны́не и при́сно и во ве́ки веко́в. Ами́нь.
Богородичен: Плене́н бы́в от враго́в мы́сленных и бли́з уже́ су́щи а́довы темни́цы, к Тебе́ обра́щся, вопию́: Ма́ти Бо́жия, внегда́ возврати́ши пле́н души́ моея́, тогда́ язы́к мо́й весе́лия испо́лнится и воспое́т: воскре́се Сы́н Тво́й, я́ко Всеси́лен.
Пе́снь 5
Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.
Припев: Преподобномучениче Евстратие, моли́ Бо́га о нас.
Утреневал еси́ любо́вию ко Христу́, до́блественне Евстра́тие, проти́вящеся понужда́ющему евре́ину отступи́ти от Христа́ твоего́, Иже е́сть Пра́вды Со́лнце, все́м присносу́щную жи́знь возсия́ющее.
Припев: Преподобномучениче Евстратие, моли́ Бо́га о нас.
Твои́м, о́тче, уче́нием вси́ пле́нницы, су́щии в темни́це, богоуби́йственнаго евре́ина поплева́ша бу́йство и изво́лиша па́че гла́дом и жа́ждею умре́ти, не́же отврещи́ся Христа́, все́м жи́знь подаю́щаго.
Припев: Преподобномучениче Евстратие, моли́ Бо́га о нас.
По́лк му́ченик пятьдесяточи́сленный, гла́дом и жа́ждею убие́н от жидови́на, предпосла́л еси́, блаже́нне, Христу́ своему́, са́м последи́ то́жде пострада́ти хотя́ за любо́вь Иису́са, все́м жи́знь подава́юща.
Сла́ва Отцу́ и Сы́ну и Свято́му Ду́ху:
Ви́дев окая́нный, я́ко изме́ршим все́м у́зником в темни́це погуби́ зла́то и наде́жду привлече́ния к злоче́стию своему́, умы́сли распя́ти тя́ на кресте́, на него́же те́кл еси́ спе́шно, преподо́бне, зовы́й: Христе́ мо́й, изведи́ из темни́цы плотски́я ду́шу мою́.
И ны́не и при́сно и во ве́ки веко́в. Ами́нь.
Богородичен: Преблаже́нная Де́во, уще́дри бла́гостию Твое́ю ду́шу мою́, ги́блющую гла́дом, и насы́ти ю́ Ангельским хле́бом, напо́й пото́ком сла́дости небе́сныя, да отсю́ду ми́р души́ мое́й обря́щу.
Пе́снь 6.
Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.
Припев: Преподобномучениче Евстратие, моли́ Бо́га о нас.
Аки во́днаго зве́ря, бы́сть утро́ба беззако́ннаго иуде́янина, и́же хотя́ше тя́ поглоти́ти и в число́ привести́ омраче́ннаго евре́йскаго со́нмища, но ты́, о́тче, дерзнове́нно ста́л еси́ проти́ву того́ зия́ния и одоле́л еси́ тому́, по́мощию Вы́шняго укрепля́емь.
Припев: Преподобномучениче Евстратие, моли́ Бо́га о нас.
В о́ньже де́нь, возшата́вшеся, иуде́е Животода́вца на Кресте́ пове́сиша, тогда́ и тебе́ окая́нный евре́ин распя́; да с Ни́мже страда́л еси́, с Те́м и просла́вишися, блаже́нне, в немерца́емом све́те прие́мь возме́здие от Спа́са своего́.
Припев: Преподобномучениче Евстратие, моли́ Бо́га о нас.
Руга́нием помина́юще стра́сть Влады́чню скве́рнии богоуби́йцы, я́коже отцы́ и́х — Христа́, та́ко си́и к дре́ву кре́стному, руга́ющеся, пригвозди́ша тя́, о́тче: но бы́сть и́м дре́во кре́стное — юро́дство, тебе́ же, спа́сшемуся, — си́ла Бо́жия.
Сла́ва Отцу́ и Сы́ну и Свято́му Ду́ху:
Обличи́л еси́ пра́здники скве́рныя иуде́йския, на кресте́ ви́ся, свя́те, не боя́ся и́х кля́твы, я́ко та́ потреби́ся пло́тию пригвожде́нна Христа́ Бо́га и тридне́вным Воскресе́нием ми́р просве́щшаго.
И ны́не и при́сно и во ве́ки веко́в. Ами́нь.
Богородичен: Яже пра́дедную кля́тву потреби́вшая благослове́нным Рождество́м Твои́м, Ма́ти Чи́стая, благослове́ния избра́нных Бо́жиих, молю́, да мя́ сподо́биши, Благослове́нная и Просла́вленная.
Конда́к, гла́с 8:
Яко ревни́тель стра́сти Влады́чней и по́стников усе́рдный после́дователь сы́й, пле́нники уче́нием твои́м наста́вль, Христо́ви приве́л еси́, Евстра́тие, и на́с, плене́нных страстьми́, мольба́ми свои́ми свободи́ и подража́тели честно́му твоему́ житию́ покажи́, зову́щих: ра́дуйся, испи́вый сла́достне ча́шу Христо́вых страда́ний.
Пе́снь 7.
Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.
Припев: Преподобномучениче Евстратие, моли́ Бо́га о нас.
Безу́мное веле́ние иуде́йское, пригвожде́н сы́й, о́тче, на кресте́, обличи́л еси́ проро́ческими Писа́ньми и па́схи зако́нныя не восхоте́л еси́ вкуси́ти, жела́я прича́стник бы́ти Па́схи, Яже за ве́сь ми́р пожре́ся — Христо́с Бо́г благослове́нный.
Припев: Преподобномучениче Евстратие, моли́ Бо́га о нас.
Разоре́ние кля́твы, я́же от дре́ва, приводи́л еси́, блаже́нне, от проро́к сказу́я, и, вхо́д живота́ на дре́ве кре́стном живото́м, ви́сящим пред очи́ма и́х, пропове́дуя, посрами́л еси́ иуде́и, неве́дущия пе́ти: Бо́же, благослове́н еси́.
Припев: Преподобномучениче Евстратие, моли́ Бо́га о нас.
Распе́ншим тя́ иуде́ем проро́чествовал еси́, о́тче преподо́бне: прии́дет вско́ре отмще́ние на вы́ за кро́вь мою́ и про́чиих христиа́н, и́хже уби́сте непови́нне, и пра́здники ва́ша в се́тование обратя́тся, ненави́дит бо суббо́т ва́ших Госпо́дь, в ни́хже отверго́стеся пе́ти: Христе́ Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Словеса́ твоя́ бы́ша о́стрыя стре́лы беззако́нным, и́миже пробода́еми, не стерпе́ша, но копие́м ре́бра твоя́ прободо́ша, и отше́л еси́ ко Источи́вшему от прободе́ннаго ребра́ жи́знь всему́ ми́ру пе́ти: Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Прободе́нну ми́ грехолю́бным копие́м лю́таго велиа́ра, ско́ро приложи́ пла́стырь ми́лости Твоея́, Богоневе́стная Де́во Ма́ти, я́ко да, исцеле́в, вы́ну Ти́ пою́, Влады́чице: Благослове́нна еси́.
Пе́снь 8.
Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.
Припев: Преподобномучениче Евстратие, моли́ Бо́га о нас.
Почти́те, лю́дие, до́браго страда́льца, и́же, вся́ у́ды пре́жде собо́ю мы́сленне распя́в, последи́ чу́вственне от иуде́й распя́т, возопи́л ко Христу́: се́ а́з я́звы Твоя́ на те́ле мое́м ношу́ и пою́ Тя́ во вся́ ве́ки.
Припев: Преподобномучениче Евстратие, моли́ Бо́га о нас.
Тебе́, о́тче, на не́бо о́гненною колесни́цею и ко́ньми восхище́нну, изыдо́ша в сре́тение му́ченик и пра́ведник ли́ки, восхвали́ша ру́чныя и но́жныя я́звы твоя́ и бо́к прободе́нный, прие́млюще тя́ в ски́нию святы́х хвали́ти Го́спода во ве́ки.
Припев: Преподобномучениче Евстратие, моли́ Бо́га о нас.
Гла́с принесе́ся к тебе́, свя́те, от велеле́пныя сла́вы: се́ до́брый небе́сный граждани́н, его́же не бе́ досто́ин ве́сь ми́р, восхо́дит от су́етнаго ми́ра к преми́рным селе́ниям пе́ти Го́спода во вся́ ве́ки.
Сла́ва Отцу́ и Сы́ну и Свято́му Ду́ху:
Сокро́вище многоце́нное — мо́щи твоя́, — преблаже́нне, беззако́нный евре́ин хотя́ утаи́ти, вве́рже в мо́ре, но Бо́жиим смотре́нием обрето́шася зде́, в пеще́ре, и́мже покланя́ющеся, прославля́ем просла́вльшаго тя нетле́нием и чудесы́ Го́спода во вся́ ве́ки.
И ны́не и при́сно и во ве́ки веко́в. Ами́нь.
Богородичен: Сокро́вище многоце́нное, дража́йшаго Иису́са, от Ма́терних не́др произве́дшая, искупи́ ду́шу мою́ от плене́ния любостра́стнаго ми́ра, да пою́ Тя́ зде́ и в немерца́ющем Све́те во вся́ ве́ки.
Песнь 9
Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.
Припев: Преподобномучениче Евстратие, моли́ Бо́га о нас.
Свети́ся, свети́ся, Бо́жия Ма́тере Пече́рская оби́тель, в тебе́ бо цвету́щее дре́во возрасте́, чу́дный Евстра́тий, благово́нными цве́ты страда́ния укра́шен. Красоте́ того́ и мы́ прича́стницы да бу́дем, покланя́емся моще́м его́ и пе́сньми велича́ем.
Припев: Преподобномучениче Евстратие, моли́ Бо́га о нас.
Открыва́яй та́йны Бо́г скве́рных уби́йцев яви́ благочести́вому царю́, я́ко, лицеме́рствующе, иуде́е в та́йне христиа́н убива́ют, и взы́де непра́вда на главу́ и́х: ра́вную бо сме́рть восприя́ша по твоему́ проро́честву, о́тче блаже́ннейший.
Припев: Преподобномучениче Евстратие, моли́ Бо́га о нас.
Кро́вь твоя́, непови́нне излия́нная от иуде́й, а́ки Авелева, о́тче, вопия́ше к Бо́гу, Иже пра́ведным судо́м за ню́ наведе́ отмще́ние, и, пове́шен бы́в на дре́ве, тво́й мучи́тель получи́ ча́сть со Иу́дою в гее́нне, твоя́ же ча́сть — Госпо́дь, Ему́же покланя́ющеся, дне́сь велича́ем.
Сла́ва Отцу́ и Сы́ну и Свято́му Ду́ху:
Кро́вь твоя́, свя́те, и нело́жное проро́чество мно́гия по́слежде приведе́ к ве́ре: сбытие́ бо того́ ви́девше, и́стинно пока́явшеся, ве́роваша во Христа́, и, кре́щшеся, до́бре пожи́ша, и блаже́нныя сподо́бишася жи́зни, ея́же и мы́ да не лиши́мся, кла́няемся ра́це моще́й твои́х и тя́ велича́ем.
И ны́не и при́сно и во ве́ки веко́в. Ами́нь.
Богородичен: Жи́зн присносу́щную в не́дрех Свои́х объе́мля, от вре́менной жи́зни к ве́чной на́с упра́ви Твои́м хода́тайством, Непоро́чная Ма́ти, и да́ждь все́м зре́ти невече́рний де́нь Ца́рствия Сы́на Твоего́.
Свети́лен:
Присносу́щную прови́дя жи́знь, блаже́нне, о вре́менней неради́л еси́, вся́, наноси́мая от иуде́й, претерпе́в до́блественне, и, зако́нныя па́схи не восхоте́в вкуси́ти, ко кресту́ пригвожде́н бы́л еси́, и, о́гненною от земли́ восходя́ колесни́цею, свиде́тельствовал еси́: Христо́с е́сть Па́сха нетле́ния, ми́ра спасе́ние.
Сла́ва, и ны́не, Богородичен:
Присносу́щнаго Све́та Предста́тельница су́щи, Богоневе́стная Де́во, на́м, во мра́це живу́щим, предста́ни и упра́ви жи́знь на́шу, да безпреткнове́нно до́йдем, иде́же Христо́с е́сть Па́сха нетле́ния, ми́ра спасе́ние.
Молитва
О святы́й уго́дниче Бо́жий, gреподобному́чениче Евстратие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому преподобномученику Евстратию Печерскому Святому преподобномученику Евстратию Печерскому](img_b/014.jpg)