Канон всем святым, от века Богу благоугодившим, глас 7.

Тропарь, глас 2:

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и веру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те спасти́ся, мо́лимся, душа́м на́шим.

Кано́н святы́м му́чеником, иера́рхом, и преподо́бным, [его́же краегране́сие сицево́: С ли́ки воспева́ю па́стырей и му́ченик, а́з Ио́сиф.] Гла́с 7:

Пе́снь 1

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ еди́ному пои́м, я́ко просла́вися.

Припев: Вси святии, молите Бога о нас.

Ли́к му́ченик нельсти́вых вся́ пре́лести победи́ борца́, лику́ет ра́дуяся пред лице́м созда́вшаго и́.

Святи́телие Христо́вы, и преподо́бнии вси́ подви́гшиися, пи́щи сподо́бишася ве́чныя благода́тию.

Слава: Изба́ви на́с, Христе́, от вся́кия я́рости моле́нием проро́к, и преподо́бных, и же́н свяще́нных, и спаси́ ду́шы на́шя.

И ныне, Богородичен: Пречи́стая Ма́ти, я́же Бо́га Пресвято́е Сло́во ро́ждшая, освяти́ вся́ любо́вию Тя́ сла́вящыя.

Пе́снь 3

Ирмо́с: Небеса́ утверди́вый Сло́вом, и земно́е основа́ние укрепи́вый на вода́х мно́гих, утверди́ мо́й у́м в во́лю Твою́, Человеколю́бче.

Сокруша́еми ка́мением, и в ро́в вмета́еми, сокруши́сте всю́ льсти́ваго си́лу, и не сокруше́ни умо́м му́ченицы пребы́сте.

Заре́ю Боже́ственных уче́ний, и доброде́телей луча́ми, прему́дрии святи́телие, ве́рныя просвеща́юще, и ересе́й мглу́ всю́ отгна́сте.

Слава: Умертви́вшеся ми́ру преподо́бнии Твои́, Сло́ве, преми́рную вои́стинну жи́знь насле́доваша: и́хже ра́ди, Ще́дре, все́х на́с уще́дри.

И ныне, Богородичен: Не истощи́в не́др О́тчих Сло́во, во не́дрех Твои́х, Пречи́стая, Младе́нец держи́мь яви́ся, нача́ло от Тебе́ прие́мь Безнача́льный.

Седален, глас 6.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сла́ва, и ны́не, Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

Пе́снь 4

Ирмо́с: Плотско́е прише́ствие твое́, Христе́, уверя́я проро́к Авваку́м, взыва́ше: сла́ва си́ле твое́й, Го́споди.

Укрепля́еми е́же ко Го́споду любо́вию му́ченицы, обнемощи́ша вра́жию си́лу: те́мже ублажа́ются.

Я́ко овча́та па́стыря и а́гнцы, блаже́ннии иера́рси, слове́сному ста́ду предста́сте Боже́ственною благода́тию.

Слава: Многосве́тлыя я́ко зве́зды, доброде́тели све́тлостию, озари́сте ве́рных исполне́ние, преподо́бнии отцы́ на́ши.

И ныне, Богородичен: Моли́, Его́же родила́ еси́ Сы́на, Всепе́тая, искуше́ний вся́ческих и скорбе́й изба́витися рабо́м Твои́м.

Пе́снь 5

Ирмо́с: У́тренюет ду́х мо́й к тебе́, Бо́же, зане́ све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

О я́звах плотски́х неради́вше кре́пцыи страда́льцы, и я́звы все́х исцеля́ете и стра́сти, Боже́ственными ва́шими я́звами.

Прия́сте вла́сть реши́ти и вяза́ти на земли́, святи́телие Христо́вы: те́мже на́шя грехо́вныя плени́цы нереши́мыя разреши́те.

Слава: Умо́м чи́стым Бо́гу соедини́вшеся ли́цы по́стничестии, проро́к, и пра́ведных, и же́н честны́х лику́ют, ра́дующеся ликова́нием неразори́мым.

И ныне, Богородичен: Черто́г неразори́мь я́вльшися Бо́гу, моли́ Того́, Всесвята́я Де́во, черто́га мя́ мы́сленнаго жи́теля соде́лати.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. мы́ же тебе́ вопие́м: Всеси́льне Спа́се, поми́луй на́с.

Низложи́сте вра́жия возвыше́ния, возвыша́еми к Бо́гу в страда́ниих, всесла́внии ору́жницы, и гра́ждане небе́снии бы́сте.

Ересе́й зи́му отгоня́юще, Христо́вы и́стиннии святи́телие, к весне́ и́стинней мно́жество благочести́вых приведо́ша.

Слава: Кре́постию Твое́ю, Христе́, преподо́бных мно́жество, и проро́к, и же́н святы́х, оправда́шася, и незаходи́маго све́та наслажда́ются.

И ныне, Богородичен: Освяти́, Всесвята́я Де́во, рабы́ Твоя́, Пресвято́е Сло́во пло́тию ро́ждшая, Его́же пое́т вся́кое дыха́ние, освяща́ющи.

Кондак, глас 8:

Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

Икос:

И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отье́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Пе́снь 7

Ирмо́с: В пещи́ су́ще халде́йстей, Авраа́мстии о́троцы ликова́ху со а́нгелом, глаго́люще: оте́ц на́ших Бо́же, благослове́н еси́.

Тече́нии кро́вными страстоте́рпцы, нече́стия угаси́ша пла́мень, пою́ще: оте́ц на́ших Бо́же, благослове́н еси́.

Иера́рхи восхваля́ем, просвети́тели ми́ра бы́вшыя, пою́ще: оте́ц на́ших Бо́же, благослове́н еси́.

Слава: Пе́сньми да почту́тся проро́к и преподо́бных святы́й собо́р, пою́щих: оте́ц на́ших Бо́же, благослове́н еси́.

И ныне, Богородичен: Я́ко А́нгел честне́йшую, Богоро́дицу песносло́вим, вопию́ще: Оте́ц на́ших Бо́же, благослове́н еси́.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.

Хра́мы и́дольския разверго́сте, всесла́внии: и хра́мы созда́сте себе́ ду́ху, страстоте́рпцы, хра́брски тече́ние сконча́вше.

Яви́стеся я́ко цве́ти благоуха́ннии, святи́телие, ра́зумом ду́шы ве́рных веселя́ще благоче́стия: те́мже досто́йно блажи́ми есте́.

Слава: Зе́млю всю́ проше́дше преподо́бнии, и Бо́жии прише́льцы проро́цы бы́сте, вы́шнее соблюда́юще наслажде́ние, и сла́ву при́сно пребыва́ющую.

И ныне, Богородичен: Же́н все́х сосло́вие, посто́м и страда́нием взыска́вших Го́спода, мо́лится непреста́нно Боже́ственному лицу́ Твоему́, Пречи́стая.

Пе́снь 9

Ирмо́с: Па́че естества́ Ма́терь, и по естеству́ Де́ву, еди́ну в жена́х благослове́нную, пе́сньми ве́рнии Богоро́дицу велича́ем.

Свяще́нных му́ченик, и проро́к, и пра́ведных, от ве́ка до́бре жи́вших, моли́твами и́х, Христе́, ду́шы на́шя поми́луй.

Я́ко служи́тели Влады́це, священнотаи́нницы я́вльшеся, совокупи́стеся слуга́м небе́сным: с ни́миже о на́с моле́ния принеси́те.

Слава: С жена́ми блаже́нное сконча́вшыя тече́ние, почти́м по́стническия ли́ки святы́я: я́ко да те́х моли́твами улучи́м свяще́ние.

И ныне, Богородичен: Грехолюби́в сы́й, суди́ща стра́шнаго трепе́щу, ро́ждшагося из Тебе́, Чи́стая, в Не́мже мя́, я́ко Блага́я, неосужде́на соблюди́.

Молитва

О преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение и ходатайством вашим просящих милости и отпущения грехов у Преблагаго Господа: вемы бо, воистинну вемы, яко вся, елика восхощете, испросити у Него можете. Темже убо смиренно молимся вам: молите милостиваго Владыку, да подаст нам дух вашея ревности к хранению святых Его заповедей, яко да текше по стопам вашим, возможем земное поприще в добродетельном житии без порока прейти и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь.