Канон всем святым, от века Богу благоугодившим, глас 2.

Тропарь, глас 2:

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и веру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те спасти́ся, мо́лимся, душа́м на́шим.

Кано́н святы́м му́чеником, святи́телем, преподо́бным, [его́же краегране́сие: Рабо́м Бо́жиим бли́жним хвалу́ нося́.] Творе́ние Ио́сифово. Гла́с 2.

Пе́снь 1

Ирмо́с: Моисе́йскую пе́снь восприи́мши, возопи́й душе́: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́.

Припев: Вси святии, молите Бога о нас.

Изгна́ния лю́тая, и уране́ния зе́льная, терпели́вно подъя́сте страда́льцы, вся́кую пре́лесть от коне́ц си́лою Боже́ственною отгна́сте.

Бо́жии служи́телие, и святи́телие, све́том мы́сленным облиста́юще я́ве, к све́ту благоче́стия наста́виша все́х благочести́вых исполне́ния.

Слава: Го́рдый у́м смири́вше преподо́бнии, к до́брей земли́ преидо́сте: возне́сшеся же Боже́ственными о́бразы, и все́м смире́нным помога́ете при́сно.

И ныне, Богородичен: Поще́нием кре́пко подви́гшеся, и терпели́вно низложи́ша врага́ честны́я жены́, Тебе́ Богороди́тельнице предстоя́т ра́дующеся.

Пе́снь 3

Ирмо́с: Непло́дствовавший мо́й у́м, плодоно́сен Бо́же покажи́ ми́, де́лателю до́брых, насади́телю благи́х, благоутро́бием Твои́м.

Разже́гшеся огне́м любве́ Христо́вы, о страстоте́рпцы, му́к разжже́ния угаси́сте, ороше́нием вседе́теля ду́ха.

Святе́йшии Христо́вы святи́телие, и честни́и преподо́бных собо́ри, о все́х на́с Человеколю́бца Бо́га умоли́те.

Слава: Свяще́ннейший ли́к Боже́ственных проро́к возвели́чися, и же́н мно́жество пострада́вших кре́пко, сла́ву улучи́ша.

И ныне, Богородичен: Со все́ми проро́ки, и жена́ми свяще́нными, ны́не приле́жно Бо́га моли́ Де́во ро́ждшагося из Тебе́, уще́дрити на́с.

Седален, глас 6.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сла́ва, и ны́не, Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

Пе́снь 4

Ирмо́с: Е́же от Де́вы Твое́ Рождество́ проро́к предзря́ возпропове́даше вопия́: слу́х Тво́й услы́шах, и убоя́хся, я́ко от ю́га, и из горы́ святы́я, приосене́нныя, прише́л еси́ Христе́.

И́же Христо́вым страсте́м Богосла́внии страстоте́рпцы уподо́бльшеся до́бре, распростира́еми ра́довахуся мно́гими му́ками, на ве́чная воздая́ния взира́юще: и́хже получи́вше ублажа́ются при́сно.

Зако́ны соблюда́юще Ду́ха, первосвяще́нницы прему́дренно упасо́сте лю́ди, я́ко ко́рмчии преизря́днии на Боже́ственне приста́нищи, и преложи́вшеся от жите́йских мо́лв, к тишине́ преидо́сте живота́.

На земли́ прише́льцы яви́стеся, преложи́вше отцы́ жи́знь ва́шу на небеса́, я́коже пи́шет, благочестному́дренне, и плотски́я стра́сти обузда́вше боле́зньми воздержа́ния, си́лою Христо́вою.

Слава: И́хже преве́л еси́ Влады́ко, от вре́меннаго жития́ многочи́сленное мно́жество, в правосла́вней послужи́вшыя тебе́, Сло́ве, ве́ре, все́х спаса́емых мно́жеством сочета́в, ве́чнаго сподо́би живота́.

И ныне, Богородичен: Го́ру присе́нную зри́т Тя́ доброде́тельми, проро́к Авваку́м, Богоро́дице, из нея́же яви́ся Бо́г неизрече́нно, доброде́телию покры́в небеса́, и ро́д челове́ческий из истле́ния спасы́й.

Пе́снь 5

Ирмо́с: Мглу́ души́ моея́ Спа́се мо́й разгна́в, све́том за́поведей Твои́х озари́ мя, я́ко еди́н Ца́рь ми́ра.

Тебе́ возлюби́вше, Ще́дре, возненави́деша вся́ мирска́я, до́блии страстоте́рпцы, примеси́вшеся му́кам, отверже́нием пло́ти.

Святи́телие, проро́цы, преподо́бнии богоно́сцы, духо́вными луча́ми просвеща́ете ми́р, тьму́ разоря́юще страсте́й.

Слава: Преподо́бнии отцы́, проро́цы и первосвяще́нницы, и присносла́вныя жены́, о на́с Тебе́ Влады́це все́х мо́лятся приле́жно.

И ныне, Богородичен: Пречи́стая Де́во Ма́ти, похвало́ му́чеников, и преподо́бных и пра́ведных, от вся́каго изми́ на́с мучи́тельства лука́ваго.

Пе́снь 6

Ирмо́с: Во глубине́ грехо́вней содержи́м е́смь, Спа́се, и в пучи́не жите́йстей обурева́ем: но я́коже Ио́ну от зве́ря, и мене́ от страсте́й возведи́, и спаси́ мя.

Кре́постию се́рдца страда́льцы проти́ву врагу́ ополчи́вшеся, того́ низложи́ша, и прия́ша побе́ды венцы́ от Бо́га: и ны́не приле́жно мо́лятся о все́х земноро́дных.

Бо́жия святи́тели почти́м ве́рно, и преподо́бныя Его́ ублажи́м, спаса́еми мольба́ми и́х, от вся́каго гне́ва и ско́рби, и вра́жия наве́та.

Слава: Пострада́ же́н Боже́ственный ли́к, и в посте́ Бо́гу угоди́, и получи́ Ца́рство Небе́сное: те́х моли́твами уще́дри Бо́же тво́й ми́р.

И ныне, Богородичен: Свята́я Богоро́дице, освяти́ на́ша помышле́ния, и у́м укрепи́, и спаси́ на́с от стре́л лука́ваго неуя́звленных, сла́вящих, Всепе́тая, Твоя́ вели́чия.

Кондак, глас 8:

Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

Икос:

И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отье́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Пе́снь 7

Ирмо́с: Херуви́мы подража́юще о́троцы в пещи́, ликовствова́ху вопию́ще: благослове́н еси́ Бо́же, я́ко и́стиною и судо́м наве́л еси́ сия́ вся́ гре́х ра́ди на́ших: препе́тый, и препросла́вленный во вся́ ве́ки.

Терпе́нием низложи́ша святи́и врага́, терпя́ще вся́ко искуше́ние лю́тых муче́ний, я́ко вои́стинну Бо́га возлюби́ша пострада́вшаго за грехи́ на́шя. Те́х моли́твами спаси́ все́х на́с, Сло́ве, от напа́стей и бе́д, Тебе́ сла́вящих.

Светозра́чнии святи́телие, и преподо́бнии и проро́цы и священному́ченик достосла́вное мно́жество, и же́н святы́х свяще́нное сосло́вие, во страда́нии и в посте́ возсия́вшее му́жески: при́сно о на́с моле́ния твори́те к Бо́гу, я́ко да поми́лует на́с.

Слава: Му́ченик мно́жество мо́лит Тя́, Христе́ Благода́телю, от все́х печа́лей, и скорбе́й, и лю́тых напа́стей, и все́х прегреше́ний, и от вре́да спаси́ мя, Сло́ве, поги́бшаго.

И ныне, Богородичен: С му́ченики, Пречи́стая, и с преподо́бными отцы́ и проро́ки все́ми, со святы́ми жена́ми во святы́х Еди́наго Почива́ющаго умоли́, все́х освяти́ти на́с, святы́ми гла́сы Тя́ славосло́вящих, Чи́стая, во вся́ ве́ки.

Пе́снь 8

Ирмо́с: В купине́ Моисе́ю Де́вы чу́до, на Сина́йстей горе́ Прообрази́вшаго иногда́, по́йте, благослови́те, и превозноси́те во вся́ ве́ки.

Тече́ние кро́ве ва́шея, страстоте́рпцы Госпо́дни, освяти́ всю́ тва́рь, и изсуши́ я́ве излия́ние пре́лести, и ве́рных ду́шы напои́ бога́тно.

Яви́ся ли́к по́стнический, святи́телей же собо́р и же́н святы́х, и проро́к сла́вных, единоче́стен а́нгелом, а́нгельски на земли́ ду́хом пожи́вше.

Слава: Изба́вите все́х на́с страстоно́сцы Госпо́дни, первосвяще́нницы, и проро́цы, и преподо́бных мно́жество, и же́н святы́х, от стре́л вра́жиих, ва́с восхваля́ющих.

И ны́не: Богороди́тельнице Чи́стая, со все́ми святы́ми проро́ки, и му́ченики, и преподо́бными, и святы́ми жена́ми, и священному́ченики, уще́дрити на́с Спа́са моли́.

Пе́снь 9

Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Кре́пцы на стра́сти, си́льни на враги́ я́вльшеся страстоте́рпцы: взя́сте побе́ду пострада́вше зако́нно, и венча́стеся от Бо́га.

Я́ко Бо́жии священноде́лателие, и па́стыря до́браго подо́бницы бы́вше, упасо́сте того́ о́вцы преподо́бне, первосвяще́нницы Богосла́внии.

Слава: С преподо́бными, по́стники, и проро́ки свяще́нными, почти́м же́н пострада́вших мно́жество и посто́м низложи́вших врага́.

И ныне, Богородичен: Щедролюби́ваго Бо́га ро́ждшая пло́тию, со святы́ми все́ми моли́ того́ при́сно, от бе́д на́с спасти́, Ма́ти Де́во Чи́стая.

Молитва

Боже святый и во святых почиваяй, трисвятым гласом на небеси от Ангел воспеваемый, на земли от чело­век во святых Своих хвалимый: давый Святым Твоим Духом комуждо благо­дать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учите­ли, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их бого­угодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче же Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки. Аминь.