Канон святителю Николаю Чудотворцу, глас 7.

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кано́н свято́му и вели́кому чудотво́рцу Никола́ю. [его́же краегране́сие: Приими́ моле́ние седмо́е, Нико́лае.] Творе́ние Ио́сифово. Гла́с 7:

Пе́снь 1

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися.

Припев: Святителю отче Николае, моли Бога о нас.

Просла́влено на земли́ преше́д житие́, тебе́ сла́вящыя, Нико́лае, прича́стники та́мо су́щия сла́вы сотвори́.

В пучи́не лю́тых пла́вающе, жите́йских искуше́ний волна́ми, Всеблаже́нне, окружа́еми есмы́: от ни́хже на́с спаси́.

Слава: Ру́ку ми́ ны́не пода́тельную по́мощи пода́ждь, о́тче Нико́лае, от вра́г ви́димых и неви́димых изба́ви мя́.

И ныне, Богородичен: И́же невеще́ственныя слуги́ сотвори́в, из Тебе́, Богоро́дице, роди́ся за ми́лость неизрече́нную, челове́ки ви́димь бы́сть.

Пе́снь 3

Ирмо́с: Небеса́ утверди́вый сло́вом, и земно́е основа́ние укрепи́вый на вода́х мно́гих, утверди́ мо́й у́м в во́лю Твою́, Человеколю́бче.

О вселе́нней принося́ моле́ния, от вся́кия ну́жды и скорбе́й безчи́сленных спаси́ на́с, свя́те Нико́лае.

Свя́занных неизбе́жно из темни́цы я́коже изба́вил еси́: соу́зы растерза́в зо́л мои́х, моли́твами твои́ми, примири́ Бо́гу, свя́те Нико́лае.

Слава: В нощи́ и во дни́ засту́пника тя́ нарица́ем, на́шя моли́твы принеси́ Го́сподеви, сохраня́я на́с при́сно, свя́те Нико́лае.

И ныне, Богородичен: Клеще́ я́же Боже́ственный у́гль прие́мши в Боже́ственней утро́бе Твое́й, ника́коже опали́вшися, попали́, Пречи́стая, на́ша прегреше́ния.

Седален, глас 8.

Возше́д на высоту́ доброде́телей / и Боже́ственными отту́ду, о́тче, озари́вся сия́нии чуде́с, / пресве́тел вои́стинну яви́лся еси́ мирови па́стырь, / нам в напа́стех сый предста́тель непобеди́мь; / те́мже, пресла́вно врага́ победи́в, лжу отгна́л еси́ / и челове́ки спасл еси́ от сме́рти, Нико́лае, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Пе́снь 4

Ирмо́с: Покры́ла е́сть Небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Прему́дростию твое́ю очерни́в А́риев у́м е́ресию помраче́нный, и от того́ прельща́емыя, Нико́лае, просвети́л еси́.

Уврачу́й моя́ мно́гия стру́пы богоприя́тными твои́ми моли́твами, богоблаже́нне о́тче Нико́лае, и се́рдце мое́ просвети́.

Слава: Умертви́в стра́стныя взыгра́ния, от ни́хже мя́ умерщвле́наго, моли́твами твои́ми, всеблаже́нне, оживи́в, но́ва сотвори́.

И ныне, Богородичен: Родила́ еси́ пло́тию Безле́тнаго: Его́же моли́ многоле́тных зо́л на́с изба́вити, пою́щих Тя́, Всенепоро́чная.

Пе́снь 5

Ирмо́с: У́тренюет ду́х мо́й к Тебе́, Бо́же, зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Сове́ты О́тче, подвиза́емыя при́сно на ны́, ненака́занных челове́к Твои́ми моли́твами, Нико́лае, безде́льны сотвори́.

Соу́зы зо́л на́ших расто́ргни твои́ми моли́твами, связа́вый зло́бу душетле́ннаго зми́я, всесвяты́й Нико́лае.

Слава: Ра́зумом при́сно согреша́юще, и мно́жеством лю́тых содержи́ми, о́тче, предста́теля тя́, Нико́лае, те́пла призыва́ем.

И ныне, Богородичен: Мари́е, Госпоже́ всея́ тва́ри, от врага́ безсту́дно облада́ти и́щуща смире́нное се́рдце мое́, Богороди́тельнице, до конца́ свободи́.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Разори́л еси́ сме́рти непра́ведный су́д, и спа́сл еси́ ми́лостию твое́ю, о́тче Нико́лае, хотя́щыя умре́ти, я́ко те́плый помо́щник призыва́ющым тя́.

Неду́ги ду́ш на́ших утиши́: и уста́ отверза́ющаяся всу́е на лю́бящих тя́, свяще́ннейший па́стырю, загради́.

Слава: Па́жить го́рькую злоче́стия а́риева потреби́л еси́, Нико́лае, растворе́нием слове́с твои́х, священнотаи́нниче, правосла́вным утвержде́ние ты́ бы́л еси́.

И ныне, Богородичен: Уврачу́й, Всенепоро́чная, неисце́льно боля́щую, окая́нную ду́шу мою́ жите́йскими пре́лестьми, и мно́гих грехо́в обстоя́нии.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

Икос:

Воспои́м ны́не святи́теля пе́сньми, / ми́рским лю́дем па́стыря и учи́теля, / да моли́твами его́ просвети́мся: / се бо яви́ся чист весь, нетле́нен ду́хом, / Христу́ принося́ же́ртву непоро́чну, чи́сту, Бо́гу благоприя́тну, / я́ко святи́тель, очище́н и душе́ю и те́лом, / те́мже сый и́стинно Це́ркве предста́тель и побо́рник сея́, / я́ко вели́кий таи́нник Бо́жия благода́ти.

Пе́снь 7

Ирмо́с: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.

Красота́ церко́вная бы́в, му́дре Нико́лае, вся́кия мя́ некрасоты́ страсте́й безче́стных изба́ви, благода́теля всего́ ми́ра моля́, святи́телю, при́сно.

Ту́чами моли́тв твои́х, Нико́лае му́дре, все́х на́с напо́й сердца́: я́ко да принесе́м плоды́ досто́йны покая́ния, святи́телю Нико́лае.

Слава: Просвети́ твои́ми моли́твами на́ша помышле́ния, ве́рою у́тренюющих, и Бо́га сла́вящих, разори́вый мольба́ми твои́ми артеми́ды ка́пища.

И ныне, Богородичен: Вся́к язы́к ве́рою сла́вит Тя́, Чи́стая, сла́ву су́щую и похвалу́ ро́да на́шего, и наста́вницу заблу́ждших, Богоро́дице Преблаже́нная.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии: ве́рою зове́м: благослови́те дела́ Госпо́дня, Го́спода.

В Ми́рех мироуха́нное те́ло твое́, всесвя́те Нико́лае, лежа́щее, ми́ро притека́ющым источа́ет, и уставля́ет неду́ги челове́ком.

Ми́ру тя́ засту́пника показа́ ми́ра Творе́ц и Госпо́дь: те́мже призыва́ющым тя́ в ну́ждах ны́не, Нико́лае, обрета́ешися изба́витель гото́вейший.

Слава: Не́сть, и́же призва́вый тя́ в ско́рбех, и ско́ро не обря́щет утеше́ния. Те́мже тебе́ мо́лимся: вся́ боле́зни на́шя, Нико́лае, облегчи́.

И ныне, Богородичен: Пое́т вся́к язы́к и сла́вит Тя́, Де́во Богоневе́сто, Бо́га бо препе́таго родила́ еси́: Его́же моли́ непреста́нно, спасти́ся душа́м на́шым.

Пе́снь 9

Ирмо́с: Па́че естества́ Ма́терь, и по естеству́ Де́ву, Еди́ну в жена́х благослове́нную, пе́сньми, ве́рнии, Богоро́дицу велича́ем.

После́довав нра́вом свяще́нных Апо́стол, и седа́лища те́х насле́довал еси́, я́ко святи́тель чи́стен, достосла́вный Нико́лае.

Я́ко ревни́теля тя́ Боже́ственнаго, и помо́щника по всему́ тебе́ призыва́ющым те́пле, во все́м ми́ре блаже́нне, Творе́ц превели́ка показа́.

Сокруше́нным се́рдцем вопие́м ти́, о́тче: утеше́ние на́м бу́ди в ско́рбех, печа́ли разгоня́я всегда́ от ду́ш на́ших, Нико́лае.

Слава: Сме́ртное посече́ние, я́коже секи́ра Дре́ву предлежи́т ти́, о душе́, не лени́ся у́бо, покая́ния плоды́ Бо́гу показа́ти усе́рдствуй.

И ныне, Богородичен: Но́сиши Нося́щаго вся́ческая святы́ми Твои́ми рука́ми: Его́же моли́, Чи́стая, от чужда́го злоде́йства невре́дным на́м спасти́ся.

Молитва

О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.