Шрифт

Каноны Октоиха святителю Николаю

Канон святителю Николаю Чудотворцу, глас 3.

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кано́н, свято́му и вели́кому чудотво́рцу Никола́ю. Творе́ние Ио́сифово. Гла́с 3.

Пе́снь 1

Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри: по́нтом бо покры́ проти́вныя, и спасе́ Изра́иля. Тому́ еди́ному пои́м, я́ко просла́вися.

Припев: Святителю отче Николае, моли Бога о нас.

Пресве́тлаго свети́льника неугаси́маго, на земли́ су́щаго столпа́, и к приста́нищу Боже́ственному призыва́юща, и́же волна́ми жите́йскими при́сно потопля́емии, Никола́а вси́ почти́м, и любо́вию ублажи́м.

Си́лою Бо́жиею всеблаже́нне укрепля́емь, ре́вность благоче́стия по ра́зуму стяжа́л еси́: те́мже хотя́щыя непра́ведно умре́ти изба́вил еси́. Сего́ ра́ди тя́ мо́лим: вся́каго непра́веднаго озлобле́ния изба́ви на́с, Нико́лае.

Слава: Моле́ния Го́сподеви, о́тче, неоску́дно приноси́ ты́: я́ко да грехо́в и пла́мене муче́ния ве́чнующаго, и напа́стей, и скорбе́й изба́вит на́с, я́ко еди́н Благи́й.

И ныне, Богородичен: Ковче́г Боже́ственный и́же вмести́вший Законода́вца на́ша беззако́ния вся́ оте́млющаго, ра́ди милосе́рдия Боже́ственнаго несказа́нныя пучи́ны, Мари́ю Пречи́стую согла́сно воспои́м.

Пе́снь 3

Ирмо́с: Непло́дная душе́ и безча́дная, стяжи́ пло́д благосла́вный, веселя́щися возопи́й: утверди́хся Тобо́ю Бо́же, не́сть свя́т, не́сть пра́веден, па́че Тебе́, Го́споди.

Изощре́н ме́чь духо́вный яви́лся еси́ му́дре: лука́выя пле́велы ерети́чествующих посеца́я, и доброде́телей стези́ спаси́тельныя ве́рным углажда́я, о́тче Нико́лае.

Тебе́ исто́чнику источа́ющу исцеле́ний пото́ки, мо́лимся, свя́те: скве́рны страсте́й все́х на́с моли́твами твои́ми омы́й, бе́д и скорбе́й избавля́я.

Слава: Кре́пкими твои́ми моли́твами низлага́я врага́, и ны́не на́нь укрепи́ немощству́ющая помышле́ния на́шя стра́стными прило́ги, призыва́нием святы́х твои́х моли́тв, о́тче Нико́лае.

И ныне, Богородичен: Ум разуме́ти не мо́жет, е́же па́че ума́ рожде́ние, чуде́снаго Рождества́ Твоего́, Богороди́тельнице всенепоро́чная, те́мже молю́ Тя: у́м мо́й облагодати́ при́сно сла́вити Тя́.

Седален, глас 8.

Возше́д на высоту́ доброде́телей / и Боже́ственными отту́ду, о́тче, озари́вся сия́нии чуде́с, / пресве́тел вои́стинну яви́лся еси́ мирови па́стырь, / нам в напа́стех сый предста́тель непобеди́мь; / те́мже, пресла́вно врага́ победи́в, лжу отгна́л еси́ / и челове́ки спасл еси́ от сме́рти, Нико́лае, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Пе́снь 4

Ирмо́с: Приосене́нную го́ру Авваку́м прозря́ше пречи́стую Твою́ утро́бу, Чи́стая. Те́м взыва́ше: от ю́га прии́дет Бо́г, и Святы́й от горы́ приосене́нныя ча́щи.

К Бо́гу хода́тая вся́к ве́рный всегда́, Нико́лае, предлага́ет тя́. Те́мже тя́ мо́лим, от напа́стей лю́тых, и паде́ний грехо́вных на́с изба́ви, О́тче.

Во́ду жи́ву в се́рдцы имы́й благода́ть Госпо́дню, ороша́еши при́сно му́дре, зно́ем скорбе́й, и сухото́ю грехо́в бе́дствующих, окая́нне поги́бнути иму́щих, всеблаже́нне.

Слава: И́же изба́вил еси́ иногда́ ведо́мыя на сме́рть непра́ведно, всеблаже́нне: ны́не и на́с спаса́й от челове́к тлетво́рных стуже́ния, и от вся́кия бесо́вския ле́сти.

И ныне, Богородичен: Вопло́щшеся Сло́во премно́жеством благоутро́бия неизрече́нно родила́ еси́: того́ моли́, Пречи́стая, плотски́я стра́сти и скве́рны все́х изба́вити, и все́х ну́ждных жития́.

Пе́снь 5

Ирмо́с: Све́том Твои́м невече́рним, Христе́, озари́, Бо́же, смире́нную мою́ ду́шу, и наста́ви на стра́х Тво́й, зане́ све́т повеле́ния Твоя́.

Све́ту чи́стому предстоя́, и отту́ду при́сно исходя́щими заря́ми просвеща́емь, о́тче, испроси́ все́м очище́ние и ми́р.

Мене́ па́че все́х челове́к Тебе́ прогне́вавша умо́м неразу́мным, Преблаги́й уще́дри, Никола́а те́плыми моли́твами.

Слава: Во уны́нии ижди́вша мою жи́знь, молю́ся ти́, о́тче Нико́лае, воздви́гни к покая́нию мы́сль мою́ оскверне́ную.

И ныне, Богородичен: Я́ко еди́на А́нгелов ра́дость Богора́дованная, ра́дости испо́лни мою́ мы́сль се́тующую, и ле́ностию погружа́емую.

Пе́снь 6

Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты́ спаси́, Спа́се, и изба́ви от тли́, я́ко спа́сл еси́ от зве́ря проро́ка.

Умертви́в воздержа́нием у́ды, стяжа́л еси́ жи́знь нестаре́емую: Е́йже и на́с о́бщники твои́ми моли́твами соде́лай му́дре, избежа́нием зла́го греха́.

Ве́трилом свяще́нных твои́х моли́тв, пучи́ну напа́стей многообра́зных, и грехо́вныя глубины́ изба́ви на́с, ко приста́нищу же живота́ приводя́, му́дре святи́телю.

Слава: Украси́в мирлики́йский престо́л, яви́лся еси́ красота́ первосвяще́нником: но моли́твами твои́ми от мирски́х напа́стей спаса́й ны́ невреди́мы, святи́телю.

И ныне, Богородичен: Всели́вшееся во утро́бу Твою́ Сло́во, Ма́ти чи́стая, дре́вле в челове́цех всели́вшуюся от преступле́ния тлю́, я́ко Бо́г еди́н, вне́ изгна́л е́сть, за милосе́рдие ми́лости.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

Икос:

Воспои́м ны́не святи́теля пе́сньми, / ми́рским лю́дем па́стыря и учи́теля, / да моли́твами его́ просвети́мся: / се бо яви́ся чист весь, нетле́нен ду́хом, / Христу́ принося́ же́ртву непоро́чну, чи́сту, Бо́гу благоприя́тну, / я́ко святи́тель, очище́н и душе́ю и те́лом, / те́мже сый и́стинно Це́ркве предста́тель и побо́рник сея́, / я́ко вели́кий таи́нник Бо́жия благода́ти.

Пе́снь 7

Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

Губя́щаго дре́вле Госпо́дни лю́ди, безу́мнаго А́риа удави́л еси́ жи́лами слове́с твои́х, я́ко па́стырь нача́льный и́стинен, о́тче Нико́лае.

Свя́то преше́д пресвято́е житие́ твое́, со святы́ми живе́ши, о́тче Нико́лае, свяще́ние посыла́я и просвеще́ние благоче́стно тя́ блажа́щым.

Слава: Я́ко гото́ва тя́ изба́вителя, я́ко те́пла засту́пника призыва́ем при́сно, о́тче Нико́лае, от страсте́й на́с изба́ви и неча́емых напа́стей, находя́щих на ны́.

И ныне, Богородичен: Мене́ небреже́нием ду́шу омрачи́вшаго, просвети́ Чи́стая, Я́же Све́т ро́ждшая, се́рдца моего́ возжиза́ющи свети́льник, я́ко да усе́рдием благи́м сла́влю Тя́.

Пе́снь 8

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля, и Изба́вителя благослови́те, и превозноси́те во вся́ ве́ки.

Зе́млю кро́тких насле́довал еси́, кро́ток преподо́бне бы́в. Те́мже молю́ся ти́ ве́рно: укроти́ моли́твами твои́ми, подвиза́ющаяся на мя́ при́сно лука́ваго треволне́ния.

Я́коже изба́вил еси́ воево́ды, и́же непра́ведно умре́ти хотя́щыя: та́ко от челове́к лука́вых озлобле́ния на́с изба́ви, и от вся́каго бесо́вскаго наве́та, Нико́лае, моля́ Спа́са.

Слава: Пу́ть показа́л еси́ челове́ком пра́вый и спаси́тельный: на него́же наста́ви на́с в житии́ преходя́щих, Нико́лае, моли́твами твои́ми, я́ко да ку́пно вни́дем в живо́тная врата́.

И ныне, Богородичен: Кре́пость и пе́ние мое́ е́сть, И́же из Тебе́ рожде́йся, Пречи́стая, Его́же приле́жно моли́, Де́во, разсла́бленнаго мя́ страстьми́ укрепи́ти, и твори́ти спаси́тельная Его́ повеле́ния.

Пе́снь 9

Ирмо́с: На Сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве, Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

Я́ко огражде́ние Боже́ственное и утвержде́ние, и до́брое прибе́жище, земны́й ми́р стяжа́ тя́: хода́тайствы бо твои́ми при́сно избавля́емся от вся́каго искуше́ния и тесноты́, о́тче Нико́лае. Те́мже во хвале́нии ве́рно ублажа́ем Тя́.

Утесня́емь бы́в мно́гими обстоя́нии, к простра́нству прибега́ю, всеблаже́нне, те́плых моли́тв твои́х, претвори́ души́ моея́ боле́зни, вопию́ ти: во́лны укроти́ отча́яния, и умири́ моего́ ума́ смуще́ние.

Слава: Творца́ настои́т прише́ствие суди́ти все́й земли́, и негото́в сы́й окая́нный, ве́сь устраша́юся, помышля́я зо́л мои́х мно́жество: Го́споди долготерпели́ве, уще́дри, и спаси́ мя Боже́ственными Никола́а моли́твами преподо́бнаго Твоего́.

И ныне, Богородичен: Просвеще́ние мое́ спаси́тельное яви́лася еси́, ро́ждшая Све́т, души́ моея́ о́блаки разгоня́ющи мра́чныя и лю́тыя: я́ко да сы́н дне́ моли́твами Твои́ми бу́ду содева́я преподо́бная, я́ко да в песнословле́нии преподо́бне ублажа́ю Тя́.

Молитва

О всеблаги́й о́тче Нико́лае, па́стырю и учи́телю всех, ве́рою притека́ющих к твоему́ заступле́нию и те́плою моли́твою тебе́ призыва́ющих, ско́ро потщи́ся и изба́ви Христо́во ста́до от волко́в, губя́щих е́, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа, тру́са, на́шествия иноплеме́нников и междоусо́бныя бра́ни, от гла́да, пото́па, огня́, меча́ и напра́сныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их царе́ва гне́ва и посече́ния ме́чнаго. Та́ко поми́луй и мене́, умо́м, сло́вом и де́лом во тьме грехо́в су́ща, и изба́ви мя гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию Христо́с Бог ти́хое и безгре́шное житие́ даст ми пожи́ти в ве́це сем и изба́вит мя шу́ияго стоя́ния, сподо́бит же десна́го со все́ми святы́ми, ами́нь.

Каноны святителю Николаю