Канон Господу нашему Иисусу Христу, глас 8.

Тропарь, глас 8:

Оком благоутро́бным, Го́споди, виждь мое́ смире́ние, я́ко пома́ле жизнь моя́ иждива́ется, и от дел несть мне спасе́ния. Сего́ ра́ди молю́ся: о́ком благоутро́бным, Го́споди, виждь мое́ смире́ние и спаси́ мя.

Слава: Яко Судии́ предстоя́щу, попецы́ся, душе́, и стра́шнаго дне час помышля́й, суд бо неми́лостив есть не сотво́ршым ми́лости. Возопи́й у́бо Христу́ Бо́гу: Сердцеве́дче, согреши́х, пре́жде да́же не осу́диши, поми́луй мя.

И ныне: Стра́шнаго Твоего́ и гро́знаго, и неумы́тнаго суда́, Христе́, во уме́ прие́м день и час, трепе́щу, я́ко злоде́й, студа́ дела́ и дея́ния име́яй лю́тая, я́же еди́н аз соде́ях приле́жно. Те́мже стра́хом припа́даю Тебе́, вопия́ боле́зненно: моли́твами ро́ждшия Тя, Многоми́лостиве, спаси́ мя.

Кано́н покая́нен ко Го́споду на́шему Иису́су Христу́. Творе́ние Ио́сифово. Гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Помилуй мя Боже, помилуй мя!

Изба́ви мя́ гее́нны, ю́же себе́ де́лы безме́стными исхода́таих, Изба́вителю: и Твоея́ любве́ возжзи́ ми в помышле́нии о́гнь Боже́ственный. (Дважды)

Подклони́хся страсте́м и омрачи́хся, и безслове́сен яви́хся, сло́вом почте́н бы́в: Го́споди, возникнове́ние да́ждь души́ мое́й, и и́миже ве́си судьба́ми, спаси́ мя.

Слава и ныне: Богоро́дичен: Исцели́, Чи́стая, неду́гующа мя́ лю́те смертоно́сным грехо́м, плотски́х и душе́вных страсте́й, я́ко да ве́рою при́сно ублажа́ю Тя́.

Пе́снь 3

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Кото́рыми узрю́ Тя тогда́, Христе́ Спа́се, очи́ма, ниеди́ну на земли́ за́поведь Твою́ сотвори́в? Ка́ко нестерпи́мому Твоему́ предста́ну престо́лу, безме́рных ми́ зо́л творя́щу отве́т? (Дважды)

Просте́р ру́це Твои́х щедро́т, приими́ мя я́коже пре́жде блу́днаго, подо́бными о́бразы порабо́тившагося безче́стным страсте́м, и от Тебе удали́вшася, Иису́се Человеколю́бче преблаги́й.

Слава и ныне: Богоро́дичен: Тебе́ храни́тельницу, Пресвята́я, в напа́стех стяжа́х: Тебе́ по Бо́зе мою́ предста́тельницу и́мам неусы́пну: Тебе́ да обря́щу, Пречи́стая, избавля́ющую мя́ в де́нь Суда́ вся́каго осужде́ния.

Седа́льны. Гла́с 8.

Де́нь о́н стра́шный помышля́ющи, душе́ моя́, побди́, вжига́ющи свещу́ Твою́, еле́ем просвеща́ющи, не ве́си бо, когда́ прии́дет к тебе́ гла́с глаго́лющий: се́ Жени́х. Блюди́ у́бо, душе́ моя́, да не воздре́млеши, и пребу́деши вне́ толку́щи я́ко пя́ть де́в: но бо́дренно пожди́, да усря́щеши Христа́ еле́ем масти́тым, и да́ст ти́ черто́г Боже́ственный сла́вы Своея́.

Сла́ва, и ны́не, Богоро́дичен: Ра́дуйся, врата́ Царя́ сла́вы я́же вы́шний еди́н про́йде, и еди́ну запеча́тану сохрани́, во спасе́ние ду́ш на́ших.

Пе́снь 4

Ирмо́с: Из горы́ приосене́нныя, Сло́ве, проро́к, Еди́ныя Богоро́дицы, хотя́ща воплоти́тися, богови́дно усмотри́. И со стра́хом славосло́вяше си́лу Твою́.

Вели́к по́двиг души́ разлуча́ющейся, тре́пет стра́шен, Судии́ седя́щу. И суди́мым челове́ком согреши́вшым: увы́ мне́, что́ сотворю́ осужде́ный? (Дважды)

Име́я се́рдце скве́рн испо́лнено, и грехо́в неудо́бь носи́мая бремена́, и к щедро́там Твои́м притека́ю, Влады́ко: не пре́зри мене́, но уще́дри мя́, молю́ся.

Слава и ныне: Богоро́дичен: Тебе́, чи́стое прия́телище Влады́ки Богороди́тельнице, ве́рою молю́: очи́сти мя́ от вся́кия скве́рны, и до́м покажи́ вседе́тельнаго и Боже́ственнаго Ду́ха.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою, Тво́й ми́р пода́ждь на́м, Человеколю́бче.

Нра́вом лука́вым преогорчи́х Тя́, Го́споди, де́лаяй безме́стная: но уще́дри мя́ обраща́ющагося, и спаси́. (Дважды)

Име́яй по́мысл от злы́х невозница́ющ, не чу́вствую несмы́сленный, недоуме́ние мое́, Иису́се, разреши́, и спаси́ мя.

Слава и ныне: Богоро́дичен: Умертви́ чи́стая, пло́ти моея́ двиза́ния, умертви́вшая рождество́м Твои́м, Отрокови́це, живу́щий гре́х пра́отца.

Пе́снь 6

Ирмо́с: Ио́ну в ки́те Го́споди еди́наго всели́л еси́, мене́ же свя́заннаго мре́жами вра́жиими, я́ко от тли́ о́наго спаси́.

Со́лнечный све́т покая́ния возсия́й ми́, Христе́ Светода́телю, су́щему во тьме́ прегреше́ний, да пою́ Твою́ благосты́ню. (Дважды)

Твоего́ стра́шнаго суди́ща трепе́щу всегда́, злы́х же не отступа́ю, рабо́тая зло́му обы́чаю: испра́ви мя́, Христе́, да пою́ Твою́ благосты́ню.

Слава и ныне: Богоро́дичен: Да гла́сы благода́рственне всегда́ сла́влю Тя́, Всенепоро́чная, души́ моея́ отжени́ тьму́, и покая́ния све́том разреши́ ми́ мра́чная согреше́ния.

Седален гла́с 8

Мытаре́во стена́ние, и блудни́цы рыда́ние, душе́, пре́жде конца́ восприими́, ве́дущему та́йная дела́ Твоя́, не преста́й рыда́нием испове́дающися и пла́чем, посто́м и бде́нием, и моли́твою вопию́щи: согреши́х, очи́сти мя́, Спа́се, моли́твами А́нгел Твои́х, я́ко ще́др, и спаси́ мя.

Пе́снь 7

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша пою́ще: отце́в Бо́же благослове́н еси́.

Воздыха́ние ми́ да́ждь, Христе́, я́коже иногда́ мытарю́, и я́коже блудни́це, слеза́ми отмы́в гное́ния зо́л мои́х, и вопию́ща мя́ уще́дри: оте́ц на́ших Бо́же благослове́н еси́. (Дважды)

В разбо́йники душегуби́тельныя, Спа́се, впа́дшаго, и уя́звленнаго лю́те, исцели́ еле́ем и́скренняго покая́ния, и умили́ пе́ти Тебе́: оте́ц на́ших Бо́же благослове́н еси́.

Слава и ныне: Богоро́дичен: И́же Бо́жие Бо́г сло́во, во утро́бу твою́ все́лься, Де́во Ма́ти Чи́стая, все́м засту́пницу оби́димым явля́ет Тя́, вопию́щым: оте́ц на́ших Бо́же благослове́н еси́.

Пе́снь 8

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.

Отведе́наго мя́ плотски́ми любосла́стии, и от Тебе, Сло́ве, безу́мно удали́вшагося, и уподо́бльшася все́м ското́м, не пре́зри, Спа́се, но пре́жде конца́ обрати́в спаси́ мя. (Дважды)

От гре́х ника́коже остаю́ся, обраще́ния никогда́же творя́, и вопию́ окая́нный: согреши́х Ти́, Го́споди, и ожесте́вшую умили́ ду́шу мою́, Ще́дре.

Слава и ныне: Богоро́дичен: Стоя́щих утвержде́ние еси́, и па́дших исправле́ние, Де́во. Те́мже па́дшаго мя́ возста́ви, да Тя́ сла́влю, Благослове́нную и Обра́дованную.

Пе́снь 9

Ирмо́с: Устра́шися вся́к слу́х неизрече́нна Бо́жия снисхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в челове́к. Те́мже Пречи́стую Богоро́дицу ве́рнии велича́ем.

Я́коже дре́вле блудни́цу, с пла́чем припа́дшую к Тебе́, Спа́се, очи́стил еси́: и я́коже оправда́л еси́ мытаря́ сло́ве, то́чию воздохну́вша: и я́коже прия́л еси́ Манасси́ю, и я́ко Дави́да поми́ловал еси́ пока́явшася: та́ко и мене́ приими́, и спаси́ мя́, Человеколю́бче. (Дважды)

Воздохни́ и прослези́ся, душе́, пе́рвых твои́х согреше́ний отступи́, и к ве́дущему та́йная Твоя́ я́вственно припади́ и возопи́й те́пле: согреши́х Ти́, Го́споди, ту́не мя́ уще́дри, име́яй утро́бы щедро́т, Многоми́лостиве.

Слава и ныне: Богоро́дичен: Просвети́, Влады́чице, две́ре све́та, се́рдца моего́ о́чи молю́ся, и́хже омрачи́ грехо́вная тьма́ глубо́кая, и покая́ния ми́ зарю́ низпосли́, и огня́ ве́чнаго хода́тайством Твои́м, Чи́стая, свободи́.

Молитва

Влады́ко Христе́ Бо́же, И́же Страстьми́ Твои́ми стра́сти моя́ исцели́вый и я́звами Твои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния, сраствори́ моему́ те́лу от обоня́ния животворя́щаго Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́. Возвы́си мой ум к Тебе́, до́лу привле́кшийся, и возведи́ от про́пасти поги́бели, я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́, но, Влады́ко Го́споди, Иису́се Христе́, Сокро́вище Благи́х, да́руй мне покая́ние всеце́лое, и се́рдце люботру́дное во взыска́ние Твое́, да́руй мне благода́ть Твою́, и обнови́ во мне зра́ки Твоего́ о́браза. Оста́вих Тя, не оста́ви мене́, изы́ди на взыска́ние мое́, возведи́ к па́жити Твое́й, и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х та́инств, моли́твами Пречи́стыя Твоея́ Ма́тере и всех святы́х Твои́х, ами́нь.