Шрифт

Каноны Октоиха Господу

Канон Господу нашему Иисусу Христу, глас 7.

Тропарь, глас 7:

Иму́щи, душе́ моя́, врачевство́ покая́ния, приступи́ слезя́щи, воздыха́нием вопию́щи: Врачу́ душ и теле́с, свободи́ мя, Человеколю́бче, от мно́гих согреше́ний, сопричти́ мя блудни́це, и разбо́йнику, и мытарю́, и да́руй ми, Бо́же, беззако́ний мои́х проще́ние, и спаси́ мя.

Слава: Мытаре́ву покая́нию не поревнова́х, и блудни́цы слез не стяжа́х: недоуме́юся бо от ослепле́ния о таково́м исправле́нии, но Твои́м благоутро́бием спаси́ мя, Христе́ Бо́же, я́ко Человеколю́бец.

И ныне: Богоро́дице Де́во Нескве́рная, Сы́на Твоего́ моли́ с го́рними си́лами, проще́ние прегреше́ний нам пре́жде конца́ дарова́ти и ве́лию ми́лость.

Кано́н покая́нен ко Го́споду на́шему Иису́су Христу́. Творе́ние Ио́сифово. Гла́с 7:

Пе́снь 1

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, тому́ еди́ному пои́м, я́ко просла́вися.

Припев: Помилуй мя Боже, помилуй мя!

В пучи́ну лю́тых впа́д, вопию́ Ти: ру́ку ми́ простри́, Ще́дре, и спаси́ мя я́ко Петра́, Человеколю́бче. (Дважды)

Мене́ ка́ющагося, Христе́, я́коже блудни́цу от согреше́ний мно́гих омы́й манове́нием ми́лости Твоея́, да ве́рою сла́влю Тя́.

Слава и ныне, Богоро́дичен: Я́же предста́тельнице ве́рных, я́же согреша́ющих обраще́ние к Бо́гу, Де́во Всепе́тая, моли́твами Твои́ми спаси́ мя.

Пе́снь 3

Ирмо́с: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м: разшири́шася на враги́ моя́ уста́ моя́, возвесели́хся о спасе́нии Твое́м.

Но́щию безме́стными содержи́мь бы́х грехи́, све́том мя́ покая́ния ны́не озари́, светода́телю Человеколю́бче, да ве́рою сла́влю Тя́. (Дважды)

Путие́ вси́, по ни́хже ходи́х в житии́, в про́пасть сласте́й мя́ низри́нуша: Иису́се, покая́ния ми́ Боже́ственныя пути́ покажи́.

Слава и ныне, Богоро́дичен: Бо́га ро́ждши небе́снаго Царя́, Де́во, во мне́ ца́рствующий гре́х низложи́, и уще́дривши спаси́ мя.

Седа́льны. Гла́с 7.

Пучи́на жите́йская обурева́ет мя́, Го́споди, волне́ния беззако́ний мои́х погружа́ют мя́, Влады́ко: но простри́ Твою́ ру́ку я́коже Петро́ви, и спаси́ мя, Человеколю́бче.

Сла́ва, и ны́не, Богоро́дичен: Честне́йши сла́вных херуви́мов еси́ Пресвята́я Де́во, они́ бо Боже́ственныя не терпя́ще си́лы, кри́лы покрыва́юще ли́ца слу́жбу соверша́ют: Ты́ же воплоще́нно Сло́во самови́дно зря́щи но́сиши, Его́же непреста́нно моли́ о душа́х на́ших.

Пе́снь 4

Ирмо́с: Покры́ла е́сть Небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Хотя́й все́м челове́ком, Ще́дре, спасти́ся, спаси́ мя преступи́вшаго Твоя́ повеле́ния, Сло́ве, и не уничижи́ мене́. (Дважды)

Подклони́хся безслове́сным страсте́м, и ското́м окая́нный уподо́бихся, Ще́дре Сло́ве Бо́жий, уще́дрив спаси́ мя.

Слава и ныне, Богоро́дичен: Де́во Чи́стая богоблагода́тная, облагодати́вши у́м мо́й омраче́нный, неве́дения соверше́нно свободи́.

Пе́снь 5

Ирмо́с: У́тренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.

Ле́ностию житие́ ижди́х, и трепе́щу неизбе́жнаго Твоего́ суди́ща, на не́мже суди́тися хощу́ стра́стный а́з, уще́дри мя́, Го́споди. (Дважды)

И́же о́чи слепце́м просвети́вый, Сло́ве, души́ моея́ зе́ницы лю́те омраче́нныя отве́рзи, зре́ти све́т повеле́ний Твои́х.

Слава и ныне, Богоро́дичен: И́же хоте́нием вся́ сотвори́вый Бо́г Сло́во, па́че сло́ва, Де́во, из Тебе́ воплоти́ся: Того́ у́бо приле́жно о все́х моли́.

Пе́снь 6

Ирмо́с: Ио́на из чре́ва А́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Обы́де мя́ бе́здна прегреше́ний, снидо́х во глубину́ поги́бели: возведи́ мя, Сло́ве, я́коже иногда́ Ио́ну от истле́ния к жи́зни. (Дважды)

Обурева́ет мя́ помышле́ний треволне́ние, ко приста́нищу и́стиннаго покая́ния испра́ви мя́, Ще́дре, в тишине́ соблюда́я се́рдце мое́.

Слава и ныне, Богоро́дичен: Пое́м Тя́, Препе́тая Отрокови́це, ро́ждшую пресвято́е Сло́во, Его́же вся́ си́лы небе́сныя воспева́ют немо́лчными гла́сы.

Седален гла́с 7

Разли́чных страсте́й, и согреше́ний мои́х бу́ря потопля́ет мя́ во глубину́ отча́яния: но моли́твами А́нгел Твои́х, Иису́се Многоми́лостиве, я́ко блу́днаго спаси́ мя.

Пе́снь 7

Ирмо́с: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.

Пожри́ душе́, же́ртву хвале́ния Бо́гу, потщи́ся и пока́йся, до́ндеже то́рг е́сть жите́йский: ны́не ку́плю де́й до́брых придая́ний. (Дважды)

Приближа́ется душе́, сме́ртное посече́ние, плоды́ досто́йны сотвори́: да не я́ко непло́дное дре́во вве́ржешися во о́гнь гее́нский, и воспла́чешися неуте́шно.

Слава и ныне, Богоро́дичен: Купина́ Тя́ прообража́ше, Чи́стая, неопали́мая, о́гнь бо родила́ еси́ непостоя́нный, Де́во. Те́мже вопию́ Ти: попали́ веще́ственныя моя́ стра́сти.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.

Сло́во прия́х я́ко све́щник сия́ющ, но к безслове́сным преклони́хся окая́нный страсте́м, и во тьме́ зло́бней ше́ствую всегда́. (Дважды)

Госпо́дь бли́з, я́коже ве́руем: попецы́ся, душе́, и не уныва́й, побди́ и возопи́й бо́дренно: ще́дрый Человеколю́бче, спаси́ мя.

Слава и ныне, Богоро́дичен: Разреши́ся от кля́твы рождество́м Твои́м, Де́во, челове́ческое смеше́ние: и́бо Всеблагослове́ннаго, благослове́ньми вся́ украша́ющаго родила́ еси́.

Пе́снь 9

Ирмо́с: Па́че естества́ Ма́терь, и по естеству́ Де́ву, еди́ну в жена́х благослове́нную пе́сньми ве́рнии Богоро́дицу велича́ем.

Се́ су́д приближа́ется, и осужде́нию дела́ име́я, са́м отчаява́юся: пра́ведный судие́ Христе́ Бо́же, не осуди́ мене́. (Дважды)

Я́коже ве́рная ханане́а, поми́луй мя́, вопию́ Ти́: я́коже погорбле́ную дре́вле испра́ви мя́, е́же ступа́ти пра́во к стезя́м Твои́м, Человеколю́бче.

Слава и ныне, Богоро́дичен: Просвети́тельными луча́ми возсия́вшаго сло́ва из Тебе́, Де́во Чи́стая, озари́ мя, грехо́в и страсте́й во тьме́ покрыва́ема.

Молитва

Го́споди Бо́же мой, Еди́н Благи́й и Человеколюби́вый, Еди́н Ми́лостивый и Кро́ткий, Еди́н И́стинный и Пра́ведный, Еди́н Ще́дрый и Ми́лостивый Бо́же наш: да прии́дет си́ла Твоя́ на мя, гре́шнаго и непотре́бнаго раба́ Твоего́, и да укрепи́т мой храм Ева́нгелием Боже́ственнаго уче́ния Твоего́, Влады́ко и Человеколю́бче, Любобла́же, Любоблагоутро́бне, просвети́ моя́ утро́бы и вся у́ды Твое́ю во́лею. Очи́сти мя от вся́кия зло́бы и греха́: соблюди́ мя нескве́рна и непоро́чна от вся́каго наи́тия и де́йства диа́вола, и да́руй ми по Твое́й бла́гости, Твоя́ разуме́ти, Твоя́ му́дрствовати, и в Твои́х хоте́ниих жи́ти, Твоего́ стра́ха страши́тися, е́же твори́ти Тебе́ благоуго́дная до после́дняго моего́ издыха́ния, я́ко да по неисповеди́мой Твое́й ми́лости соблюде́ши мое́ те́ло и ду́шу, ум же и мы́сли, не искуше́н вся́кия сопротиволежа́щия се́ти храм. Го́споди мой, Го́споди, покры́й мя Твои́м благоутро́бием, и не оста́ви мя, гре́шнаго, и нечи́стаго, и недосто́йнаго раба́ Твоего́: я́ко Ты еси́ Защи́титель мой, Го́споди, и о Тебе́ пе́ние мое́ вы́ну, и Тебе́ сла́ву возсы́лаем, Отцу и Сыну и Свято́му Духу, ны́не и при́сно, и во ве́ки веко́в, аминь.