Канон Господу нашему Иисусу Христу, глас 6.

Тропарь, глас 6:

Помышля́ю день стра́шный и пла́чу дея́ний мои́х лука́вых, ка́ко отвеща́ю Безсме́ртному Царю́? Или́ ко́им дерзнове́нием воззрю́ на судию́, блу́дный аз? Благоутро́бный Отче, Сы́не единоро́дный, Ду́ше Святы́й, поми́луй мя.

Слава: Во юдо́ли плаче́вне, на ме́сте, е́же завеща́л еси́, егда́ ся́деши, Ми́лостиве, сотвори́ти пра́ведный суд, не обличи́ моя́ сокрове́нная, ниже́ посрами́ мене́ пред Ангелы, но пощади́ мя, Бо́же, и поми́луй мя.

И ныне: Упова́ние и покро́в держа́вный к Тебе́ притека́ющих, Богороди́тельнице, благо́е предста́тельство ми́ра, моли́ со безпло́тными приле́жно, Его́же родила́ еси́ Человеколю́бнейшаго Бо́га, изба́витися душа́м на́шым от вся́каго преще́ния, Еди́на Благослове́нная.

Кано́н покая́нен ко Го́споду на́шему Иису́су Христу́ [его́же краегране́сие: О́чию мое́ю Христе́ пла́чь приими́] Творе́ние Ио́сифово, гла́с 6:

Пе́снь 1

Ирмо́с: Чу́вственный фарао́н потопле́н бы́сть со всево́инством, Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

Припев: Помилуй мя Боже, помилуй мя!

Впа́дшаго, Христе́, разбо́йников в ру́це лука́вых, и я́звами душетле́нными, и́сполу ме́ртва бы́вша, ми́лости еле́ем уврачева́в уще́дри мя́, да Тя́ прославля́ю. (Дважды)

Я́ко согреши́х мно́го, верте́п бы́х разбо́йником: рожде́йся в верте́пе Христе́, сле́з ту́чу да́руй ми́, и очи́сти, я́ко да Свято́му Ду́ху Твоему́ це́рковь бу́ду.

Слава и ныне, Богоро́дичен: С му́ченики, Чи́стая, с Боже́ственными проро́ки и со все́ми А́нгелы, Зижди́теля все́х моли́, спасти́ ве́рою Тя́ сла́вящих и велича́ющих.

Пе́снь 3

Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мам, Бла́же, прибе́жище и утвержде́ние.

Пока́ятися Христо́ви обеща́хся, и от злы́х ника́коже отступа́ю: что́ бу́ду, слепото́ю обложе́н мно́гою? Сы́не Бо́жий, Ты́ мя уще́дри. (Дважды)

Помышля́ю Бо́жие долготерпе́ние, изжи́в жи́знь в ле́ности окая́нный, и бою́ся, да не внеза́пу посече́ние сме́ртное предвари́т мя́.

Слава и ныне, Богоро́дичен: Но́в на́м ра́й яви́лася еси́ жи́зни, чи́стая, посреде́ дре́во иму́щий, от него́же яды́й, Пречи́стая, умерщвле́ния Ада́м лука́ваго отпуща́ется.

Седа́льны. Гла́с 6.

Поми́луй на́с, Го́споди, поми́луй на́с: вся́каго во отве́та недоуме́юще, сию́ Ти моли́тву я́ко Влады́це гре́шнии прино́сим, поми́луй на́с.

Сла́ва, и ны́не, Богоро́дичен: В хра́ме стоя́ще сла́вы Твоея́, на небеси́ стоя́ти мни́м. Богоро́дице, две́рь небе́сная, отве́рзи на́м две́ри ми́лости Твоея́.

Пе́снь 4

Ирмо́с: Покры́ла е́сть небеса́ доброде́тель Твоя́, Христе́, и Твоего́ хвале́ния, Го́споди, вся́ испо́лнишася.

Не осуди́ на́с согреши́вших Ти́ мно́го: но обы́чною Твое́ю, Влады́ко, ми́лостию уще́дри. (Дважды)

Пу́ть сы́й живота́, Спа́се, смертоно́сных путе́й греха́ уклоня́тися ми́ при́сно сподо́би.

Слава и ныне, Богоро́дичен: Ле́ностию жи́знь мою́ ижди́в, Пречи́стая, к Твоему́ притека́ю заступле́нию, уще́дривши спаси́ мя.

Пе́снь 5

Ирмо́с: Све́т возсия́вый ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

И́же от Иессе́ова ко́рене израсты́й, Христе́, изсуши́ прозябе́ния страсте́й мои́х, всажда́я во мне́ стра́х Тво́й. (Дважды)

Воздыха́ния я́коже мыта́рь стя́жим, и злы́х отсту́пим, я́ко да воздыха́ния убежи́м ве́чнующаго.

Слава и ныне, Богоро́дичен: Небе́сная врата́ воспое́м Богоро́дицу, и́миже вхо́дят вси́ гре́шнии ко вхо́дом проще́ния.

Пе́снь 6

Ирмо́с: Ки́том пожре́н грехо́вным, вопию́ Тебе́, Христе́, я́ко проро́ка из истле́ния мя́ свободи́.

Воочи́вый слепы́я, Христе́, души́ моея́ отве́рзи о́чи: я́ко да све́т Тво́й у́зрю, и страсте́й тьмы́ изба́влюся. (Дважды)

Во́д животво́рных покая́ния испо́лнену ду́шу мою́ сотвори́, Ще́дре, ре́ки сле́з да́руя ми́.

Слава и ныне, Богоро́дичен: Свята́я Ма́ти Бо́жия, оскверне́ное се́рдце мое́ дея́нии нечи́стыми, моли́твами Твои́ми очи́сти.

Седален гла́с 6

Душе́, в ле́ности жи́знь провожда́ющи всю́, дне́ су́днаго гро́знаго во уме́ не прие́млеши, воспряни́ у́бо, и покая́ние себе́ избери́, обрати́ся и возопи́й ко Христу́: Ще́дре, не воспомяни́ на́ших мно́гих согреше́ний, в ча́с осужде́ния.

Пе́снь 7

Ирмо́с: Преподо́бных Твои́х отроко́в пе́снь услы́шавый, и пе́щь горя́щую ороси́вый, благослове́н еси́, Го́споди Бо́же оте́ц на́ших.

От зе́льныя зло́бы умо́м ослепи́хся, и не воззре́х на све́т покая́ния, Христе́ Спа́се мо́й, спаси́ мя. (Дважды)

Наде́юся на Твое́ благоутро́бие, припа́даю Ти́, Ще́дре, прошу́ зо́л мои́х разреше́ния, не пре́зри мя́, Влады́ко.

Слава и ныне, Богоро́дичен: Ра́бий зра́к прие́мшаго Влады́ку, Отрокови́це, ражда́еши: его́же моли́, Чи́стая, страсте́й мя́ рабо́ты свободи́ти.

Пе́снь 8

Ирмо́с: Преподо́бнии Твои́ о́троцы в пещи́ херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

Поревнова́х немилосе́рдию бога́таго нра́вом, и презира́я моего́ обнища́вшаго ума́, пред две́рьми покая́ния огное́наго зло́бою, Христе́, да не во о́гнь по́слеши негаси́мый. (Дважды)

Зиме́ и в суббо́ту, до́брых пра́здности, да не от жития́ мя по́ймеши негото́ва, зи́му грехо́вную утоли́вый ще́дрый: но обраще́ние Боже́ственное пода́ждь ми́.

Слава и ныне, Богоро́дичен: Су́щи А́нгел честне́йшая, Бо́га пресвята́го родила́ еси́, премно́жественне освя́щшися, Богоро́дице Де́во: те́мже ду́шу мою́ освяти́.

Пе́снь 9

Ирмо́с: Е́же ра́дуйся от А́нгела прии́мшая, и ро́ждшая Созда́теля Своего́, Де́во, спаси́ Тя велича́ющыя.

Ио́сиф у́бо целому́дрствовав, пшеницода́вец позна́н бы́сть: а́з же блу́дствуя, гла́дом одержи́мь е́смь доброде́тельных дея́ний. (Дважды)

Я́ко Пе́тр пока́явся Христе́, сле́зы приношу́, я́ко мыта́рь воздыха́ю, я́ко блу́дный из глубины́ зову́: согреши́х, прости́ мя.

Слава и ныне, Богоро́дичен: Просвети́ мя омраче́ннаго грехи́, безстра́стия Све́т ро́ждшая: я́ко да пою́ Тя, Чи́стая Присноде́во.

Молитва

Возсия́й в сердца́х на́ших, Человеколю́бче Го́споди, Твоего́ Богове́дения нетле́нный свет, и мы́сленная на́ша отве́рзи о́чи, во ева́нгельских Твои́х пропове́даний разуме́ние, вложи́ в нас и блаже́нных Твои́х за́поведей страх, да плотски́я по́хоти вся попра́вше, духо́вное жи́тельство про́идем, вся, я́же ко благоугожде́нию Твоему́ и му́дрствующе и де́юще. Ты бо еси́ просве́щение душ и теле́с на́ших, Христе́ Бо́же, и Тебе́ сла́ву возсыла́ем, со Безнача́льным Твои́м Отцем и Всесвяты́м, и Благи́м, и Животворя́щим Твои́м Ду́хом, ныне и при́сно, и во ве́ки веко́в, аминь.