Канон Господу нашему Иисусу Христу, глас 5.

Тропарь, глас 5:

Во глубины́ мя греха́ попо́лзшася, треволне́ние обурева́ет отча́яния, но предвари́, Христе́, я́ко Всеси́лен, Упра́вителю всех, и ко приста́нищу ти́хому устреми́ безстра́стия, за благоутро́бие, Спа́се, и спаси́ мя.

Слава: Душе́, я́же зде привре́менна, та́мо же ве́чна, зрю суди́лище, и на Престо́ле судию́, и трепе́щу изрече́ния: про́чее, душе́, обрати́ся, суд непроща́емь.

И ныне:Наде́жде ненаде́емых, По́моще безпомо́щных, Заступле́ние на Тя упова́ющих, свята́я Влады́чице Богоро́дице, по́мощь Твою низпосли́ нам.

Кано́н, его́же краегране́сие си́це: Мно́го Ти́ согреши́вшаго уще́дри, Сло́ве. Творе́ние ки́р Ио́сифа, гла́с 5:

Пе́снь 1

Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри, пе́снь побе́дную, я́ко просла́вися.

Припев: Помилуй мя Боже, помилуй мя!

Мно́гими лестьми́ извлеко́ма, и прельща́ема, Христе́, чу́ждаго, обрати́ и уще́дри мя́, я́ко всеси́лен. (Дважды)

И́же глуха́го у́шы отве́рзый, Христе́, души́ моея́ огло́хнувшая ушеса́ отве́рзи, молю́ся: я́ко да Твоя́ словеса́ внуша́ю.

Слава и ныне: Богоро́дичен: Две́ре Боже́ственныя сла́вы, покая́ния ми́ две́ри отве́рзи, и от вра́т а́довых исхити́, молю́ся, смире́нную мою́ ду́шу.

Пе́снь 3

Ирмо́с: Над язы́ки Бо́г воцари́ся, Бо́г седи́т на престо́ле святе́м Свое́м, и пое́м ему́ разу́мно я́ко Царю́ и Бо́гу.

Ты́, и́же ни еди́ному хотя́й поги́бнути, благи́й Го́споди, погиба́ющаго уще́дри, и спаси́ мя, ма́нием всеще́дре ми́лости Твоея́. (Дважды)

Я́же в ве́дении и не в ве́дении согреши́х к Тебе́, Христе́ Го́споди, вся́ ве́дящему прихожду́ и припа́даю Ти́, приими́ мя я́коже блу́днаго.

Слава и ныне: Богоро́дичен: Де́во Ма́ти, я́же Бо́га вопло́щшая, гла́сы приими́ вопию́щих Ти́ всегда́, и изба́ви на́с от разли́чных обстоя́ний.

Седа́льны. Гла́с 5.

Вси́ побди́м, и Христа́ усря́щим со мно́жеством еле́а, и свеща́ми све́тлыми, я́ко да черто́га вну́трь сподо́бимся: и́же бо вне́ двере́й обрета́яйся, безде́льно Бо́гови воззове́т: поми́луй мя́.

Сла́ва, и ны́не, Богоро́дичен: Святе́йши херуви́м, и вы́шши серафи́м, Пречи́стая, Богоро́дицу Тя́ вои́стинну испове́дающе, и́мамы гре́шнии засту́пницу, и обрета́ем во вре́мя напа́стей спасе́ние. Те́мже не преста́й о на́с моля́щи, держа́во и прибе́жище душа́м на́шым.

Пе́снь 4

Ирмо́с: Дела́ смотре́ния Твоего́ Го́споди, ужаси́ша проро́ка Авваку́ма: изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.

Дела́, я́же в житии́ соверши́х, су́ть лука́ва и лю́та: о ни́хже, Христе́ Бо́же мо́й, изба́ви мя́, покая́ние и́скреннее подая́ ми. (Дважды)

Вся́ку за́поведь честну́ю уничижи́х, стра́х Тво́й отри́нух, Христе́, и бою́ся неизбе́жнаго Твоего́ суди́ща, в не́мже да не осу́диши мене́, Благоутро́бне.

Слава и ныне: Богоро́дичен: Воплоща́ется от чи́стых крове́й Твои́х Госпо́дь, покая́ние чту́щым Тя́ подава́я, Всепе́тая, Твои́м благи́м хода́тайством, я́ко благоутро́бен, и еди́н Человеколю́бец.

Пе́снь 5

Ирмо́с: Све́те и́стинный, Христе́ Бо́же, к Тебе́ у́тренюет ду́х мо́й от но́щи, яви́ на мя́ лице́ Твое́.

Воспряни́, о душе́, воспряни́ от сна́ тя́жкаго, моего́ лю́таго греха́, и покая́ния све́том озари́ся. (Дважды)

Обнови́м ду́шу прилежа́нием, и умиле́ния ту́чами напои́мся: я́ко да прозябе́м покая́ния кла́с.

Слава и ныне: Богоро́дичен: Де́во в жена́х благослове́нная, Твоя́ ми́лости пода́ждь лю́дем Твои́м: ми́лостиваго бо яви́лася еси́ Ма́ти.

Пе́снь 6

Ирмо́с: От ки́та проро́ка изба́вил еси́, мене́ же из глубины́ грехо́в возведи́, Го́споди, и спаси́ мя.

Не́сть в житии́ се́м греха́, его́же а́з еди́н не сотвори́х окая́нный, Еди́не Безгре́шне, уще́дри мя́. (Дважды)

Ве́трилом усе́рдия впери́мся, и ко приста́нищу спасе́ния покая́нием предвари́м вси́, я́ко да спасе́мся.

Слава и ныне: Богоро́дичен: Де́во ве́рным Предста́тельнице, изба́витися от вся́каго греха́ рабо́м Твои́м моли́ Го́спода.

Седален гла́с 5

Безслове́сными мя́ страстьми́ преклоне́ннаго, и блу́дно житие́ мое́ ижди́вша, призови́, Спа́се, я́коже блу́днаго, и приими́, и объя́тия оте́ческая за милосе́рдие щедро́т распростри́ ми: и моли́твами безпло́тных дре́вней че́сти сподо́би.

Пе́снь 7

Ирмо́с: Благослове́н еси́ Бо́же, ви́дяй бе́здны, и на престо́ле сла́вы седя́й, препе́тый и пресла́вный.

Благослове́н еси́, Бо́же, и́же за благоутро́бие ка́ющихся все́х прие́мля, препе́тый и пресла́вный. (Дважды)

Исцели́, благоутро́бне Христе́, мно́гия моя́ стра́сти, И́же мое́ све́дый неможе́ние, препе́тый и пресла́вный.

Слава и ныне: Богоро́дичен: Благослове́н еси́, Бо́же, И́же во чре́во Деви́че всели́вся, и спа́сл челове́ка, препе́тый и превозноси́мый во ве́ки.

Пе́снь 8

Ирмо́с: Творца́ тва́ри, Его́же ужаса́ются А́нгели, по́йте лю́дие, и превозноси́те во вся́ ве́ки.

Ме́ртва преступле́нием бы́вша мя́, Го́споди, оживи́, да Тя́ сла́влю во вся́ ве́ки. (Дважды)

Просвети́в мя́ покая́нием, тьмы́ грехо́вныя изба́ви, Го́споди, да Тя́ сла́влю во вся́ ве́ки.

Слава и ныне: Богоро́дичен: Из Тебе́ Бо́г возсия́, Всепе́тая Де́во, и богоразу́мием просвети́ омраче́нныя.

Пе́снь 9

Ирмо́с: Тя́ блаже́нную в жена́х, и благослове́нную Бо́гом, челове́ческий ро́д, пе́сньми велича́ем.

Ми́лостив бу́ди ми́, Го́споди, без числа́ безу́мно согреши́вшему, и Твоего́ Ца́рствия, Сло́ве, сподо́би мя́. (Дважды)

Я́коже ниневи́тяны спа́сл еси́ дре́вле пока́явшыяся еди́не Спа́се, и на́с пою́щих Тя́ спаси́ ми́лостию Твое́ю.

Слава и ныне: Богоро́дичен: Но́сиши я́коже престо́л о́гненный ма́нием вся́ нося́щаго, и сосце́ма пита́еши, Де́во, все́х пита́ющаго.

Молитва

Го́споди Бо́же мой, Еди́н Благи́й и Человеколюби́вый, Еди́н Ми́лостивый и Кро́ткий, Еди́н И́стинный и Пра́ведный, Еди́н Ще́дрый и Ми́лостивый Бо́же наш: да прии́дет си́ла Твоя́ на мя, гре́шнаго и непотре́бнаго раба́ Твоего́, и да укрепи́т мой храм Ева́нгелием Боже́ственнаго уче́ния Твоего́, Влады́ко и Человеколю́бче, Любобла́же, Любоблагоутро́бне, просвети́ моя́ утро́бы и вся у́ды Твое́ю во́лею. Очи́сти мя от вся́кия зло́бы и греха́: соблюди́ мя нескве́рна и непоро́чна от вся́каго наи́тия и де́йства диа́вола, и да́руй ми по Твое́й бла́гости, Твоя́ разуме́ти, Твоя́ му́дрствовати, и в Твои́х хоте́ниих жи́ти, Твоего́ стра́ха страши́тися, е́же твори́ти Тебе́ благоуго́дная до после́дняго моего́ издыха́ния, я́ко да по неисповеди́мой Твое́й ми́лости соблюде́ши мое́ те́ло и ду́шу, ум же и мы́сли, не искуше́н вся́кия сопротиволежа́щия се́ти храм. Го́споди мой, Го́споди, покры́й мя Твои́м благоутро́бием, и не оста́ви мя, гре́шнаго, и нечи́стаго, и недосто́йнаго раба́ Твоего́: я́ко Ты еси́ Защи́титель мой, Го́споди, и о Тебе́ пе́ние мое́ вы́ну, и Тебе́ сла́ву возсы́лаем, Отцу и Сыну и Свято́му Духу, ны́не и при́сно, и во ве́ки веко́в, аминь.