Канон Господу нашему Иисусу Христу, глас 2.

Тропарь, глас 2:

Согреши́х к Тебе́, Спа́се, я́ко блу́дный сын: приими́ мя, Отче, ка́ющагося, и поми́луй мя, Бо́же.

Слава: Зову́ к Тебе́, Христе́ Спа́се, мытаре́вым гла́сом: очи́сти мя я́коже о́наго и поми́луй мя, Бо́же.

И ныне: Богоро́дице, не пре́зри мя тре́бующа заступле́ния Твоего́: на Тя бо упова́ душа́ моя́, и поми́луй мя.

Кано́н умиле́ния, ко Го́споду на́шему Иису́су Христу́. [Его́же краегране́сие си́це: Ту́чу да́ждь ми́ сле́з, Бо́жий сло́ве.] Творе́ние Ио́сифово. Гла́с 2.

Пе́снь 1

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты Еги́петския, я́ко просла́вися.

Припев: Помилуй мя Боже, помилуй мя!

Вопло́щься Сло́ве, и не прише́д пра́ведники, я́коже ре́кл еси́, но гре́шники призва́ти на покая́ние, мно́го согреши́вша приими́ и спаси́ мя. (Дважды)

Еди́н а́з грехо́м порабоще́н е́смь, еди́н а́з страсте́м две́ри отверзо́х: Благопремени́телю Еди́не, обрати́в мя́, спаси́ милосе́рдием Твои́м.

Слава и ныне: Богоро́дичен: Я́же исто́чник безстра́стия ро́ждшая, уя́звенаго мя́ страстьми́, Отрокови́це, исцели́, и огня́ ве́чнаго исхити́ мя, Еди́на Богоблагода́тная.

Пе́снь 3

Ирмо́с: Утверди́ на́с в Тебе́, Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

И́же во чре́во, Христе́, вше́дый нетле́нное, истле́вшую страстьми́ ду́шу мою́ покая́нием обнови́, и све́та присносу́щнаго яви́ испо́лнену. (Дважды)

Послу́шах врага́ прогне́вающаго, и вся́к гре́х соверши́х, и безу́мно прогне́вах Тебе́, Человеколю́бче, еди́наго долготерпели́ваго.

Слава и ныне: Богоро́дичен: Мари́е, злата́я кади́льнице, страсте́й мои́х воню́ отжени́, и утверди́ мя коле́блемаго прило́гми.

Седа́льны умили́тельны. Гла́с 2:

А́з е́смь дре́во непло́дное, Го́споди, покая́ния плода́ не творя́ отню́д, и посече́ния бою́ся, и огня́ о́наго устраша́юся негаси́маго. Те́мже Тя́ молю́: пре́жде о́ныя беды́ обрати́ и спаси́ мя.

Сла́ва, и ны́не, Богоро́дичен: Милосе́рдия су́щи исто́чник, ми́лости сподо́би на́с, Богоро́дице, при́зри на лю́ди согреши́вшыя, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л, безпло́тных Архистрати́г.

Пе́снь 4

Ирмо́с: Пою́ Тя, слу́хом бо, Го́споди, услы́шах, и ужасо́хся, до мене́ бо и́деши, мене́ ищя́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

В ка́л грехо́вный впа́д, и вы́шнее благообра́зие погуби́х, Го́споди, и бою́ся муче́ния. Те́мже покая́ния красото́ю, смире́нную ду́шу мою́ просвети́. (Дважды)

Льсти́выми глаго́лы, льсти́вый от Тебе мя укра́д, сне́дь себе́ соде́ла: Бо́же все́х, сего́ зло́бы исхити́ мя, и покая́ния о́бразы призови́ мя.

Слава и ныне: Богоро́дичен: Воплоща́ется из чи́стых крове́й Твои́х, и челове́ком соединя́ется во́лею Госпо́дь, Пречи́стая, и прие́млет ка́ющыяся, и́же дре́вле погруже́нныя грехми́, Твои́ми мольба́ми, Чи́стая, при́сно прекланя́ем.

Пе́снь 5

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го Бо́га не зна́ем.

И́же просвети́вый о́чи слепа́го, ослепле́нную ду́шу мою́ просвети́, и бде́ти сию́ укрепи́ в дея́ния блага́я, со́н же ле́ностный до конца́ возненави́дети. (Дважды)

Исцели́, еди́не Спа́се, уя́звленную мою́ ду́шу вои́стинну, я́звою лю́тою греха́ дре́вле в разбо́йники впа́дшему я́звы исцели́вый.

Слава и ныне: Богоро́дичен: Но́во я́ко Младя́ на́м Предве́чнаго Сы́на родила́ еси́, во двою́ хоте́нию и дея́нию су́ща сугу́ба, я́ко Челове́ка вку́пе же и Бо́га, Всепе́тая.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Низпадо́хся зло́бою змии́ною, и на одре́ отча́яния лежу́: и́же разсла́бленныя глаго́лом воздви́гнувый, Христе́, и мене́ воздви́гни. (Дважды)

Ве́ема ве́тры змии́ными, и потопля́ема всегда́ волна́ми грехо́вными, спаси́ мя, я́коже Петра́, Человеколю́бче Го́споди.

Слава и ныне: Богоро́дичен: От все́х родо́в творе́ц избра́ Тебе́, Всенепоро́чная, добро́ту Иа́ковлю, Ю́же возлюби́, и из Тебе́ возсия́в яви́ся.

Седален, глас 2

Безпло́тных пресвяти́и ли́цы, мо́лят Тя́, Бо́га блага́го и Влады́ку, пощади́ти на́с в ча́с осужде́ния, и изба́вити на́с го́рькаго муче́ния, бесо́вския зло́бы, и страсте́й омраче́ния, и вся́каго преще́ния, прибега́ющих любо́вию к покро́ву ва́шему.

Пе́снь 7

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

У́мным развраще́нием и бесо́вскими прило́ги вся́каго студа́ испо́лнихся, дале́че бы́х за́поведей Твои́х, я́коже блу́дный. Ны́не же обраща́яся зову́: согреши́х я́коже Он, не возгнуша́йся мене́, Иису́се, воплоще́йся мене́ ра́ди. (Дважды)

Бо́же вся́ческих, ниневи́тяны запреще́ния ражда́ющаго сме́рть, пока́явшыяся дре́вле спа́сл еси́: та́кожде, Еди́не Человеколю́бче, премно́гим блудо́м оскверне́нное се́рдце мое́, ны́не обраща́ющееся, лю́тых изба́ви му́к.

Слава и ныне: Богоро́дичен: Невеще́ственнаго Све́та жили́ще чре́во Твое́ бы́сть, Пречи́стая Богоневе́сто Отрокови́це, све́тлостьми Боже́ственнаго ра́зума безбо́жие отгна́вшаго, Его́же пою́ще зове́м: благослове́н Бо́г оте́ц на́ших.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щыя: благослови́те вся́ дела́ Госпо́дня Го́спода.

Подпадо́х лука́вому, и козньми́ его́ порабоще́н бы́х, и зря́ мя льсти́вый в небреже́нии мно́зе, хва́лится: сего́ мя́ исхити́, и́же заблу́ждшым обраще́ние, Ще́дре. (Дважды)

Разреши́ мя нереши́мыми у́зами страсте́й содержи́ма теле́сными, и́же нереши́мыя разреши́вый от ве́чных у́з, и тещи́ к стезя́м напра́ви спаси́тельным, Христе́ Спа́се ми́ра.

Слава и ныне: Богоро́дичен: Изнемо́гшую мно́гими прило́гми лука́ваго, окая́нную мою́ ду́шу, Богороди́тельнице, целе́бными Твои́ми мольба́ми, Де́во, здра́ву соде́лай, да Тя́ сла́влю во вся́ ве́ки.

Пе́снь 9

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Се́ вре́мя де́лания, что́ спи́ши без ума́, душе́, во уны́нии глубо́це? Воста́ни, слеза́ми просвети́ свещу́ твою́. Потщи́ся, приближа́ется Жени́х душа́м: не укосни́, да не оста́нешися Боже́ственных двере́й внеу́ду. (Дважды)

О, ко́ль стра́шное Твое́ суди́ще, явля́ющее вся́ко дея́ние на́го пред А́нгелы и челове́ки! О, ко́ль лю́тое изрече́ние, е́же согре́шшым хо́щеши да́ти! От него́же изба́ви мя́, Христе́, пре́жде конца́, подая́ ми обраще́ния сле́зы.

Слава и ныне: Богоро́дичен: Пощади́ мя, Го́споди, пощади́, егда́ хо́щеши суди́ти, и не осуди́ мене́ во о́гнь, ни я́ростию Твое́ю обличи́ мене́: мо́лит Тя́ Де́ва, я́же Тебе́, Христе́, ро́ждшая, и А́нгел мно́жество, и му́ченик сосло́вие.

Молитва

Благодари́м Тя, Го́споди Бо́же наш, о всех благодея́ниих Твои́х, я́же от пе́рваго во́зраста до настоя́щаго в нас, недосто́йных, бы́вших, о и́хже ве́мы и не ве́мы, о явле́нных и неявле́нных, я́же де́лом бы́вших, и сло́вом: возлюби́вый нас, я́коже и Единоро́днаго Твоего́ Сы́на о нас да́ти изво́ливый. Сподо́би и нас досто́йны бы́ти Твоея́ любве́. Даждь сло́вом Твои́м му́дрость и стра́хом Твои́м вдохни́ кре́пость от Твоея́ си́лы, и а́ще что хотя́ще или́ не хотя́ще согреши́хом, прости́, и не вмени́ и сохрани́ ду́шу на́шу свя́ту, и предста́ви ю́ Твоему́ Престо́лу, со́весть иму́щу чи́сту, и коне́ц досто́ин человеколю́бия Твоего́. И помяни́, Го́споди, всех призыва́ющих и́мя Твое во и́стине: помяни́ всех, бла́га или́ сопроти́вная нам хотя́щих: вси бо челове́цы есмы́, и всу́е всяк челове́к. Те́мже мо́лимся Тебе́, Го́споди: пода́ждь нам Твоего́ благоутро́бия ве́лию ми́лость.