Канон Господу нашему Иисусу Христу, глас 8.

Тропарь, глас 8:

Безнача́льне О́тче, и Сы́не, и Боже́ственный Ду́ше, Крести́теля моли́твами, многоле́тныя стра́сти души́ моея́ утоли́, молю́ся: и спаси́ мя раба́ Твоего́.

Кано́н покая́нен ко Го́споду на́шему Иису́су Христу́, и святы́м Его́ му́чеником. Творе́ние ки́р Ио́сифа, гла́с 8:

Пе́снь 1

Ирмо́с: Сокруши́вшему бра́ни мы́шцею Свое́ю, и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу: я́ко просла́вися.

Припев: Помилуй мя Боже, помилуй мя.

Испо́лни мое́ се́рдце умиле́ния, Христе́, я́ко да вни́ду покая́нием в селе́ния Твоя́: и испове́данием помолю́ся Тебе́, от долго́в мя́ разреша́ющу.

Разреши́ мя, Сло́ве, от соу́з безчи́сленных мои́х зо́л, да ше́ствую в покая́нии пра́ведныя стези́ Твоя́, в Боже́ственное наставля́ющыя поко́ище ве́чных красо́т.

Слава, Мученичен: Взя́тся к высоте́ вели́кое му́ченик Твои́х, Христе́, великоле́пие, всесла́вно бо пострада́вше, и превели́кими Твои́ми благода́тьми возвели́чишася.

И ныне, Богородичен: Покая́ния ми́, Де́во, покажи́ пути́, и от водя́щия мя́ ко греху́ возврати́ стези́: да Тя́ пою́ многопе́тую Бо́жию роди́тельницу.

Пе́снь 3

Ирмо́с: Уверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Скве́рны зло́бныя отмы́в моего́ се́рдца, и яви́тися ми́ непоро́чну пред Тобо́ю в де́нь стра́шный сподо́би, Христе́ мо́й, я́ко Преблаги́й. (Дважды)

Слава: Возмо́же лука́вством умертви́ти мя́ отсту́пник, жа́лом сло́ве грехо́вным: но са́м мя́, Христе́, живоно́сным исцели́ бы́лием покая́ния.

И ныне, Богородичен: Низпа́дшым исправле́ние, Богоро́дице, па́дшаго мя́ воздви́гни из ро́ва зо́л мои́х: и утверди́, Влады́чице, на ка́мени за́поведей Бо́жиих.

Стихира, глас 8

Егда́ прииму́ во уме́ мно́жество соде́янных мно́ю зо́л, и в помышле́ние прииду́ стра́шнаго о́наго испыта́ния? Тре́петом содержи́мь к Тебе́ прибега́ю, Человеколю́бцу Бо́гу. Те́мже не пре́зри мене́, молю́ Тя, Еди́не безгре́шне: да́руй умиле́ние смире́нней мое́й души́ пре́жде конца́, и спаси́ мя.

Пе́снь 4

Ирмо́с: Услы́шах, Го́споди, слу́х Тво́й, и убоя́хся: я́ко неизрече́нным сове́том, Бо́г сы́й присносу́щный, от Де́вы проше́л еси́ вопло́щься: сла́ва снизхожде́нию Твоему́, Христе́, сла́ва си́ле Твое́й.

Прельсти́ мя́ вкуше́нием грехо́вным вра́г льсте́ц, и от Тебе́, Бла́же, дале́че удали́, и зубо́м свои́м сне́дь соде́ла мя́: еди́не Спа́се, потщи́ся изъя́ти мя́.

Неявле́ная, Го́споди, и сокрове́ная моя́ Са́м ве́си, согреши́вшаго Ти́ мно́го: мно́гими Твои́ми щедро́тами уще́дри, Сло́ве Бо́жий, я́ко ми́лостив, и покая́ния ми́ вре́мя пода́ждь очисти́тельно.

Слава, Мученичен: Я́ко волна́ми муче́ньми потопля́еми му́ченицы, окормле́нием Христо́вым ко приста́нищем приведо́стеся Небе́снаго Ца́рствия, от Него́ победоно́сными венцы́ вои́стинну удобря́еми.

И ныне, Богородичен: Всепе́тая Влады́чице, велегла́сно воспева́ющаго Ти́, испо́лни вся́кия ра́дости мою́ мы́сль, подаю́щи ми́ пла́чь бла́г, и покая́ния вины́, и ра́зум спасе́ния.

Пе́снь 5

Ирмо́с: Мра́к души́ моея́ разжени́, светода́вче Христе́ Бо́же, началоро́дную тьму́ изгна́в бе́здны: и да́руй ми́ све́т повеле́ний Твои́х, Сло́ве, да у́тренюя сла́влю Тя́.

И́же блудни́цу очи́стивый, и прокаже́нныя, Твои́м повеле́нием, Соде́телю вся́ческих, скве́рнаго греха́ смире́нную ду́шу мою́ очи́сти, и оде́ждами блиста́ющими красну́ соде́лай, Влады́ко, молю́ся. (Дважды)

Слава: От у́з разреши́в мя́ мно́гих мои́х прегреше́ний, Христе́ Бо́же, невозбра́нно ходи́ти напра́ви в пути́ Твоя́: я́ко да отреши́вся от пло́ти, в поко́ища свята́я всели́вся, сла́влю Тя́.

И ныне, Богородичен: Свята́я Богоро́дице, Я́же Свято́е Сло́во ро́ждшая пло́тию, Еди́наго почива́ющаго на все́х святы́х, освяти́ мо́й у́м в лука́вых де́лех при́сно пребыва́ющий.

Пе́снь 6

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви я́ко Человеколю́бец, и упра́ви живо́т мо́й, молю́ся.

Ка́ющася приими́ мя, я́коже иногда́ ниневи́тяны, ве́ровавшыя Боже́ственней про́поведи, Христе́, проро́ка Твоего́: и окорми́ живо́т мо́й, молю́ся Ти́.

Я́ко мыта́рь воздыха́ю, я́коже блудни́ца слезю́, я́ко Пе́тр вопию́, мно́гими погружа́емь прегреше́нии, Христе́: по́мощи ми́ ру́ку да́ждь, и спаси́ мя.

Слава, Мученичен: Я́ко богосве́тлая свети́ла, му́ченицы, луча́ми страда́ния озаря́ете всегда́ земны́й ми́р, и отгоня́ете пре́лести тьму́ глубо́кую.

И ныне, Богородичен: Манноприе́мная ру́чка, Тя́, Богоро́дице, иногда́ прообрази́: Христа́ бо носи́ла еси́, ма́нну ра́зума одожди́вшаго все́м чту́щым Тя́.

Седален, глас 8

Ве́к мо́й скончава́ется, житие́ мимохо́дит, и стра́шный Тво́й престо́л гото́вится, Спа́се: су́д мене́ жде́т, претя́ мне́ о́гненною му́кою, пла́менем негаси́мым: сле́з ту́чу да́ждь ми́, и угаси́ его́ си́лу, хотя́й спасти́ся все́м челове́ком.

Пе́снь 7

Ирмо́с: А́нгелом о́троки из огня́ спасы́й, и гремя́щую пе́щь преложи́вый на ро́су, благослове́н еси́ Бо́же оте́ц на́ших.

Я́ко в беззако́ниих зача́т и роди́хся, Ще́дре, согреши́х па́че все́х челове́к: обраще́ния ми́ пода́ждь вре́мя оправда́ющее мя́. (Дважды)

Слава: Превозне́слся безу́мно, я́коже пре́жде фарисе́й, и паде́нием лю́тым падо́хся, и ви́дя мя́ ра́дуется вражде́бный: Сло́ве Бо́жий, не пре́зри мене́.

И ныне, Богородичен: Па́че вины́ ражда́еши все́х вину́, премно́жеством бла́гости челове́ка бы́вшаго: те́мже согла́сно Тя́, Чи́стая, ублажа́ем.

Пе́снь 8

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Ру́це вся́кими оскверни́ла еси́ злодея́ньми, душе́ моя́: и ка́ко те́х воздева́еши на высоту́ бесе́дующи Бо́гу? Но́зе непотре́бны сотвори́ла еси́, на дела́ ходя́щи сту́дная: потщи́ся ходи́ти покая́нием в пути́ спаси́тельныя.

Не пребы́х, Го́споди, в за́поведех Твои́х никогда́же, не сотвори́х ни еди́н де́нь Твоего́ хоте́ния, Бла́же: кото́рыма у́бо очи́ма воззрю́ на Тя́ тогда́, творя́ща су́д пра́ведный, и пови́нныя отсыла́юща во о́гнь гее́нский?

Слава, Мученичен: Превзыдо́сте, святи́и, смире́ния земно́е те́ло, и му́ки я́коже стра́ждущу ино́му претерпе́сте, отсече́ние рука́м же и нога́м: отню́дуже превы́шшия ны́не сподо́бистеся жи́зни во ве́ки.

И ныне, Богородичен: Волну́ема мя́ бу́рею грехо́вною, вопию́ Ти, Влады́чице Чи́стая, Твои́м хода́тайством напра́ви мя́ ко спаси́тельному покая́нию, и ко всеути́шному приста́нищу: я́ко да уви́жу све́т спасе́ния, омрача́емый при́сно ле́ностию.

Пе́снь 9

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́дове о́трока своего́. В ни́хже посети́ на́с восто́к с высоты́, и напра́вил ны́ е́сть на пу́ть ми́ра.

Да и а́з спаса́емь благода́рственно Тебе́, Христе́, велича́ю, при́зри на мя́ мно́ги ра́ны на плещу́ прие́мшаго, и исцели́, вино́ на ни́х и еле́й возлива́я, Твоего́, Спа́се, благоутро́бия позна́ние. (Дважды)

Слава: Я́коже разбо́йника благонра́внаго испусти́вшаго гла́с, изба́вил еси́ уби́йства и те́м злы́х, я́коже уще́дрил еси́ блудни́цу прослези́вшуюся, я́ко Петра́ вели́каго ученика́, и Дави́да проро́ка: и мене́, Спа́се, поми́луй отча́яннаго.

И ныне, Богородичен: Просвети́тельными мо́лниями, Всенепоро́чная, из Твоея́ проше́дшаго утро́бы, Сы́на Бо́жия, ве́рою пою́щыя Тя́ просвети́: и тьмы́ на́с несвети́мыя, и ве́чныя му́ки изми́ Твои́м предста́тельством.

Молитва

Го́споди Вседержи́телю, Бо́же отец на́ших, Авраа́мов, и Исаа́ков, и Иа́ковль, и се́мене их пра́веднаго: сотвори́вый не́бо и зе́млю со все́ю ле́потою их, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ стра́шным и сла́вным и́менем Твои́м, его́же вся боя́тся, и трепе́щут от лица́ си́лы Твоея́, я́ко непостоя́нно великоле́пие сла́вы Твоея́, и нестерпи́мь гнев, е́же на гре́шники преще́ния Твоего́. Безме́рна же и неизсле́дованна ми́лость обеща́ния Твоего́: Ты бо еси́ Госпо́дь Вы́шний, благоутро́бен. долготерпели́в и многоми́лостив, и ка́яйся о зло́бах челове́ческих. Ты Го́споди, по мно́жеству бла́гости Твоея́, обеща́л еси́ покая́ние и оставле́ние согреши́вшим Тебе́, и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо Го́споди Бо́же сил, не положи́л еси́ покая́ние пра́ведным, Авраа́му и Исаа́ку и Иа́кову, не согреши́вшим Тебе́. Но положи́л еси́ покая́ние на мне, гре́шнем: зане́ согреши́х па́че числа́ песка́ морска́го. Умно́жишася беззако́ния моя́, Го́споди, умно́жишася беззако́ния моя́: и несмь досто́ин воззре́ти, и ви́дети высоту́ небе́сную от мно́жества непра́вд мои́х. Сля́чен есмь мно́гими у́зами желе́зными, во е́же не возвести́ главы́ моея́, и несть ми ослабле́ния: зане́ прогне́вах я́рость Твою́, и лука́вое пред Тобо́ю сотвори́х, не сотвори́вый во́ли Твоея́, и не сохрани́вый повеле́ний Твои́х. И ны́не приклоня́ю коле́на се́рдца, тре́буя от Тебе́ бла́гости: согреши́х, Го́споди, согреши́х, и беззако́ния моя́ аз вем, но прошу́ моля́ся, осла́би ми, Го́споди, осла́би ми, и не погуби́ мене́ со беззако́ньми мои́ми. Ниже́ в век враждова́в соблюде́ши зол мои́х, ниже́ осу́диши мя в преиспо́дних земли́. Зане́ Ты еси́ Бо́же, Бог ка́ющихся, и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й, и восхвалю́ Тя вы́ну во днех живота́ моего́, я́ко Тя пое́т вся си́ла небе́сная, и Твоя́ есть сла́ва во ве́ки веко́в, ами́нь.