Канон Господу нашему Иисусу Христу, глас 6.

Тропарь, глас 6:

И́же проро́ки прославля́емый Бо́г в Тро́ице, про́стей же и неслия́нней, Предте́чи мольба́ми спаси́ мя.

Кано́н покая́нен ко Го́споду на́шему Иису́су Христу́. Творе́ние ки́р Ио́сифа. Гла́с 6.

Пе́снь 1

Ирмо́с: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г Отца́ моего́, и вознесу́ Его́: сла́вно бо просла́вися.

Изба́вителю мо́й Иису́се, я́коже изба́вил еси́ мно́гих прегреше́ний блудни́цу, иногда́ пока́явшуюся до́бре: молю́ся Ти́, и мене́ изба́ви безчи́сленных зо́л мои́х я́ко ми́лостив.

Пла́вая в су́етнем помышле́нии жития́, Иису́се, лю́тую сию́ пучи́ну, во истопле́ния впадо́х мно́гая, от ни́хже изба́вив спаси́ мя.

Слава, Му́ченичен: Вети́йствующе му́дрии, дерзнове́нием Бо́га сло́ва вети́й злы́х победи́сте: и вся́к ви́д подъе́мше ра́н, вельми́ просла́вистеся.

И ныне, Богоро́дичен: Яви́лася еси́ врата́ Живота́, сме́рти врата́ затво́рши Рождество́м Твои́м, Чи́стая: яви́лася еси́ земля́ избра́нная, е́юже вознесе́ся от земли́ на небеса́ челове́ческое смеше́ние.

Пе́снь 3

Ирмо́с: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.

Ми́лостивным Твои́м о́ком при́зри на мя́, егда́ хощу́ пред Тобо́ю предста́ти, и суди́тися, Еди́не Благопремени́телю Го́споди. (Дважды)

Слава: Воздыха́юща мя́ приими́, я́коже мытаря́ из глубины́ душе́вныя, и покая́ние ми́ да́руй, Спа́се, греха́ вся́каго мя́ избавля́ющее.

И ныне, Богоро́дичен: Зачала́ еси́, Пресвята́я, содержа́щаго ве́сь ми́р: сего́ ра́ди молю́ся Ти́, изба́ви мя́ вся́каго содержа́щаго муче́ния.

Стихира, глас 6

Се́рдца моего́ стру́пы, от мно́гих согреше́ний возра́стшыя ми́ исцели́, Спа́се, я́ко ду́ш и теле́с вра́чь: подая́ прося́щым прегреше́ний проще́ние, при́сно да́руй ми́ сле́зы покая́ния, дая́ ми разреше́ние долго́в, Го́споди, и поми́луй мя́.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й и убоя́хся: сла́ва си́ле Твое́й, Го́споди.

То́ки сле́з да́ждь ми́ изсуша́ющыя страсте́й мои́х исто́чники, и греха́ вся́каго тиме́ния отмыва́ющыя, Ще́дре, многоми́лостиве, и угаша́ющыя огня́ гее́нскаго ве́чнующий пла́мень (Дважды) неугаси́мый.

Слава: Непреста́нно чешу́ стру́пы души́ моея́ сластолю́бием, и пребыва́ю неисце́лен, в чу́вство са́м приити́ не хотя́, кто́ бу́ду? и что́ сотворю́? Христе́ Ще́дрый, исцели́в спаси́ мя.

И ныне, Богоро́дичен: Седмосве́тлый Тя́ све́щник, о́гнь богоразу́мия нося́щ, Отрокови́це, проро́к дре́вле прови́де, светя́щ во тьме́ неве́дения бе́дствующым. Те́мже вопию́ Ти, Всенепоро́чная: просвети́ мя, молю́ся.

Пе́снь 5

Ирмо́с: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.

Се́ и́же тала́нт Тво́й сокры́вый, Христе́, лени́вый ра́б Тво́й, и упраздни́выйся лука́выми страсте́й дея́нии, а́з е́смь: те́мже не посли́ мене́ во о́гнь.

Тво́й сы́н бы́в благода́тию, благоутро́бне Христе́, порабо́тихся врагу́, и от Тебе́ удали́хся жи́в блу́дно. Те́мже обрати́в мя́ спаси́.

Слава, Му́ченичен: Умерщвля́еми телесы́ му́ченицы, вся́ умертви́ша ко́зни вра́жия: и к жи́зни нестаре́ющейся приидо́ша в ра́дости, венцы́ побе́ды прии́мше.

И ныне, Богоро́дичен: Врата́ непроходи́мая, отве́рзи ми́ врата́, молю́ся, покая́ния и́стиннаго: и покажи́ ми стезю́ покая́ния, Чи́стая, все́х наста́внице.

Пе́снь 6

Ирмо́с: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.

Не покажи́ мене́ бесо́м обра́дование в де́нь стра́шный, Христе́ Иису́се: да не услы́шу тогда́ гла́са отсыла́ющаго во о́гнь гее́нский.

Погрузи́ мя во глубине́ прегреше́ний, и́же пра́ведных вра́г: и к щедро́т Твои́х притека́ю пучи́не, Иису́се, к приста́нищу жи́зни ны́не напра́ви мя́.

Слава, Му́ченичен: Я́звами уязви́сте уязви́вшаго ва́с, благочести́вии ору́жницы. Те́мже преста́вльшеся к жи́зни, стра́сти ны́не челове́ческия исцеля́ете.

И ныне, Богоро́дичен: Хра́м Бо́гу яви́лася еси́, Всенепоро́чная, во́ньже всели́вся свяще́нне, челове́ческое существо́ обожи́, сотвори́л е́сть ве́рных хра́мы себе́.

Седален, глас 6

Помышля́ю де́нь стра́шный, и пла́чуся дея́ний мои́х лука́вых, ка́ко отвеща́ю Безсме́ртному Царю́? ко́им же дерзнове́нием воззрю́ на Судию́, блу́дный а́з? Благоутро́бный О́тче, Сы́не Единоро́дный, и Ду́ше Святы́й, поми́луй мя́.

Пе́снь 7

Ирмо́с: Согреши́хом, беззако́нновахом, непра́вдовахом пред тобо́ю, ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.

Взира́ю на ми́лость Твою́ безме́рную, безме́рно согреши́вый, ве́м Твое́ милосе́рдие, ве́м долготерпе́ние и незло́бие: покая́ния ми́ да́руй плоды́, ще́дрый Христе́, и спаси́ мя.

Уврачу́й, Ще́дре, се́рдца моего́ неисце́льныя стра́сти, да́руй отсече́ние долго́в мои́х, тя́жкое бре́мя облегчи́: да во умиле́нии Тя́ сла́влю при́сно отце́в Бо́га.

Слава, Му́ченичен: Разделя́еми бы́сте от теле́с, но не разделе́ни от Бо́га яви́стеся му́ченицы, совокупле́ния ра́ди Боже́ственнаго, себе́ соедини́вшаго на́м нетле́нно. Его́же при́сно моли́те, изба́витися на́м вся́кия ну́жды.

И ныне, Богоро́дичен: Прозябла́ еси́ без се́мене, Его́же роди́ Оте́ц нетле́нно, пребыла́ еси́ по рождестве́ Де́ва, я́коже и пре́жде рождества́. Те́мже ублажа́ема еси́, и прославля́ема, Пречи́стая, непреста́нно, я́ко Ма́ти су́щи Бо́жия.

Пе́снь 8

Ирмо́с: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.

Взира́ю на вели́кую ми́лость щедро́т Твои́х, Христе́, я́коже Дави́д, согреши́в па́че о́наго, и зову́ со о́нем: Еди́не Ми́лостиве, поми́луй мя́ вско́ре.

Коне́ц бла́г бы́ти ми́ молю́ся, положи́ти же лука́вым дея́нием когда́ коне́ц, не усе́рдствую, ожесточе́нное име́я мое́ се́рдце: уще́дри мя́, Бо́жий Сло́ве.

Слава, Му́ченичен: Я́ко избра́нныя и непоро́чныя же́ртвы, поже́ршемуся на́с ра́ди, Единоро́дному Сло́ву, во́лею принесо́стеся, же́ртвы вся́ упражня́юще де́монския, страстоно́сцы.

И ныне, Богоро́дичен: Но́ва на́м Младе́нца родила́ еси́, Ве́тхаго Де́ньми, но́выя на земли́ стези́ показу́ющаго, и обетша́вшее естество́ обновля́юща, Безневе́стная Благослове́нная.

Пе́снь 9

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

Иису́се Человеколю́бче, еди́не не́мощь на́шу ве́дый: в сию́ бо обле́клся еси́ милосе́рдия ра́ди, хотя́ сию́ очи́стити: те́мже скве́рны лука́выя и гное́ния зо́л мои́х очи́сти, и спаси́ мя.

Я́ко блудни́ца сле́зы приношу́ Ти, Человеколю́бче: я́ко мыта́рь стеня́ взыва́ю Ти́: очи́сти, и спаси́ мя. Я́коже ханане́а вопию́: поми́луй мя́, я́коже Петра́ пока́явшася, проще́ния сподо́би.

Слава, Му́ченичен: Освяти́л еси́, Го́споди, зе́млю святы́ми кровьми́ святы́х Твои́х, и те́х всесвя́те ду́хи, духово́м си́л святы́х совокупи́л еси́: всегда́ же си́ми освяща́еши ве́рою и́стинною Тебе́ освяща́ющыя.

И ныне, Богоро́дичен: Гла́с Ти́ прино́сим арха́нгелов, Всечи́стая, благослове́нная, ра́дуйся вмести́вшая Бо́га невмести́маго: ра́дуйся кля́твы разреше́ние, и благослове́ния введе́ние: ра́дуйся, еди́на ра́йскую две́рь отве́рзшая.

Молитва

Велича́я велича́ю Тя Го́споди, я́ко призре́л еси́ на смире́ние мое́, и не́си мене́ затвори́л в рука́х вра́жиих, но спасл еси́ от нужд ду́шу мою́. И ны́не Влады́ко, да покры́ет мя рука́ Твоя́, и да прии́дет на мя ми́лость Твоя́, я́ко смяте́ся душа́ моя́, и боле́зненна есть во исхожде́нии свое́м, от окая́ннаго моего́ и скве́рнаго телесе́ сего́. Да не когда́ лука́вый сопоста́та сове́т сря́щет, и препне́т ю́ во тме, за неве́домыя и ве́домыя в житии́ сем бы́вшия ми грехи́. Ми́лостив бу́ди ми, Влады́ко, и да не у́зрит душа́ моя́ мра́чнаго взо́ра лука́вых де́монов, но да прии́мут ю́ А́нгели Твои́ све́тлии и пресве́тлии. Даждь сла́ву и́мени Твоему́ свято́му, и Твое́ю си́лою возведи́ мя на Боже́ственное Твое́ суди́ще, внегда́ суди́тися ми, да не прии́мет мя рука́ кня́зя мiра сего́, е́же исто́ргнути мя, гре́шника, во глубину́ а́дову, но предста́ни ми, и бу́ди ми Спас и Засту́пник. Теле́сныя бо и сия́ муче́ния, весе́лия суть рабо́м Твои́м. Поми́луй, Го́споди, оскверни́вшуюся страстьми́ жития́ сего́ ду́шу мою́: и чи́сту ю́ покая́нием и испове́данием приими́, я́ко благослове́н еси́ во ве́ки веко́в, ами́нь.