Шрифт

Каноны Октоиха Господу

Канон Господу нашему Иисусу Христу, глас 5.

Тропарь, глас 5:

Непостижи́мый Бо́же, всеси́льная Тро́ице и Еди́нице, моли́твами Предте́чи Твоего́ спаси́ мя, избавля́ющи тьмы́, и пла́мене предлежа́щаго ми́.

Кано́н, [его́же краегране́сие си́це: Очище́ние на́м, Христе́, прегреше́нием дава́й.] Творе́ние Ио́сифово, гла́с 5:

Пе́снь 1

Ирмо́с: Зе́млю, на ню́же не возсия́, ни ви́де со́лнце когда́, бе́здну, и́же не ви́де на́гу широта́ небе́сная, Изра́иль про́йде невла́жно, Го́споди, и вве́л еси́ его́ в го́ру святы́ни Твоея́, хва́ляща и пою́ща побе́дную пе́снь.

Припев: Помилуй мя Боже, помилуй мя.

Очище́ние ми́ да́руй соде́янных мно́ю, Спа́се, и осла́би ми́ пре́жде да́же отсю́ду отити́ ми, очи́сти мно́гаго гное́ния, Го́споди, очи́стивый прокаже́нныя: и сподо́би мя́ без поро́ка предста́ти Тебе́, приити́ хотя́щему суди́ти живы́м и ме́ртвым.

Гное́ние, е́же лежи́т на очесе́х души́ моея́, возбраня́ющее ми́ зре́ти лучи́ Твоя́, я́же я́влься на земли́ просте́рл еси́, со́лнце незаходи́мое: сие́ очи́сти спа́се, и дава́й созерца́ти, Го́споди Благоутро́бне, благода́тей Твои́х све́т.

Слава, Му́ченичен: Бо́дри бы́вше повеле́ний Христо́вых храни́телие, успи́сте вра́жию всю́ зло́бу, страда́льцы блаже́ннии. Те́мже отягча́ема сно́м грехо́вным, к покая́ния, молю́ся, Боже́ственней бо́дрости и мене́ воздви́гните.

И ныне, Богоро́дичен: Изба́ви мя́ обы́чая зла́го, Чи́стая Де́во, утверди́ на ка́мени за́поведей, коле́блема козньми́, Влады́чице, ве́тхаго запина́теля. И сподо́би мене́ Христу́ угоди́ти, до́бре воспева́юща и пою́ща побе́дную пе́снь.

Пе́снь 3

Ирмо́с: Дви́жимое се́рдце мое́, Го́споди, волна́ми жите́йскими, утверди́, в приста́нище ти́хое наставля́я я́ко Бо́г.

Пока́ятися Тебе́ Бо́гу обещава́юся, и па́ки согреша́я, что́ бу́ду? Ка́ко явлю́ся, внегда́ су́диши земли́?

Моле́ния Го́сподеви принесе́м, воздохне́м, сле́зы пролие́м чисти́тельныя скве́рнам: я́ко да изба́вимся та́мо.

Слава, Му́ченичен: Ли́цы му́ченичестии, лико́м сопричта́шася у́мных а́нгел: и равноа́нгельнии бы́вше, благода́тию Боже́ственнаго ду́ха.

И ныне, Богоро́дичен: Покая́ния врата́ ны́не ми́ отве́рзи, врата́ све́та, Де́во: вхо́ды же страсте́й затвори́ смире́нныя моея́ души́.

Стихира, глас 5

Мно́жества прегреше́нии мои́х пре́зри, Го́споди, и́же от Де́вы рожде́йся, и вся́ очи́сти беззако́ния моя́, мы́сль ми́ подая́й обраще́ния, я́ко еди́н Человеколю́бец, молю́ся: и поми́луй мя́.

Пе́снь 4

Ирмо́с: Услы́шах, Го́споди, слу́х Тво́й, и убоя́хся, разуме́х смотре́ние Твое́, и просла́вих Тя́, еди́не Человеколю́бче.

Глаго́л Твои́х, Го́споди, небре́г просвеща́ющих, те́мная сотвори́х дела́, и бою́ся та́мошняго стра́шнаго Твоего́ суди́ща.

Ве́трилом Боже́ственнаго стра́ха впери́м душе́вный кора́бль: и к приста́нищем покая́ния дости́гнем, злы́х убежа́вше треволне́ния.

Слава, Му́ченичен: Ка́плющия му́ченицы сла́дости, яви́стеся Боже́ственныя го́ры: и ра́й богонасажде́нный, жи́зни дре́во иму́щий Го́спода.

И ныне, Богоро́дичен: Пречи́стая Влады́чица, согреша́ющым Предста́тельница, па́дающым Боже́ственное исправле́ние, я́ко Бо́га ро́ждшая сла́вится.

Пе́снь 5

Ирмо́с: Окая́нную ду́шу мою́, нощеборю́щуюся со тьмо́ю страсте́й, предвари́в уще́дри, и возсия́й мы́сленное со́лнце дне све́тлыя звезды́ во мне́, во е́же раздели́ти но́щь от све́та.

От де́л не́сть мне́ спасе́ния, мно́го бо на земли́ окая́нный согреши́х, и трепе́щу стра́шнаго суди́ща Твоего́, егда́ осуди́ти хо́щеши, Бо́же, престу́пники Твои́х за́поведей.

Ка́ко безу́мен бы́х? Ка́ко омрачи́хся творя́ дела́ зла́я? Ка́ко не разуме́х стра́ха Твоего́, Христе́? В зе́млю понико́х, и уподо́бихся ското́м безслове́сным: но обрати́ мя, Бо́же вся́ческих.

Слава, Му́ченичен: Освяти́ у́м мо́й мольба́ми святы́х му́ченик Твои́х, Христе́, молю́ся, и покажи́ просвеще́ния испо́лнена, и ве́чней сла́ве прича́стника, да сла́вя пою́ Тя, Спа́се.

И ныне, Богоро́дичен: Бо́га неизрече́нным сло́вом, Де́во Ма́ти, родила́ еси́ на́м, все́м покая́ние даю́ща многосогреши́вшым, хода́тайством Твои́м благи́м, прибе́жище ве́рным и приста́нище.

Пе́снь 6

Ирмо́с: Я́коже проро́ка от зве́ря изба́вил еси́, Го́споди, и мене́ из глубины́ несодержи́мых страсте́й возведи́, молю́ся, да приложу́ призре́ти ми́ к хра́му свято́му Твоему́.

Се́ вре́мя обраще́ния, и а́з низлежу́ в зна́к при́сно, нечу́вствием мно́гим всегда́ содержи́мь: омраче́ние се́рдца моего́, Сло́ве, разреши́в уще́дри мя́.

Стеня́ща мя́, я́коже иногда́ мытаря́ уще́дри, благоутро́бне Христе́. И я́коже блудни́цу те́пле слези́ти сподо́би: да отмы́ю и а́з тиме́ние мно́гих мои́х прегреше́ний.

Слава, Му́ченичен: Подвиза́вшеся до́бре, све́тло венча́шася Твои́ страда́льцы, живонача́льною десни́цею Твое́ю, Бо́же и Го́споди: си́х честны́ми мольба́ми спаси́ вся́ лю́ди Твоя́.

И ныне, Богоро́дичен: Богора́дованная се́не освяще́ния, честны́й ковче́же, свети́льниче Боже́ственнаго све́та, хле́ба живо́тнаго трапе́зо, сло́ва пала́то одушевле́нная, хра́м мя́ ду́ху покажи́.

Седален, глас 5

На одре́ слежу́ согреше́ний мно́гих, окрада́емь е́смь в наде́жди спасе́ния моего́: и́бо со́н ле́ности моея́ хода́тайствует души́ мое́й му́ку: но Ты́, Бо́же, рожде́йся от Де́вы, воздви́гни мя́ к Твоему́ пе́нию, да сла́влю Тя́.

Пе́снь 7

Ирмо́с: Огня́ гаси́лище отроко́в моли́тва, ороша́ющая пе́щь пропове́дница чудесе́, не опаля́ющи, ниже́ сожига́ющи песносло́вцы Бо́га Оте́ц на́ших.

Беззако́ния моя́ и непра́вды моя́, безчи́сленная согреше́ния, Христе́, прости́, и бу́дущия изба́ви мя́ му́ки, за мно́жество Твои́х щедро́т, Бо́же.

Я́ко блу́дный ны́не ижди́х бога́тство, е́же прия́х, и гла́дом та́ю, Боже́ственнаго бра́шна лиша́емь: ка́ющася, Спа́се, приими́, и спаси́ мя.

Слава, Му́ченичен: Бесо́вския полки́, мучи́телей все́ мно́жество, стреля́ньми, му́ченицы ура́нисте, терпе́нием же и до́блестию, и к животу́ и́стинному ны́не преложи́стеся.

И ныне, Богоро́дичен: Приста́нище спаси́тельное показа́ся все́м, Чи́стая, страсте́й бу́рю утиша́ющи, и к тишине́ все́х приводя́щи, Богороди́тельнице Чи́стая, и́же на земли́ смире́нныя.

Пе́снь 8

Ирмо́с: А́нгелов со́нм, челове́ков собо́р, Царя́ и зижди́теля все́х, свяще́нницы по́йте, благослови́те леви́ти, лю́дие превозноси́те во вся́ ве́ки.

Се́ возсмерде́ша и согни́ша души́ моея́ ра́ны, Христе́, и пострада́х и смири́хся отню́д: лечьба́ми покая́ния, Спа́се, уврачу́й мя́.

Льсти́вно зми́й мя́ лука́внейший подъукра́д, зо́л испо́лни, и воздыха́я зову́: не отри́ни мене́, Сло́ве, осужде́ннаго и смире́ннаго.

Слава, Му́ченичен: Ва́с прехва́льнии Госпо́дни му́ченицы, ни о́гнь, ни ме́чь, ни зве́рие, ни гла́д, ни коле́с раздробле́ние, ниже́ му́ка и́на возмо́же разлучи́ти от Христа́ Человеколю́бца.

И ныне, Богоро́дичен: А́нгелов похвала́, и челове́ков спасе́ние, и спору́чница бу́ди ми́, Ма́ти Бо́жия: я́ко да обращу́ся, и прииму́ разреше́ние пре́жде согреше́нных, в ве́дении и не в ве́дении.

Пе́снь 9

Ирмо́с: Я́ко сотвори́ Тебе́ вели́чия си́льный, Де́ву я́вль Тя́ Чи́сту по Рождестве́, я́ко ро́ждшую без се́мене своего́ Творца́: те́м Тя́, Богоро́дице, велича́ем.

Да Твое́ велича́ю долготерпе́ние, Иису́се, долготерпи́ и еще́ на мне́, и не посецы́ мене́ я́коже непло́дную смоко́вницу, взыва́ю Ти́: я́ко да покая́ния плоды́ принесу́ Тебе́.

Ко́ль стра́шен еси́, еди́не держа́вный и си́льный? И кто́ проти́ву постои́т Твоему́ стра́шному преще́нию, егда́ хо́щеши на суде́ са́м седе́ти? В не́мже мя́ соблюди́ неосужде́нна.

Слава, Му́ченичен: Теле́сныя боле́зни боле́зньми Боже́ственными ва́шими изъима́ете, Госпо́дни страда́льцы: те́мже исцели́те души́ моея́ стра́сти люте́йшыя, я́ко су́ще вра́чеве иску́снейшии.

И ныне, Богоро́дичен: Светови́дный о́блак, предводя́щий но́выя лю́ди к земли́ обетова́ния, вои́стинну Богоблагода́тная яви́лася еси́, и врата́ вводя́щая к жи́зни. Те́мже Тя́, Богоро́дице, велича́ем.

Молитва

Влады́ко Го́споди Иису́се Христе́, Ты еси́ Помо́щник мой, в рука́х Твои́х есмь аз, помози́ ми, не оста́ви мене́ согреши́ти к Тебе́, я́ко заблужде́н есмь, не оста́ви мя после́довати во́ли пло́ти моея́, не пре́зри мя, Го́споди, я́ко не́мощен есмь. Ты ве́си поле́зное мне, не оста́ви мя поги́бнути грехи́ мои́ми, не оста́ви мя, Го́споди, не отступи́ от мене́, я́ко к Тебе́ прибего́х, научи́ мя твори́ти во́лю Твою́, я́ко Ты еси́ Бог мой. Исцели́ ду́шу мою, я́ко согреши́х Ти, спаси́ мя ра́ди ми́лости Твоея́, я́ко пред Тобо́ю суть вси стужа́ющии ми, и несть мне ино́е прибе́жище, то́кмо Ты, Го́споди. Да постыдя́тся у́бо вси востаю́щии на мя и и́шущии ду́шу мою, е́же потреби́ти ю́, я́ко Ты еси́ Еди́н Си́льный, Го́споди, во всех, и Твоя́ есть сла́ва во ве́ки веко́в, аминь.