Шрифт

Каноны Октоиха Господу

Канон Господу нашему Иисусу Христу, глас 4.

Тропарь, глас 4:

Отца́, и Сы́на, и Ду́ха Свята́го, вси́ ве́рнии единому́дренно мо́лим, славосло́вити досто́йно еди́нство Божества́, в Трие́х су́ще Ипоста́сех, несме́сно пребыва́ющее, про́сто, неразде́льно и непристу́пно: и́мже избавля́емся о́гненнаго муче́ния.

Кано́н покая́нен, ко Го́споду на́шему Иису́су Христу́ [его́же краегране́сие сицево́: Чисто́тными мя́ слеза́ми омы́й сло́ве.] Творе́ние Ио́сифово. Гла́с 4.

Пе́снь 1

Ирмо́с: Порази́вый Еги́пта, и фарао́на мучи́теля погрузи́вый в мо́ри, лю́ди спа́сл еси́ из рабо́ты, Моисе́йски пою́щыя пе́снь побе́дную: я́ко просла́вися.

Припев: Помилуй мя Боже, помилуй мя.

Сокрове́нно де́ющаго дела́ тьмы́, Го́споди, да не я́ве обличи́ши, ни посрами́ши пред все́ми: но све́том просвети́ и́скренняго покая́ния, Спа́се, и спаси́ мя.

Грехи́ всегда́ на грехи́, Влады́ко, совокупля́ю блу́дный, и не чу́вствую стра́ха Твоего́ никогда́же, Го́споди: те́мже пре́жде конца́ спаси́ и уще́дри мя́.

Слава, Му́ченичен: Щито́м благоче́стия покрыва́еми святи́и, держа́ще я́ко ме́ч кре́стное ору́жие, к боре́нию врага́ сла́внии изыдо́сте, и того́ низложи́сте.

И ныне, Богоро́дичен: Ковче́г Боже́ственным ду́хом позлаще́нный, Пречи́стая, показа́ся: не скрижа́ли нося́щ зако́на, но Христа́ Го́спода, Его́же зако́н и проро́цы дре́вле предвозвести́ша.

Пе́снь 3

Ирмо́с: Утвержда́яй гро́м, и созида́яй ду́х, утверди́ мене́, Го́споди, да Тя́ пою́ и́стинно, и творю́ во́лю Твою́: я́ко не́сть свя́т, я́ко Ты́, Бо́же на́ш.

И́же слепце́в о́чи просвети́вый, Христе́, о́чи мои́ просвети́ омраче́ннии сластьми́, и жите́йскими печа́льми, и ника́коже к судьба́м Твои́м взира́ющии.

Се́ вре́мя, возни́кни душе́ моя́, от зо́л, я́же соде́яла еси́, и Влады́це изба́вителю возопи́й со стра́хом: покая́ния, Христе́, две́ри отве́рзи ми́.

Слава, Му́ченичен: Му́ченически тече́ние соверши́вше святы́х сосло́вие, и тьмы́ мы́сленных му́ринов, Боже́ственною си́лою я́ко вои́стинну посече́, и сла́ву получи́.

И ныне, Богоро́дичен: Пра́отцем разре́шила еси́ печа́ль, ра́дость на́м ро́ждши Жизнода́вца, и Изба́вителя, Пресвята́я Богоро́дице: Его́же приле́жно моли́, спасти́ ду́шы на́шя.

Стихира, глас 4

Омы́й мя́ слеза́ми мои́ми, Спа́се, я́ко оскверни́хся мно́гими грехи́. Те́мже и припа́даю Ти́: согреши́х, Бо́же, и поми́луй мя́.

Пе́снь 4

Ирмо́с: услы́шах Бо́же слу́х тво́й, и убоя́хся, разуме́х дела́ твоя́, и ужасо́хся, Го́споди: я́ко твоего́ хвале́ния испо́лнь земля́.

Обнаже́н бы́х доброде́телей, и зло́бою облеко́хся, и се́ студа́ испо́лнихся, Иису́се Человеколю́бче: оде́ждами мя́ Боже́ственными просвети́.

Препла́вая мирска́го мо́ря, Сло́ве, во́ду, ле́ностию в беду́ истопле́ния впадо́хся сласте́й теле́сных: к покая́ния приста́нищу напра́ви мя́.

Слава, Му́ченичен: Валя́еми по земли́ я́коже ка́мение страстоте́рпцы, пре́лести тве́рдыя до конца́ низверго́ша, и к вы́шнему гра́ду доспе́ша: те́х моли́твами, Го́споди, спаси́ на́с.

И ныне, Богоро́дичен: Спасе́ние Тя́ на вся́кое вре́мя и ме́сто призыва́ю: не пре́зри мене́, Всенепоро́чная, я́же Бо́га ро́ждшая, изба́вителя вку́пе и Спа́са моего́.

Пе́снь 5

Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет, и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Уны́нием преходя́щаго житие́ тле́ющее, и пре́лестьми мя́ омрача́ема от преле́стника по вся́ дни́, Иису́се, уще́дри, и к све́ту покая́ния наста́ви и жи́зни.

Вознесе́ся се́рдце мое́ прило́гми зми́а, и низпаде́ся паде́нием ве́лиим: и́же низве́рженным, Иису́се, исправле́ние, возста́ви и спаси́ мя, мно́гих Твои́х ра́ди щедро́т.

Слава, Му́ченичен: Ка́плями крове́й угаси́сте многобо́жия пре́лести пе́щь, богоблаже́ннии, и ту́чами исцеле́ний пла́мень утиши́сте страсте́й всегда́, Спа́совы страда́льцы.

И ныне, Богоро́дичен: Возсия́й ми́, Влады́чице, зарю́ ми́лости Твоея́, и́же во мра́це прегреше́ний мои́х су́щу, Де́во: и к све́ту покая́ния наста́ви мя́, Пречи́стая, да ве́рою Тя́ пою́.

Пе́снь 6

Ирмо́с: Пучи́ною жите́йскою дея́ньми мои́ми снидо́х во а́д, но я́ко от ки́та Ио́на, та́ко вопию́: из глубины́ зо́л возведи́, молю́ся, Сы́не Бо́жий и Сло́ве.

Дрема́нием небреже́ния отяготи́х, окая́нный, ду́шу, и греха́ сно́м низложи́хся: к све́ту покая́ния воздви́гни мя́, Го́споди, и Твои́м милосе́рдием спаси́ мя.

Ка́ко падо́х окая́нный? Ка́ко удали́хся Бо́га преблага́го? Ка́ко не внемлю́ в чу́вствии стра́шное суди́ще о́но, на не́мже и́мам суди́тися? Тво́рче мо́й, уще́дри мя́.

Слава, Му́ченичен: Превозше́дше преде́лы челове́ческия му́ченицы Христо́вы к Зижди́телю возникнове́нием Боже́ственным, муче́ния боле́зни претерпе́сте ра́дующеся, я́ко в телесе́х чужди́х.

И ныне, Богоро́дичен: Всесвята́я Де́во, Предста́тельнице и покро́ве все́х ве́рных, предста́ни и изба́ви мя́ преще́ния бу́дущаго, и стра́шнаго суди́ща в ча́с су́дный, да ве́рою при́сно пою́ Тя́.

Седален, глас 4

Дре́вом Ада́м рая́ бы́сть изселе́н: Дре́вом же кре́стным разбо́йник в ра́й всели́ся. Ов у́бо вку́ш, за́поведь отве́рже сотво́ршаго: о́в же сраспина́ем, Бо́га испове́да тая́щагося, помяни́ мя, вопия́, во Ца́рствии Твое́м.

Пе́снь 7

Ирмо́с: О́бразу злато́му не поклони́вшеся о́троцы авраа́мстии, искуша́хуся я́ко зла́то в горни́ле в пещи́ о́гненней, я́ко в черто́зе све́тлем ликова́ху, пою́ще: благослове́н еси́ Бо́же оте́ц на́ших.

Ю́но Отроча́ яви́лся еси́ Христе́, ве́тхаго осужде́ния изба́вити хотя́ ми́р, я́ко Благоутро́бен. Те́мже вопию́ Ти, обетша́вшаго мя́ грехи́ мно́гими ны́не обнови́, Ще́дре, и спаси́ мя пою́ща: благослове́н Бо́г оте́ц на́ших.

И́же иногда́ Манасси́ю пока́явшася спасы́й, и уще́дривый блудни́цу прослези́вшуюся, и разбо́йника сло́вом оправда́вый, мно́гая и лю́тая согреши́вшаго Ти́, и мене́, Спа́се, приими́ вопию́ща: благослове́н Бо́г оте́ц на́ших.

Слава, Му́ченичен: Бу́ри лю́тей многобо́жия обдержа́щей вселе́нную, кора́бль сотво́рше благоче́стия страстоте́рпцы: окормле́нием же Христо́вым, ко приста́нищу жи́зни доплы́вше вопие́те: благослове́н Бо́г оте́ц на́ших.

И ныне, Богоро́дичен: Спа́са и Бо́га, и изба́вителя и Влады́ку, пло́тию ро́ждши Пречи́стая Влады́чице, тому́ при́сно, Пречи́стая, моли́ся, я́ко да разреше́ние лю́тых и мно́гих грехо́в оставле́ние прии́мше, славосло́вим того́ я́же па́че ума́ щедро́ты.

Пе́снь 8

Ирмо́с: Во огни́ пла́меннем предстоя́т Тебе́ Херуви́ми, Серафи́ми, Го́споди, и вся́ тва́рь пе́снь Тебе́ пое́т кра́сную: по́йте, благослови́те, лю́дие превозноси́те Христа́, Еди́наго Соде́теля, во вся́ ве́ки.

Не пребы́х во стра́се Твое́м, не послу́шах за́поведей Твои́х, и во́лю твою́ никогда́же сотвори́х: что́ бу́ду окая́нный? Человеколюби́в сы́й, уще́дри мя́ ту́не, Спа́се, и не отве́ржи мене́.

Де́лателю до́брых, вопию́ Ти: стра́ха Твоего́ серпо́м, пожни́ из ко́рене вся́ терно́вная помышле́ния души́ моея́ окая́нныя: и се́менем покая́ния прозяба́ти ми́ сподо́би, Христе́, спаси́тельный кла́с.

Слава, Му́ченичен: Распространи́шася благода́тию, утесня́еми в му́ках мно́гих страстоно́сцы, и стесни́ша врагу́ пути́ про́пастей испо́лнены, и ны́не наставля́ют на́с к путе́м Бо́жиим в ве́ре и любви́.

И ныне, Богоро́дичен: Чре́во Твое́, Всенепоро́чная, сто́г честна́го гумна́ яви́ся, ми́ру нося́ пшени́цу Живота́, пита́ющу вся́ческая. Те́мже Тя́ я́ко вино́вну все́х до́брых, ве́рнии по достоя́нию ублажа́ем.

Пе́снь 9

Ирмо́с: Сотвори́ держа́ву мы́шцею свое́ю, низложи́ бо си́льныя со престо́л, и вознесе́ смире́нныя Бо́г Изра́илев: в ни́хже посети́ на́с восто́к с высоты́, и напра́вил ны́ е́сть на пу́ть ми́ра.

Се́ отве́рзеся черто́г та́йный, и му́дрии украси́вше свещы́ своя́ еле́ем доброде́телей, вхо́дят све́тли. Отложи́ со́н уны́ния, о душе́, я́ко да вни́деши со Христо́м свещу́ нося́щи.

Я́коже блудни́ца держу́ но́зе Твои́ мы́сленно, и слеза́ми омыва́ю си́х, Сло́ве. Омы́й мя́, Спа́се, от тиме́ния страсте́й: ве́ра твоя́ спасе́ тя, ны́не и мне́ пригласи́в, я́ко да Твое́ безчи́сленное пою́ милосе́рдие.

Слава, Му́ченичен: Весе́лым се́рдцем и ра́достною душе́ю му́ченицы в вы́шних живу́т, я́звы Христо́вы я́коже красоту́ благоле́пия при́сно иму́ще: и на́м ми́ра испроша́ют, и лю́тых избавле́ние, и прегреше́ний разреше́ние.

И ныне, Богоро́дичен: Благолюби́вая Отрокови́це, благолюби́ваго Бо́га ро́ждшая, вопию́ Ти: ублажи́ окая́нную мою́ ду́шу, озло́бленную лю́те страстьми́ и прило́гми лука́вых бесо́в, да ве́рою Тя́ пою́ наде́жду все́х.

Молитва

Влады́ко Го́споди, Иису́се Христе́, Бо́же наш, долготерпе́вый о на́ших согреше́ниих и да́же до ны́нешняго часа́ приведы́й нас, во́ньже, на Животворя́щем Дре́ве ви́ся, благоразу́мному разбо́йнику и́же в рай путесотвори́л еси́ вход и сме́ртию смерть разруши́л еси́: очи́сти нас, гре́шных и недосто́йных раб Твои́х, согреши́хом бо и беззако́нновахом и не́смы досто́йни возвести́ очеса́ на́ша и воззре́ти на высоту́ Небе́сную, зане́ оста́вихом путь пра́вды Твоея́ и ходи́хом в во́лях серде́ц на́ших. Но мо́лим Твою́ безме́рную бла́гость: пощади́ нас, Го́споди, по мно́жеству ми́лости Твоея́, и спаси́ нас И́мене Твоего́ ра́ди свята́го, я́ко исчезо́ша в суете́ дни́е на́ши, изми́ нас из руки́ сопроти́внаго, и оста́ви нам грехи́ на́ша, и умертви́ плотско́е на́ше мудрова́ние, да, ве́тхаго отложи́вше челове́ка, в но́ваго облеце́мся и Тебе́ поживе́м, на́шему Влады́це и Благоде́телю. И та́ко, Твои́м после́дующе повеле́нием, в ве́чный поко́й дости́гнем, иде́же есть всех веселя́щихся жили́ще. Ты бо еси́ вои́стинну и́стинное весе́лие и ра́дость лю́бящих Тя, Христе́ Бо́же наш, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в, ами́нь.