Канон Господу нашему Иисусу Христу, глас 2.

Тропарь, глас 2:

Вети́йствуяй, я́коже пи́сано е́сть, у́м челове́ческий не мо́жет Божества́ еди́но нача́ло пе́ти триипоста́сное.

Кано́н умиле́ния ко Го́споду на́шему Иису́су Христу́ и святы́м му́чеником [его́же краегране́сие си́це: Мои́м рыда́нием вмеще́ние, о Спа́се, подава́еши.] Творе́ние Ио́сифово. Гла́с 2.

Пе́снь 1

Ирмо́с: Моисе́йскую пе́снь восприи́мши, возопи́й душе́: Помо́щник и покрови́тель бы́сть мне́ во спасе́ние, Се́й мо́й Бо́г, и просла́влю Его́.

Припев: Помилуй мя Боже, помилуй мя.

Себе́ бра́тие пре́жде исхо́да воспла́чим го́рько, я́ко да слеза́ми до́брыми убежи́м тогда́ сле́з муче́ния, ничто́же иму́щих поле́зно.

Тьма́ми, Христе́, завеща́х пока́ятися, и нечу́вственну ду́шу име́яй, в прегреше́ния впа́даю: уще́дри, Спа́се, не́мощь мою́.

Слава, Му́ченичен: Кре́пцы на враги́ я́вльшеся си́лою Боже́ственною, некре́постную и́х низложи́сте си́лу, му́ченицы Христо́вы достохва́льнии.

И ныне, Богоро́дичен: Пламеноно́сная клеще́, ю́же Иса́иа ви́де иногда́, веще́ственныя се́рдца моего́ стра́сти, Богороди́тельнице, попали́, и до конца́ потреби́.

Пе́снь 3

Ирмо́с: Непло́дствовавший мо́й у́м, плодоно́сен, Бо́же, покажи́ ми, де́лателю до́брых, насади́телю благи́х, благоутро́бием Твои́м.

Ле́ностным дрема́нием отяготи́х ду́шу: воздви́гни, Христе́, ко бде́нию покая́ния, твори́ти Твоя́ повеле́ния.

Не яви́ мене́, Иису́се, в де́нь стра́шный отча́янна: но пре́жде конца́ обрати́в, лю́тыя изба́ви му́ки.

Слава, Му́ченичен: И́же стра́сти Христо́вы подража́вше до́бре, Боже́ственными о́бразы страстоте́рпцы Христо́вы, души́ моея́ лю́тыя стра́сти исцели́те.

И ныне, Богоро́дичен: Дои́ши матероле́пно пита́теля все́х, и но́сиши сего́ на объя́тиях, Чи́стая, вся́ческая руко́ю нося́щаго всегда́.

Стихира, глас 2

Все́х превосхожду́ грехо́м, кого́ научу́ покая́нию? Аще воздохну́ я́ко мыта́рь, непщу́ю отягчи́ти небеса́: а́ще слезю́ я́коже блудни́ца, оскверня́ю слеза́ми зе́млю. Но да́ждь ми́ оставле́ние грехо́в, Бо́же, и поми́луй мя́.

Пе́снь 4

Ирмо́с: Е́же от Де́вы Твое́ рождество́ проро́к предзря́, воспропове́даше вопия́: слу́х Тво́й услы́шах, и убоя́хся, я́ко от ю́га, и из горы́ святы́я приосене́нныя прише́л еси́ Христе́.

Окра́дена мя́ отвсю́ду, и обнища́вша сло́ве, зря́ вра́г, о поги́бели мое́й ра́дуется, льсти́вый мудре́ц: Го́споди сла́вы, обогати́телю убо́гих, того́ мя злоде́йствия изми́.

Ру́це и о́чи оскверни́х, Го́споди, соде́яв я́же неле́по е́сть твори́ти, и в гне́в подвиго́х щедро́ты Твоя́, ижди́в Твое́ долготерпе́ние: призре́в уще́дри мя́, Бла́же.

Слава, Му́ченичен: Ко́ль ди́вен Бо́г на́ш во святы́х е́сть, послу́шавших его́, и низлага́ющих истука́нныя поги́бели, и насле́довавших рая́ простра́нство, от него́же дре́вле изгна́н бы́сть Ада́м.

И ныне, Богоро́дичен: Научи́вся ду́хом проро́ческий пресла́вный ли́к, е́же па́че ума́ Твое́й та́йне, Богоро́дице, различнообра́зно сию́ предначерта́ет свяще́нными образы́, и́хже коне́ц зри́м све́тло.

Пе́снь 5

Ирмо́с: Мглу́ души́ моея́, Спа́се мо́й, разгна́в, све́том за́поведей Твои́х озари́ мя, я́ко еди́н Ца́рь ми́ра.

Грехи́ совокупля́ю безу́мно грехо́м, и восклоне́ния не́сть в сме́рти мое́й: увы́ мне́, ка́ко явлю́ся Христо́ви?

Беду́ прие́млю я́ко кора́бль, погуби́х мое́ бре́мя, е́же ми́ да́л еси́ Ще́дре, и ны́не обнища́в зову́: не пре́зри мене́, Христе́.

Слава, Му́ченичен: Я́ко сла́ву презре́вше до́льнюю и попира́емую, небе́сней страстоте́рпцы сподо́бистеся сла́ве, сопребыва́юще Христу́.

И ныне, Богоро́дичен: Дании́л Тя́ го́ру ве́лию ду́хом зря́ще, Богоро́дице: от нея́же ка́мень отсе́кся, сокруша́ет де́монов истука́нная.

Пе́снь 6

Ирмо́с: Во глубине́ грехо́вней содержи́м е́смь, Спа́се, и в пучи́не жите́йстей обурева́ем: но я́коже Ио́ну от зве́ря, и мене́ от страсте́й возведи́, и спаси́ мя.

Я́коже дре́вле ханане́а зову́ Ти, Спа́се, Сы́не Бо́жий, поми́ловав мя́ уще́дри: ду́шу бо стра́ждущу и́мам в лю́тых, и саму́ в чу́вство приити́ не хотя́щую.

Смуща́ет мя́ безме́рных страсте́й бу́ря: я́коже мо́рю иногда́ запрети́л еси́, и спа́сл еси́ святы́я ученики́ Твоя́, и мене́, Иису́се, возведи́, и спаси́, Христе́.

Слава, Му́ченичен: Окропля́еми крове́й свои́х тече́ньми, и о́чию избода́еми му́ченицы, померза́еми сту́дению лю́тою, к теплоте́ жи́зни преидо́сте, воспева́юще Христа́.

И ныне, Богоро́дичен: Я́ко трапе́за хле́б вмеща́еши та́йный, от него́же я́дше не ктому́ а́лчем всепе́тая, ве́дущии Тя́, Христа́ все́х Бо́га роди́тельницу, и пита́тельницу я́ко вои́стинну.

Седален, глас 2

Поми́луй мя́, Бо́же, поми́луй мя́, о двою́ греху́ пла́каше Дави́д, о тьма́х а́з согреше́ниих вопию́ Ти: Он посте́лю слеза́ми омочава́ше, а́з же ни ка́пли еди́ныя и́мам, отча́яхся и молю́: поми́луй мя́, Бо́же, по вели́цей ми́лости Твое́й.

Пе́снь 7

Ирмо́с: Херуви́мы подража́юще о́троцы в пещи́, ликовствова́ху вопию́ще: благослове́н еси́ Бо́же, я́ко и́стиною и судо́м наве́л еси́ сия́ вся́ гре́х ра́ди на́ших, препе́тый и препросла́вленный во вся́ ве́ки.

Зако́нов Твои́х отверго́хся, и покори́хся безслове́сным похоте́м, де́я неле́пая, Христе́, я́ко осуети́хся в безу́мии мое́м, я́коже и́н никто́же от челове́к на земли́: не оста́ви у́бо мене́, Спа́се, поги́бнути, человеколю́бия ра́ди.

В беззако́ниих, Го́споди, се́ а́з зача́т е́смь, я́коже Дави́д зову́, и я́ко блудни́ца слезю́, и я́ко преогорчева́яй ра́б, преогорчи́х Тя́ еди́наго су́щаго Бо́га блага́го: не оста́ви у́бо мене́ Спа́се поги́бнути, человеколю́бия ра́ди.

Слава, Му́ченичен: О́чию избода́еми, и оте́млеми рука́ми и нога́ми, благоте́чно к небе́сному благосла́внии посыла́хуся ше́ствию, препина́юще ше́ствия единобо́рца: те́х моли́твами спаси́ вся́, Сло́ве, Тебе́ славосло́вящыя.

И ныне, Богоро́дичен: Херуви́ми сла́вят, Серафи́ми воспева́ют, Престо́ли, и Вла́сти, и госпо́дьствия при́сно, е́же па́че ума́ Твое́ Рождество́, Мари́е всепе́тая, я́ко еди́на Бо́га ражда́еши пло́тию. Его́же моли́, Чи́стая, все́м на́м спасти́ся, любо́вию почита́ющым Тя́.

Пе́снь 8

Ирмо́с: В купине́ Моисе́ю Де́вы чу́до, на Сина́йстей горе́ прообрази́вшаго иногда́, по́йте, благослови́те, и превозноси́те во вся́ ве́ки.

Да обожи́ши на́с, воплоти́лся еси́ за ми́лость, ника́коже разуме́х, порабоще́н сластьми́: Твое́ю бла́гостию обрати́ мя Христе́, все́х спасе́ние.

Ты́ па́стырю до́брый, Сло́ве, заблу́ждшую на гора́х преступле́ния, окая́нную мою́ ду́шу обрати́ и спаси́: да не до конца́ мя вра́г льсти́вый пожре́т.

Слава, Му́ченичен: Ста́нем му́жески вку́пе, вопия́ху дру́г дру́гу кра́снии страда́льцы, ураня́еми лю́те: се́ Христо́с простира́ет побе́ды венцы́ во вся́ ве́ки.

И ныне, Богоро́дичен: Да обожи́т на́с Бо́г, воплоти́ся из чи́стых крове́й Твои́х, и бы́сть челове́к, Де́во Богоро́дице: Его́же моли́ при́сно о чту́щих Тя́.

Пе́снь 9

Ирмо́с: От земноро́дных кто́ слы́ша таково́е, или́ кто́ ви́де когда́? Я́ко Де́ва обре́теся во чре́ве иму́щая, и безболе́зненно младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́ем.

О ка́ко стра́шно е́сть Твое́ суди́ще, на не́мже Христе́ ожида́ю суди́тися, и не чу́вствую отню́д сего́ стра́ха, в ле́ности вся́ ле́та провожда́я! Обрати́ мя Еди́не Соде́телю, и́же Манасси́ю обраще́й согреши́вшаго.

Уста́ви, Христе́, пото́ки, вопию́ Ти, безме́рных мои́х зо́л, то́ки мне́ дая́й сле́з умыва́ющыя скве́рну, я́же подъя́х безу́мием: и спаси́ мя, спасы́й блудни́цу от души́ пока́явшуюся, ми́лостию Твое́ю.

Слава, Му́ченичен: По́лк че́стен, во́инство победоно́сное, и избра́нное ополче́ние, собо́р святы́х му́ченик, ли́к блаже́нный, ликостоя́нием сочета́ся безпло́тных. Те́х моли́твами, Христе́, вся́ ны́ Ца́рствию Твоему́ прича́стники сотвори́.

И ныне, Богоро́дичен: Све́тлыми заря́ми, из чре́ва Твоего́ возсия́вшаго на́м, и безбо́жия но́щь потре́бльшаго, Де́во Ма́ти Мари́е, просвети́ вся́ ве́рою Тебе́ чту́щыя, и от несвети́мыя тьмы́ изба́ви в ча́с осужде́ния.

Молитва

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.