Канон Пресвятой Богородице, глас 8.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Други́й кано́н пресвяте́й Богоро́дице. Гла́с 8.

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Пресвятая Богородице, спаси нас.

Омраче́нную сластьми́ жития́ ду́шу мою́, Богома́ти, и мирски́ми печа́льми безвре́менно смуща́ему, просвеще́нием Твои́м просвети́.

Отверзо́шася две́ри небе́сныя Боже́ственным Твои́м Рождество́м, Богома́ти: в ни́хже вхо́д да́ждь души́ мое́й я́ко ми́лостива, и к те́м наста́ви мя́.

Слава: Устреле́ную стрело́ю лука́ваго, и ко́зньми о́наго, и кова́рствы уязвле́ную ду́шу мою́, Де́во, ми́лостию Твое́ю исцели́.

И ныне: Я́же ненаде́ющихся наде́жда, па́дших исправле́ние, све́т Боже́ственный ро́ждшая, ду́шу мою́ су́щую во тьме́ просвети́.

Пе́снь 3

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Воздыха́ния немо́лчная, и приле́жныя сле́зы, и сокруше́нно се́рдце да́ждь ми́, Де́во, да пла́чуся соде́янных мно́ю, и совозраста́ющыя моя́ стра́сти потреби́, еди́на Всепе́тая.

Дрема́ньми отягче́нную грехо́вными, и ко а́дове утро́бе низпопо́лзшуюся ду́шу мою́ исхити́, Влады́чице, и помышле́ние покая́ния и́стиннаго пода́ждь ми́, Богоблаже́нная.

Слава: Умиле́ния любо́вь, и доброде́телей да́руй, Всенепоро́чная, погруже́нней души́ мое́й прегреше́ньми, и небе́сное житие́ возлюби́ти, и Бо́жие жела́ние име́ти.

И ныне: На Тя́ упова́ние возлага́ю, Ма́ти Бо́жия, и отча́яния вско́ре изба́влюся: ве́м бо, ве́м Твоего́ благоутро́бия бога́тство, и кре́пость све́дый дерзнове́ния Твоего́.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Я́же Бо́га Сло́ва неизрече́нно ро́ждшая, души́ моея́ стру́пы обяжи́, де́йственным бы́лием, кро́вь сы́на Твоего́ честну́ю возлия́вши, разруши́вшаго а́дово душетле́нное чре́во, и источи́вшаго ми́ру воскре́сение.

Неве́сто Бо́жия, прегреше́ний очище́ние души́ мое́й струи́ низпосли́, и лука́вая отмы́й помышле́ния, чи́сте бы́ти то́й сподо́би: к Твоему́ бо хода́тайству, и Твое́й по́мощи, Богоро́дице Де́во, прибего́х.

Слава: К Твоему́ ны́не прибега́ю заступле́нию, Пречи́стая, предвари́ мя изба́вити лю́тыя бу́ри вра́жия, и смуща́ющих пото́ков беззако́ния: к Твоему́ же приста́нищу, и к Твое́й тишине́ неукло́нно, Богома́ти, наста́ви мя́.

И ныне: Вра́г грехо́вными стрела́ми ду́шу мою́ всю́ уязви́, и оскверни́ сластьми́ мое́ се́рдце, и отврати́ от пути́ пра́ваго. Сего́ ра́ди вопию́ Ти: обрати́вши исцели́ мя, и спаси́.

Пе́снь 5

Ирмо́с: Вску́ю мя́ отри́нул еси́ от Лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго; но обрати́ мя, и к све́ту за́поведей Твои́х пути́ моя́ напра́ви, молю́ся.

Со все́м усе́рдием тщу́ся к Твоему́, Всенепоро́чная, заступле́нию и душе́вное о́ко возвожду́: не отврати́ мене́, но заступи́ мя я́ко Блага́я, и изба́ви мя́, и прегреше́ний мои́х скве́рну отмы́й.

Я́д смертоно́сен грехо́вными зубы́ вложи́ся: но того́ погуби́ гвоздьми́ и копие́м Боже́ственным Рождества́ Твоего́, за милосе́рдие на́с ра́ди пло́тию пострада́вшаго, Еди́на Всепе́тая.

Слава: Умерщвле́нна мя́ нра́вом, и истле́вшаго прегреше́ньми, оживи́, Ро́ждшая Живо́т ве́чный, и обновле́нием духо́вным, к нетле́нию претвори́ мя, Богоблаже́нная.

И ныне: Лука́вства бесо́вскаго, и зло́бы челове́ческия изба́ви мя́, Влады́чице, и душе́вную боле́знь, и теле́сную вско́ре исцели́, Ро́ждшая Еди́на вся́кия пло́ти и согреше́ний Врача́, Спа́са и Го́спода.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Отступи́х от Бо́га блу́дно жи́в, и ра́б сласте́й окая́нный бы́х, и вся́кия обнажи́хся доброде́тели Боже́ственныя: но посети́ мя́, Пречи́стая.

Бежа́тель бы́х от за́поведей да́нных ми́, и удали́вся от живота́ к сме́рти прибли́жихся: но наста́ви мя́ к возвраще́нию, Богома́ти Пречи́стая.

Слава: Житие́ мое́ лука́вно, испо́лнено нераде́ния: но ми́лость Твоя́ мно́гая и неизрече́нная, Пречи́стая, да одоле́ет и милосе́рдие бла́гости Твоея́ немощне́й мы́сли мое́й.

И ныне: Спа́са и Изба́вителя ро́ждши, и Всеще́драго, уще́дри мя́, Чи́стая, и спаси́, и изба́ви от обыше́дших мя́, и напа́дающих неми́лостивно на не́мощь мою́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Го́споди Бо́же во ве́ки.

Вся́ еси́ светоно́сна, Све́т незаходи́мый, Де́во, прие́мши, и просвеща́ющи, Чи́стая, ве́рою Тебе́ вопию́щыя: Благослове́н, Пречи́стая, Пло́д Твоего́ чре́ва.

Да Твое́ человеколю́бие и ми́лость, Де́во, яви́ши, из глубины́ мя зо́л возведи́ вопию́ща: благослове́н, Пречи́стая, Пло́д Твоего́ чре́ва.

Слава: К Тебе́, Ма́ти Де́во, притека́ю, уязвля́емь стрела́ми душетле́нными: всего́ мя моли́твою Твое́ю огради́ вопию́ща: благослове́н, Пречи́стая, Пло́д Твоего́ чре́ва.

И ныне: Изба́ви мя́, Ма́ти Спа́сова, одержа́щаго лю́таго плене́ния, помышле́ний лука́вых, и ви́н грехо́вных: я́ко да при́сно спаса́емь по до́лгу Тя́ сла́влю.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Вседержи́тель Госпо́дь всели́выйся во утро́бу Твою́, и сто́лп утвержде́ния ве́рным Тя́ показа́: к Нему́же прибега́юще напа́стей избавля́емся и бе́д, и свобожда́емся искуше́ния, согла́сно пою́ще: свяще́нницы воспо́йте, лю́дие превозноси́те Его́ во ве́ки.

Свяще́ннаго, Влады́чице, отпадо́х жития́, ко греху́ невоздержи́мо влеко́мь, и си́м порабоща́емь, свобожде́ния е́же о Христе́ и пра́вды и́стинныя обнажи́хся: но не пре́зри мя́, Сокро́вище спасе́ния, к Тебе́ прибега́ющаго, на́га и обнища́вшаго.

Слава: Да испра́вится мольба́ моли́твы моея́ ко Го́споду, из утро́бы Твоея́ произше́дшему, Влады́чице: и от преступле́ния за́поведей да изба́вит мя́, и осужде́ния и кля́твы зако́нныя, и скве́рну да отмы́ет лю́тых мои́х прегреше́ний, я́ко Еди́н Ми́лостив.

И ныне: Богороди́тельнице Пречи́стая, души́ моея́ я́звы, и грехо́вныя собла́зны очи́сти, исто́чником отмыва́ющи, и́же из ре́бр сы́на Твоего́, от ни́х поте́кшими струя́ми: к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.

Пе́снь 9

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее Небе́с. Те́м Тя́ Богоро́дицу А́нгелов и челове́к чинонача́лия велича́ют.

Вои́стинну Богома́ти су́щаго Бо́га, моля́щи не преста́й Его́же родила́ еси́, грехо́в оставле́ние рабо́м Твои́м пода́ти, и всесоверше́нное проще́ние те́м ны́не соде́янных зо́л: и си́х сподо́бити со все́ми святы́ми ве́чнаго наслажде́ния.

Кре́постию и си́лою духо́вною, и ору́жием, и держа́вою, препоя́ши смире́нную ду́шу мою́, Пресвята́я Богоро́дице, и кре́стным ору́жием облецы́, и греха́ моего́ ра́ны очи́сти, росо́ю Твоего́ человеколю́бия, и вели́кою ми́лостию Твое́ю.

Слава: Спасе́ния бу́ди ми́ сто́лп, Чи́стая, бесо́в безде́льны сотвори́ полки́, и напа́стей молву́, и беды́ отгоня́ющи, и страсте́й нахо́ды дале́че прогоня́ющи, и чи́стое даю́щи свобожде́ние.

И ныне: Чи́стая препросла́вленная Ма́ти Бо́жия, пою́щыя Тя́ любо́вию спаси́, и искуше́ний молву́ разоря́ющи ми́лостивно: я́ко Бо́га бо ро́ждши, Де́во, вся́ ели́ко хо́щеши твори́ти мо́жеши, и подае́ши ми́лость невозбра́нно. Те́мже Тя́ вси́ велича́ем.

Молитва

Пречистая Владычице Богородице, Царица Небесе и земли, высшая Ангел и Архангел и всея твари Честнейшая, чистая Дево Марие, миру Благая помощнице, всех христиан поможение и утверждение, и всем во всяких нуждах избавление! Призри ныне, О, Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припадающыя и Пречистому и Цельбоносному образу Твоему поклоняющыяся, Твоея же помощи и заступления в скорбех и напастех своих просящыя. Буди за нас ходатаица к Сыну Твоему, Христу Богу нашему: мы бо грешнии не имамы иныя помощницы разве Тебе, Владычице. Ты еси наша надежда и упование, Ты еси заступница и предстательница наша, Ты обидимым защищение, печальным утешение, скорбящым радование, сирым прибежище, вдовам хранительница, девам слава, слезящым веселие, больным посещение, немощным исцеление, грешным спасение. Сего ради, О, Богомати, к Тебе прибегаем, и на Твой Святый образ взирающе, с любовию покланяемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков. Аминь.