Канон Пресвятой Богородице, глас 7.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Други́й кано́н Пресвяте́й Богоро́дице. Гла́с 7:

Пе́снь 1

Ирмо́с: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

Припев: Пресвятая Богородице, спаси нас.

Впа́дшаго в тле́ние преслуша́ния пра́деда Ада́ма обнови́ла еси́, Бо́га, Пречи́стая, пло́тию ро́ждши.

С весе́лием гла́с Гаврии́лов взыва́ем Ти́, Чи́стая: ра́дуйся, все́х Наде́жде Пречи́стая, ра́дуйся, Богоневе́сто.

Слава: Умерщвле́нный мо́й у́м оживи́ живо́тным де́йствием из Тебе́ ро́ждшимся вои́стинну, Пречи́стая Де́во.

И ныне: Благословя́щии Тя́ ве́рно от Бо́га благословля́ются я́ве: благослове́ния во исто́чник родила́ еси́, Еди́на Всепе́тая.

Пе́снь 3

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́, Го́споди, и Тя́ пое́т ду́х мо́й.

Тебе́ Де́ву, обра́зно се́нь всесвяту́ю, Законополо́жнику на горе́ Бо́г предсказа́ше: селе́ние бо бы́сть все́х освяща́ющаго.

Зе́млю Тя́ святу́ю, Де́во, разуме́хом вси́, на́м без се́мене возрасти́вшую кра́сный кла́с, Иису́са Христа́, пита́ющ ве́рою Тя́ и любо́вию блажа́щих.

Слава: Ви́дена бы́ша ше́ствия Бо́га вы́шняго, в Тебе́, Де́во, неизрече́нно тому́ вопло́щшуся: Ма́ти бо Ты́ была́ еси́ все́ми ца́рствующаго.

И ныне: Утверди́хся, Боже́ственное Твое́ Рождество́ разуме́в, и заступле́нием Твои́м, Де́во, обога́щься, зовы́й: свя́т еси́ Го́споди, спаса́яй ду́шы на́шя.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Услы́шах слу́х Тво́й, и убоя́хся: разуме́х дела́ твоя́, и ужасо́хся Го́споди.

Услы́шал е́сть Авваку́м Тя́, Пречи́стая, го́ру, духо́вными осене́ньми просвеща́ему: из Тебе́ бо Бо́г яви́ся воплоща́емь.

Исправля́ется правосла́вных собо́р, Тебе́ Всесвяту́ю поя́ я́ко Богома́терь, со Арха́нгелом, ра́дуйся, зовы́й Тебе́.

Слава: Бие́тся несто́риа лице́, не восхоте́вшаго му́дрствовати Тебе́ Богоро́дицу Чи́стую: Бо́га бо вои́стинну, Пречи́стая, родила́ еси́.

И ныне: Кра́сную Тя́ и све́тлую добро́тами Жени́х обре́т, в Тя́ всели́ся, и Богоро́дицу Всечи́стая соде́ла.

Пе́снь 5

Ирмо́с: У́тренюет ду́х мо́й к Тебе́, Бо́же: зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Боголе́пную Твою́, Госпоже́, и кра́сную, и сладча́йшую и благу́ю добро́ту возлюби́в Влады́ка, в Тя́, Де́во, всели́ся.

Всесвята́я и светоно́сная две́ре благода́ти, вселе́нную светле́йшим Твои́м све́том озари́вши, Отрокови́це, Тебе́ пою́щыя просвети́.

Слава: Богоро́дицу испове́дающии Тя́, Ма́ти Де́во, непреиду́щаго Ца́рствия и пи́щи Тобо́ю, Богома́ти, улучи́ти да сподо́бятся.

И ныне: Хра́м яви́лася еси́ Всеви́дца и Вседержи́теля: Твою́ бо утро́бу чисте́йшую небе́с обре́т водвори́ся, Богороди́тельнице Всечи́стая.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Богому́жно в челове́цех пожи́вшаго родила́ еси́, Богоро́дице Де́во, еди́наго благоде́теля, е́же бы́ти челове́ком да́рующаго.

Емману́ила, Богоро́дице, сугу́ба по существу́ родила́ еси́, пре́жде соверше́нно сло́во, Бо́га воплоще́нна, избавле́ние на́м подава́ющаго.

Слава: Ковче́г прие́мый зако́на скрижа́ли, преднаписа́ Тебе́, Богоро́дице, Сло́во Бо́жие, я́ко прие́мшую во чре́ве Свое́м на́с ра́ди воплоща́ема.

И ныне: А́нгельския язы́ки испо́лнены, Твоя́ похвалы́ пропове́дати не мо́гут, Чи́стая: мы́ же ны́не ра́бски прие́мше, е́же ра́дуйся, Гаврии́лово прино́сим.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.

Я́же в пещи́ о́гненней, Твое́ Рождество́ спасло́ е́сть у́бо Дре́вле: ны́не же на́с, Всенепоро́чная, спаси́, Его́ прише́ствию е́же па́че сло́ва зову́щих: благослове́н еси́ Бо́же оте́ц на́ших.

Богооте́ц у́бо Дави́д Твою́ сла́ву напису́ет, Де́во, и Тебе́ тва́рей Цари́цу явле́нно проро́чествует, предстоя́щую одесну́ю, Всенепоро́чная, Бо́га оте́ц на́ших.

Слава: Обнови́ла еси́, Чи́стая, земны́х естество́, обновле́нием Рождества́ Твоего́. Те́мже Ти́ вопие́м: благослове́н е́сть во ве́ки вся́, Госпоже́, Пло́д Твоего́ чре́ва.

И ныне: Осужде́ннаго бы́вша Ада́ма, и сме́ртию держи́ма, Ада́м вторы́й, Пречи́стая, Тобо́ю поми́ловав призва́, благослове́н еси́ зову́ща, рожде́йся, и обновле́й мя́.

Пе́снь 8

Ирмо́с: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.

Непостижи́мый Влады́ка все́х, Его́же не вмеща́ют Небеса́, Богороди́тельнице, вмеща́ется во Твою́ утро́бу, Де́во. Те́мже Тя́ ве́рнии любо́вию превозно́сим во ве́ки.

Ума́ превы́шшаго всея́ тва́ри, Отрокови́це, Его́же не возмога́ет рожде́нное зре́ти естество́, носи́ла еси́ на Свое́ю Пречи́стою руку́. Те́мже ве́рнии любо́вию превозно́сим во вся́ ве́ки.

Слава: Бо́га, Его́же родила́ еси́, умоли́, Де́во, низпосла́ти спасе́ние ве́рно чту́щым Тя́, и бе́д разруше́ние, и неду́гов лю́тых премене́ние ско́рое, и благода́ть ве́чную.

И ныне: Украше́н Тя́ доброде́тельми разли́чными, и просвеще́н хра́м Вы́шняго, уве́девше, Всесвята́я Де́во, пое́м благоче́стно Тя́, и славосло́вим во вся́ ве́ки.

Пе́снь 9

Ирмо́с: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

Всесоверше́но челове́чество прия́то бы́сть из Тебе́, Пречи́стая Отрокови́це, сло́ву совоку́пльшуся пло́ти одушевле́нней, сло́вом души́ укра́шенней: те́мже вси́ ве́рнии Тя́ велича́ем.

Вити́йское у́бо буесло́вие да умолчи́т, апо́стольская же труба́ да возгласи́т, Тебе́ и́стинными гла́сы, Де́во, восхваля́ющи, Богоро́дицу и́стинную возвеща́ющи.

Слава: Поми́ловася Тебе́ ра́ди челове́чество, по ипоста́си вои́стинну Сло́ву соеди́ншееся, и воздая́нием Бо́г, Де́во, бы́вшее: те́мже Тя́ вси́ при́сно велича́ем.

И ныне: Проразуме́ся проро́ческими быстрозре́нии та́инство, Отрокови́це, Твоего́ рождества́, я́ко воплоще́нна Бо́га ро́ждши челове́ком, избавля́ющаго на́с от напа́стей моли́твами Твои́ми.

Молитва

Пречистая Владычице Богородице, Царица Небесе и земли, высшая Ангел и Архангел и всея твари Честнейшая, чистая Дево Марие, миру Благая помощнице, всех христиан поможение и утверждение, и всем во всяких нуждах избавление! Призри ныне, О, Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припадающыя и Пречистому и Цельбоносному образу Твоему поклоняющыяся, Твоея же помощи и заступления в скорбех и напастех своих просящыя. Буди за нас ходатаица к Сыну Твоему, Христу Богу нашему: мы бо грешнии не имамы иныя помощницы разве Тебе, Владычице. Ты еси наша надежда и упование, Ты еси заступница и предстательница наша, Ты обидимым защищение, печальным утешение, скорбящым радование, сирым прибежище, вдовам хранительница, девам слава, слезящым веселие, больным посещение, немощным исцеление, грешным спасение. Сего ради, О, Богомати, к Тебе прибегаем, и на Твой Святый образ взирающе, с любовию покланяемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков. Аминь.