Канон Пресвятой Богородице, глас 6.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

И́н кано́н ко Пресвяте́й Богоро́дице, [его́же краестро́чие по алфави́ту.]

Пе́снь 1

Ирмо́с: Волно́ю морско́ю Скры́вшаго дре́вле гони́теля мучи́теля под земле́ю скры́ша спасе́нных о́троцы: но мы́ я́ко отрокови́цы, Го́сподеви пои́м, сла́вно бо просла́вися.

Припев: Пресвятая Богородице, спаси нас.

Пречи́стая Е́во, Благода́тная Мари́е сла́вная, ра́дости хода́таице, певцы́ Твоя́ Боже́ственными благода́тьми благода́тствуй: я́ко да благода́рственную пе́снь Тебе́ возсле́м. (Дважды)

Слава: Оле Твои́х та́инств, Богома́ти! творе́ний бо яви́лася еси́ Влады́чица, Его́же не дерза́ют взира́ти А́нгелов во́инства, во объя́тиих нося́щи. Те́мже Тя́ ублажа́ем.

И ныне: Ро́д челове́ческий ве́сь тле́нием сме́ртным осуди́ся, прама́терним вкуше́нием Дре́ва: Тобо́ю же воззва́ся, я́ко Живо́т ро́ждшею, Чи́стая, нетле́нный.

Пе́снь 3

Ирмо́с: Тебе́ на вода́х пове́сившаго всю́ зе́млю неодержи́мо, тва́рь ви́девши на ло́бнем ви́сима, у́жасом мно́гим содрага́шеся, не́сть свя́т ра́зве Тебе́, Го́споди, взыва́ющи.

Ле́стию мя́ прельсти́вый обоже́ния жела́нием вра́г дре́вле, из Еде́ма Богома́ти, на зе́млю пресмыка́вый сокруши́: но Христо́с уще́дрив мя́, от ложе́сн Твои́х пло́ть восприи́м, возсозда́. (Дважды)

Слава: Живота́ яви́лася еси́ врата́, проро́ку дре́вле Иезеки́илю, Отрокови́це, я́же Госпо́дь еди́н воплоще́нный про́йде, и заключе́нная Тя́, Чи́стая, соблюде́, я́ко е́сть Вы́шний.

И ныне: Разреши́ся кля́твы дре́вния осужде́ние, Богома́ти, Твои́м хода́тайством: яви́вся бо Ти́, Госпо́дь, все́ незави́стно источи́, я́ко преблаги́й, все́м благослове́ние, Пречи́стая.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: На Кресте́ Твое́ Боже́ственное истоща́ние прови́дя Авваку́м, ужа́сся вопия́ше: Ты́ си́льных пресе́кл еси́ держа́ву, Бла́же, приобща́яся су́щым во а́де, я́ко всеси́лен.

Избра́нная же и Пречи́стая от все́х родо́в я́вльшися еди́на, я́же доброде́тельми возсия́вшая нескве́рная, Честна́я, и́же Тя́ песносло́вящыя све́тлостию Твое́ю просвети́. (Дважды)

Слава: Бо́га пло́тию Де́во родила́ еси́, из чи́стых Твои́х, Чи́стая, крове́й Ма́ти, Спа́са избавля́ющаго вся́ от лю́тых, пою́щыя Тя́, Отрокови́це Богоблагода́тная.

И ныне: Священноде́йствует Боже́ственному рождеству́ Твоему́, Богоро́дице Чи́стая, невеще́ственных естество́, и челове́ков собра́ние любо́вию Тя́ пое́т: Твои́м сия́нием на́с озари́.

Пе́снь 5

Ирмо́с: К Тебе́ у́тренюю, милосе́рдия ра́ди себе́ истощи́вшему непрело́жно, и до страсте́й безстра́стно прекло́ньшемуся, Сло́ве Бо́жий, ми́р пода́ждь ми́ па́дшему, Человеколю́бче.

Ле́ствица я́вльшися обра́зно Иа́кову, к высоте́ превзя́тая, Твоего́, Богоневе́стная, яви́ рождества́ вои́стинну изря́дное: Тобо́ю бо вои́стинну на́м Бо́г споживе́ схожде́нием Боже́ственным, и Живо́т подаде́ челове́ком. (Дважды)

Слава: Изба́вльшеся Тобо́ю прама́терния печа́ли, Богороди́тельнице, утеше́ния испо́лнени бы́хом, весе́лие все́м ро́ждшая, и всеми́рную ра́дость: те́мже, Всепе́тая, Твоя́ песносло́вцы от бе́д Твои́ми моли́твами соблюди́.

И ныне: Та́йно научи́мь Твоему́ богови́дне Моисе́й о́бразу, предзря́ше купину́ неопали́мую огне́м, Де́во Всенепоро́чная: в Тя́ бо Созда́тель все́лься, не опали́ Тя вы́шшую все́х творе́ний, Богоневе́стная.

Пе́снь 6

Ирмо́с: Я́т бы́сть, но неудержа́н в пе́рсех ки́товых Ио́на: Тво́й бо о́браз нося́, Страда́вшаго и погребе́нию да́вшагося, я́ко от черто́га от зве́ря изы́де: приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Зако́ннии Тя́ о́брази, Богоро́дице, и прорече́ние я́ве проро́ков явля́ху, иму́щую роди́ти ми́ру Изба́вителя, и Благоде́теля всея́ тва́ри, многоча́стно и многообра́зно благоде́йствовавшаго, ве́рою и любо́вию, Влады́чице Чи́стая, славосло́вящих Тя́. (Дважды)

Слава: Устрани́вшыяся дре́вле от пре́лести человекоуби́йцы врага́, Бо́жия первозда́нныя пи́щи ра́йския, еди́на Богороди́тельнице, па́ки возвела́ еси́ к раю́ ро́ждши Спа́са Го́спода, распя́тие и погребе́ние Боже́ственною вла́стию претерпе́вшаго.

И ныне: И́же во́лею Боже́ственною, и си́лою соде́тельною Свое́ю, вся́ от не су́щих составле́й, Чи́стая, про́йде от твои́х ложе́сн и Бо́г и челове́к: и и́же во тьме́ неве́дения пре́жде су́щыя, сия́ньми Боже́ственными, Влады́чице Чи́стая, све́тло озари́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Неизрече́нное чу́до, в пещи́ изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Преукра́шенну Тя́, иму́щую позлаще́нное, Богома́ти, украше́ние благоле́пное, восхоте́ Тво́й Сы́н же и Госпо́дь, во спасе́ние на́с вопию́щих Ти́: пло́д Тво́й, Чи́стая, благослове́нный. (Дважды)

Слава: Ши́пок посреде́ те́рний обре́т, Пречи́стая, Влады́ка, испо́лни на́с благоуха́ньми Твои́ми кра́сными благода́тей духо́вных, вопию́щыя ему́ во умиле́нии: Изба́вителю Бо́же, благослове́н еси́.

И ныне: Зна́мения вси́ Твои́ Боже́ственнии проро́цы ви́девше Твоего́ Боже́ственнаго Рождества́, сла́вно вопия́ху, Чи́стая: Бо́г прии́дет от Де́вы, е́же спасти́ вопию́щыя: Изба́вителю Бо́же, благослове́н еси́.

Пе́снь 8

Ирмо́с: Ужасни́ся боя́йся не́бо, и да подви́жатся основа́ния земли́: се́ бо в мертвеце́х вменя́ется в Вы́шних Живы́й, и во Гро́б ма́л странноприе́млется: Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Боже́ственному Дании́лу ны́не предви́дена была́ еси́ несеко́мая гора́: из Тебе́ бо, Отрокови́це, ка́мень отсече́ся Христо́с: Еди́н бо Де́во, кроме́ руки́ челове́ческия. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки. (Дважды)

Слава: Пе́сньми Рождество́ Твое́, Чи́стая, при́сно сла́вят го́рнии во́ини, и Тебе́ же, Отрокови́це Присноде́во, ра́достно с на́ми я́ко Богома́терь воспева́ют, ю́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

И ныне: Све́та Твоего́ заря́ми, Тя́ му́дрствующыя ны́не Богоро́дицу и́стинную, Мари́е, светоза́рны соде́лай, Богороди́тельнице Чи́стая: Све́та бо селе́ние яви́лася еси́, Де́во, ве́рою Ти́ вопию́щым: ра́дуйся благослове́нная и препросла́вленная во вся́ ве́ки.

Пе́снь 9

Ирмо́с: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бо́г, ве́рою и любо́вию Тя́ велича́ющыя.

Ра́дости на́м ве́чныя и жи́зни яви́лася еси́, преесте́ственне Богороди́тельнице, Хода́таица, Чи́стая, Спа́са все́х ро́ждшая, от лица́ земна́го вся́ку сле́зу я́ве оте́мшаго, и все́м ра́дость пода́вшаго. (Дважды)

Слава: Поя́ Дави́д Тво́й Пра́отец, ковче́г Тя́ прорече́ знамена́тельне: и Боже́ственныя ма́нны злату́ю ру́чку, Моисе́й, Богоро́дицу: и́бо Еди́на вмести́ла еси́ и́же в не́дрех Отчих Су́ща при́сно, Богоро́дице. Те́мже Тя́ пе́сньми сла́вим.

И ныне: Я́ко вои́стинну превы́шши всея́ тва́ри еси́: Бо́га бо все́х родила́ еси́ пло́тию. Те́мже Тя́ предста́тельницу и́мамы, Влады́чице, и наде́жду изве́стну, и сте́ну тве́рду, Тобо́ю спасе́ние улучи́ти наде́ющеся.

Молитва

К кому́ возопию́, Влады́чице? К кому́ прибе́гну в го́рести мое́й, áще не к Тебе́, Цари́це Небе́сная? Кто плач мой и воздыха́ние мое прии́мет, áще не Ты, Пренепоро́чная, наде́ждо христиа́н и прибе́жище нам, гре́шным? Кто пáче Тебе́ в напáстех защити́т? Услы́ши у́бо стена́ние мое́, и приклони́ у́хо Твое́ ко мне, Влады́чице Мáти Бо́га моего́, и не пре́зри мене́, тре́бующаго Твоея́ по́мощи, и не отри́ни мене́, гре́шнаго. Вразуми́ и научи́ мя, Цари́це Небе́сная; не отступи́ от мене́, раба́ Твоего́, Влады́чице, за ропта́ние мое́, но бу́ди мне Мáти и засту́пница. Вручáю себе́ ми́лостивому покро́ву Твоему́: приведи́ мя, гре́шнаго, к ти́хой и безмяте́жной жи́зни, да плáчуся о гресе́х мои́х. К кому́ бо прибе́гну пови́нный аз, áще не к Тебе́, упова́нию и прибе́жищу гре́шных, наде́ждою на неизрече́нную ми́лость Твою́ и щедро́ты Твоя́ окриля́емь? О, Влады́чице Цари́це Небе́сная! Ты ми уповáние и прибе́жище, покро́в и заступле́ние и по́мощь. Цари́це моя́ преблага́я и ско́рая засту́пнице! Покры́й Твои́м хода́тайством моя́ прегреше́ния, защити́ мене́ от враг ви́димых и неви́димых; умягчи́ сердца́ злых челове́к, возстаю́щих на мя. О, Мáти Го́спода моего́ Творцá! Ты еси́ ко́рень де́вства и неувяда́емый цвет чистоты́. О, Богороди́тельнице! Ты подáждь ми по́мощь немощству́ющему плотски́ми страстьми́ и боле́знующему се́рдцем, еди́но бо Твое́ и с Тобо́ю Твоего́ Сы́на и Бо́га на́шего и́мам заступле́ние; и Твои́м пречу́дным заступле́нием да избáвлюся от вся́кия беды́ и напа́сти, о Пренепоро́чная и Пресла́вная Бо́жия Мáти Мари́е. Те́мже со упова́нием глаго́лю и вопию́: ра́дуйся, благода́тная, ра́дуйся, обра́дованная; ра́дуйся, преблагослове́нная, Госпо́дь с Тобо́ю.