Канон Пресвятой Богородице, глас 4.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

И́н кано́н пресвяте́й Богоро́дице. Гла́с 4.

Пе́снь 1

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Припев: Пресвятая Богородице, спаси нас.

Ты́ Еди́на заступле́ние, и прибе́жище, и храни́тельница еси́ рабо́м Твои́м, Богороди́тельнице Чи́стая. Сего́ ра́ди припа́дающе вопие́м Ти́: спаси́ на́с, Влады́чице, милосе́рдием Твои́м.

Освяти́, Влады́чице, оскверне́нное се́рдце мое́, Я́же Пресвято́е Сло́во ро́ждшая, и су́щи все́х святе́йшая вы́шних си́л, Отрокови́це Всенепоро́чная.

Слава: Па́дших воззва́ние, и стоя́щих еси́ утвержде́ние, Всенепоро́чная. Те́мже молю́ся Ти́: па́дший мо́й у́м грехо́м испра́ви, Влады́чице, да сла́влю Тя́.

И ныне: Ме́ртва мя́ скорбьми́ и неде́йственна лежа́ща, ру́ку просте́рши по́мощи Твоея́ возста́ви, и Боже́ственнаго весе́лия испо́лнена покажи́ мя, Богороди́тельнице.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшыя духо́вно утверди́ в Боже́ственней Твое́й сла́ве венце́в сла́вы сподо́би.

Поми́луй, Пречи́стая Де́во, в пучи́не жите́йстей лю́те мя́ потопля́ема, и ко приста́нищу ти́хому спасе́ния испра́ви: Тя́ бо еди́ну наде́жду стяжа́х.

Ума́ моего́ тьму́ разори́, Богоро́дице, све́том и́же в Тебе́ я́ко Бла́га, и молю́ся: покая́ния мя́ о́бразы утверди́, я́ко ще́дра, и многоми́лостива, да спаса́ем ублажа́ю Тя́.

Слава: Кропле́нием ми́лости Твоея́, Де́во Богора́дованная, у́глие погаси́ мои́х страсте́й: и уга́сший свети́льник се́рдца моего́ возжзи́, златы́й све́щнице, Всенепоро́чная.

И ныне: Боля́щую лю́те страстьми́ окая́нную мою́ ду́шу, Богороди́тельнице, я́ко ми́лостивая посети́, и спаси́ мя моли́твами Твои́ми: я́ко да живо́т лу́чший получи́в велича́ю Тя́.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Неизсле́дный Бо́жий сове́т, е́же от Де́вы воплоще́ния, Тебе́ Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Я́же всенепоро́чная Ма́ти Бо́жия, возсия́й ми́ покая́ния зарю́, разруши́ мра́к окая́нныя моея́ души́, и лука́вая помышле́ния се́рдца моего́ отжени́, Де́во.

Я́же благопреме́ннаго и благоуве́тливаго, Пречи́стая, Влады́ку ро́ждши, Де́вома́ти, я́ко блага́я, о на́с Того́ моли́ всегда́, от чужда́го изба́вити на́с.

Слава: Тя́ очисти́лище все́х челове́ков, ве́рою молю́ и прошу́, Благослове́нная: ми́лостива мне́ Судию́ Сы́на Твоего́ сотвори́, я́ко да во хвале́нии сла́влю Тя́.

И ныне: Име́я Тя́, Пречи́стая, помо́щницу всегда́ никого́ убою́ся, или́ устрашу́ся: кто́ же ли хотя́ ско́рбная принести́ рабу́ Твоему́, и не устраши́тся?

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо Неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющым Тя́ ми́р подава́ющая.

Умерщвле́н страстьми́ и скве́рнами, Всенепоро́чная, к щедро́там Твои́м прибега́ю, и к те́плому Твоему́ притека́ю, Влады́чице, покро́ву и по́мощи: жи́знь еди́на ро́ждшая, се́рдце мое́ оживи́.

Просвети́ омраче́нное мое́ се́рдце, Пречи́стая, я́же светода́вца ро́ждшая, Бо́га вку́пе и челове́ка: Его́же я́ко ма́ти умоли́, пода́ти ми́ избавле́ние, Госпоже́, пре́жде стра́шнаго дне́.

Слава: Ума́ моего́ уврачу́й сокруше́ния, Всенепоро́чная, исцели́ стра́сти души́ моея́, и уны́ния тьму́ отжени́: я́ко да во хвале́нии Тя́ пою́ Присноблаже́нную, Богоро́дице Всепе́тая.

И ныне: Низложи́, Влады́чице, враго́в мои́х шата́ния: Тя́ бо еди́ну и́мам предста́тельницу и наде́жду, и по́мощь кре́пкую, Ты́ мя соблюди́, Чи́стая, вся́каго избавля́ющи мя́ те́х нахожде́ния.

Пе́снь 6

Ирмо́с: Возопи́, прообразу́я погребе́ние тридне́вное, проро́к Ио́на в ки́те моля́ся: от тли́ изба́ви мя́, Иису́се Царю́ Си́л.

Возсия́й ми́ покая́ния зарю́, Влады́чице, и о́блаки злы́х помышле́ний мои́х разори́, о́блаче Со́лнца Пра́веднаго Присноде́во.

Утоли́ страсте́й мои́х свире́пую во́лну, и бу́рю злы́х помышле́ний укроти́, приста́нище вели́кое обурева́емых Присноде́во.

Слава: Напо́й мя́ умиле́ния питие́м, Влады́чице, сле́з ре́ки мне́ ны́не подаю́щи: и́миже угашу́ пла́мень ве́чнующий, Еди́на Всепе́тая.

И ныне: Изсуша́ющи зо́л мои́х свире́пую пучи́ну, ро́ждшая бла́гости вои́стинну пучи́ну, наста́ви мя́ ко приста́нищу Боже́ственныя во́ли.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди Бо́же оте́ц на́ших, благослове́н еси́.

Любо́вию притека́ю мно́гою под святы́й Тво́й покро́в, не отврати́ мене́ тща́: но да́ждь ми́, Пречи́стая, оставле́ние прегреше́ний, и спаси́ мя, да ви́девше врази́ мои́ посра́мятся.

Не убою́ся зла́, Ты́ бо со мно́ю еси́, Де́во: пожену́ враги́, я́же неща́дно мене́ гоня́щыя, и побежду́ си́лою Твое́ю укрепля́ем, Мари́е Богороди́тельнице.

Слава: И́маши е́же мощи́ при́сно все́х, я́ко ро́ждши Влады́ку, влады́чествия мя́ сла́стнаго и страсте́й свободи́, да пою́ ра́дуяся: ра́дуйся, престо́ле вы́шняго, Благослове́нная.

И ныне: Тя́ еди́ну покрови́тельницу и́мам на земли́ Тво́й ра́б, и по́мощь вои́стинну спаси́тельную и тве́рдую, Пречи́стая, богопросла́вленная: и к Тебе́ прибега́ю, спаси́ мя от се́тей ловя́щих, Богороди́тельнице.

Пе́снь 8

Ирмо́с: О́троки благочести́выя в пещи́ Рождество́ Богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Блу́дно житие́ ижди́в, и вся́кую нечистоту́ соде́лав, трепе́щу суди́ща, трепе́щу истяза́ния, трепе́щу и отве́та осужде́ния моего́, Чи́стая: я́же судию́ ро́ждшая, предста́ни ми́ тогда́, и изба́ви мя́ ну́жды.

На Тя́ всю́ наде́жду спасе́ния моего́ возложи́х, Богома́ти неискусобра́чная, и Тебе́ на по́мощь призыва́ю всегда́: спаси́ мя от печа́лей и напа́стей врага́, и разреши́ плени́цы зо́л мои́х, и ве́чныя тьмы́ исхити́ мя.

Слава: В ча́с, Де́во, конца́ моего́ руки́ бесо́вския мя́ исхити́, и суда́ и пре́ния, и стра́шнаго испыта́ния, и мыта́рств го́рьких, и кня́зя лю́таго, Богома́ти, и ве́чнаго осужде́ния.

И ныне: Соблюди́ раба́ Твоего́, Де́во, от вся́каго наве́та чужда́го, Тя́ бо и́мам Влады́чице, покро́в и заступле́ние, прибе́жище и утвержде́ние: и Тебе́ ра́ди ча́ю изба́витися се́тей врага́, еди́на Предста́тельнице ро́да челове́ческаго.

Пе́снь 9

Ирмо́с: Вся́к земноро́дный да взыгра́ется Ду́хом просвеща́ем, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, я́же ра́дость ро́ждшая, Пречи́стая, су́щым на земли́ вои́стинну. Ра́дуйся, спаси́тельное приста́нище, и покро́ве притека́ющих к Тебе́. Ра́дуйся, ле́ствице чи́стая, возвы́сившая па́дших. Ра́дуйся, всеблаже́нная Богоро́дице, упова́ние душа́м на́шым.

Разруши́ па́жить греха́ моего́, оскверне́нныя моея́ души́ и телесе́, Богора́дованная Пречи́стая Влады́чице, си́льною моли́твою Твое́ю, о Всенепоро́чная, исцеле́ние да́вши спаси́тельное, Влады́чний стра́х Боже́ственный.

Слава: Ты́ мне́ просвеще́ние, Ты́ ми́ избавле́ние и ра́дование, Ты́ побо́рница моя́, Ты́ моя́ сла́ва и похвала́, и ча́яние спасе́ния моего́ еси́, Всенепоро́чная, и Тебе́ ве́рно покланя́юся, и вопию́ Ти: спаси́ мя окая́ннаго раба́ Твоего́, и от вра́т а́довых исхити́ мя.

И ныне: Спаси́ мя́, Чи́стая, Спа́са ро́ждшая и всеще́драго, уще́дри мя́ раба́ Твоего́, и к покая́ния пути́ наста́ви: лука́ваго собла́зны от среды́ отжени́, и того́ ловле́ния изба́ви мя́ и огня́ ве́чнаго, Пренепоро́чная, исхити́ мя́.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.