Канон Пресвятой Богородице, глас 3.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Други́й кано́н Пресвяте́й Богоро́дице, гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: тому́ еди́ному пои́м, я́ко просла́вися.

Припев: Пресвятая Богородице, спаси нас.

Очище́ние ми́ пода́ждь прегреше́ний, Боже́ственными Твои́ми мольба́ми, Де́во: си́льну бо и́маши моли́тву, Пречи́стая, и Тебе́ чту́щыя избавля́еши от согреше́ний, и страсте́й, и скорбе́й, и обстоя́ний.

Вода́ми моли́тв Твои́х, Де́во, иста́явшую зно́ем безме́рных мои́х согреше́ний и страсте́й, ороси́ ду́шу мою́ смире́нную: я́ко да прохлажде́ние Боже́ственно улучи́в, пе́сньми Тя́ велича́ю, я́ко предста́тельницу те́плую.

Слава: Всего́ погружа́ема грехми́ и всего́ отча́янна мя́ су́ща, Ты́, Чи́стая Влады́чице, милосе́рдия Твоего́ ру́ку просте́рши, к покая́ния мя́ высоте́ привлецы́, подаю́щи ми́ исто́чник сле́з.

И ныне: Раздери́, Пречи́стая, грехо́вное рукописа́ние мои́х прегреше́ний Твои́ми моли́твами, я́ко иму́щи к Сы́ну Твоему́ дерзнове́ние за ны́ моли́ти приле́жно: Тя́ бо еди́ну и́мамы Христиа́не засту́пницу.

Пе́снь 3

Ирмо́с: И́же от не су́щих вся́ приведы́й сло́вом созида́емая, соверша́емая ду́хом, Вседержи́телю Вы́шний, в любви́ Твое́й утверди́ мене́.

Благоутро́бия милосе́рдия Твоего́, молю́ся, отве́рзи ми́ вско́ре, Богоро́дице Пречи́стая, и те́плая мне́ яви́ся во искуше́ниих помо́щница, и спасе́ние.

Изба́ви мя́ от вся́кия содержа́щия лю́тыя грехо́вныя бу́ри, раба́ Твоего́, Пречи́стая, и ко спаси́тельному мя́ приста́нищу напра́ви, моли́твами Твои́ми.

Слава: Спаси́ мя, Ма́ти Де́во Чи́стая, от страсте́й мои́х му́тных слия́ний, и обходя́щих ны́не смире́нную мою́ ду́шу, и оскорбля́ющих.

И ныне: Сле́з ту́чу пода́ждь ми́, Блага́я, и си́ми угаси́ страсте́й мои́х пе́щь, и вся́кия омы́й душе́вныя моя́ скве́рны, Богоро́дице.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Всю́ на Тя́ наде́жду возложи́х, Влады́чице, молю́ся припа́дая от души́: смертоно́сныя изба́ви боле́зни, к жи́зни спасе́ния возводя́щи мя́, я́же жи́знь ро́ждшая.

Влады́чице Чи́стая, кре́пкая ми́ру помо́щница, не отве́ржи мене́ от себе́, ниже́ посра́млена отсле́ши мя́ от лица́ Твоего́, ниже́ бесо́м покажи́ мя обра́дование.

Слава: Ве́сь обнаже́н бы́х окая́нный Боже́ственных де́л, и уязви́хся сласте́й о́стрыми стрела́ми, и острупле́н бы́х. Те́мже вопию́ Ти, Влады́чице: спаси́ мя, Пречи́стая.

И ныне: Приидо́ша, Чи́стая, безме́стных дея́ний во́ды до окая́нныя моея́ души́, и по́мыслы бре́нными одержи́мь, вопию́ Ти с боле́знию: не пре́зри, Влады́чице, раба́ Твоего́.

Пе́снь 5

Ирмо́с: Я́ко ви́де Иса́иа обра́зно на Престо́ле превознесе́на Бо́га, от А́нгел Сла́вы дориноси́ма, о окая́нный, вопия́ше, а́з: прови́дех бо воплоща́ема Бо́га, Све́та Невече́рня, и ми́ром влады́чествующа.

Виногра́де Боже́ственный, и́же кра́сный гро́зд прозя́бшая, и душа́м подаю́щ питие́ Боже́ственное, Де́во, напое́ния го́рькаго, и пия́нства страсте́й, и сласте́й изба́ви ду́шу мою́, и огня́ ве́чнаго.

Тиме́ния исто́ргни мя́ грехо́в, Пречи́стая Богоневе́сто, па́дшаго в ка́л страсте́й: и струя́ми моли́тв Твои́х омы́вши мя́ страсте́й скве́рн, ри́зою спасе́ния светови́дною одежи́.

Слава: Я́же ми́рови ми́р, и спасе́ние все́м пода́вшая, я́ко Боже́ственный ми́р поро́ждши, Де́во Чи́стая, настоя́щую бра́нь страсте́й души́ моея́ и те́ла умири́, стра́хом и любо́вию Спа́са Христа́.

И ныне: Боле́вшую ду́шу мою́ грехми́, Пречи́стая, исцели́ Твои́м милосе́рдием, и сподо́би наставля́ющи мя́ твори́ти во смире́нии Сы́на Твоего́ повеле́ния при́сно, я́ко да восприиму́ Сего́ бла́гость.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя упра́вителю спаси́.

Избавле́ние прегреше́ний пода́ждь я́ко блага́я, Твоему́ рабу́, Пречи́стая, Твоего́ заступле́ния прося́щему с ве́рою, и бу́дущаго мя́ суда́ исхити́.

Влады́чице и Ма́ти Изба́вителя, Ты́ предста́ни ми́ в ча́с исхо́да моего́, истяза́ему мне́ от возду́шных духо́в, о я́же несмы́сленною мы́слию соде́ях.

Слава: Окая́нен яви́хся ве́сь а́з, нечистота́ми всегда́ объя́т: и прозря́ ны́не созади́ ногу́ мое́ю сме́рть, взыва́ю Ти́, Богоро́дице, помози́ ми.

И ныне: Во́лны стра́стных помышле́ний, всегда́ мя́ смуща́ют, Пречи́стая, и лука́вых духо́в бу́ря погружа́ет мя́: но утверди́ на ка́мени безстра́стия.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́: благослове́н еси́, взыва́ющыя, Бо́же оте́ц на́ших.

Тебе́ Ма́тери Бо́жии, чи́стей и непоро́чней молю́ся, оскверне́нный те́лом и душе́ю, и окаля́нный дея́нии нечи́стыми, и наде́юся, Влады́чице, на ми́лость Твою́, Ты́ мя уще́дри, Пречи́стая.

Прегреше́ний мои́х мно́жество, и злы́х испыта́ние, недоуме́нием мя́ препира́ет зело́, и во отча́яния влече́т глубину́: Пречи́стая Влады́чице, спаси́ мя погиба́ющаго, и лю́те потопля́ема.

Слава: Поми́луй, Блага́я, смири́вшуюся ду́шу мою́ лука́выми дея́ньми, и к покая́ния мя́ пути́ наста́ви, и твори́ти хоте́ния Твоего́ Сы́на испра́ви, и от му́ки изба́ви.

И ныне: Мно́жеством щедро́т Твоея́ бла́гости, грехо́в на́ших мно́жество пре́зри, Блага́я, и благопремени́тельна бу́ди, немо́лчно зову́щым: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: В пла́мень ко отроко́м евре́йским снизше́дшаго, Бо́жиею си́лою, и я́вльшагося Го́спода, свяще́нницы благослови́те, и превозноси́те во вся́ ве́ки.

Сласте́й го́ресть, чу́вства вся́ теле́сная проше́дши, ду́шу мою́ безме́стно окаля́ет, и в сме́рть влече́т: Влады́чице ми́ра, бу́ди ми́ спасе́ние.

На Тя́ возложи́х, Влады́чице, се́рдце, и ду́шу, и те́ло: не и́мам бо ины́я наде́жди, ра́зве Тебе́, е́юже получу́ ми́лость. Те́мже пода́ждь ми́ бога́тую Твою́ благода́ть.

Слава: Зми́й мне́ я́дом приползе́, и плотско́ю сла́достию окая́нную ду́шу мою́ лю́те умори́: но оживи́ сию́ сопроти́вными лечьба́ми, Чи́стая, Твои́ми моли́твами.

И ныне: Лю́тая мя́ но́щь покрыва́ет прегреше́ний, Свята́я Влады́чице: не и́мам бо свещи́, ду́шу просвеща́ющия благодея́ния еле́ем. Те́мже из черто́га изрину́хся вы́шняго.

Пе́снь 9

Ирмо́с: Тебе́ неопали́мую купину́, и святу́ю Де́ву, Ма́терь Све́та, и Богоро́дицу, наде́жду все́х на́с, велича́ем.

Скве́рну стра́стных помышле́ний моего́ ума́ очи́стивши, Чи́стая, безстра́стия све́тлою ри́зою одежи́ мя.

Отве́рзи ми́ Боже́ственныя вхо́ды покая́ния, Де́во, вхо́ды страсте́й и сласте́й мои́х загражда́ющи, и возбраня́ющи си́лою Твое́ю.

Слава: Услы́ши гла́с стена́ния моего́, и гла́с пла́ча моего́, Де́во Всенепоро́чная, и пода́ждь очище́ние и спасе́ние окая́нней мое́й души́.

И ныне: Ве́сь отча́яхся окая́нный, и недоуме́юся, помышля́я лука́вая моя́ дея́ния: ту́не уще́дри, Влады́чице. И спаси́ мя.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.