Канон Пресвятой Богородице, глас 2.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Други́й кано́н Пресвяте́й Богоро́дице. Гла́с 2.

Пе́снь 1

Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския: я́ко просла́вися.

Припев: Пресвятая Богородице, спаси нас.

Я́же Исто́чник безстра́стия ро́ждшая, уя́звленаго мя́ страстьми́, Отрокови́це, исцели́, и огня́ ве́чнаго исхити́, Еди́на Богора́дованная.

Теле́сных неду́г изба́ви мя́, и души́ моея́ исцели́ безме́стныя стра́сти: и огня́ ве́чнаго исхити́ мя, Еди́на Богоблагода́тная.

Слава: Под Твою́ ны́не прибега́ю бла́гость, Де́во Ма́ти Пречи́стая, изба́ви раба́ Твоего́ душе́вных боле́зней, и страсте́й душетле́нных, и ве́чнаго огня́.

И ныне: Ты́, Влады́чице, мое́ те́плое очисти́лище, к Тебе́ прири́щу и спаса́юся, и приобрета́ю душе́вное спасе́ние: мо́жеши бо все́х спасти́, я́ко Ма́ти су́щи Бо́га.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́. Возвесели́ бо ся ду́х мо́й внегда́ пе́ти: не́сть свя́т, я́коже Бо́г на́ш, и не́сть пра́веден па́че Тебе́, Го́споди.

Родила́ еси́ безнача́льнаго Царя́, из Тебе́, Де́во Ма́ти, пло́ть прие́мша: того́ у́бо я́ко Человеколю́бца моли́, спасти́ раба́ Твоего́ от вся́кия ско́рби, и бу́дущаго осужде́ния.

Разори́ недоуме́ние се́рдца моего́, я́звы исцели́, и гное́ния отжени́ Боже́ственною Твое́ю си́лою: и умиле́ния струю́ пода́ждь ми́, я́же исто́чник ро́ждши присноживо́тный.

Слава: Боле́вшую ду́шу мою́ бесо́вскими напа́стьми и уны́нием, Богороди́тельнице, исцели́: и сле́зы покая́ния да́ждь се́рдцу моему́, и Влады́ки моего́ стра́х всади́ в не́м, Пречи́стая.

И ныне: Ле́ностию жи́знь мою́ ижди́в, и страстьми́ се́рдце мое́ оскверни́в, прихожду́ к Тебе́, Влады́чице, умиле́нием души́, и молю́ся: уще́дри и спаси́ мя, покая́ния мя́ о́бразы утвержда́ющи.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Пою́ Тя, слу́хом бо Го́споди услы́шах, и ужасо́хся: до мене́ бо и́деши, мене́ ищя́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Пою́ Тя вои́стинну, Всепе́тая, препе́таго Бо́га сло́во па́че естества́ ро́ждшую: и молю́ся, смире́нныя души́ моея́ боле́зни исцели́, и от лю́таго мя́ изба́ви осужде́ния.

Обы́чно на ны́ бога́тыя Твоея́ ми́лости Де́во ороша́й, неду́ги уставля́ющи, стра́сти разруша́ющи разли́чныя души́: те́мже разреши́ се́рдца моего́ плени́цы грехо́вныя, и боле́зней мно́гих.

Слава: Оскверни́х ду́шу мою́ страстьми́: чисте́йшее Ты́ бы́вши пречи́стому жили́ще, очи́сти, Богороди́тельнице, к све́ту покая́ния наставля́ющи мя́, и огня́ бу́дущаго изъима́ющи.

И ныне: Ум мо́й, Пречи́стая Влады́чице, просвети́, молю́ся Тебе́. Во́лны утиши́ стра́стнаго се́рдца моего́, плотска́я хоте́ния потребля́ющи, и ко приста́нищу Боже́ственному приводя́щи:

Пе́снь 5

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю Царю́ ми́ра, просвети́ мя сия́нием Твои́м: ино́го бо ра́зве Тебе́ Бо́га не зна́ю.

Наве́ты и ловле́ньми льсти́ваго, умерщвле́наго оживи́ мя, Всенепоро́чная Влады́чице Богоро́дице, я́же ро́ждши жи́знь все́х ипоста́сную: да Тя́ пою́ благоче́стно Всепе́тую.

Я́же А́гнца и па́стыря, я́вльшися Де́во Ма́ти, упаси́ мя нра́вом заблужде́ннаго, и десны́м мя́ сочета́тися овца́м, в де́нь су́дный сподо́би: я́ко да Твою́ благода́ть пою́ спаси́тельную.

Слава: От страсте́й омраче́ния, от собла́зн прибыва́ющих напа́стьми чужда́го, бу́дущих же му́к ве́чных согреша́ющым, изба́ви мя́, Отрокови́це, Твои́ми мольба́ми, молю́ся.

И ныне: Неве́сто Бо́жия, в ню́же всели́ся еди́но Боже́ственное сло́во, всю́ просвеща́ющее вселе́нную, возсия́й ми́ зарю́ и́стиннаго покая́ния: озари́ мне́ спаси́тельныя лучы́, разоря́ющи страсте́й мои́х тьму́ Твои́ми мольба́ми, молю́ся.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Ны́не к Тебе́ прибега́ю, Препе́тая, спаси́ мя моли́твами Твои́ми и соблюди́: ели́ка бо хо́щеши, и мо́жеши я́ко Ма́ти вся́ укрепля́ющаго.

Обурева́ема бу́рею печа́лей, и потопля́ема настоя́ньми треволне́ния, спаси́ мя, Богоро́дице Де́во, раба́ Твоего́.

Слава: Милосе́рдия Твоего́ сподо́би мя́, немилосе́рдием и зло́бою одержи́маго, и томле́ний предлежа́щих и огня́ ве́чнаго исхити́ мя.

И ныне: Грехи́ ми́ра взе́млющаго, Пречи́стаго А́гнца заче́нши родила́ еси́, Всенепоро́чная, грехо́в проще́ние дарова́ти ми́, моля́щися Ему́ не преста́й.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, сы́й благослове́н и препросла́влен.

Живо́т ипоста́сный на́м ро́ждши, сме́ртию сме́рть я́ве погу́бльший, стра́сти умертви́ се́рдца моего́, и исто́чник сле́з пода́ждь ми́, Чи́стая: я́ко да при́сно сла́влю Тя́.

Наде́жда непосты́дная, упова́ние изве́стное, и стена́ необори́мая, покро́в же и помо́щница бу́ди мне́, Всенепоро́чная, упова́ющему на Тя́: и к све́ту наста́ви, Чи́стая, покая́ния и умиле́ния.

Слава: Изба́витися рабу́ Твоему́ вся́кия зло́бы бесо́вския и печа́ли, и осужде́ния, и ве́чнаго огня́, Сы́на Твоего́ умоли́: я́ко да ве́рою при́сно сла́влю Тя́.

И ныне: Пречи́стое зача́тие, и нетле́нное Рождество́, Ты́ еди́на показа́ла еси́, Де́ва пребы́вши: Христа́ бо заче́нши, Чи́стая, над все́ми Бо́га, Челове́ка бы́вша, ве́рным на спасе́ние и избавле́ние.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Прибе́жище христиа́ном и помо́щнице, в лю́тых одержи́ма мя́, Пречи́стая Де́во, не пре́зри, беда́ми обходи́маго всегда́, и мно́гими устремле́нии лука́вых бесо́в.

Не забу́ди гла́са моли́твенник Твои́х, Предста́тельнице стра́шная, но от вся́кия боле́зни, и от вся́каго преще́ния мольба́ми Твои́ми исхити́: преклоня́ет бо Бо́га Твоя́ ма́терняя моли́тва.

Слава: Утоли́ страсте́й мои́х лю́тую ны́не бу́рю, Чи́стая благослове́нная: и победи́, Отрокови́це, неща́дно на мою́ нищету́ напа́дающих, вся́ враги́ безпло́тныя, я́ко да ве́рою пою́ Тя.

И ныне: От пе́щи искуше́ний, от пла́мене грехо́в и огня́ страсте́й и гее́нны, и бесо́вскаго наше́ствия, в ча́с сконча́ния исхити́ мя́ еди́на Богороди́тельнице, предста́тельнице ве́рных.

Пе́снь 9

Ирмо́с: Безнача́льна роди́теля Сы́н, Бо́г и Госпо́дь, вопло́щься от Де́вы на́м яви́ся, омраче́нная просвети́ти, собра́ти расточе́нная. Те́м всепе́тую Богоро́дицу велича́ем.

Человеколю́бца Го́спода Еди́наго Многоми́лостиваго, па́че ума́ же и сло́ва родила́ еси́: того́ моли́, Де́во, в ча́с стра́шный суда́ изба́вити раба́ Твоего́ огня́ ве́чнаго.

На́м пою́щым Тя́, и ве́рою сла́вящым, и к Боже́ственному Твоему́ покро́ву при́сно притека́ющым, пода́ждь с небесе́ разреше́ние лю́тых, и му́чащих страсте́й, Богоневе́сто, и му́ки и суда́ изба́ви.

Слава: Красе́н в виде́нии, во вкуше́нии же горча́йший, и́же мене́ умори́вый греха́ пло́д, его́же напита́хся в сы́тость, стра́шнаго ча́ю суда́, от него́же мя́ исхити́, Пресвята́я Де́во Ма́ти.

И ныне: Ублажи́, Пречи́стая, смире́нное се́рдце мое́, озло́бленное сластны́ми затво́ры, я́ко Благо́му Роди́тельница, и блага́ су́щи вся́: и к покая́нию мя́ благи́х двере́й введи́.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.