Канон Пресвятой Богородице, глас 1.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

Слава, И ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

И́н кано́н пресвяте́й Богоро́дице. Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Припев: Пресвятая Богородице, спаси нас.

Я́же еди́на безле́тнаго Бо́га в ле́то ро́ждши воплоще́нна, всесвята́я Пречи́стая, вселе́тныя стра́сти преокая́нныя моея́ души́ исцели́.

Стру́пы души́ моея́, и се́рдца недоуме́ние, помышле́ний омраче́ние, и у́мное побежде́ние потреби́ Пречи́стая, я́ко ми́лостивая, Твои́ми моли́твами.

Слава: Я́же све́т ро́ждшая изба́вителя моего́, тьмы́ и му́к ве́чных изба́ви мя́ пречи́стая: я́ко да спаса́емь воспева́ю благоутро́бие Твое́.

И ныне: В пучи́не лю́тых, и в молве́ страсте́й потопля́емь е́смь а́з, Твою́ Пречи́стая призыва́ю тишину́: спаси́ мя, приста́нище бо еси́ ве́рных.

Пе́снь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е, и основа́вый на вода́х зе́млю, Всеси́льне.

Непло́дныя мы́сли моея́ безпло́дие все́ потреби́, и плодоно́сну доброде́тельми ду́шу мою́ покажи́, пречи́стая Богоро́дице, ве́рным помо́щнице.

Изба́ви мя́ Всенепоро́чная, вся́каго обстоя́ния, мно́гих собла́зн змие́вых, и ве́чнаго огня́, и тьмы́, я́же све́т ро́ждшая преве́чный.

Слава: Стра́шным суди́щем чи́стая, и огне́м о́нем неугаси́мым, и отве́том лю́тым ве́сь осужде́н е́смь: потщи́ся спасти́ мя Влады́чице Пречи́стая, раба́ Твоего́.

И ныне: Да обожи́т челове́чество, Бо́г бы́сть челове́к из Тебе́ Де́во Чи́стая, па́че сло́ва и смы́сла: сего́ ра́ди Тя́ согла́сно вси́ ве́рнии ублажа́ем.

Тропарь, глас 2.

Моле́ние те́плое и стенá необори́мая, / ми́лости исто́чниче, мирови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.

Пе́снь 4

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

Де́во Богоро́дице, нескве́рная се́не, оскверне́на мя́ прегреше́ньми очи́сти щедро́тами Твои́ми, чисте́йшими кропле́ньми: да́ждь ми́ ру́ку по́мощи, да зову́: сла́ва Тебе́ чи́стая Богоневе́сто.

Хра́м освяще́н яви́лся еси́ Бо́гу, в Тя́ все́льшемуся па́че ума́: того́ моли́, грехо́вных скве́рн на́с очи́стити, я́ко да хра́м позна́емся, и оби́телище духо́вное.

Слава: Поми́луй мя́ Богоро́дице, я́же еди́на ми́лостей исто́чник ро́ждшая, и разреши́ души́ моея́ лю́тую боле́знь, и недоуме́ние серде́чное: сле́з струю́ и умиле́ние пре́жде конца́ пода́ждь, и лю́тых избавле́ние.

И ныне: Свята́я Богоро́дице, освяти́ на́с, пресвята́го ро́ждши пло́тию, уподо́битися хотя́щаго челове́ком, и Небе́сному Ца́рствию прича́стники все́х покажи́, пречи́стая, Твои́ми моли́твами.

Пе́снь 5

Ирмо́с: Тво́й ми́р да́ждь на́м, Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Ме́ртва мя́ соде́ла иногда́ во Еде́ме вкуше́ние лука́вое: но я́же жи́знь ро́ждшая Пречи́стая, дре́вле Дре́вом уме́ршаго оживи́ мя ны́не, и пода́ждь умиле́ние.

Спаси́ мя Пречи́стая, от бе́д лю́тых и воздви́гни мя́ от гно́я страсте́й, и изба́ви мя́ плене́ния и озлобле́ния лука́вых бесо́в, Твоего́ непотре́бнаго раба́.

Слава: Зе́ницы души́ моея́ озари́ чи́стая, зре́ти ми́ при́сно Боже́ственную све́тлость, и Твою́ сла́ву Ввсенепоро́чная, я́ко да получу́ ми́лость и ве́чную сла́ву.

И ныне: О́блак и ра́й, и две́рь Тя́ све́та, трапе́зу, и руно́ ве́мы, ру́чку вну́трь ма́нну нося́щу, сла́дость ми́ру, Чи́стая Де́во Ма́ти.

Пе́снь 6

Ирмо́с: Проро́ка Ио́ну подража́я вопию́: живо́т мо́й бла́же свободи́ из тли́, и спаси́ мя Спа́се ми́ра, зову́ща: сла́ва Тебе́.

Оскверне́на мя́ мно́гими грехи́, молю́ся Тебе́ еди́ной благо́й, и нескве́рней се́ни: омы́й от вся́кия скве́рны, хода́тайством Твои́м.

Окорми́тельница ми́ бу́ди чи́стая, вла́ему в пучи́не лю́тых, жите́йскими ну́ждами, и испра́ви, к при́сному приста́нищу, и спаси́ мя.

Слава: Треволне́ние помышле́ний, и страсте́й нахожде́ния, и глубина́ грехо́вная, окая́нную мою́ ду́шу обурева́ют: помози́ ми свята́я Влады́чице.

И ныне: Свяще́нная се́не показа́нная, Мари́е, оскверне́нную сластьми́ окая́нную мою́ ду́шу освяти́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Су́щым в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Оскве́рншуюся страстьми́ ду́шу мою́ освяти́, Пречи́стая Боневе́сто, и ума́ моего́ лю́тое плене́ние, и се́рдца недоуме́ние, и бесо́вская устремле́ния вско́ре потреби́ чи́стая.

Умерщвле́нный страстьми́ плотски́ми, всенепоро́чная, оживи́ у́м мо́й, и Бо́гу уго́дная соверша́ти укрепи́ мя́: да велича́ю Тя́, и сла́влю при́сно благоутро́бие Твое́.

Слава: Де́во Ма́ти, я́же еди́на Бо́га ро́ждшая, умертви́ плотски́я моя́ сла́сти, и душе́вную мою́ скве́рну отмы́й вско́ре: и истяза́ния бесо́в лука́вых изба́ви, и спаси́ мя.

И ныне: Преиспещре́на Боже́ственными доброде́тельми, родила́ еси́ Сло́во собезнача́льно Отцу́, Чи́стая Де́во, доброде́тельми небеса́ вои́стинну покры́вшаго: Его́же моли́ при́сно уще́дрити на́с.

Пе́снь 8

Ирмо́с: Его́же ужаса́ются А́нгели, и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие и превозноси́те во вся́ ве́ки.

Воплоща́ется безпло́тный из Тебе́ боголе́пно: его́же моли́ Пречи́стая, стра́сти моя́ плотски́я умертви́ти, и оживи́ти ду́шу мою́ умерщвле́нную греха́ми.

Исцеля́ющаго сокруше́ние Ада́ма пе́рстнаго, спа́са родила́ еси́ Пречи́стая и Бо́га: того́ умоли́, я́звы души́ моея́ исцели́ти, я́же неисце́льно боля́щыя.

Слава: Воздви́гни слежа́ща мя́ во глубине́ злы́х, и ны́не борю́щаго мя́ победи́, чи́стая, и уя́звленную безме́стными сластьми́ ду́шу мою́ пречи́стая не пре́зри, но уще́дри, и спаси́ мя.

И ныне: Избавля́емся вся́ческих искуше́ний, пречи́стая, Твои́ми к Бо́гу бо́дренными моли́твами, Тебе́ Богоро́дицу све́дущии благослове́нную и обра́дованную.

Пе́снь 9

Ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Грехолюби́в сы́й в ле́ности пребыва́ю, и суди́ща, Чи́стая, неумы́тнаго трепе́щу: в не́мже мя́ соблюди́ Твои́ми святы́ми моли́твами Богоневе́сто, неосужде́нна, да я́ко Предста́тельницу мою́ ублажа́ю Тя́, Пречи́стая.

Ужаса́юся суди́ща Де́во, и незабве́ннаго о́ка Твоего́ Сы́на, соде́яв мно́гия грехи́ на земли́, и сего́ ра́ди Тебе́ вопию́: всемилосе́рдая Влады́чице помози́ ми, и тогда́шния беды́ изба́ви мя́, и спаси́, Чи́стая.

Слава: Ко́ль стра́шен де́нь испыта́ния, Отрокови́це! Ко́ль ужа́сен отве́т! Ко́ль горька́ беда́! Кто́ постои́т про́чее Пречи́стая Влады́чице? Поми́луй стра́стную мою́ ду́шу, и пре́жде конца́ да́ждь ми́ оставле́ние, Пречи́стая.

И ныне: Я́же све́т ро́ждшая Боже́ственный, из Отца́ возсия́вший, омраче́нную мою́ ду́шу лестьми́ жите́йскими, и бы́вшую враго́в поруга́ние Всенепоро́чная уще́дри, и све́ту покая́ния спаси́тельнаго сподо́би, Чи́стая.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.