Канон Пресвятой Богородице, глас 6.

Тропарь, глас 6:

Благослове́нную нареки́й Твою́ Ма́терь, / прише́л еси́ на страсть во́льным хоте́нием, / возсия́в на Кресте́, взыска́ти хотя́ Ада́ма, / глаго́ля А́нгелом: / сра́дуйтеся Мне, я́ко обре́теся поги́бшая дра́хма. / Вся му́дре устро́ивый, / Бо́же наш, сла́ва Тебе́.

Кано́н Пресвяте́й Богоро́дице. Гла́с 6.

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Пресвятая Богородице, спаси нас.

Тебе́, Всесвята́я Де́во, не́бо простры́й Госпо́дь, и зе́млю основа́вый, из Тебе́ проше́д с пло́тию, не́бо земно́е на́м показа́л е́сть.

Я́же Бо́га Заче́ншая, на́с ра́ди бы́вшаго Челове́ка, Того́ моли́, Чи́стая, в Де́нь су́дный на́с уще́дрити мно́го согреши́вшыя ему́.

Слава: Светле́йшими луча́ми возсия́вшее Со́лнце от свята́го Твоего́ чре́ва, всю́ зе́млю озаря́ет, Влады́чице, те́мже просве́щшеся, Тя́ Бо́жию Ма́терь чти́м.

И ныне: Омраче́ния души́ моея́ безме́стных помышле́ний мглу́ разруши́, наведе́ньми, Богоро́дице Влады́чице, све́том святы́х за́поведей Вопло́щшагося из Тебе́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Руко́ю держа́щи Христа́ содержа́щаго вся́, от руки́ лука́ваго диа́вола, и вся́каго врежде́ния изба́ви на́с, Богороди́тельнице Чи́стая, пою́щих Тя́.

Бесо́вскаго смуще́ния изба́ви на́с, Де́во, и челове́к непра́ведных, и вся́ких искуше́ний, и неду́г тлетво́рных Твои́ми моли́твами, Влады́чице Всенепоро́чная.

Слава: Се́ Тебе́ вси́ ро́дове блажа́т, Отрокови́це, безле́тное Сло́во в пло́ти под ле́ты ро́ждши преесте́ственно, и двою́ па́ки пребы́вши.

И ныне: Я́же Человеколю́бца Бо́га ро́ждшая Де́во, непотре́бнаго мя́ Твоего́ раба́, в ча́с стра́шнаго прише́ствия Его́, изба́ви вся́каго осужде́ния.

Седален, глас 6.

Творе́ц и Изба́витель мой, Пречи́стая, / Христо́с Госпо́дь, из Твои́х ложе́сн проше́д, / в мя оболки́йся, пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся, А́нгельски, ра́дуйся, Влады́чице, / предста́тельство и покро́ве, / и спасе́ние душ на́ших.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Хра́м Бо́жий воспои́м святу́ю Де́ву, све́тло вси́ блажа́ще, обожи́вшеся ея́ ра́ди, и лю́тых изба́вльшеся.

Я́ко две́рь веду́щую к Боже́ственному вхо́ду, я́ко ра́й Боже́ственный, я́ко мы́сленно ме́сто свяще́ния, я́ко добро́ту Иа́ковлю, Де́ву ублажа́ем.

Слава: Приста́нище благоути́шное Тя́ показа́ Христо́с, Влады́чице Всенепоро́чная, ве́рою и любо́вию от мы́сли чи́сты призыва́ющым Тебе́, Богоро́дицу и́стинную.

И ныне: Мари́е Пречи́стая, чисте́йшее была́ еси́ прия́телище простра́нное Боже́ственнаго вселе́ния, душе́вную мою́ скве́рну и ка́л потреби́.

Пе́снь 5

Ирмо́с: Бо́жиим све́том Твои́м бла́же, у́тренюющих Ти́ ду́ши любо́вию озари́ молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

И́же сло́вом вся́ созда́вый, и му́дрым про́мыслом Госпо́дь окормля́я еди́н, я́коже хо́щет, благоутро́бием создава́ется из Тебе́, Пречи́стая, и пло́ть несказа́нно быва́ет.

Се́ Де́во, проро́чески зача́т во утро́бе над все́ми Бо́га Влады́ку и Го́спода, и неизрече́нно того́, Чи́стая, родила́ еси́, и по рождестве́ Де́во нетле́нна пребы́вши.

Слава: Мари́е, Влады́чице все́х, изба́ви мя́ я́ко ми́лостива, стра́шнаго плене́ния, молю́ся: и греха моего́ рукописа́ние раздери́, копие́м вопло́щшагося из Тебе́.

И ныне: Греха́ моего́ плени́цу, Твои́м хода́тайством и предста́тельством, Де́во, расто́ргни: отча́янным бо ты́ еси́ наде́жда, ве́рою притека́ющым к Боже́ственному покро́ву Твоему́.

Пе́снь 6

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Не опали́вши утро́бу Твою́, о́гнь сы́й Иису́с, из Тебе́ пло́тию проше́д: того́, Чи́стая, моли́, огня́ и вся́кия му́ки изба́витися ве́рою воспева́ющым Тя́.

Святы́х А́нгел Тя́ благоле́пие воспева́ю, Всенепоро́чная, и молю́: неле́потная потреби́ от мене́ бесо́вская мечта́ния, в тишине́ соблюда́ющи се́рдце мое́.

Слава: Пло́тным воображе́нием соедини́вся, и́же от Отца́ Единоро́дный, во утро́бе Твое́й еди́н от двою́, без се́мене про́йде, и соблюде́ неврежде́нно честно́е де́вство Твое́, Всенепоро́чная.

И ныне: Мно́жество очи́сти мои́х грехо́в, мно́жеством ми́лости Твоея́, и спаси́ мя раба́ Твоего́, Блага́я, к Тебе́ прибега́ющаго, и моля́щася ве́рно ми́лости Твое́й.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Росода́тельну у́бо пе́щь соде́ла А́нгел, преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Седя́й в не́дрех роди́теля неопи́санный, ны́не седи́т опи́сан, Пречи́стая, в не́дрех Твои́х Твои́м обложе́н зра́ком, за е́же спасти́ Ада́ма но́в Ада́м бы́в.

Моля́щи не преста́й человеколю́бца Бо́га на́шего, Всенепоро́чная, я́ко да прии́мем всеконе́чное проще́ние злы́х. И улучи́м я́же на Небесе́х угото́ванная блага́я лю́бящым Его́.

Слава: Благослови́м Тя́, Пренепоро́чная, ро́ждшую благослове́ннаго Го́спода, благослове́ньми венча́ющаго Боже́ственными естество́ челове́ческое, и но́во творя́ща то́ обетша́вшее пре́жде.

И ныне: Спасе́ния Твоего́ приста́нищем обогати́вшеся, Чи́стая, от бу́ри спаса́емся: и наде́жду я́же на Тя́ я́ко кре́пость души́ содержа́ще, зове́м: благослове́нная я́же Бо́га пло́тию ро́ждши.

Пе́снь 8

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Вои́стинну Богоро́дицу испове́дуем Тя́: со А́нгелом, е́же ра́дуйся, ве́рно вопие́м Ти́: еди́на бо су́щым на земли́ ра́дость родила́ еси́, обра́дованная Чи́стая, и Благослове́нная.

Боговеща́нная цевни́ца Твоего́ пра́отца, ковче́г Тя́ пресвя́т предвообража́ше, нося́щу Бо́га во пло́ти, Всенепоро́чная: Его́же превозно́сим Го́спода во ве́ки.

Слава: Неискусобра́чная Отрокови́це богора́дованная, и приста́нище су́щым в бу́ри христиа́ном, и упова́ние, изба́ви от напа́стей, и страсте́й и озлобле́ния, и от ве́чнаго огня́ рабы́ Твоя́.

И ныне: Егда́ прии́деши во сла́ве суди́ти вся́ческим, десны́м мя́ овца́м причти́, Влады́ко, гре́шнаго, ма́тере Твоея́ мольба́ми: да Тя́ сла́влю во вся́ ве́ки.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и, Тя́ ублажа́ем.

Сы́н Сло́во Бо́жие безнача́льное вопло́щься, Сы́н Де́выя быва́ет: благоволе́нием же Отца́ и Ду́ха Боже́ственнаго де́йством, ве́сь обнови́ истле́вший мо́й зра́к я́ко всеси́лен.

Душе́ возни́кни, и бо́дрствуй к моли́твам, и ко все́м благи́м: прилежа́нием ле́ность со́нную отве́ржи, бо́друю иму́щи храни́тельницу всегда́, Чи́стую Ма́терь Бо́жию, Юже велича́ем.

Слава: Упова́ние и покро́в, и ра́дование, Ты́ ве́рным еси́, Богоро́дице Всенепоро́чная. Сего́ ра́ди молю́ся Твои́м щедро́там: просвети́ ду́шу мою́, ю́же омрачи́ тьма́ мно́гих грехо́в, и лука́вых помышле́ний.

И ныне: Свята́я Де́во Богора́дованная, две́ри све́та отве́рзи ми́, но́щь греха́ да мя́ не покры́ет: испра́ви жи́знь мою́, к приста́нищу благоути́шному Боже́ственных повеле́ний из Тебе́ вочелове́чившагося.

Молитва

Пречистая Владычице Богородице, Царица Небесе и земли, высшая Ангел и Архангел и всея твари Честнейшая, чистая Дево Марие, миру Благая помощнице, всех христиан поможение и утверждение, и всем во всяких нуждах избавление! Призри ныне, О, Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припадающыя и Пречистому и Цельбоносному образу Твоему поклоняющыяся, Твоея же помощи и заступления в скорбех и напастех своих просящыя. Буди за нас ходатаица к Сыну Твоему, Христу Богу нашему: мы бо грешнии не имамы иныя помощницы разве Тебе, Владычице. Ты еси наша надежда и упование, Ты еси заступница и предстательница наша, Ты обидимым защищение, печальным утешение, скорбящым радование, сирым прибежище, вдовам хранительница, девам слава, слезящым веселие, больным посещение, немощным исцеление, грешным спасение. Сего ради, О, Богомати, к Тебе прибегаем, и на Твой Святый образ взирающе, с любовию покланяемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков. Аминь.