Канон Пресвятой Богородице, глас 5.

Тропарь, глас 5:

Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и Неискусобра́чная, / ро́ждшая пло́тию Творца́ Твоего́ и Бо́га, / моля́щи не оскудева́й о воспева́ющих / и кла́няющихся Рождеству́ Твоему́.

Кано́н Богоро́дице, его́же краегране́сие: [Пя́тое быва́ет пе́ние ны́не Де́ве] Гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.

Припев: Пресвятая Богородице, спаси нас.

Две́ри Боже́ственныя сла́вы, отве́рзшая ра́йския две́ри, покая́ния две́ри и мне́ отве́рзи молю́ся, и у́м мо́й просвети́ воспева́ти Тя́, Богора́дованная.

Уста́вила еси́ сме́ртное устремле́ние, ро́ждшая живото́м и сме́ртию облада́ющаго, Всенепоро́чная: того́ у́бо моли́, умерщвля́ющая прегреше́ния, ду́шу мою́ уста́вити, и спасти́ мя.

Слава: Еди́ну от родо́в Тя́ добро́ту Иа́ковлю, избра́ сло́во Отцу́ собезнача́льное, и от Твои́х воплоти́ся крове́й: Влады́чице, спаси́ мя хода́тайствы Твои́ми.

И ныне: Я́коже на руно́ до́ждь небе́сный на Тя́ сше́дший, подъя́ла еси́ всечи́стая: те́мже одожде́ния страсте́й мои́х изсуши́, молю́ Тя, Ма́ти Де́во.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, еди́не бла́же и Человеколю́бче.

Стрела́ми грехо́вными уя́звленнаго мя́, в Тебе́ лечьбо́ю всего́ исцели́, Чи́стая: и от содержа́щих мя́ измени́ боле́зней, я́же боле́зней премени́вшая ро́д челове́ческий рождество́м Твои́м.

Я́же всу́е смире́нное се́рдце мое́ оскорбля́ющыя и и́щущыя умертви́ти мя́ неви́димыя враги́, Влады́чице, Твои́м низложи́ заступле́нием, да пребу́дут безде́льни, студа́ исполня́еми.

Слава: Во́д животво́рных мя́ испо́лни, Влады́чице, я́же Боже́ственную во́ду ми́рови источи́вшая: беззако́ний мои́х лю́тыя изсуши́ пото́ки, и се́рдца моего́ во́лны Боже́ственною Твое́ю тишино́ю укроти́.

И ныне: Пре́йде се́нь, зако́ну сконча́ему: законода́вца бо Христа́ родила́ еси́, благода́ть очище́ния и просвеще́ния на́м законополага́юща, и кля́твы изъима́юща, Пречи́стая Де́во, Всенепоро́чная.

Седален, глас 5.

Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

От де́л спасе́ния не́сть ми́: те́мже под кро́в Тво́й с наде́ждею прибега́ю, Де́во Bсенепоро́чная, отча́яннаго мя́ спаси́ моли́твами Твои́ми.

Све́та чи́стое прия́телище, со́лнца носи́ло честно́е, омраче́ное се́рдце мое́ лю́тых мра́ком, озари́ и спаси́ мя, молю́ся, Влады́чице.

Слава: Истка́вшая оде́жду от крове́й Твои́х Де́вственных, не́бо о́блаки, Отрокови́це, одева́ющему, оде́ждею нетле́ния облецы́, пре́лестию обнаже́ннаго мя́.

И ныне: От удо́лий жите́йских, я́ко кри́н восприя́т Тя́ Зижди́тель: из Тебе́ ми́рови вдохну́ духо́вное благоуха́ние, Де́во пресвята́я Богоневе́сто.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Да обря́щу Тя́ по́мощь, Де́во, изъима́ющую мя́ в ча́с су́дный осужде́ния, егда́ суди́щу из Тебе́ ро́ждшагося предста́ну.

Зако́ном мя́ побежда́ема грехо́вным, Чи́стая, и пре́лестьми чужда́го ча́сто прельща́ема, и в бре́ги прегреше́ний низре́ема обрати́.

Слава: Угль ро́ждшая, Его́же узре́ Иса́иа, попали́ ве́щь, Всенепоро́чная, мои́х согреше́ний, и просвети́ мя, молю́ся.

И ныне: Пло́ть от крове́й Твои́х Христу́ взаи́м да́вши, плотски́я моя́, Де́во, стра́сти отню́д очи́сти, и безстра́стия стезю́ покажи́ ми.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Да не пожре́т мене́, Влады́чице, уны́ния глубина́, и грехо́вная волна́ да не покры́ет мене́: но Твое́ю моли́твою да спасе́н бу́ду, Еди́на Чи́стая.

Зако́на све́щник прообража́ше Тя́ ро́ждшую све́т, просвети́вшаго, Пречи́стая, вся́ческая. Те́мже вопию́ Ти: омраче́ннаго мя́ просвети́.

Слава: Блага́го ро́ждшая Благоде́теля и Соде́теля, Всечи́стая Влады́чице, и благолюби́вая, ду́шу мою́ озло́бленную ублажи́.

И ныне: Вину́ спасе́ния жизнода́вца родила́ еси́ на́м, ве́чное избавле́ние да́рующа вои́стинну, Тя́ Богоро́дицу пропове́дающым.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щыя: Бо́же, благослове́н еси́.

Пою́ Тя, Всепе́тая, Бо́га бо Препе́таго без се́мене родила́ еси́, Де́во Всесвята́я, обожа́ющаго пою́щих: Бо́же, благослове́н еси́.

Умертви́ стра́сти моя́, жи́знь ро́ждшая, воздви́гни мя́ лежа́ща от гро́ба нечу́вствия: да любо́вию сла́влю Тя́, Богоневе́сто.

Слава: При́зри на моле́ния рабо́в Твои́х, Влады́чице, от бе́д избавля́ющи, и от скорбе́й спаса́ющи, ве́рою пою́щыя: Бо́же, благослове́н еси́.

И ныне: Неисчетноси́льнаго, на́шу не́мощь поне́сшаго, родила́ еси́, Чи́стая: его́же моли́, исцели́ти ду́шу мою́, лю́те изнемо́гшую.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая Го́спода по́йте, и превозноси́те во вся́ ве́ки.

Я́же предо́брая и богозра́чная Де́во, до́брых мя́ виде́нием удобри́вши просвети́, я́ко да зову́: Го́спода по́йте, и превозноси́те Его́ во ве́ки.

Врата́ све́та, покая́ния ми́ врата́ светоза́рная отве́рзи, показу́ющи вся́кий пра́вый пу́ть пра́вды, приводя́щий к Боже́ственнаго хоте́ния вхо́ду.

Слава: Свято́е, Чи́стая, Сло́во, ве́рныя освяща́ющее, неизглаго́ланно родила́ еси́: того́ моли́, Пресвята́я, смире́нную ду́шу мою́ ны́не освяти́ти, зло́бою оскверне́ную.

И ныне: Струя́ све́тлая и исто́чник безсме́ртия, свята́я Влады́чице, из Тебе́ произы́де, и́же все́х Госпо́дь. Те́мже вопию́ Ти, Чи́стая: струи́ зо́л мои́х изсуши́ ту́чами Твои́х моли́тв.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.

Основа́ние непоколеби́мо, Спа́са родила́ еси́, Чи́стая, на вода́х зе́млю Боже́ственным повеле́нием основа́вшаго: Его́же моли́ на́с утверди́ти, чи́сто Тебе́ блажа́щих.

В пу́ть смире́ния повеле́ний Боже́ственных, незаблу́дно ше́ствовати, и непреле́стно сотвори́ мя, Чи́стая, бесо́вский мяте́ж, и страсте́й нахожде́ния отгоня́ющи, и тишину́ подаю́щи ми́.

Слава: Дрема́нием одержи́ма нераде́ния, ви́дя вра́г нахо́дит неосла́бно, сно́м сла́стным наде́яся укра́сти мя́: но сама́ мя сохрани́, Чи́стая, неусы́пною Твое́ю моли́твою, Ма́ти Де́во.

И ныне: Я́ко самоосужде́н, помышля́ю мои́х грехо́в мно́жество, и стра́шное суди́ще судии́, на не́мже хощу́ суди́тися: но я́же судию́ ро́ждшая Бо́га, тогда́ мя соблюди́, Богоро́дице, неосужде́на.

Молитва

Пречистая Владычице Богородице, Царица Небесе и земли, высшая Ангел и Архангел и всея твари Честнейшая, чистая Дево Марие, миру Благая помощнице, всех христиан поможение и утверждение, и всем во всяких нуждах избавление! Призри ныне, О, Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припадающыя и Пречистому и Цельбоносному образу Твоему поклоняющыяся, Твоея же помощи и заступления в скорбех и напастех своих просящыя. Буди за нас ходатаица к Сыну Твоему, Христу Богу нашему: мы бо грешнии не имамы иныя помощницы разве Тебе, Владычице. Ты еси наша надежда и упование, Ты еси заступница и предстательница наша, Ты обидимым защищение, печальным утешение, скорбящым радование, сирым прибежище, вдовам хранительница, девам слава, слезящым веселие, больным посещение, немощным исцеление, грешным спасение. Сего ради, О, Богомати, к Тебе прибегаем, и на Твой Святый образ взирающе, с любовию покланяемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков. Аминь.