Канон Пресвятой Богородице, глас 4.

Тропарь, глас 4:

Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Кано́н Пресвяте́й Богоро́дице, [его́же краегране́сие сицево́: Богоро́дице Де́ве мольбу́ приноша́ю]. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припев: Пресвятая Богородице, спаси нас.

Я́ко су́щи чисте́йшая, Пречи́стая, вся́кия тва́ри, е́же нечи́стыми страстьми́, лю́те оскверне́нное се́рдце мое́, чи́стою моли́твою Твое́ю, Богороди́тельнице, очи́сти. [Два́жды.]

Слава: Сле́з и воздыха́ний изба́ви мя́, предлежа́щих ми́ в бу́дущем стра́шнем суде́, богоприя́тными моли́твами твои́ми, Де́во Ма́ти пречи́стая, я́же к зижди́телю и Бо́гу на́шему.

И ныне: Я́же еди́на па́че ума́, Рождество́м Твои́м свободи́ла еси́ от кля́твы ро́д челове́ческий, плотски́ми страстьми́ порабоще́на мя́, Пречи́стая, Твои́ми мольба́ми свободи́.

Пе́снь 3

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною му́дростию, Христе́: не́сть бо свя́т, па́че Тебе́, Человеколю́бче.

Превы́шшую херуви́м молю́ Тя, Влады́чице, низпа́дший мо́й у́м напа́стьми зми́евыми, страсте́й теле́сных покажи́ вы́шший. [Два́жды.]

Слава: Во испыта́нии стра́шнем, егда́ хо́щет мя́ Госпо́дь осуди́ти многосогреши́вшаго, да обря́щу Тя́, Всенепоро́чная, избавля́ющую мя́ осужде́ния.

И ныне: Щедро́тами Твои́ми немилосе́рдныя моя́ нра́вы преложи́, ми́лостию Твое́ю, Христе́, и неми́лостива мя́ су́ща спаси́, мольба́ми ро́ждшия Тя́.

Седален, глас 4.

При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи. / Тя бо, Еди́ну, тве́рдое и изве́стное утвержде́ние и́мамы, / и Твое́ предста́тельство стяжа́хом. / Да не постыди́мся, Влады́чице, Тя призыва́ющии, / потщи́ся на умоле́ние Тебе́ ве́рно вопию́щих: / ра́дуйся, Влады́чице, / всех по́моще, ра́досте и покро́ве, / и спасе́ние душ на́ших.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Свяще́ния су́щи Боже́ственный до́м, источи́вшагося на благодея́ния своего́ созда́ния, Пречи́стая, ду́шу мою́ освяти́, и помышле́ния просвети́. [Два́жды.]

Слава: Ве́емо ве́тром зло́бы помышле́ние мое́, и ле́ностию все́ погружа́емо, моли́твами Твои́ми утверди́, Влады́чице, и от нападе́ния исхити́.

И ныне: Пала́ту Царе́ву Небе́сную одушевле́нную, ны́не молю́ Тя, Де́во: до́м Святы́я Тро́ицы, моли́твами Твои́ми покажи́ мя, верте́п разбо́йником пребыва́ющаго.

Пе́снь 5

Ирмо́с: Нечести́вии не у́зрят сла́вы Твоея́, Христе́, но мы́ Тя́ Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя́, Человеколю́бче.

А́гница, ро́ждшая а́гнца Бо́жия, ду́шу мою́ взыщи́ прельще́нную наве́том змии́ным, и на гора́х, Влады́чице, заблужда́емую преступле́нием.

Те́плою моли́твою Твое́ю, мра́зом лю́тым померза́емую ду́шу мою́, к теплоте́ зижди́теля Боже́ственныя любве́, благоче́стно сподви́гни, Богоро́дице Присноде́во.

Слава: Я́же до́брая и непоро́чная в жена́х, Чи́стая, окая́нную мою́ ду́шу стра́стнаго поро́ка ны́не свободи́, и чи́сте пожи́ти ми́, моли́твами Твои́ми устро́й.

И ныне: Ду́шу мою́ сохрани́, я́ко зе́ницу о́ка, под кро́вом крилу́ Твое́ю блага́я, Пречи́стая, и от духо́в лука́вствия, томле́ния и муче́ния изба́ви мя́.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Сме́рти потреби́тель бы́сть Рождество́ Твое́, Де́во, умира́ющым же живо́т и избавле́ние. Сего́ ра́ди молю́ Тя: ду́шу мою́ умерщвле́нную воскреси́.

Простри́ мне́ по́мощи ру́ку, Человеколю́бче, в пучи́не жите́йстей обурева́ему, мольба́ми Ма́тере Твоея́, и вы́шних неизче́тных си́л.

Слава: Село́ е́же Боже́ственный возраста́вшее кла́с, осла́бленную ду́шу мою́, и гла́дом Боже́ственных дея́ний иста́емую не пре́зри, но напита́й Сы́на Твоего́ Боже́ственною благода́тию.

И ныне: Успи́ стра́стная двиза́ния телесе́ и взыгра́ния моя́ плотска́я уму́ повини́ я́коже жребя́, успи́вши Чи́стая, сно́м Твои́х моли́тв.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Боже́ственная горо́ Отрокови́це, от нея́же ка́мень отсече́ся, сокруши́вый столпы́ и́дольския, души́ моея́ истука́нная, и се́рдца моего́ окамене́нное отжени́ недоуме́ние.

Не поколеба́ся Отрокови́це, я́коже прие́мшая во утро́бе Твое́й, презре́нием коле́блющаго зе́млю, и я́же на не́й, егда́ хо́щет: те́мже утверди́ мя, прило́ги вра́жиими коле́блемаго.

Слава: Низлага́ющи ми́ плотска́я мудрова́ния, всего́ мя, Богоро́дице, покажи́ духо́вна доброде́тельми укра́шена, его́же вселука́вый сластьми́ некрасото́ю помрачи́.

И ныне: Боже́ственный окри́не милосе́рдия и бла́гости источи́ ми оби́льно бога́тство Твои́х щедро́т, скве́рну прегреше́ний мои́х омыва́ющи, и плотско́е угаси́ разжже́ние.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́сашеся, благоче́стия рачи́тели о́троцы, взыва́ше: благослови́те вся́ дела́ Госпо́дня Го́спода.

Зре́л пло́д родила́ еси́, Влады́чице, от Него́же сме́рть я́дши поги́бе. Те́мже зову́ Ти, плодо́м греха́ умерщвле́наго мя́ льсти́вно, оживи́ пою́ща: благослови́те вся́ дела́ Госпо́дня Го́спода.

Успи́ движе́ние стра́стное мы́сли моея́, неусы́пною Твое́ю моли́твою, Пречи́стая Влады́чице, и возста́ви мя́ от сна́ ле́ностнаго пе́ти в бо́дрости души́: благослови́те вся́ дела́ Госпо́дня Го́спода.

Слава: Расто́ргни прегреше́ний мои́х плени́цу, и теле́сныя воста́ния утиши́, Богоро́дице: лука́вая же посецы́ умышле́ния, и очи́сти от та́йных помышле́ний ско́ро раба́ Твоего́, все́х ве́рных Предста́тельнице и избавле́ние.

И ныне: Не бои́шися ли, окая́нная душе́, та́мо клеветни́к клеве́щущих Твоя́ зла́я дея́ния безчи́сленная? Сего́ ра́ди пока́йся ко Преблаго́му, и спосо́бницу еди́ну Пречи́стую приими́: Та́ бо е́сть челове́ком прибе́жище.

Пе́снь 9

Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся Тя́, Богоро́дице, велича́ем.

Расто́ргни соу́з зо́л мои́х Боже́ственным копие́м сы́на Твоего́, и разреши́ окая́нную мою́ ду́шу, окова́нную и бе́дствующую, и к любви́ привяжи́, Де́во Ма́ти Бо́га на́шего.

Я́же небе́с ши́ршая Де́во, утесне́ное мое́ се́рдце вся́ким прило́гом сопроти́вным, в широте́ безстра́стия возведи́ те́сною стезе́ю ходи́ти мя́ укрепля́ющи всегда́.

Слава: Да Тя́ сла́влю, Де́во, вои́стинну препросла́вленную, вся́каго безслове́сия грехо́внаго изба́ви мя́, и сла́вы небе́сныя прича́стника сотвори́ прибега́ющаго к ми́лости Твое́й.

И ныне: Уста́ви сове́ты вся́, я́же на ны́ вооруже́нных, Ма́ти Бо́га вы́шняго, ра́дости же испо́лни упова́ющих на Тя́ да усе́рдно вси́ Твое́ пропове́мы заступле́ние.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.