Канон Пресвятой Богородице, глас 3.

Тропарь, глас 3:

Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сын Твой и Бог наш, / Кресто́м восприи́м страсть, / изба́ви нас от тли я́ко Человеколю́бец.

Кано́н Пресвяте́й Богоро́дице, его́же краестро́чие: Тре́тие пе́ние Богоро́дице приношу́. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: тому́ еди́ному пои́м, я́ко просла́вися.

Припев: Пресвятая Богородице, спаси нас.

Приосене́нную го́ру Тя́ прови́де ду́хом Авваку́м проро́к, молю́, Пречи́стая, осени́ мя стра́стию пробода́ема, и в се́ни сме́ртней от стужа́ющих мя́ страсте́й свободи́тися. [Два́жды.]

Слава: Окропле́нием Боже́ственныя струи́ источи́вшияся от Боже́ственнаго ребра́ Сы́на Твоего́, моя́ омы́й серде́чныя я́звы: я́ко да велича́ю Тя́, и по до́лгу сла́влю Присноблаже́нную и Пренепоро́чную.

И ныне: Равноде́теля ро́ждшему родила́ еси́ сло́ва, обожи́вшаго челове́ческое существо́: но того́ моли́ недоумева́ема и изнемо́гша мя́ вра́жиими кова́рствы, Боже́ственнаго утеше́ния сподо́бити чи́стая.

Пе́снь 3

Ирмо́с: И́же от несу́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

И́же в ми́лости Неизрече́нней, и щедро́тах су́ща Бога́таго, ми́лостива су́щи, Всесвята́я, моли́ е́же уще́дрити на́с озло́бленных. [Два́жды.]

Слава: До́м все́х су́щи Творца́, обита́ти моли́ во мне́ Уте́шителю, бы́вшем верте́пе душетле́нных разбо́йник, Чи́стая Де́во.

И ныне: Ма́нием вся́ нося́щаго Боже́ственным, во объя́тиих я́ко нося́щи Богоро́дице, при́зри на мя́, и изба́ви мя́ от и́же к страсте́м ра́зума безме́стнаго.

Седален, глас 3.

Без се́мене от Боже́ственнаго Ду́ха, / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́, / и Младе́нца млеко́м пита́ла еси́. / Те́мже не преста́й моли́ти, / изба́витися от бед душа́м на́шим.

Пе́снь 4

Ирмо́с: Положи́л еси́ к на́м тве́рдую любо́вь, Го́споди, единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Я́звы, Христе́, и заколе́ние во́лею я́ко претерпе́л еси́, уя́звленную мою́ ду́шу разбо́йническими де́монов озлобле́ньми, моли́твами исцели́ ро́ждшия Тя́, еди́не Многоми́лостиве.

Те́ло Твое́ю руку́ созда́телю е́смь и творе́ние, зло́бою же змии́ною, Христе́, от сласте́й жите́йских сокруши́хся. Те́мже мя́ возсозида́й ро́ждшия Тя́ Боже́ственными умоле́ньми.

Слава: Сло́во О́тчее па́че сло́ва родила́ еси́, разреши́вшее вся́каго безслове́сия челове́ки: Его́же приле́жно моли́, безслове́сными мя́ страстьми́ пленя́ема свободи́ти, Еди́на Присноде́во.

И ныне: Исцеле́ние на́м из дла́ни то́чиши всегда́, вся́ святы́ни се́нь, вся́ све́та су́щи испо́лнена, вся́ ка́плющи ми́ро благоуха́ния, Пречи́стая Богоневе́сто.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, а́з: прови́дех бо воплоща́ема Бо́га, Све́та невече́рня, и ми́ром влады́чествующа.

Пло́ти моея́ боле́зни, и душе́вную боле́знь претвори́, и ле́ности о́блаки отгони́, Де́во, Све́та о́блаче, и здра́вие, и лю́тых премене́ние да́ждь ми́ прося́щему, и любо́вию Тя́ сла́вящему. [Два́жды.]

Слава: Хода́таицу Тя́ и моли́твенницу, из Тебе́ Ро́ждшемуся ны́не предлага́ю, вся́каго греха́ сы́й испо́лнь Де́во, пору́чница ми́ и жития́ исправле́ние бу́ди, и руковожде́ние к стезя́м Боже́ственнаго Ве́дения.

И ныне: Освяти́ у́м мо́й, и ду́шу, Де́во, световоди́, и Боже́ственныя Сла́вы прича́стника сотвори́: се́ бо зо́л испо́лнихся, и вся́ким порабоще́н бы́х сласте́м, и оскверне́ну приношу́ со́весть.

Пе́снь 6

Ирмо́с: И́же в концы́ веко́в доше́дшыя, Человеколю́бче, и треволне́ньми напа́стей поги́бнути бе́дствующыя, вопию́щыя не пре́зри: спаси́, Спа́се, я́коже спа́сл еси́ от зве́ря проро́ка.

Фарисе́а превознесе́нною мы́слию превосходи́х, гордя́ся при́сно, и к про́пастем порева́яся безме́рных согреше́ний, Еди́на Чи́стая, смири́вшагося мя́ лю́те уще́дри. [Два́жды.]

Слава: Я́же пречу́дное Зача́тие име́вши и Рожде́ние, Твоя́ ми́лости на мне́ окая́ннем ны́не удиви́: и́бо в беззако́ниих и зача́хся и рожде́йся сласте́м порабоще́н бы́х.

И ныне: Восклица́ю, пла́чу и рыда́ю, егда́ суди́ще стра́шное воспомина́ю: лука́ва бо дела́ и́мам, неискусому́жная Де́во Ма́ти Бо́жия, в ча́с стра́шный предста́ни ми́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

От де́л спасе́ния не́сть ми́, Влады́чице, грехи́ бо прилага́ю ко грехо́м, и к зло́бе зло́бу: моли́твою у́бо Твое́ю, Чи́стая, уще́дри, и спаси́ мя. [Два́жды.]

Слава: Су́д при две́рех, суди́ще гото́во, угото́вися, смире́нная душе́, и возопи́й: внегда́ суди́ти ти́ Сло́ве, не осуди́ мене́, моли́твами Ро́ждшия Тя́.

И ныне: Объе́м грехо́вныя плоды́ умертви́хся, и принося́ ду́шу непло́дну, зову́ Ти: плодоно́сну покажи́, я́же плодо́м Твои́м тле́ние потреби́вшая.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Вся́ я́ко добра́ и бли́жняя все́х Царя́ бы́вшая, Богоро́дице, испо́лни мя́ благи́х де́л, зло́бе спожи́вшаго, и ле́ностно все́ житие́ сконча́вшаго: я́ко да Тя́ сла́влю во вся́ ве́ки. [Два́жды.]

Слава: От ки́това чре́ва я́ко изба́вил еси́ дре́вле проро́ка, Бо́жий Сло́ве, пресла́вно: та́ко изба́ви мою́ ду́шу во глубину́ попо́лзшуюся поги́бели, име́яй, Спа́се, моля́щуюся Тебе́ неискусобра́чно ро́ждшую Тя́ Де́ву.

И ныне: В кра́сную оде́жду обле́кшагося мя́ богорожде́ния, обре́тше, Богоро́дице, и́же зло́бу соде́ловающии, тоя́ обнажи́ша: но Ты́ мя Боже́ственными оде́ждами уясни́ покая́нием, моли́твами Твои́ми, Де́во.

Пе́снь 9

Ирмо́с: В Зако́не се́ни и Писа́ний о́браз ви́дим ве́рнии: вся́к му́жеский по́л ложесна́ разверза́я, свя́т Бо́гу. Те́м перворожде́нное Сло́во Отца́ Безнача́льна, Сы́на первородя́щася Ма́терию неискусому́жно, велича́ем.

Растле́нна умо́м, растле́нна душе́ю и со́вестию, зло́бою оскверне́на, и на́га вся́ких бла́г явле́нна, Де́во нетле́нная, непоро́чная, не пре́зри мене́, но де́лы благоче́стия украси́.

Испо́лнихся зо́л, испо́лнихся помышле́ний отчужда́ющих мя́ от Тебе́, Человеколю́бца. Сего́ ра́ди и стеню́ и вопию́: ка́ющагося мя́ приими́, и не отри́ни мене́ ро́ждшия Тя́ моли́твами, Благоде́телю многоми́лостиве.

Слава: Да изба́влюся Твои́ми, Всенепоро́чная Отрокови́це, моли́твами, от вся́каго гне́ва, страсте́й смертоно́сных, лю́тыя гее́нны и огня́, от челове́ков непра́ведных, от враго́в лука́вых, прибе́гнувый к Твоему́ покро́ву, и призыва́яй Тя́ на по́мощь.

И ныне: Я́ко Ма́ти Бо́жия, моли́ из Тебе́ ро́ждшагося Го́спода Бо́га и Царя́: е́же изба́витися вся́каго преще́ния, и лука́ваго обы́чая Твоему́ рабу́, Чи́стая, на Тя́ наде́явшемуся из чре́ва Ма́тере моея́, Влады́чице.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.