Канон святым апостолам, глас 6.

Тропарь, глас 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́м сла́вным и всехва́льным апо́столом. Творе́ние Феофа́ново, гла́с 6:

Пе́снь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святии апостоли, молите Бога о нас.

Све́т бы́вше ми́ру богоглаго́ливии, све́тлыми блиста́ньми озари́те на́с: и страсте́й изба́вите но́щи, и мглы́ искуше́ний, богоблаже́ннии.

Кня́зи честны́я по все́й земли́ ду́х ва́с че́стно поста́ви, Госпо́дни ученицы́: те́мже возду́шнаго кня́зя победи́вше, ве́рныя избавля́ете.

Слава: От огня́ невеще́ственнаго, я́ко светоза́рное разже́гшеся у́глие, веще́ственныя моя́, прему́дрии, стра́сти попали́те, к све́ту безстра́стия и живота́ наставля́юще мя́.

И ныне, Богородичен: Апо́стол моли́твами, проро́к, и му́ченик, и ро́ждшия Тя́, Чи́стыя, Го́споди Иису́се, все́х Царю́, уще́дри лю́ди согреши́вшыя Ти́.

Пе́снь 3

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Боже́ственный ду́х ва́шя язы́ки извари́в наше́ствием стра́шным, сокруше́нныя челове́ки к животу́ обновля́ет ва́ми, сла́внии апо́столи.

В ра́зуме согреша́яй, ко́е обря́щу поми́лование сло́ве, в де́нь су́дный? Сего́ ра́ди вопию́ Ти: Твои́х ра́ди учени́к уще́дри мя́ самоосужде́ннаго.

Слава: Уподо́бльшиися Христо́вым спаси́тельным страсте́м, души́ моея́ стра́сти ле́тныя и лю́тыя исцели́те, вра́чеве су́ще сла́внии апо́столи.

И ныне, Богородичен: Согреши́вшаго мя́, Христе́, Богоро́дицы ра́ди и Твои́х апо́стол, обрати́в я́ко Бо́г поми́луй, и огня́ ве́чнаго, Спа́се, свободи́.

Седален, глас 4.

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Пе́снь 4

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Приста́нища благоути́шная, приста́нища небу́рная, к ти́хому мя́ приста́нищу доведи́те, прегреше́ний лю́тых треволне́нием обурева́ема.

Душе́ моя́, воздохни́, душе́ моя́, прослези́ся: смире́нное се́рдце мое́ благо́му отню́д прилепи́ся, я́ко да бу́дущаго Тя́ пла́мене и му́ки изба́вит Бо́г.

Слава: Спа́са Го́спода моли́те, спаси́телие су́ще челове́ков всеблаже́ннии апо́столи: да на́с спасе́т от искуше́ний злы́х я́ко Человеколю́бец.

И ныне, Богородичен: Де́во пречи́стая, Де́во непоро́чная, со Апо́столы о на́с мольбу́ сотвори́: я́ко да изба́вимся лю́тых искуше́ний и бе́д.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Пу́ть вводя́щий в живо́т, зело́ тесне́йшим ше́ствием искуше́ний и скорбе́й, ученицы́ Сло́ва я́ве ходи́вшии, стезю́ души́ моея́ угла́дите.

Свети́льницы Боже́ственнаго Восто́ка, изба́вите мя́ от тьмы́ страсте́й, и сласте́й помраче́ния, и напа́стей, и обстоя́ний, и бу́ри, и бе́д, Христо́вы Апо́столи.

Слава: Сви́тцы сло́ва богозра́чнии, в кни́зе мя́ живо́тней написа́тися моли́те, апо́столи, грехо́в мои́х зло́е растерза́юще писа́ние моли́твами ва́шими.

И ныне, Богородичен: Спасе́ние мое́ и упова́ние, спаси́ мя упова́ющаго на Тя́, все́х упова́ние непосты́дное, я́же к Сы́ну Твоему́ мольба́ми, и Боже́ственных учени́к, Отрокови́це еди́на всепе́тая.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Я́ко скрижа́ли богопи́санная ду́ха, я́ве честна́я законоположе́ния сла́внии, в душа́х име́сте нело́жно: и́миже в писа́ниих упраздни́сте зако́н, ми́р спа́сше.

Душе́ согреша́ющи, обы́чаем же злы́м умовре́дно рабо́тающи, обраще́нием обрати́ся, и Го́сподеви ще́дрому возопи́й: Апо́стол ра́ди сло́ве, спаси́ мя.

Слава: Овца́м десны́м сочета́й мя́, во ужа́сном и стра́шном прише́ствии Твое́м, избра́нным Твои́м, моли́твами Боже́ственных пропове́дник Твои́х, закла́выйся за все́х, А́гнче незло́бивый.

И ныне, Богородичен: Ли́к мо́лит Тя́ безпло́тных слу́г, Сы́не Бо́жий пребезнача́льне, мо́лит Тя́ собо́р ученико́в с ро́ждшею Тя́, лю́дем Твои́м пода́ждь ми́лости Твоя́.

Кондак, глас 2:

Тве́рдыя и Боговеща́нныя пропове́датели, верх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

У́дицею сло́ва Апо́столи, извле́кше все́х из глубины́ пре́лести, приведо́сте к закла́вшемуся сло́ву на́с ра́ди, пою́ще ему́: благослове́н Бо́г оте́ц на́ших.

Я́вльшемуся ве́щию теле́сною Апо́столи, нехода́тайственне бесе́довавше, просвети́стеся светода́тельными блиста́ньми его́. Те́мже мя́ просвети́те вопию́ща: благослове́н Бо́г оте́ц на́ших.

Слава: Па́стыря до́браго умоли́те, Боже́ственнии ученицы́, в гора́х мя́ заблу́ждшаго преступле́ния взыска́ти, и спасти́ вопию́щаго приле́жно: благослове́н Бо́г оте́ц на́ших.

И ныне, Богородичен: Со проро́ки, Апо́столы же и му́ченики, Де́во, Его́же родила́ еси́, моли́, земны́х мя́ изба́вити зо́л, и прича́стника небе́сных бла́г бы́ти мя́ сподо́би, Влады́чице.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Моли́тв серпо́м очи́стите пле́велы вся́ мы́сли моея́, Боже́ственнии де́латели Спа́совы апо́столи: я́ко да спаси́тельнаго плода́ принесу́ кла́с.

Олядене́вшая сердца́ обнови́сте ра́лом сло́ва, и все́явше уче́ние честно́е, кла́с стори́чествующ спа́сшихся пожа́сте, Богови́дцы.

Слава: Вра́жию зло́бу успи́вше, усну́ли есте́ сно́м пра́ведных подо́бным, неусы́пнии о на́с моли́твенницы бы́вше, ученицы́ Сло́ва, во вся́ ве́ки.

И ныне, Богородичен: Огня́ негаси́маго изба́ви мя́, Го́споди, проро́к, и му́ченик, и Апо́стол Твои́х, и во утро́бу вмести́вшия Тя́ неизрече́нно, Де́вы неискусому́жныя, Ще́дре, моли́твами.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя́ ублажа́ем.

Бо́га челове́ком приобщи́вшася, и ме́ртвенное совокупле́нием без сравне́ния обожи́вшаго, во все́м ми́ре пропове́давше, все́х безбо́жныя пре́лести свободи́сте: те́мже ублажа́еми есте́ при́сно, Боже́ственнии Апо́столи.

Христо́ву стра́сть изъобрази́вше Апо́столи, страстьми́ телесе́ разли́чными, пло́ти моея́ стра́сти умертви́те: и изнемо́гшую, и бе́дствующую, и умерщвле́ную мою́ ду́шу оживотвори́те.

Слава: Пу́ть бу́ди ми́ наставля́ющий мя́ к незаблу́дному пути́ за́поведей Твои́х, Человеколю́бче, в про́пасть грехо́вную впа́дшему: и заблужда́ющу, и укло́ншуся к путе́м лука́вым, и бе́дствующу.

И ныне, Богородичен: Ли́ки А́нгел и Арха́нгел же, Вла́сти и Си́лы, Нача́ла, Госпо́дствия, Херуви́ми и Серафи́ми и престо́ли, Христе́, собо́р апо́стол, с Ро́ждшею Тя́, мо́лятся Тебе́, еди́не Царю́, спаси́ рабы́ Твоя́.

Молитва

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.