Канон святым апостолам, глас 5.

Тропарь, глас 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́м апо́столом, творе́ние Феофа́на, епи́скопа Ники́йскаго, гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.

Припев: Святии апостоли, молите Бога о нас.

Сия́нием первода́тнаго светода́ния, пло́тию бесе́довати челове́ком сподо́бившагося, обогати́вшеся сла́внии, души́ моея́ разруши́те вся́к мра́к, Боже́ственнии апо́столи.

Напря́г Боже́ственный лу́к, я́коже стре́лы ва́с в ве́сь ми́р посла́ апо́столи, стре́лы сокруша́ющыя злоко́зненнаго вся́, и исцеля́ющыя ве́рных я́звы.

Слава: Иму́ще прему́дрость са́мую учи́теля, умудри́сте апо́столи вся́ концы́. Те́мже мя́ умудри́те, вра́жие вся́ко злоде́йство отгоня́ти.

И ныне, Богородичен: Еди́на благослове́нная, богора́дованная, благослове́ньми челове́ческий ро́д обра́довавши, Христа́ моли́ с Боже́ственными, Пречи́стая, Апо́столы, поми́ловатися на́м.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

И́же пло́тию обнища́вый, премно́гий бла́гостию, Его́ ра́ди обнища́вшыя, обогати́ ва́с сла́внии апо́столи, дарова́ньми вся́кими, обогаща́ющя концы́ Боже́ственными и честны́ми ра́зумы.

Уязви́хся ядови́тым зми́я угрызе́нием, уя́звено се́рдце стяжа́х. Те́мже Ти́ вопию́, Христе́, мене́ ра́ди уязви́вшемуся: апо́стол Твои́х мольба́ми исцели́, и спаси́ мя, молю́ся.

Слава: Мре́жею моли́тв ва́ших всеблаже́ннии, от глубины́ зло́бныя бори́теля, и от треволне́ния помышле́ний, и от страсте́й смертоно́сных возве́дше мя́, приведи́те Бо́гу все́х спаса́ема.

И ныне, Богородичен: Я́же до́ждь прие́мшая небе́сный, со апо́столы того́ моли́: уста́вити пото́ки мои́х страсте́й, пучи́ну изсуша́ющи греха́ моего́, и спасти́ мя, чи́сто Тебе́ сла́вящаго.

Седален, глас 4.

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Две́рь сы́й Иису́с Бо́г на́ш и Госпо́дь, отве́рзл свое́ апо́столом позна́ние, все́м язы́ком две́рь отве́рзе те́х уче́ньми.

Сы́не Бо́жий, сы́ны по прича́стию Небе́снаго Отца́ Твоего́ апо́столы яви́л еси́: моле́нием и́х сы́ны све́та все́х на́с сотвори́.

Слава: И́же на престо́лех двоюна́десятих, с судие́ю и Царе́м хотя́ще пресла́вно се́сти, стра́шнаго и ужа́снаго мя́, апо́столи, изба́вите суда́.

И ныне, Богородичен: Боже́ственнаго свяще́ния ковче́же, освяти́ мою́ ду́шу, помышле́ние просвети́, всегда́ моля́щи Христа́ со апо́столы, да спасе́т мя́.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко еди́н Благоутро́бен.

Духо́внии вити́и, честни́и апо́столи, на го́рнице, во о́гненне ви́де ду́ха свята́го к ни́м прише́дша, стра́шно прия́ша.

Сокруша́юще нече́стия, сокруше́ную прегреше́ньми мою́ мы́сль, росо́ю исцеле́ния апо́столи исцели́те.

Слава: Стре́лы избра́нныя ва́с Христо́с посла́ апо́столи, сокруша́ющыя стре́лы лука́вствия: те́мже мя́ исцели́те уя́звеннаго вра́жиими стрела́ми.

И ныне, Богородичен: Не осуди́ мене́, ни отве́ржи мене́ от лица́ Твоего́, Многоми́лостиве: мо́лит Тя́ чи́сто ро́ждшая, и апо́стольский собо́р.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Распространя́ющееся уста́вил еси́ зло́бы согни́тие, язы́ков ду́шы, Человеколю́бче, со́лию уче́ния свяще́нных учени́к Твои́х.

Глубину́ ве́си зо́л мои́х, Влады́ко Христе́, да́ждь ми́ ру́ку, и спаси́ мя, Человеколю́бче, мольба́ми свяще́нных апо́стол Твои́х.

Слава: Судие́ пра́веднейший, в де́нь суда́ стра́шнаго, тре́петнаго мя́ изба́ви осужде́ния, благосла́вных апо́стол Твои́х мольба́ми.

И ныне, Богородичен: Отча́яннаго мя́ от мно́жества беззако́ний, спасе́ния Го́споди сподо́би, учени́к и ма́тере Твоея́ мольба́ми.

Кондак, глас 2:

Тве́рдыя и Боговеща́нныя пропове́датели, верх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щыя: Бо́же, благослове́н еси́.

Превозноси́мый отце́в Госпо́дь, ва́с превознесе́, всю́ низве́рже вра́жию си́лу, ученицы́ Христо́вы богови́дцы.

Скве́рну се́рдца моего́ струя́ми умиле́ния, ва́шими мольба́ми, апо́столи, омы́йте, уча́ще взыва́ти: Бо́же, благослове́н еси́.

Слава: Огне́м Боже́ственнаго ду́ха ве́щь попали́сте вся́каго су́етства: те́мже паля́щия мя́ изба́вите гее́нны, ученицы́ Бо́га сло́ва.

И ныне, Богородичен: Я́же паде́ния Ада́мова исправле́ние, воздви́гни па́дшаго мя́ в про́пасть зло́бную, моли́твами Твои́ми, Де́во, и Боже́ственных апо́стол.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая Го́спода по́йте и превозноси́те во вся́ ве́ки.

Ты́ мы́сленныя о́блаки, апо́столы сло́ве распросте́рл еси́, кропя́щыя на ны́ до́ждь прему́дрых и Боже́ственных уче́ний, и напоя́ющыя на́с во вся́ ве́ки.

Преудо́бреннии столпи́ церко́внии, и́же сию́ держа́щии ве́ры уче́ньми, согни́вшуюся души́ моея́ хра́мину, Боже́ственным хитроде́йствием утверди́те, Богови́дцы.

Слава: Стени́, душе́, и сле́з пото́ки от всего́ се́рдца принеси́ Го́сподеви, зову́щи: Еди́не Ще́дрый, спаси́ и очи́сти мя́, всесла́вных апо́стол моли́твами благоприя́тными.

И ныне, Богородичен: Сио́не избра́нный, Ца́рский гра́де, вы́шняго мя́ гра́да граждани́на сотвори́, с Боже́ственными ученики́ моля́щи, Пречи́стая Де́во, безле́тнаго Сы́на Твоего́.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя Ему́: его́же велича́юще, Де́ву ублажа́ем.

Небеса́ узве́здены светлостьми́ Боже́ственных доброде́телей у́мно яви́стеся, посреде́, Христа́, я́ко со́лнце иму́ще, и земны́я концы́ прему́дрии обнови́сте: сего́ ра́ди блажи́ми есте́.

Христо́вы я́звы на Боже́ственнем телеси́ ва́шем, я́ко у́тварь всеблаголе́пну нося́ще прему́дрии, уя́звленую мою́ ду́шу де́монскими стрела́ми, я́же ко Го́споду хода́тайствы исцели́те.

Слава: В ро́ве преиспо́днем мя́ греха́ слежа́ща, Христе́, и ле́ности лю́тыя сно́м ду́шу отягчи́вшаго, Твои́ми сло́ве, ученики́, я́коже Ла́заря воздви́гнувый, спаси́ Го́споди.

И ныне, Богородичен: Души́ моея́ напра́ви ше́ствия сло́ве Бо́жий, к стезя́м за́поведей Твои́х незаблу́дных, име́я моля́щуюся ро́ждшую Тя́ пречи́стую Де́ву, и прему́дрыя апо́столы Твоя́ Многоми́лостиве.

Молитва

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.