Канон святым апостолам, глас 3.

Тропарь, глас 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́м сла́вным и всехва́льным апо́столом. Творе́ние Феофа́ново. Гла́с 3.

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем: Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.

Припев: Святии апостоли, молите Бога о нас.

Церко́вныя столпы́, основа́ния ве́ры, благоче́стная утвержде́ния, и ве́рныя вся́ утвержда́ющая, прииди́те ублажи́м свяще́нныя апо́столы, я́ко да мольба́ми и́х спасе́мся.

Са́м себе́ пре́жде суда́ блу́дный убоя́вся осужда́ю, зла́я бо дела́ безчи́сленная стяжа́х. Те́мже молю́ся Ти́, пра́ведный Судие́: отча́яннаго мя́ спаси́ Боже́ственными мольба́ми апо́стол Твои́х.

Слава: Непревра́тнии столпы́ благоче́стия, прельще́нием мя́ вра́жиим препя́таго, и на земли́ лежа́щаго и бе́дствующаго, и недоумева́ющагося испра́вите, я́ко да обря́щу оставле́ние, о ни́хже согреши́х.

И ныне, Богородичен: Со святы́ми проро́ки, со апо́столы, и му́ченики, из Тебе́ вопло́щшагося Го́спода, приле́жно, Чи́стая, моли́, я́ко да плотски́я на́шя вся́ стра́сти умертви́т, и живо́т ве́чный на́м да́рует.

Пе́снь 3

Ирмо́с: И́же от не су́щих вся́ приведы́й, сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

И́же ми́ра концы́ уче́ния Боже́ственнаго испо́лнивше, ду́шу мою́ испо́лните доброде́тельных дея́ний, и помышле́ний благи́х, Христо́вы самови́дцы.

От собла́зн мно́гих лука́ваго, и от вся́кия ско́рби, и от вся́кия тесноты́, от вся́каго обстоя́ния, ученицы́ Христо́вы изба́вите мя́.

Слава: Увы́, душе́ моя́, окая́нная и смире́нная, ча́сто согреша́ющи, и Бо́га прогне́вающи, ка́ко испро́сиши проще́ние злы́х, и́хже не престае́ши творя́щи?

И ныне, Богородичен: Боже́ственная ле́ствице, ю́же ви́де Иа́ков, по не́йже сни́де Бо́г, вознося́ на́с, приле́жно моли́ со апо́столы, уще́дрити на́с.

Седален, глас 4.

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Пе́снь 4

Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Я́коже мо́лнии, и я́ко лучы́ незаходи́маго со́лнца, апо́столы простира́я сло́ве, в мирски́я концы́, все́х просвети́в, и безбо́жия мра́к отгна́л еси́.

Мо́ре лю́таго греха́ сло́ве обурева́ет мя́, и волне́ния безчи́нных помышле́ний смире́нную ду́шу мою́ смуща́ют: окорми́телю Го́споди, ученик Твои́х мольба́ми спаси́ мя.

Слава: Ужаса́юся помышля́я стра́шное Твое́, Влады́ко, прише́ствие: и́мам бо пре́жде суда́, мою́ осужда́ющую мя́ вну́трь со́весть, и пре́жде му́чащия му́ки, нечу́вствие мое́.

И ныне, Богородичен: Сло́ве Бо́жий, И́же рожде́йся от Де́вы Богоотрокови́цы Тоя́ хода́тайствы свяще́нными, и прему́дрых апо́стол Твои́х, Спа́се, вся́каго обстоя́ния и вся́кия ну́жды изба́ви ду́шы на́шя.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́, Непостижи́мый: и к Тебе́ у́тренююще, воспева́ем Тя́, Человеколю́бче.

На земли́ вопло́щься, соде́лал еси́ ученики́, небеса́ веща́юща, Христе́, сла́ву Твою́: те́х ра́ди у́бо, Го́споди, ду́шы на́шя поми́луй. [Два́жды.]

От страсте́й и от вся́кия ну́жды, от лю́таго обстоя́ния, сло́ве изба́ви рабы́ Твоя́, апо́стол Твои́х благоприя́тными моли́твами.

Слава: Увы́ мне́, душе́ всестра́стная, ка́ко хо́щеши Стра́шному Суду́ предста́ти безпло́дна су́щи; потщи́ся, пока́йся, доброде́телей плоды́ возраща́ющи.

И ныне, Богородичен: И́же на земли́ я́вльшагося неизрече́нно с пло́тию, от чи́стых крове́й Твои́х, Чи́стая, моли́ я́ко Сы́на Твоего́ всегда́, очище́ние на́м дарова́ти.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Бе́здну прему́дрости духо́вныя источи́вше, апо́стольское сосло́вие, мирска́го изсуши́ мудрова́ния тече́ние, и напо́й благочести́вых собра́ния.

Воздохни́ и прослези́ся, смире́нная душе́ моя́, и возопи́й ко Го́споду, глаго́лющи: согреши́х Ти́, Влады́ко, очи́сти мя́, Благоутро́бне, мольба́ми прему́дрых апо́стол Твои́х.

Слава: Потеко́ша пото́цы страсте́й, и потопи́ша мою́ душе́вную хра́мину: ре́ки духо́вныя бы́вше апо́столи, сокруше́ннаго мя́ к животу́ обнови́те.

И ныне, Богородичен: Собо́р Тя́ апо́столов, Христе́, мо́лит с ро́ждшею Тя́: очище́ние низпосла́ти и ми́р рабо́м Твои́м, я́ко Человеколю́бец и Бо́г благопремени́тель.

Кондак, глас 2:

Тве́рдыя и Боговеща́нныя пропове́датели, верх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7

Ирмо́с: Пре́жде о́бразу злато́му, перси́дскому чти́лищу, о́троки не поклони́шася, трие́ пою́ще посреде́ пе́щи: отце́в Бо́же благослове́н еси́.

И́же све́т ми́ру Христо́с, све́т ва́с показа́, светоно́снии апо́столи, разгоня́ющих тьму́ прельще́ния, и просвеща́ющих ве́рных мы́сли.

Я́же на на́с вра́жия се́ти сокруши́те, богогла́снии апо́столи, и стези́ на́м покая́ния угла́дите, к ва́м прибега́ющым.

Слава: Объюроде́вшую ду́шу мою́ плотски́ми страстьми́ со́ль Боже́ственная су́ще богоглаго́ливии Госпо́дни апо́столи, очи́стите ве́рно оживля́юще.

И ныне, Богородичен: Добро́то Иа́ковля, до́брыми мя́ зра́ки просвети́, молю́ся, моля́щися ны́не со апо́столы, ро́ждшемуся от Твои́х чи́стых крове́й.

Пе́снь 8

Ирмо́с: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Уязви́хся страсте́й ору́жием, и острупи́х се́рдце безу́мием, зло́бы соде́телем: апо́столи сла́внии исцели́те мя́ всего́ недоуме́ющася, ду́ш и теле́с вра́чеве су́ще.

Во всю́ зе́млю пропове́дников веща́ние изы́де Боже́ственное, уча́щее правосла́вно о еди́нственном существе́, еди́но естество́ почита́ти Святы́я Тро́ицы, и еди́но вои́стинну госпо́дьство, и еди́но Ца́рство во вся́ ве́ки.

Слава: Мене́ многосогреши́вшаго, и долготерпе́ние твое́ Боже́ственное ижди́вшаго. В пребыва́нии прегреше́ний, возврати́, Влады́ко, ве́дый мою́ не́мощь сло́ве, и ле́ность, и злому́дрие.

И ныне, Богородичен: Боже́ственная клеще́, я́же Боже́ственнаго у́гля неизрече́нно прие́мши, Богоро́дице, страсте́й мои́х разжже́нное у́глие угаси́, Пречи́стая, росо́ю Твои́х моли́тв, и всесла́вных и Боже́ственных апо́стол.

Пе́снь 9

Ирмо́с: В зако́не се́ни и писа́ний о́браз ви́дим ве́рнии, вся́к му́жеский по́л ложесна́ разверза́я, свя́т Бо́гу: те́м перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

И́же словесы́ Твои́х ученик, утверди́л еси́ земны́я концы́ Отца́ безнача́льнаго сло́ве: те́х мольба́ми, и мене́, к страсте́м безслове́сным попо́лзшася, и бесо́вским прельще́нием потопля́ема уще́дри.

Душе́ моя́, страсте́й рабо́тающая устремле́нием, пострада́вшему на́с ра́ди принеси́ мольбы́, я́ко да изба́вит Тя́ лю́тых, моля́щымся проявле́нне свяще́нным ученико́м, и уподо́бльшымся того́ плотски́м страда́нием.

Слава: Христо́вы ученицы́, егда́ с ни́м суди́ти ся́дете суду́ пови́нных, неосужде́нну мою́ ду́шу соблюди́те, оскверне́нную безме́стными де́лы, я́ко блази́и мои́ предста́телие, и я́ко ми́ра засту́пницы.

И ныне, Богородичен: Де́во Чи́стая, Де́во Пречи́стая, Христо́ва пала́то, Де́во Пресвята́я, Свята́го Святы́х Бо́га, па́че вины́ и сло́ва ро́ждшая, со апо́столы святы́ми, о все́х моли́ся.

Молитва

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.