Канон святым апостолам, глас 2.

Тропарь, глас 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́м апо́столом, творе́ние Феофа́ново. Гла́с 2.

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Припев: Святии апостоли, молите Бога о нас.

Све́та Боже́ственнаго мо́лния ве́рою бы́вше, светови́днии Спа́совы апо́столи, всего́ мя просвети́те омрача́ема сласте́й че́рностию, и в ле́ности все́ мое́ житие́ проше́дша.

Ученицы́ и дру́зи Христо́вы, дру́га мя́ бы́вша врагу́, злы́х ра́ди присвое́ния, от сего́ мя избавля́йте сподви́жуще мою́ ду́шу к любви́, возлюби́вшаго ро́д челове́чь благосты́ни ра́ди.

Слава: Смире́нная душе́ моя́, пре́жде сме́рти потщи́ся пока́ятися, и себе́ умерщвле́нную пла́чи: да я́ко Ла́заря четверодне́внаго воскреси́вый я́ко милосе́рд, и Тебе́ воскреси́т апо́стол мольба́ми.

И ныне, Богородичен: Блага́го ро́ждши Бо́га, Пречи́стая, все́х благотворя́щаго, тле́нием содержи́мых, того́ моли́, Пренепоро́чная, со проро́ки, и му́ченики, и апо́столы, все́х изба́вити от напа́стей.

Пе́снь 3

Ирмо́с: Процвела́ е́сть пусты́ня, я́ко кри́н Го́споди, язы́ческая неплодя́щая Це́рковь, прише́ствием Твои́м, в не́йже утверди́ся мое́ се́рдце.

Учи́теля стяжа́вше святи́и прему́дрость о́тчую ду́хом, е́ллинскую обуи́сте прему́дрость, богови́дцы досточу́днии.

Непло́дие души́ моея́ разреши́те всехва́льнии, и благоча́дие дея́ний, в доброде́телех приноси́ти сотвори́те, я́ко сло́ва самови́дцы достоблаже́ннии.

Слава: Лю́те мя́ уяде́на ны́не ядови́тым угрызе́нием вра́жиим, исцели́ мольба́ми Апо́стол Твои́х, благоде́телю все́х, Многоми́лостиве.

И ныне, Богородичен: Бо́га преблага́го умоли́, Пречи́стая, со Апо́столы все́ми, от вся́каго вре́да, и обстоя́ния, и бе́д изба́витися чту́щым Тя́.

Седален, глас 4.

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Пе́снь 4

Ирмо́с: Прише́л еси́ от Де́вы, ни хода́тай, ни А́нгел, но са́м Го́споди вопло́щься, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

А́лчуща мя́ всегда́, и гла́дом иста́ема, спасе́ния сне́дьми насы́ти, Еди́не Человеколю́бче, Боже́ственными мольба́ми Апо́стол, во все́м ми́ре пропове́давших Тя́.

На мо́ре мирско́е наве́л еси́ все́х, я́ко ко́ни, Человеколю́бче, сла́вныя апо́столы Твоя́, того́ возмуща́ющыя сла́ныя неве́рствия го́рькия во́ды.

Слава: Со́лнца Христа́ су́щым во тьме́ возвести́вше, во тьме́ мя лежа́ща грехо́вней просвети́те, апо́столи прехва́льнии, возбраня́юще лука́вым помысло́м се́рдца моего́.

И ныне, Богородичен: Всепе́тая, я́же Бо́га препе́таго ро́ждшая, о пою́щих Тя́ со апо́столы моли́, я́ко да изба́вимся от грехо́в, и бе́д и озлобле́ния.

Пе́снь 5

Ирмо́с: Хода́тай Бо́гу и челове́ком бы́л еси́ Христе́ Бо́же: Тобо́ю бо, Влады́ко, к светонача́льнику Отцу́ Твоему́, от но́щи неве́дения приведе́ние и́мамы.

Вели́кий па́стырь посреде́ волко́в посла́ я́ко о́вцы, Боже́ственныя ученики́ своя́, те́х претворя́ющя Бо́жиею си́лою креще́ния, и добро́тою слове́с.

Боже́ственным све́том, я́же во тьме́ пре́лести просвети́сте Апо́столи сердца́. Те́мже молю́ вы́, отемне́наго мя́ сластьми́ мра́чными, просвети́те, богоблаже́ннии.

Слава: Окая́нная душе́, пре́жде конца́ потщи́ся и пока́йся, Го́сподеви зову́щи: согреши́х Ти́, Влады́ко, прости́ Апо́стол ра́ди, и спаси́ мя я́ко милосе́рд.

И ныне, Богородичен: Све́том Твои́м озари́ во тьме́ лежа́ща мя́, све́та жили́ще, и со Апо́столы моли́ся, Пренепоро́чная, от вся́кия ну́жды изба́вити мя́ Твои́ми моли́твами.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

И́же во́ду живо́тную нося́ще, та́емую ду́шу мою́ зно́ем грехо́вным молю́ся, ученицы́ Спа́совы напо́йте.

Небеса́ мы́сленная бы́вше, богоза́рнии Апо́столи, сла́ву Бо́жию испове́дасте неизрече́нную, ю́же улучи́ти на́м все́м моли́теся.

Слава: В пучи́не лю́те волну́ющийся, к Тебе́, Христе́, и́же все́х Окорми́телю прихожду́, ра́ди Апо́стол Твои́х, ко спаси́тельному приста́нищу упра́ви мя́.

И ныне, Богородичен: Со все́ми вы́шними си́лами, со проро́ки, и Апо́столы, и му́ченики, о на́с моли́ сы́на Твоего́, Богоневе́сто.

Кондак, глас 2:

Тве́рдыя и Боговеща́нныя пропове́датели, верх учени́к Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и смерть прия́л еси́ па́че вся́каго всепло́дия, Еди́не све́дый серде́чная.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Огне́м Боже́ственнаго ду́ха предвозжже́ни бы́вше Апо́столи, пре́лести у́глие угаси́сте, Бо́жие же раче́ние во уме́х все́х ве́рных воспали́сте: те́мже велегла́сно ва́с чти́м.

Ми́р возненави́десте, и я́же в ми́ре, Христа́ возлюби́сте, в ми́ре пло́тию челове́ком примеси́вшася: его́же моли́те, Боже́ственнии Апо́столи, я́же в житии́ мя все́х лю́тых свободи́ти.

Слава: Судие́ пра́ведне Сердцеве́дче, и́же еди́н сокрове́нная ве́дый моя́ согреше́ния, в ча́с суда́ не осуди́ мене́, ниже́ отсле́ши мя́ во о́гнь, моли́твами Апо́стол Твои́х.

И ныне, Богородичен: Огне́м Божества́ не опали́лася еси́, неизрече́нно ро́ждши Де́во, бра́ку неиску́сна бы́вши. Те́мже со Апо́столы моли́ся, Чи́стая, ве́чнаго мя́ пла́мене свободи́ти, Тебе́ сла́вящаго.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щыя: благослови́те вся́ дела́ Госпо́дня Го́спода.

Телови́дно на ва́с наше́д во о́гненном ви́де Пресвяты́й Ду́х, соде́ла я́ко свети́ла, попаля́юща у́бо безбо́жие, просвеща́юща же вся́ благоче́ствующыя, Боже́ственнии сло́ва апо́столи.

Страстьми́ лю́те обурева́емое неиспра́вленное се́рдце мое́ исцели́. Ще́дре, молю́ся: ду́шу мою́ просвети́, и у́м мо́й напра́ви прекло́ншийся в зло́бу, ученико́в Твои́х мольба́ми.

Слава: Воздохни́, душе́ моя́, и прослези́ся приле́жно, и себе́ пре́жде конца́ воспла́чи, пре́жде да́же не пости́гнет тебе́ пла́чь неуте́шимый, и возопи́й Го́сподеви: спаси́ мя, Ми́лостиве, моли́твами Апо́стол Твои́х.

И ныне, Богородичен: Пе́щь иногда́ неопа́льшая дете́й, Твое́ Рождество́ прообража́ше, Де́во Всенепоро́чная. Сего́ ра́ди молю́ Тя: со Апо́столы моли́ся, со все́ми проро́ки, огня́ гее́нны изба́вити мя́.

Пе́снь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.

Апо́столи сла́внии, Апо́столи блаже́ннии, ученицы́ Спа́совы, пропове́дницы всему́дрии, от вся́каго мя́ изба́вите вре́да, вся́каго гне́ва, вся́каго греха́, вся́каго обстоя́ния, и разли́чных напа́стей.

Мене́ осужде́ннаго, мене́ неиспра́вленнаго, Твоя́ повеле́ния небре́гшаго, и бесо́вским прельще́нием умовре́дно после́довавша, возврати́, Го́споди, моли́твами Апо́стол Твои́х.

Слава: Ду́шу неиспра́влену приношу́, и со́весть погребе́ную с вещми́ прегреше́ний, и оскверне́нное се́рдце, и по́мысл окаля́н, вопию́ Ти, Человеколю́бче: Апо́стол ра́ди уще́дри мя́ ми́лостию Твое́ю.

И ныне, Богородичен: Апо́столи Пречи́стая, Твоего́ Сы́на пропове́даша во все́м ми́ре, Бо́га и Челове́ка. Те́мже с ни́ми моли́ся, во стра́шном дни́ суда́ изба́витися му́к, ве́рою Тебе́ велича́ющым.

Молитва

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.