Канон Небесным Силам Безплотным (Архангелам и Ангелам), глас 8.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н безпло́тным святы́м а́нгелом. Творе́ние ки́р Феофа́на. Гла́с 8:

Пе́снь 1

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Запев: Вси Небеснии Силы безплотнии, молите Бога о нас.

Святы́х А́нгел я́ко началово́дцы, и боговиде́ния наслажда́ющеся све́тлостно, Благода́вца и Спа́са о на́с моли́те, Арха́нгели. [Два́жды.]

Слава: Ну́ждными одержи́ми напа́стьми, к ва́м я́ко предста́телем ны́не прибега́ем ве́рнии, Арха́нгели Боже́ственнии, Влады́ку ны́не о на́с приле́жно умоли́те.

И ныне, Богоро́дичен: Бу́ди ми́, Де́во, прибе́жище, приста́нище же и стена́ и предста́тельница, Я́же Бо́га пло́тию ро́ждши Богома́ти, Изба́вителя всеще́драго.

Пе́снь 3

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Дарми́ многообра́зными а́нгельскаго чи́на, я́ко чинонача́льницы явля́еми архистрати́зи, украша́еми. Христо́вы Це́ркви тве́рдо сохраня́йте предста́тельствы ва́шими. [Два́жды.]

Слава: Ору́жием благоволе́ния, ве́рных исполне́ния, правосла́вия добро́тами ны́не венчава́еми, от напа́стей я́ко благосла́внии предста́телие Бо́жии изба́вите, Боже́ственнии арха́нгели.

И ныне, Богоро́дичен: Жи́зни нетле́нныя Боже́ственная се́нь была́ еси́, еди́на от ве́к я́вльшися, Де́во Ма́ти Чи́стая. Те́мже, Всепе́тая, су́щаго мя́ в се́ни сме́ртней, к животу́ наста́ви ны́не моли́твами Твои́ми.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Услы́шах, Го́споди, смотре́ния Твоего́ та́инство: разуме́х дела́ Твоя́, и просла́вих Твое́ Божество́.

Дво́ице пе́рвенствующая арха́нгельскому ны́не собра́нию, притека́ющыя к покро́ву ва́шему, от вся́кия беды́ спаса́йте. [Два́жды.]

Слава: Зри́телие све́тлости богонача́льная, и благодая́ния архистрати́зи всесла́внии, ны́не ста́до ва́ше просвеща́йте.

И ныне, Богоро́дичен: Свяще́нно Тя́ сла́вят безпло́тных Боже́ственная во́инства, Богома́ти Всенепоро́чная: Зижди́теля бо и́х родила́ еси́.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою, Тво́й ми́р пода́ждь на́м, Человеколю́бче.

О́крест Бо́га предстоя́ще архистрати́зи, и отту́ду истека́ющими заря́ми просвеща́еми, ста́до ва́ше сохрани́те. [Два́жды.]

Слава: Избавле́ние на́м дарова́ти, моли́теся Влады́це и Бо́гу на́шему, я́ко предста́телие все́х избавле́ния.

И ныне, Богоро́дичен: Ми́ро та́йное имену́ем Тя́, Всечи́стая, су́щее, ро́ждшую Бо́га пло́тию, благоуха́ния точа́щаго дарова́ния.

Пе́снь 6

Ирмо́с: Моли́тву пролию́ ко Го́споду, и Тому́ возвещу́ печа́ли моя́: я́ко зо́л душа́ моя́ испо́лнися, и живо́т мо́й а́ду прибли́жися: и молю́ся я́ко Ио́на: от тли́, Бо́же, возведи́ мя.

Ны́не престо́лу стра́шному предстоя́ти неукло́нно сподо́бившеся богови́дцы, и озаре́нии Святы́я Тро́ицы насыща́етеся: к ва́м прибега́ющым от напа́стей и страсте́й моли́те изба́витися, Арха́нгели. [Два́жды.]

Слава: Стра́нствия Влады́чняго моли́теся ва́с пе́сненно воспева́ющым получи́ти, и ра́дости присносу́щныя сподо́битися, и Боже́ственныя све́тлости, Арха́нгели богови́днии, Гаврии́ле и Михаи́ле всесла́внии.

И ныне, Богоро́дичен: Одушевле́нный Влады́чний черто́г, и́же све́тлыми луча́ми де́вства светови́дне, я́коже кри́н сия́ющий посреде́ терно́внаго мяте́жа, Пречи́стая и Благоле́пная Богоро́дица Де́ва да сла́вится.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша пою́ще: отце́в Бо́же благослове́н еси́.

Многоразли́чную благода́ть, архистрати́зи Боже́ственнии, ва́м дарова́л е́сть, и́же все́х благода́тель, его́же ны́не Це́рковь пою́щую спаса́йте: оте́ц на́ших Бо́же благослове́н еси́. [Два́жды.]

Слава: Си́лою Всеви́дца укрепля́еми, вся́ концы́ земли́ я́сно назира́ете, и все́х спаса́ете ве́рою пою́щих: оте́ц на́ших Бо́же, благослове́н еси́.

И ныне, Богоро́дичен: Спаси́тельное приста́нище, Богоро́дице Де́во, Тя́ ны́не иму́ще, жите́йских бе́д избега́ем и мяте́жей, Сы́ну Твоему́ зову́ще: оте́ц на́ших Бо́же благослове́н еси́.

Пе́снь 8

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Предстоя́тели и певцы́ неизрече́нныя и неизглаго́ланныя Твоея́ сла́вы, приими́ Тебе́ ны́не моля́щыяся, Христе́, во ве́ки. [Два́жды.]

Слава: Еди́не бла́же, Христе́, о на́с моля́щаяся ны́не во́инства а́нгельская приими́, Тебе́ воспева́ющая во ве́ки.

И ныне, Богоро́дичен: Светле́йшими Твои́ми блиста́ньми, Богома́ти, ве́рою пою́щыя Тя́ просвеща́еши, Тя́ восхваля́ющыя во вся́ ве́ки.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Лико́м безпло́тных ны́не Твою́ Це́рковь доброде́телию подража́ющу покажи́, огражда́я А́нгелы, Христе́, ста́до Твое́.

Слава: Душа́м спасе́нию от Бо́га дарова́тися, А́нгели засту́пницы моли́теся, прибега́ющым под кро́в ва́ш, всесла́внии.

И ныне, Богоро́дичен: Я́ко у́тро су́щым во тьме́ и заблу́ждшым, Де́во, пра́ведное со́лнце на руку́ держа́щи Христа́, возсия́ла еси́.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.