Канон Небесным Силам Безплотным (Архангелам и Ангелам), глас 7.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н святы́м безпло́тным А́нгелом, [его́же краегране́сие: Безпло́тных похвалу́ седьму́ю ношу́.] Творе́ние Феофа́ново. Гла́с 7:

Пе́снь 1

Ирмо́с: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

Запев: Вси Небеснии Силы безплотнии, молите Бога о нас.

Неисчетноси́льне Христе́, Твои́м све́том озари́в мо́й у́м, А́нгелы Твоя́ пе́ти вдохни́, я́ко всеси́лен. [Два́жды.]

Слава: Кре́пкую иму́ще све́тлость, из богонача́льнаго происходя́щу исто́чника, небе́снии ли́цы пе́сньми Христа́ почита́ют.

И ныне, Богоро́дичен: Укра́шену Тя́, Чи́стая, Боже́ственными светлостьми́, ве́рнии ве́мы, я́ве ра́дуйся, Тебе́ вси́ зове́м.

Пе́снь 3

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́ Го́споди, и Тя́ пое́т ду́х мо́й.

Хода́тае бы́вше Боже́ственнаго явле́ния ли́цы а́нгельстии, и невеще́ственно зовете́ непреста́нно: свя́т еси́ Го́споди, спаса́я ду́шы на́шя.

Любо́вию зако́нною дру́г другу Боже́ственная сия́ния отдаю́ще, благочи́нно Христу́ поете́: свя́т еси́ Го́споди, Еди́не Многоми́лостиве.

Слава: Пе́рвей зари́ вторы́я све́тлости житию́ благоче́ствующии поревну́им, Христу́ пою́ще: свя́т еси́ Го́споди, спаса́я ду́шы на́шя.

И ныне, Богоро́дичен: И́же от не су́щих вся́ приведы́й во́лею, от Тебе́ Де́во, пло́ть взае́млет Сло́во, челове́к бы́в, за милосе́рдие Человеколю́бец.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся, Го́споди.

Исцели́ти ду́ши моея́ стру́пы, предстоя́ще Христу́ я́ко служи́тели избра́ннии, ли́цы а́нгельстии тому́ помоли́теся.

Во́инства безпло́тных, Влады́ко, Тво́й Престо́л благогове́йно обстоя́ще, я́сно при́сно вопию́т: сла́ва си́ле Твое́й, Го́споди.

Слава: Удиви́шася а́нгельстии чи́нове, зря́ще Тебе́, Христе́, с пло́тию на земли́ живу́ща со сме́ртными челове́ки.

И ныне, Богоро́дичен: Всепе́тая, и Богома́ти Пречи́стая, ро́ждшая Бо́га несказа́нно пло́тию, Тебе́ мо́лимся, моли́ спасти́ся на́м.

Пе́снь 5

Ирмо́с: К Тебе́ у́тренюю, и Тебе́ вопию́, благоутро́бне Го́споди: омраче́нную грехми́ ду́шу мою́, све́том озари́в за́поведей Твои́х, наста́ви.

Свяще́ннейшими и многовеща́нными усты́ пою́т серафи́ми пребезнача́льное и Пребоже́ственное нача́ло, невеще́ственными светоли́тии просвеща́еми.

Свяще́нными и многосве́тлыми кри́лы покрыва́ются херуви́ми, к Боже́ственному сия́нию не сме́юще зре́ти, му́дрости Пребоже́ственныя приведе́ния.

Слава: Разу́мно Боже́ственнаго и всебога́тнаго, престо́ли сла́внии, красне́йшаго наслажда́ющеся блиста́ния, зри́тели неизрече́нных преми́рно явля́ются.

И ныне, Богоро́дичен: Ум пребоже́ственный, челове́ческому, Пречи́стая, примеша́ется в пречи́стем и всесвяте́м Твое́м чре́ве, соедини́вся неслия́нно и неизме́нно по ипоста́си.

Пе́снь 6

Ирмо́с: Ио́на из чре́ва А́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Ю́ношески светлостьми́ господонача́лия облиста́еми, и неизрече́нную сла́ву Того́ воспева́юще, госпо́дьствия при́сно явля́ются. [Два́жды.]

Слава: Любе́зно си́льне премогу́щую си́лу, взира́юще Боже́ственныя си́лы, в кре́пости пребыва́ют я́ве возмога́еми.

И ныне, Богоро́дичен: От ца́рска коле́на произше́дши, Де́во, родила́ еси́ па́че естества́ сло́во все́х Царя́, и де́ва вои́стинну соверши́лася еси́.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́ Го́споди Бо́же оте́ц на́ших.

Славосло́вят неукло́нно, Тво́й престо́л, Христе́, я́ве окружа́юще, у́мне а́нгельская ликостоя́ния, благослове́н еси́, зову́ще, Бо́же оте́ц на́ших. [Два́жды.]

Слава: Отону́дными Тя́ нача́ла усе́рдии, о еди́ном нача́ле невеще́ственно обраща́еми, непреста́нными славословле́ньми зову́т: благослове́н еси́ Бо́же оте́ц на́ших.

И ныне, Богоро́дичен: Еди́ну Ипоста́сь во двою́ существу́, Богороди́тельнице, Христа́ Еди́наго без се́мене родила́ еси́, стра́шное соверша́юща смотре́ние, Бо́га оте́ц на́ших.

Пе́снь 8

Ирмо́с: Еди́наго безнача́льнаго Царя́ сла́вы, его́же благословя́т небе́сныя си́лы, и трепе́щут чи́ни а́нгельстии, по́йте. свяще́нницы, лю́дие превозноси́те Его́ во ве́ки.

И́же все́ жела́ние к Бо́гу прело́жше, я́же отону́ду наслажда́ющеся заря́ми арха́нгели, ва́с воспева́ющым изба́витися напа́стей, Христа́ умоли́те все́х Царя́. [Два́жды.]

Слава: У́мове су́ще честне́йшии, вся́каго измене́ни веще́ственнаго пристра́стия, о А́нгели! Спаси́те все́х, любо́вию с ва́ми Христа́ превознося́щих во вся́ ве́ки.

И ныне, Богоро́дичен: Све́т непристу́пный, Богоро́дице Де́во, во чре́ве Твое́м прие́мши неизрече́нно, просвети́ла еси́ су́щыя во тьме́ жития́, сла́вити благоче́стно Христа́ произше́дшаго из Тебе́ несказа́нно.

Пе́снь 9

Ирмо́с: Всепе́тая небе́с превы́шшая, безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

Сия́ньми богонача́льнаго светоли́тия наслажда́ющеся вси́ ли́цы а́нгельстии, препросла́вленнаго Бо́га непреста́нно воспева́ют, и сла́вят при́сно велича́юще. [Два́жды.]

Слава: Изба́витися мне́ страсте́й обдержа́ния, о херуви́ми и серафи́ми, си́лы, вла́сти, а́нгели, арха́нгели, нача́ла же и престо́ли, и госпо́дьствия, Христа́ моли́те приле́жно.

И ныне, Богоро́дичен: Я́ко Ма́ти ны́не к Сы́ну Твоему́, Богоро́дице, дерзнове́ние иму́щи, любо́вию пою́щих Тя́ изба́ви от прегреше́ний лю́тых, и неду́гов, и бе́д, Всесвята́я: да вси́ Тя при́сно велича́ем.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.