Канон Небесным Силам Безплотным (Архангелам и Ангелам), глас 5.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н, безпло́тным. Творе́ние Феофа́ново, [его́же краегране́сие: Пе́ние а́нгелом пя́тое.] Гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.

Запев: Вси Небеснии Силы безплотнии, молите Бога о нас.

Таи́нницы богонача́лия светода́тельнаго, и того́ луча́ми первоявле́ннаго сия́юще, све́том просвети́ти ду́шу мою́, А́нгели, Влады́ку умоли́те. [Два́жды.]

Слава: Иму́ще дерзнове́ние, я́ко престо́лу высо́кому предстоя́ще вси́, благочести́вне пою́щих ва́с, бе́д изба́вите предста́телие чи́на небе́снаго, о Архистрати́зи!

И ныне, Богоро́дичен: Разреши́ся кля́тва, и печа́ль преста́: Благослове́нная бо и благода́тная, ве́рным ра́дость возсия́, благослове́ние все́м конце́м цветонося́щи Христа́.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

И́же сло́вом ликова́ния вы́шним си́лам прему́дро составле́й, Твою́ бла́гость неисчетноси́льну показу́яй, си́х предста́тельствы Це́рковь Твою́ утверди́, Еди́не Бла́же и Человеколю́бче. [Два́жды.]

Слава: Украша́я неизрече́нною све́тлостию А́нгелы, Христе́, и те́ми утвержда́я це́рковь Твою́, Милосе́рде, окая́нную мою́ ду́шу те́ми просвети́, молю́ся Ти́, Влады́ко, не помина́я мои́х безчи́сленных грехо́в.

И ныне, Богоро́дичен: Ты́ Ма́ти Бо́га несочета́нно была́ еси́, безпло́тныя ли́ки просвеща́ющаго, еди́но богонача́лие в трие́х пе́ти непреста́нно свяще́нствиих, и госпо́дьствиих, Пречи́стая Де́во Всепе́тая.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й твои́х, спасти́ пома́занныя Твоя́ прише́л еси́.

А́нгельския соста́вил еси́ све́тлости, богоде́тельными луча́ми благопода́тливе просвети́л еси́: я́ко си́лен в кре́пости, сло́во Твое́ испо́лнивый, Человеколю́бче. [Два́жды.]

Слава: Земна́я теле́с мудрова́ния отложи́м, ве́рнии, житию́ подо́бящеся безпло́тных чино́в, и у́м впери́м ду́хом.

И ныне, Богоро́дичен: Бу́ди ми́ Предста́тельнице Пренепоро́чная, прибежище и приста́нище, страсте́й бу́рю отгоня́щи: я́же а́нгельския ли́ки, добро́тою без сравне́ния побе́ждшая.

Пе́снь 5

Ирмо́с: Одея́йся све́том, я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко еди́н благоутро́бен.

Обходя́ще всея́ земли́ концы́, влады́чняя благодея́ния ве́рным прино́сите, и сохраня́ете всесла́внии арха́нгели. [Два́жды.]

Слава: Словеси́ Твоему́ повину́ющеся сло́ве Бо́га и Отца́, небе́снаго чинонача́лия сла́вная украше́ния, Твоея́ све́тлости све́том озаря́ются.

И ныне, Богоро́дичен: Все́ мое́ жела́ние к Тебе́ предста́ви, я́же па́че сло́ва, жела́ния сла́дость роди́вшая, Тебе́ Богоро́дицу, Чи́стая, ве́дущым.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Священноукраша́еми а́нгельстии собо́ри избра́ннии, светода́тельными сия́нии просвеща́етеся, богоде́тельным озаре́нием я́ве соверша́еми. [Два́жды.]

Слава: Трисве́тлыми заря́ми бога́тно преукраша́еми А́нгели и Арха́нгели, богозра́чно окая́нную мою́ ду́шу просвети́те ва́шими моли́твами.

И ныне, Богоро́дичен: Зачала́ еси́, Пречи́стая, все́х Зижди́теля и Бо́га, Его́же с тре́петом зря́т ра́дующеся, всеблагогове́йно предстоя́ще А́нгели.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: Превозноси́мый отце́в Госпо́дь пла́мень угаси́, о́троки ороси́ согла́сно пою́щыя: Бо́же, благослове́н еси́.

Неисчетноси́льную Христо́с явля́я кре́пость, ва́с архистрати́зи поста́вил е́сть, научи́ воспева́ти: Бо́же, благослове́н еси́. [Два́жды.]

Слава: И́же мно́жество безчи́сленное безпло́тных чино́в украша́яй бла́гостию, ве́рных составле́ния сподо́би пе́ти Тя́: Бо́же, благослове́н еси́.

И ныне, Богоро́дичен: Страстьми́ коле́блема, Де́во, Ты́ ны́не утверди́ мя, я́же все́м источи́вшая ве́рным безстра́стие, ве́рою пою́щым: Бо́же, благослове́н еси́.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая Го́спода по́йте, и превозноси́те во вся́ ве́ки.

Привлача́т мя́ ны́не а́нгельстии собо́ри, пе́ти пе́сньми и серде́чным жела́нием, с ни́миже пою́: дела́ вся́кая Го́спода по́йте, и превозноси́те Его́ во ве́ки. [Два́жды.]

Слава: Слуги́ пресвяте́й и трисо́лнечней зари́, спасти́ся моли́те ве́рою пою́щым: Го́спода воспева́йте дела́, и превозноси́те Его́ во ве́ки.

И ныне, Богоро́дичен: Две́ри све́та, Де́во Ма́ти Отрокови́це: све́том Твои́м озари́ ве́рою пою́щих: Го́спода воспева́йте дела́, и превозноси́те Его́ во ве́ки.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.

Чино́м нача́льницы бы́вше а́нгельским, пресве́тлый Михаи́ле, и ты́ Гаврии́ле Боже́ственнаго воплоще́ния всеи́стинный пропове́дник бы́в, все́х сохраня́йте пою́щих ва́с сла́внии. [Два́жды.]

Слава: И́же бога́тыми дарова́ньми преизлива́яй своя́ сокро́вища, и́же чи́ны приведы́й а́нгельския, с ни́ми же прише́д я́ко судия́, и все́х Ца́рь, спаси́ мя, Влады́ко, прибега́ющаго к ми́лости Твое́й.

И ныне, Богоро́дичен: У́мне А́рха́нгели, Вла́сти, Престо́ли, Херуви́ми, Си́лы и Серафи́ми, А́нгели све́тлии, Нача́ла и Госпо́дьствия, Твоему́ Сы́ну, Пренепоро́чная Чи́стая, с тре́петом слу́жат, Богоро́дице всеблаже́нная.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.