Канон Небесным Силам Безплотным (Архангелам и Ангелам), глас 3.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н святы́м безпло́тным а́нгелом, [его́же краегране́сие: Творю́ тре́тие пе́ние безпло́тным.] Феофа́ново. Гла́с 3.

Пе́снь 1

Ирмо́с: Пе́снь но́вую пои́м, лю́дие, от Де́вы Ро́ждшемуся во спасе́ние на́ше, и еди́но Сотво́ршему с Небе́сными земна́я, я́ко просла́вися.

Запев: Вси Небеснии Силы безплотнии, молите Бога о нас.

Безнача́лен све́т, и пода́телен светоявле́ния сы́й всего́, Христе́ Бо́же, мое́ помышле́ние просвети́ предста́тельством Твои́х си́л.

Ра́дующеся ангелоле́пно, всебога́тым прича́стием а́нгельстии ли́цы, Твои́ми, Спа́се, кра́сными сия́нии та́йно облиста́ются.

Слава: Я́ко благи́й животво́рец благоде́тельный ду́х исходя́й от отца́, небе́сныя си́лы утверди́ неприкоснове́нными Боже́ственными благода́тьми.

И ныне, Богоро́дичен: Чинонача́льниче Бо́жий Гаврии́ле безпло́тных лико́в, и ны́не пребога́те, гла́с ра́достен обра́дованней возопи́й: ра́дуйся, Всенепоро́чная.

Пе́снь 3

Ирмо́с: Лу́ки сокруши́л еси́ вра́жии, и щиты́ сте́рл еси́ кре́постию Влады́ко Христе́, утвержде́ние на́ше, Свя́т еси́ Го́споди.

Струи́ теку́щыя и ре́ки бла́гости, яви́л еси́ благи́й а́нгельския ли́ки, сокрове́ннаго Твоего́ та́инства заре́ю сия́ющих.

Да пока́жеши я́ве сокро́вища бога́тства Твоего́, и кре́пости, Влады́ко Христе́, Твоея́ сла́вы прича́стники у́мныя си́лы приве́л еси́.

Слава: С тре́петом Тебе́ служе́бне а́нгельския све́тлости предстоя́ще, пою́т при́сно Твою́ си́лу, Христе́, неисчетноси́льную.

И ныне, Богоро́дичен: Всего́ прия́т из Тебе́ неизме́нно челове́ка, и́же Влады́ка сего́ всего́, Богома́ти, и Тебе́ исто́чника благода́ти яви́л е́сть.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Стра́нна и неизрече́нна Рождества́ Твоего́ та́йна: услы́шах слу́х Тво́й, и убоя́хся, и веселя́ся вопию́ Ти: си́ле Твое́й сла́ва, Человеколю́бче.

О́блацы и́же трисо́лнечное светозаре́ние прие́млюще, принесо́стеся Боже́ственным хоте́нием, тро́ическая украше́ния, окормля́еми си́лою ду́ха.

В ми́р посыла́ются к хотя́щым ве́ровати Тебе́, я́коже храни́телие спасе́ния благочести́вых А́нгели, соблюда́юще, Cпа́се, рабы́ Твоя́.

Слава: Просвеща́ются та́йно А́нгели, чи́стым приближе́нием, и богонача́льным Твои́м осия́нием: си́ле Твое́й сла́ва, зову́ще, Человеколю́бче.

И ныне, Богоро́дичен: Ра́бски моле́бник ны́не прихожду́ в кро́в тво́й, Пренепоро́чная: изба́ви мя́, Богороди́тельнице, страсте́й смуще́ния, я́же безстра́стию вино́внаго ро́ждшая.

Пе́снь 5

Ирмо́с: На земли́ неви́димый яви́лся еси́, и челове́ком во́лею сожи́л еси́ непостижи́мый, и к Тебе́ у́тренююще, воспева́ем Тя́, Человеколю́бче.

Со Отце́м Сы́на и Ду́ха, трисия́нным све́том просве́щшеся ве́рнии, воспои́м еди́но Божество́, со а́нгельскими во́инствы.

Свещы́ сообраща́ющыяся, незаходи́мым сия́нием Божества́ пребоже́ственнаго, проявле́нне обога́щшеся, а́нгельстии чи́ни пропове́дают.

Слава: Еди́но нача́ло пребезнача́льное чести́ серафи́мы уча́т, вопию́ще гла́с трисвяты́й я́ве, ду́хом просвеща́еми а́нгели Божества́.

И ныне, Богоро́дичен: Без се́мене, Отрокови́це, Тебе́ Арха́нгел Гаврии́л роди́ти Животода́вца благовести́, Богоро́дице Всечи́стая, с небесе́ соше́д.

Пе́снь 6

Ирмо́с: Селе́ния Ио́на, е́же в преиспо́днем а́де, есте́ственный о́браз бы́в, вопия́ше: возведи́ от тли́ живо́т мо́й, Человеколю́бче.

Пе́рвое и вседе́тельное богонача́лия сия́ние, Арха́нгели и А́нгели, си́льно пою́т зову́ще, с нача́лы и властьми́ и си́лами, гла́сы немо́лчными Го́спода. [Два́жды.]

Слава: И́же ми́р у́мный всесли́чным чи́ном по чину́ украше́й неви́димо, сему́ уподобля́тися благочи́нию, честну́ю Це́рковь благоволи́.

И ныне, Богоро́дичен: Исцеле́ний Тя́ исто́чник приснотеку́щ, е́же в Тя́ все́льшееся Сло́во показа́: моея́ у́бо души́ я́звы, Богоро́дице Де́во, исцели́.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: Го́рдый мучи́тель, но дете́й бы́сть игра́лище: я́коже бо пе́рсть попра́вше седмери́чный пла́мень, поя́ху: благослове́н еси́ Го́споди, Бо́же оте́ц на́ших.

Тве́рдым умо́м и до́блественным о́ком, зря́ще первонача́льныя све́тлости, прича́стием быва́ете све́ти втори́и, а́нгельстии ли́цы, благослове́н еси́, зову́ще, Бо́же оте́ц на́ших. [Два́жды.]

Слава: Неукло́нным жела́нием, и неизда́тельною любо́вию води́ми су́ще, добро́тами зижди́теля, положе́нием бы́сте свети́ла втора́я, ли́цы а́нгельстии, благослове́н еси́ зову́ще, Бо́же оте́ц на́ших.

И ныне, Богоро́дичен: Воплоще́нное родила́ еси́, Богоро́дице, сло́во безнача́льное, е́же из отца́ без ма́тере предве́чное Боже́ственным рождество́м, благослове́н, Влады́чице, пло́д твоего́ чре́ва.

Пе́снь 8

Ирмо́с: Веще́ственнаго огня́ пла́мень невеще́ственным увяди́ша, богозри́мии о́троцы, и поя́ху: благослови́те вся́ дела́ Госпо́дня Го́спода.

Я́ко все́х соде́тель, А́нгелы умы́слил еси́, и предста́ша ти́ со стра́хом, зову́ще: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Прича́стием Боже́ственнаго огня́, я́коже пла́мень бы́вше небе́сныя умы́ зову́т: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Слава: Невеще́ственныя и у́мныя А́нгелы пре́жде соста́вил еси́ ви́димых все́х, непреста́нно Тебе́ зову́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

И ныне, Богоро́дичен: Сло́во Отчее, па́че сло́ва воплоще́нное, Богороди́тельнице Де́во, родила́ еси́: Его́же пою́т вся́ дела́ я́ко Го́спода, и превозно́сят во вся́ ве́ки.

Пе́снь 9

Ирмо́с: Сла́дкою пречи́стаго Твоего́ Рождества́ стрело́ю уя́звлени, Чи́стая, Твое́й достожела́нней добро́те дивя́щеся, пе́сньми а́нгельскими досто́йно Тя́, я́ко Ма́терь Бо́жию велича́ем.

И́же све́ту вели́кому и пе́рвому ны́не предстоя́ще ли́цы, моли́твенницы сильне́йшии бы́сте о все́х на́с, ва́с, я́коже мо́щно, о Боже́ственнейшии А́нгели Бо́жии, велича́ющих. [Два́жды.]

Слава: Равноси́льную Тро́ицу сла́вити сподо́бльшеся я́сно, тоя́ сия́нием пе́рвее освеща́еми, освети́тися вторы́м сия́нием сподо́бите на́с, и́же ва́с благоче́стно велича́ющих.

И ныне, Богоро́дичен: Тя́ на́шего спасе́ния основа́ние вси́ ве́мы: Твое́ бо Пречи́стое Рождество́ спасло́ е́сть, кро́вию богоде́тельною, пою́щыя Тя́, Богоро́дице, и ве́рно сла́вящыя.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.