Канон Небесным Силам Безплотным (Архангелам и Ангелам), глас 2.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н святы́м небе́сным безпло́тным а́нгелом, [его́же краегране́сие: Пою́ хвалу́ ли́ку а́нгельскому.] Творе́ние Феофа́ново. Гла́с 2.

Пе́снь 1

Ирмо́с: Нетре́ну, необы́чну, немо́кренно морску́ю ше́ствовав стезю́, избра́нный вопия́ше Изра́иль: Го́сподеви пои́м, я́ко просла́вися.

Запев: Вси Небеснии Силы безплотнии, молите Бога о нас.

У́глие богоно́сное, заре́ю разже́гшееся Твоего́ существа́, безпло́тныя яви́л еси́ ли́ки, Тебе́, Христе́, сла́вящыя, я́ко всеси́льна.

Си́лу нетле́ния, и сла́ву стяжа́вше безсме́ртия дарова́нную А́нгели, Христе́, е́же к Тебе́ приближе́нием просвеща́ются.

Слава: Яви́шася светоно́сцы, и́же невеще́ственную показу́юще, и по естеству́ образми́ А́нгели, Христе́, чу́вственне вообразу́ющии чистоту́.

И ныне, Богоро́дичен: Чи́ни а́нгельстии рождеству́ Твоему́, Де́во, е́же па́че естества́, слу́жат ра́дующеся, Чи́стая: си́х бо родила́ еси́ Бо́га и Го́спода.

Пе́снь 3

Ирмо́с: Лу́к сокруши́ся си́льных держа́вою Твое́ю Христе́, и си́лою немощству́ющии препоя́сашася.

И́же естество́м безсме́ртен Бо́г, прему́дре содева́я благода́тию, во́инства безсме́ртная явля́ет. (Дважды)

Слава: Ны́не предстоя́ще жела́нием кра́йним Христу́ спасти́ся все́м на́м, А́нгели, моли́теся.

И ныне, Богоро́дичен: Нача́ло подле́тно прие́м изве́стно из Тебе́, и́же ле́т соде́тель, Ма́ти Присноде́во.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Моли́твенники привожду́ Ти безпло́тныя: и́хже, Ще́дре, прии́м я́ко благоутро́бен, от грехо́в мя́ изба́ви.

Уму́ приближа́ющеся всевино́вному, у́мове Боже́ственнии очища́еми, просвеща́ются превы́шними ра́зумы.

Слава: Боже́ственная украше́ния небе́снаго чинонача́лия, Боже́ственным ду́хом украша́еми, сохраня́еми су́ть непрело́жне.

И ныне, Богоро́дичен: Разуме́в Тя́ издале́ча, Де́во, Бо́га нося́щую воплоще́нна на руку́ Свое́ю, Иса́иа предвозвести́.

Пе́снь 5

Ирмо́с: Угль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшым, богоразу́мия просвеще́ние да́руя.

Боже́ственнаго богонача́лия бли́з сия́юще, Херуви́ми и Серафи́ми, Све́тлостию, со Престо́лы превзя́тыми, богоподо́бно про́чая просвеща́ют.  (Дважды)

Слава: Я́ко всего́ светоли́тия пода́телю, зерца́ла светови́дная сло́ве Бо́жий, приве́л еси́ Твою́ зарю́ с весе́лием и ра́зумом неукло́нным прие́млющая.

И ныне, Богоро́дичен: Ра́дость Тебе́, и́же пра́отцем се́тование разреша́ющую, Гаврии́л свяще́нный Арха́нгел, с Небесе́ слете́в благовествова́ше, Чи́стая Богоневе́сто.

Пе́снь 6

Ирмо́с: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Боже́ственная места́ сла́вы Твоея́, нача́льнаго све́та Влады́ко Христе́, светоблиста́нными разже́гшеся сия́ньми, заре́ю светови́дне ве́чно пребыва́ют. (Дважды)

Слава: Си́лою Боже́ственною укрепля́еми, Серафи́ми зову́ще гла́сы немо́лчными, пе́ние трисвято́е, почита́ти возво́дят на́с естество́ триипоста́сное.

И ныне, Богоро́дичен: Кля́тся, я́коже рече́ Госпо́дь, и́стиною дре́вле Дави́ду, из чре́ва Твоего́ проше́д испо́лни: родила́ бо еси́ Отрокови́це, не́бом и земле́ю ца́рствующаго.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: Вети́и яви́шася о́троцы, любому́дрейшии дре́вле, от богоприя́тныя бо души́, богосло́вяще устна́ми поя́ху: Пребоже́ственный отце́в и на́ш Бо́же, благослове́н еси́.

О́крест престо́ла неизрече́нныя Твоея́ сла́вы, лику́юще при́сно небе́снии у́мове, немо́лчными устна́ми воспева́ют: Пребоже́ственный отце́в и на́ш Бо́же, благослове́н еси́. (Дважды)

Слава: Егда́ ви́деша Тя́ а́нгельстии чи́ни на небеса́ с пло́тию возноси́ма, врата́ небе́сная отверзо́ша Ти́, пою́ще: Пребоже́ственный отце́в и на́ш Бо́же, благослове́н еси́.

И ныне, Богоро́дичен: Зако́на Тя́ нача́ток и проро́ков отрокови́це Гаврии́л показу́я вопия́ше: се́ Ты́ ражда́еши еди́на Всепе́тая, Пребоже́ственнаго отце́м и на́м Бо́га благослове́ннаго.

Пе́снь 8

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Подо́бия Твоея́ бла́гости соста́вил еси́ А́нгелы, за́поведи Твоя́ кре́постию соверша́ющыя, Сло́ве, и споспешеству́ющыя все́м ве́рным зва́ти: осуществова́нная да пое́т Го́спода вся́ тва́рь, и превозно́сит во вся́ ве́ки.

Боже́ственными доброде́тельми небе́сное украси́л еси́ житие́, святы́х А́нгел священнонача́лие, просвеща́я си́х Тебе́, Христе́, вопию́щих: осуществова́нная да пое́т Го́спода вся́ тва́рь, и превозно́сит во вся́ ве́ки.

Слава: Ра́дующеся све́тло, воспои́м Боже́ственное пе́ние безпло́тных неоску́дне, и Влады́ку богосло́вяще, пе́снь с ни́ми возопии́м: осуществова́нная да пое́т Го́спода вся́ тва́рь, и превозно́сит во вся́ ве́ки.

И ныне, Богоро́дичен: Пра́вость, я́же му́дре вся́ пра́вящая, возлюби́ досто́йно Тя́ пренепоро́чную и пречи́стую Де́ву несказа́нно, Пресвята́я Богоро́дице, в Тя́ все́льшаяся, ю́же славосло́вим, да пое́т Го́спода вся́ тва́рь, и превозно́сит во вся́ ве́ки.

Пе́снь 9

Ирмо́с: Ве́сь еси́ жела́ние, ве́сь сла́дость, Сло́ве Бо́жий, Де́вы Сы́не, Бо́же бого́в, Го́споди, святы́х Пресвяты́й. Те́м Тя́ вси́ с Ро́ждшею велича́ем.

Белообразу́юще яви́шася а́нгели светообра́зно, Боже́ственным ученико́м Твои́м пове́дающе Твое́ второ́е прише́ствие, Христе́: с ни́миже Тя́ вси́ богосло́вяще велича́ем. (Дважды)

Слава: Я́ко благоде́тель вся́каго естества́ слове́снаго, твори́ши пе́рвей си́ зари́ втору́ю све́тлость, кра́йния ра́ди бла́гости: те́мже Тя́ вси́ благодаря́ще велича́ем.

И ныне, Богоро́дичен: Разуме́в Твое́, Пречи́стая, светообра́зное де́вство, и уди́влься, ра́дость Тебе́ принесе́ Боже́ственный архистрати́г: те́мже Тя́ вси́ я́ко Богоро́дицу велича́ем.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.