Канон Небесным Силам Безплотным (Архангелам и Ангелам), глас 1.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н безпло́тным, его́же краестро́чие: Пе́рвое А́нгелом пе́ние. Творе́ние господи́на Феофа́на. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Запев: Вси Небеснии Силы безплотнии, молите Бога о нас.

Престо́лу предстоя́ще све́тло Влады́чнему всесвяти́и А́нгели, Отцу́ собезнача́льна, и Того́ вели́каго сове́та А́нгела, сло́во ми́ вдохну́ти ва́с пою́щу, моли́теся. [Два́жды.]

Слава: Зерца́ла све́та богонача́льна, и трисо́лнечныя свещи́ сия́ние в себе́ прие́млющыя, по ели́ку пости́жно, а́нгельския чи́ны пе́рвее умы́слив, у́м Боже́ственный соста́ви.

И ныне, Богоро́дичен: Украше́й я́ко Бо́г чинонача́лия вы́шних си́л, во утро́бу неискусобра́чную, Серафи́мов вы́шшу, всели́ся Твою́, Богоро́дице, и пло́ть непреме́нна бы́сть.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный Хра́ме неизрече́нныя сла́вы Твоея́, Человеколю́бче.

Све́ту богоде́тельному Серафи́ми несре́дственно приближа́ющеся, и многогу́бо и́м насыща́еми, первода́тными я́ве сия́ньми перводе́льно све́тятся, и я́ко све́ти втори́и быва́ют, Божество́м обожа́еми. [Два́жды.]

Слава: А́нгельския све́тлости пе́ти усе́рдно жела́юще, я́же те́ми от Бо́га по́мощь подае́мую, ве́рнии про́сим ума́ чистото́ю, и пречи́стыми усты́, и да полу́чим си́х сия́ние.

И ныне, Богоро́дичен: Ума́ пресу́щественнаго ви́дети сподобля́еми, я́ко ле́по, Гаврии́л, Де́во Всенепоро́чная, ра́дованен гла́с принесе́ Тебе́, словесе́ зача́тие я́ве возвеща́я Ти́, и неизрече́нное рождество́ пропове́дая Твое́.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Престо́ли пе́рвое исполня́юще удобре́ние, и Херуви́ми и Серафи́ми, Боже́ственными заря́ми, несре́дственно све́тятся, Богоде́тельная священнонача́лия прие́млюще, ны́не пою́т: сла́ва си́ле Твое́й, Го́споди. [Два́жды.]

Слава: Пою́т тричи́сленную Еди́ницу Божества́ тро́ическими свяще́ннии непреста́нными гла́сы, явля́юще Cерафи́ми пречи́стое богосло́вия та́инство, и правосла́вней ве́ре науча́юще.

И ныне, Богоро́дичен: И́же вся́кия тва́ри превы́шши разумева́емь, па́че ума́ живонача́льным зда́нием, вои́стинну на земли́ соверша́я чудеса́, де́вственными све́тлостьми, во Твое́ чи́стое чре́во всели́ся, Пречи́стая.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Любо́вию Боже́ственною распала́еми, Госпо́дьствия, Вла́сти и Си́лы, чи́нове втори́и, немо́лчными усты́ богонача́льное песносло́вят еди́но Существо́ и си́лу. [Два́жды.]

Слава: Управля́ются арха́нгельстии чи́нове Ду́хом, и А́нгелов, и Нача́лов, со безчи́сленными во́инствы: еди́но триипоста́сное просвети́тельно Существо́ почита́ти све́тло учи́ми су́ть.

И ныне, Богоро́дичен: Украси́лася еси́ па́че вся́каго а́нгельскаго благоле́пия, А́нгелов бо Творца́ заче́нши и Го́спода, Богома́ти Пречи́стая, воплоти́вшагося неизрече́нно от Твои́х крове́й, родила́ еси́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Чи́ни безпло́тных, Го́споди, престо́лу предстоя́ще сла́вы Твоея́, Человеколю́бче, гла́сы а́нгельскими непреста́нными Тя́ почита́ют: Ты́ бо кре́пость еси́ те́х, Христе́, и пе́ние. [Два́жды.]

Слава: Лице́ Твое́ зря́ще А́нгели, добро́ту недомы́слимую, Пребоже́ственное благоле́пие Твоея́ Боже́ственныя све́тлости, просвеща́ются: Ты́ бо те́х и све́т еси́ и ра́дование.

И ныне, Богоро́дичен: Воплоти́ся, и́же пре́жде сы́й безпло́тное Сло́во, из Тебе́, Пречи́стая, вся́ческая во́лею творя́й, и безпло́тных во́инства приведы́й от небытия́, я́ко Всеси́лен.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Песнь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки Спасе́ три́ превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Безнача́льный Све́т ты́ еси́, Влады́ко, от Отца́ све́та возсия́вый, А́нгелов во́инства све́ты устро́ил еси́, зерца́ла прие́млюща, блиста́ние Твое́ незаходи́мое: Препе́тый отце́в Бо́г, и препросла́влен.

Ро́д челове́чь, и́же все́х Госпо́дь, приставле́ньми а́нгельскими я́ве спаса́еши: сия́ бо предста́вил еси́ все́м ве́рующым, и правосла́вно пою́щым Тя́, Препе́таго отце́в Бо́га, и препросла́влена.

Слава: Язы́к и у́м не мо́жет, Влады́ко, Твои́х чуде́с изрещи́, и де́л благоле́пное: Ты́ бо просвети́л еси́ вся́кое удобре́ние небе́сных си́л: Препе́тый отце́в Бо́г, и препросла́влен.

И ныне, Богоро́дичен: Из Тебе́, Чи́стая, Сы́н воплоти́ся, и́же пре́жде без ма́тере из Отца́, и без отца́ е́же по на́м, на́с ра́ди бы́в. Ему́же ны́не слу́жат безпло́тных полки́, я́ко хвали́мому отце́в Бо́гу, и препросла́влену.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Слава: Просвеще́нная и близосве́тная А́нгелов во́инства луча́ми трисо́лнечныя красоты́, ве́рнии подража́юще воспои́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Я́ко исто́чник все́х до́брых, богонача́льнейшая приво́дит Боже́ственная си́ла све́ты вторы́я, све́т пе́рвый прие́млющя и вопию́щя: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Слава: Ум пе́рвый и Соде́тель, преми́рныя умы́ а́нгельския, пресу́щественне соста́ви Себе́, я́ве приближа́ющыяся, и вопию́щыя: вся́ дела́ Госпо́дня Го́спода по́йте, и превозноси́те во вся́ ве́ки.

И ныне, Богоро́дичен: Па́че Сло́ва из Отца́ рожде́нна пре́жде ве́к, неизрече́нно воплоще́нна родила́ еси́ на́м Де́во Всенепоро́чная. Ему́же вопие́м: вся́ дела́ Госпо́дня Го́спода по́йте, и превозноси́те во вся́ ве́ки.

Пе́снь 9

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Прича́стники неизрече́нныя сла́вы Твоея́, безпло́тныя умы́, Спа́се, соста́вил еси́: и ны́не те́ми Твоя́ лю́ди сохрани́, Тебе́ ве́рою и любо́вию прибега́ющыя, да Тя́, Влады́ко, непреста́нно велича́ем.

Да посыла́еши ми́рнаго А́нгела, соблюда́юща, Вседержи́телю, ста́до Твое́: ми́ра бо и любве́ Ты́ вино́вен, и богому́дренную ве́ру соблюда́юща, и вся́ е́реси Твое́ю си́лою разруша́юща.

Слава: Ве́сь сла́дость воспева́емый, небе́сную сла́достную све́тлость насади́ в це́рквах Твои́х, Влады́ко, и благоче́стно да́ждь в состоя́ние, да Тя́ Спаси́теля непреста́нно велича́ем.

И ныне, Богоро́дичен: Чи́ни а́нгельстии, Пречи́стая, ны́не немо́лчно Твое́ рождество́ почита́ют: в чину́ бо стоя́т взира́юще, весе́лия Его́ насыща́ющеся, и Тя́, Богоро́дицу, непреста́нно велича́ют.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.