Шрифт

Каноны октоиха

Канон октоиха на воскресной Утрени ко Пресвятой Богородице глас 3.

Богородичен глас 3:

Без се́мене от Боже́ственнаго Ду́ха, / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́, / и Младе́нца млеко́м пита́ла еси́. / Те́мже не преста́й моли́ти, / изба́витися от бед душа́м на́шим.

Канон Пресвятей Богородице, глас 3.

Песнь 1.

Ирмос: Во́ды дре́вле / ма́нием Боже́ственным / во еди́но со́нмище совокупи́вый / и раздели́вый мо́ре Изра́ильтеским лю́дем, / Сей Бог наш / препросла́влен есть. / Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ на́с.

Коле́но приклоня́ет вся́ко естество́ небе́сных, Де́во, / вопло́щшемуся из Тебе́, / со земны́ми же достоле́пно преиспо́дняя, я́ко просла́вися.

О примире́ний Я́же в Тебе́! / Благи́х бо незави́стно Пода́тель, / я́ко Бог Ду́ха Боже́ственнаго пода́вый нам, / плоть от Тебе́, Отрокови́це, прия́т, я́ко просла́вися.

Песнь 3.

Ирмос: И́же от несу́щих вся Приведы́й, / Сло́вом созида́емая, / соверша́емая Ду́хом, / Вседержи́телю Вы́шний, / в любви́ Твое́й утверди́ мене́.

Жезл из ко́рене Иессе́ова, проро́чески прозя́бши Де́ва, / цвет Тя, Христе́, возсия́ нам: / Свят еси́, Го́споди.

Да Боже́ственному прича́стию земноро́дныя соде́лаеши, / от Де́вы плоть на́шу Ты, обнища́л еси́, прие́м: / Свят еси́, Го́споди.

Песнь 4.

Ирмос: Положи́л еси́ к нам тве́рдую любо́вь, Го́споди, / Единоро́днаго бо Твоего́ Сы́на за ны на смерть дал еси́. / Те́мже Ти зове́м, благодаря́ще: / сла́ва си́ле Твое́й, Го́споди.

И́же поста́вивый го́ры, Влады́ко, ме́рилом Боже́ственнаго ра́зума, / отсече́н еси́ от Де́вы Ка́мень, кроме́ рук: / си́ле Твое́й сла́ва, Человеколю́бче.

Неду́гующее исцели́л еси́ на́ше естество́, Влады́ко, / скоре́йшую из Де́вы сию́ соедини́в цельбу́, / Твое́ Пречи́стое, Сло́ве, Божество́.

Часть моя́ еси, Го́споди, и насле́дие жела́нное, / соедини́вый мя из Де́вы, Сло́ве, Ипоста́си Твое́й, / пло́тию быв ипоста́сь.

Песнь 5.

Ирмос: К Тебе́ у́треннюю, всех Творцу́, / преиму́щему всяк ум ми́рови, / зане́ свет повеле́ния Твоя́, / в ни́хже наста́ви мя.

Сло́во Бо́жие Сын Твой, Де́во, / Соде́тель Ада́ма первозда́ннаго, / не созда́ние, а́ще и плоть одушевле́ну / Себе́ из Тебе́ созда́л есть.

Ра́вен Отцу́ Сын Твой, Де́во, / Сло́во Бо́жие, Ипоста́сь соверше́нна во двою́ естеству́, / Иису́с Госпо́дь, Бог соверше́н и Челове́к.

Песнь 6.

Ирмос: Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

Вообража́ется е́же по нам, от Нетле́нныя Де́вы, / И́же о́бразом неразлу́чный, о́бразом быв и ве́щию, / не прело́жся Божество́м Челове́к.

Бе́здны грехо́в, и бу́ри страсте́й, Пречи́стая, изба́ви мя: / еси́ бо приста́нище и бе́здна чуде́с, / ве́рою притека́ющим к Тебе́.

Богородичен, глас 3.

Непостижи́маго и Неопи́саннаго, / Единосу́щнаго Отцу́ и Ду́хови, / во утро́бу Твою́ та́йно вмести́ла еси́, Богоро́дице, / еди́но и несме́сно от Тро́ицы Божество́: / позна́хом рождество́ Твое́ в ми́ре сла́вити. / Те́мже и благода́рственно вопие́м Ти: / ра́дуйся, Благода́тная.

Песнь 7.

Ирмос: Я́коже дре́вле / благочести́выя три о́троки ороси́л еси́ / в пла́мени халде́йстем, / све́тлым Божества́ огне́м / и нас озари́, / благослове́н еси́, взыва́ющия, / Бо́же оте́ц на́ших.

И́же сла́вы Госпо́дь, и держа́й го́рния си́лы, / И́же со Отце́м седя́й, де́вственныма рука́ма носи́мь: / благослове́н еси́, Го́споди, Бо́же оте́ц на́ших.

Я́ра смерть, но сию́ Тебе́ бесе́довавшую погуби́л еси́, / от Де́вы Богоипоста́сная плоть быв: / благослове́н еси́, Го́споди, Бо́же оте́ц на́ших.

Богоро́дицу вси Тя Бо́га ро́ждшую, уве́дехом, / Еди́наго бо от Тро́ицы воплоти́вшагося из Тебе́ родила́ еси́: / благослове́н, Пречи́стая, Плод Твоего́ чре́ва.

Песнь 8.

Ирмос: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.

Чи́ны у́мныя, я́ко Ма́ти, превозшла́ еси́, / и близ Бо́га бы́вши: / благослови́м, Благослове́нная Де́во, рождество́ Твое́, / и превозно́сим во вся ве́ки.

Добро́ту есте́ственную, / красне́йшу показа́ла еси́, / облистава́ющую плоть Божества́. / Благослови́м, Благослове́нная Де́во, рождество́ Твое́, / и превозно́сим во вся ве́ки.

Песнь 9.

Ирмос: Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет дверь затворе́на. / Сию́ неизрече́нно / я́ко Богома́терь, велича́ем.

Сы́тость Твои́х похва́л, Де́во, / благочести́вым ве́рным отню́д не быва́ет: / жела́нием бо жела́ние при́сно Боже́ственное, и Духо́вное прие́млюще, / я́ко Ма́терь Бо́жию, велича́ем.

Положи́л еси́ нам непосты́дную Моли́твенницу, / Тебе́ ро́ждшую, Христе́. / Тоя́ мольба́ми Ми́лостива подае́ши нам Ду́ха, Пода́теля бла́гости, / от Отца́ Тобо́ю происходя́ща.

Молитва

Пресвятая Госпоже, Владычице Богородице, упование всех уповающих на Тя, Заступнице печальных, прибежище отчаянных, вдов и сирот Питательнице! Услыши и помилуй ны, грешныя и недостойныя рабы Твоя, со умилением ко пречистому Твоему образу припадающия: умоли, Милосердая Владычице, Сына Твоего и Господа нашего Иисуса Христа, да отвратит от нас праведный гнев Свой, да простит грехи и беззакония наша, яко да сподобимся благостию Его скончати житие наше в покаянии и получити милость Его со всеми избранными Его, яко благословена и препрославлена еси во веки веков. Аминь.