Канон иной Знамению, бывшему от иконы Пресвятой Богородицы Мирожской (Оранта)

Стихи́ры, гла́с 6:

Злата́я кади́льнице, ру́чко и же́зл, свети́льниче златоза́рный и сви́тче боже́ственный, в не́мже пе́рстом Бо́жиим Сло́во написа́ся, Тебе́ велича́ем.

Да́руй на́м, Богоро́дице, по́мощь от печа́ли, на Тя́ наде́ющимся, ве́рным прибе́жище, избавля́й от бе́д рабы́ Твоя́, Деви́це, на Тя́ бо по Бо́зе упова́ние вси́ возлага́ем.

Влады́чице, Ма́ти Изба́вителя, приими́ моле́ние ра́б Твои́х, а́ще и недосто́йне моля́щихся Ти, да мо́лишися за ны́ к ро́ждшемуся из Тебе́ Влады́це ми́ру, бу́ди на́м Изба́вительница.

Яже ра́дость от Ангела прии́мшая и ро́ждши Зижди́теля Твоего́, Де́во, спаси́ Тебе́ велича́ющих.

Влады́чице, приими́ моли́тву ра́б Твои́х и изба́ви на́с от вся́кия ну́жды и печа́ли.

Сла́ва, и ны́не, гла́с 8:

Что́ у́бо, му́жие богохрани́маго гра́да Пско́ва, ви́девше преди́вное зна́мение от Твоего́ пречи́стаго о́браза, Пресвята́я Влады́чице, сле́зы от пречи́стою о́чию, и ужа́сшеся, усре́тше со свяще́нным чи́ном, тре́петни со слеза́ми си́це глаго́лаху: не пре́зри, Влады́чице, воздыха́ния ра́б Твои́х, и не отри́ни моле́ний на́ших в коне́ц, но моли́ о на́с Сы́на Твоего́ и Бо́га на́шего, и ми́лостива и человеколюби́ва Того́ на́м покажи́, изба́витися на́м пра́веднаго Его́ преще́ния, Ты́ бо еси́, Пречи́стая, заступле́ние душа́м на́шим.

Тропа́рь зна́мению Богоро́дицы, гла́с 4:

Яко звезда́ пресве́тла возсия́ в Росси́йстей земли́ ико́на честна́го о́браза Твоего́, Богоро́дице Де́во, из обою́ о́чию точа́щи сле́зы Твоя́, я́ко река́, и ви́девше наро́ди пско́встии, му́жи и жены́ и с ча́ды, с пла́чем моля́щеся о́бразу Твоему́, си́це глаго́лаху: о, Пресвята́я Влады́чице Богоро́дице, не забу́ди гре́шных ра́б Твои́х, моля́щися Христу́ Бо́гу на́шему спасти́ся на́м.

Величание:

Велича́ем Тя́, Пресвята́я Де́во, богоизбра́нная Отрокови́це, и чте́м о́браз Тво́й честны́й, и́мже показа́ла еси́ пречу́дное зна́мение.

Кано́н, гла́с 8.

Пе́снь 1.

Ирмос: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

Припев: Пресвята́я Богоро́дице, спаси́ на́с.

Боже́ственныя си́лы же́зл преоблиста́я бла́гостию, святы́м зна́мением от свята́го жили́ща, яви́ся чу́до па́че естества́ от о́браза Твоего́, Пречи́стая.

Припев: Пресвята́я Богоро́дице, спаси́ на́с.

Ви́деша пресла́вное дне́сь зна́мение, бы́вшее от боже́ственнаго Твоего́ зра́ка, Ма́ти Бо́жия, и е́же о Тебе́ та́инство пропове́дающееся, Богоро́дице Де́во, издале́ча зря́щии Твоя́ чудеса́.

Сла́ва Отцу́ и Сы́ну и Свято́му Ду́ху:

Наде́жду иму́ще на Тя́, Богороди́тельнице, и несумне́нну ве́ру, гра́да сего́ наро́ди, я́ко ца́рский ски́петр Тебе́ гра́ду забра́ла положи́ша, Де́во, Неискусобра́чная.

И ны́не и при́сно и во ве́ки веко́в. Ами́нь.

Яко жи́ву Ма́терь Сло́ва ви́дев Тя́ наро́д многочи́сленный, зна́мение изря́дно показа́вшу, и обстоя́ще Твою́ всечестну́ю ико́ну со свяще́нным собо́ром, ру́це возде́вше к высоте́, моля́хуся, Тебе́ призыва́юще на по́мощь.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Пресвята́я Богоро́дице, спаси́ на́с.

Приклони́ у́хо Твое́, Блага́я, и ви́ждь озлобле́ние на́ше и бе́д умноже́ние, к Тебе́ бо душе́внии о́чи простира́ем, Влады́чице, с пла́чем коле́на преклоня́ем, мо́лим Тя́, вопию́ще: сла́ва, Богома́ти, зна́мению Твоему́.

Припев: Пресвята́я Богоро́дице, спаси́ на́с.

Пою́т Тя́, Богоро́дице, Ангельстии чи́ни и пра́зднуют проро́цы, патриа́рси со святи́тели, теку́ще во святу́ю це́рковь, с ни́миже тогда́ и боголюби́вии наро́ди, ви́деша Тя́, Цари́це, за ны́, гре́шныя, к Сы́ну моля́щуся поми́ловати гра́д и лю́ди, в не́м живу́щия и сла́вящия Твоего́ пречи́стаго о́браза преди́вное зна́мение.

Сла́ва Отцу́ и Сы́ну и Свято́му Ду́ху:

О, пресла́вное зна́мение, испо́лнено у́жаса! Ви́девше и́же тогда́ наро́ди от Твоея́ всечестны́я ико́ны, Богороди́тельнице, от обою́ о́чию сле́зы исходя́ща, стра́хом одержи́ми, со слеза́ми си́це взыва́ху: Влады́чице, не оста́ви на́с.

И ны́не и при́сно и во ве́ки веко́в. Ами́нь.

Зна́мения ны́не наста́ де́нь, зна́мение ико́ны Твоея́, Де́во Богороди́тельнице, пра́здник све́тел соверша́юще, вопие́м Ти́: не́сть, Пречи́стая, па́че Тебе́, Богоневе́сто.

Седа́лен, гла́с 8:

Юже дре́вле ли́к проро́ческий пропове́да две́рь небе́сную, неопали́мую купину́, и све́щник многосве́тлый, злату́ю кади́льницу, ру́чку и же́зл, пресла́вно дне́сь и ди́вно зна́мение показа́. Те́мже благода́рственная пе́ния воспису́ем Ти́, раби́ Твои́, Богоро́дице: моли́ Христа́ Бо́га согреше́ний оставле́ние дарова́ти, Тебе́ бо и́мамы наде́жду, раби́ Твои́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Пресвята́я Богоро́дице, спаси́ на́с.

Яже Кла́с прозя́бши и возрасти́вши животвори́вый, неора́нная Ни́ва, даю́щи ми́рови жи́знь, Богоро́дице, спаса́й пою́щия Тя́.

Припев: Пресвята́я Богоро́дице, спаси́ на́с.

Многобога́тный да́р и неотъе́млемое сокро́вище да́л еси́ гра́ду Твоему́, ико́ну Пречи́стыя Твоея́ Ма́тере, Сло́ве, и сея́ по́мощию проти́вных низлага́й.

Сла́ва Отцу́ и Сы́ну и Свято́му Ду́ху:

В боже́ственнем хра́ме Твое́м, Богора́дованная, иде́же чудотво́рная Твоя́ ико́на поста́влена бы́сть, во утвержде́ние богохрани́мому гра́ду на́шему, совоку́пльшеся, Тя́ прославля́ем.

И ны́не и при́сно и во ве́ки веко́в. Ами́нь.

Собо́ри ве́рных и вся́ко состоя́ние челове́ческое веселя́тся, совоку́пльшеся в честне́м хра́ме Твое́м, зря́ще в не́м, я́коже пресве́тлое со́лнце, о́браз Пречи́стыя Твоея́ Ма́тере, Сло́ве.

Пе́снь 5.

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Пресвята́я Богоро́дице, спаси́ на́с.

Вели́кий преднапису́ет Тя́ во проро́цех Моисе́й ковче́г, и трапе́зу, и све́щник, и ру́чку, обра́зно явля́я воплоще́ние е́же от Тебе́ Вы́шняго, Ма́ти Де́во.

Сла́ва Отцу́ и Сы́ну и Свято́му Ду́ху:

Яко щито́м, огражда́еми непобеди́мою Твое́ю си́лою, Де́во, сопроти́вных побежда́ем неизрече́нное мно́жество, Всепе́тая.

И ны́не и при́сно и во ве́ки веко́в. Ами́нь.

Ты́ бога́тство неистощи́мое, исцеле́ний исто́чник ве́рою прибега́ющим ко хра́му Твоему́, иде́же пребыва́ет честны́й о́браз Тво́й, Влады́чице.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Пресвята́я Богоро́дице, спаси́ на́с.

Псалмы́ Тя воспева́ем, Обра́дованная, и немо́лчно Ти́, е́же ра́дуйся, вопие́м, Ты́ бо источи́ла еси́ все́м ра́дость.

Сла́ва Отцу́ и Сы́ну и Свято́му Ду́ху:

Зна́мение стра́шно и ве́щь пресла́вну от Твоея́ ико́ны, Влады́чице, дне́сь пра́зднующе, лю́дие Твои́, Богоро́дице, похва́льная, я́ко досто́йно похвалы́, прино́сим Ти́, глаго́люще: ра́дуйся, Обра́дованная.

И ны́не и при́сно и во ве́ки веко́в. Ами́нь.

Честну́ю ико́ну Твою́ ра́достным се́рдцем и душе́ю облобыза́ем, веселя́щеся, и, те́плою ве́рою прикаса́ющеся, исцеле́ние почерпа́ем.

Конда́к, гла́с 7:

Засту́пнице христиа́ном непосты́дная и Предста́тельнице гра́ду на́шему Пско́ву, не пре́зри моле́ния на́с, гре́шных, и ви́дящих от Твоего́ честна́го о́браза сле́зы теку́ща из обою́ о́чию и моля́щихся приле́жно. Но предвари́, я́ко Бла́га, на по́мощь на́шу, ве́рно к Тебе́ прибега́ющим, услы́ши на́ша моле́ния, Богоро́дице, и изба́ви на́с от нахожде́ния пога́ных, ускори́ же на моли́тву на́шу и потщи́ся на умоле́ние, заступа́ющи при́сно, Богоро́дице, чту́щих Тя́: ра́дуйся, Де́во, христиа́ном похвало́.

Икос:

Разреши́ тму́ мои́х прегреше́ний, я́же во уме́ мое́м лежа́щую, и Твои́м мя́ све́том просвети́, Де́во, я́ко да возмогу́ Тебе́ похвалу́ принести́, Юже Оте́ц восхвали́, и Ду́х Святы́й осени́, Сы́н же и Сло́во Бо́жие всели́ся и, нетле́нно от пречи́стою Твое́ю бо́ку проше́д, со челове́ки поживе́. Те́мже гре́шнии мы́ и недосто́йнии раби́ Твои́, дне́сь соверша́юще свяще́нное торжество́, зна́мение бы́вшее честны́я ико́ны Твоея́, в о́ньже преди́вное чу́до показа́ла еси́, и Твоему́ чудеси́ уди́вльшеся, Твои́х бога́тных дарова́ний испо́лнившеся, вме́сто благово́нных арома́т, ели́ко возмо́жно на́м, земны́м, похва́льная прино́сим Ти́, глаго́люще: ра́дуйся, покро́ве и наде́жда гра́ду Твоему́; ра́дуйся, я́ко проти́вных си́лою Твое́ю низлага́ем; ра́дуйся, Разу́мнаго Со́лнца Ма́ти, ве́рных просвеща́ющи, неве́рных же помрача́ющи; ра́дуйся, Де́во, христиа́ном похвало́.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Припев: Пресвята́я Богоро́дице, спаси́ на́с.

Ви́ждь, Пречи́стая, озлобле́ние ра́б Твои́х, и не отри́ни в коне́ц, Твое́ бо есмы достоя́ние и Твое́ю наде́ждею крепи́мся, да вси́ вопие́м Ти́: ра́дуйся, Обра́дованная.

Сла́ва Отцу́ и Сы́ну и Свято́му Ду́ху:

Светоно́сная благода́ть и исцеле́ние даде́ся гра́ду Твоему́, о́браз Тво́й, Пречи́стая, его́же любе́зно облобыза́юще, весели́мся.

И ны́не и при́сно и во ве́ки веко́в. Ами́нь.

Незаходи́маго Све́та свеще́, Боже́ственнаго Сия́ния яви́ся све́щник, златосия́ющь и ми́р ве́сь озаря́ющь заре́ю чи́стаго де́вства, пою́щия Тя́ спаса́еши, Благослове́нная, Яже Бо́га пло́тию ро́ждши.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Пресвята́я Богоро́дице, спаси́ на́с.

Сопроти́вных разжже́нныя пламенови́дныя на на́с угаси́ стре́лы, я́ко да Тя́ пое́м, Чи́стая, во ве́ки.

Припев: Пресвята́я Богоро́дице, спаси́ на́с.

Па́че естества́ Соде́теля и Спа́са, Бо́га Сло́ва родила́ еси́, Де́во, те́мже Тя́ пое́м, Чи́стая, во ве́ки.

Сла́ва Отцу́ и Сы́ну и Свято́му Ду́ху:

Яко нетле́нное зерца́ло име́я гра́д Тво́й ико́ну Твою́, Пречи́стая, сопроти́вящихся низлага́ем и Сы́ну Твоему́ вопие́м: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Что́ Ти принесе́м, Пречи́стая, от всея́ тва́ри сла́вимей? Недоуме́емся, Влады́чице, то́чию е́же Гаврии́л научи́: ра́дуйся, Обра́дованная.

Песнь 9.

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Пресвята́я Богоро́дице, спаси́ на́с.

Се́ вре́мя благоприя́тно и де́нь спасе́ния, зна́мение ико́ны Твоея́, Пречи́стая, е́же пра́зднующе све́тло, духо́вне торжество́ соверша́ем.

Припев: Пресвята́я Богоро́дице, спаси́ на́с.

Яже Боже́ственною све́тлостию озаря́ется, зри́м дне́сь, Пречи́стая, ико́ну Твою́ честну́ю, е́йже кла́няющеся, Тя́ велича́ем.

Сла́ва Отцу́ и Сы́ну и Свято́му Ду́ху:

Мы́сли очи́стивше, празднолю́бнаго гра́да Пско́ва собо́ри свяще́нных ли́ков и все́х ве́рных благочести́вое мно́жество, восхвали́те Ма́терь Сло́ва, е́же от Тоя́ о́браза бы́вшее преди́вное зна́мение, ему́же со стра́хом кла́няющеся, велича́ем.

И ны́не и при́сно и во ве́ки веко́в. Ами́нь.

Де́вства Твоего́ зна́мение невреди́мо сохрани́ Сло́во Бо́жие, из Тебе́ проше́д, сохрани́ти и гра́д Тво́й мо́лимся неразори́мь, Де́во Всепе́тая, да Тя́ непреста́нно велича́ем.

Свети́лен Богоро́дице.

Вожделе́в Твое́й добро́те Иису́с, Пречи́стая, в Тя́ всели́ся и Тя́ Засту́пницу гра́ду Твоему́ Сло́во Бо́жие дарова́, его́же сохраня́й заступле́нием Твои́м при́сно, я́ко да Тя́ ублажа́ем, Пренепоро́чная Отрокови́це.

Молитва

К кому возопию, Владычице, к кому прибегну в горести моей, аще не к Тебе, Царице Небесная? Кто плач мой услышит и воздыхание приимет, аще не Ты, Пренепорочная, Надежда христиан и прибежище нам грешным? Кто паче Тебе в несчастиях защитит? Услыши стенание мое и приклони ухо Твое ко мне, Владычице и Мати Бога моего! Не презри ищущаго Твоея помощи и не отрини мене, грешнаго, Царице Небесная! Научи меня исполнять волю Сына Твоего и даруй желание всегда следовать Его святым заповедям. За мой ропот в болезнях, трудах и несчастиях не отступи от мене, но пребуди Материю и Покровительницей мене малодушнаго.

Царице моя Преблагая, Заступнице усердная! Твоим ходатайством прегрешения моя покрый, от видимых и невидимых врагов защити; сердца враждующих против меня смягчи и Христовою любовию согрей. Мне, немощному, даруй Твою всесильную помощь победить мои греховныя привычки, дабы очищенный покаянием и последующею добродетельною жизнию, в общении со Святою Церковию, провел остальные дни земнаго странствия.

Предстани мне, Надеждо всех христиан, в час кончины моея и подкрепи мою веру в смертный тяжкий час. Вознеси за меня, многогрешащаго в жизни сей, Твои всесильныя молитвы по отшествии моем, да оправдает меня Господь и соделает причастником Его безконечных радостей. Аминь.