Канон Пресвятой Богородице в честь Ее иконы «Всеблаженная»

Тропа́рь Всеблаже́нныя, глас 4:

Торжество́ днесь пра́зднуем све́тлое, / се бо предлежи́т, о Всеблаже́нная, ико́на Твоя́ Всечестна́я, / к ней же любо́вию се́рдца вси приходя́ще, Влады́чице, поклоня́емся и те́пло Тебе́ вопие́м: / изба́ви нас от бед и обстоя́ний.

Кано́н Всеблаже́нныя. Глас 1.

Песнь 1:

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Пресвята́я Богоро́дице, спаси́ на́с.

Днесь возсия́ Всенепоро́чныя Де́вы торжество́. / Прииди́те у́бо, празднолю́бцы, / согла́сными пе́сньми и пе́нии ра́достно сию́ воспои́м.

Припев: Пресвята́я Богоро́дице, спаси́ на́с.

Боже́ственное и всенепоро́чное торжество́ Богоро́дицы соверша́юще, / притеце́м, богому́дрии, / рука́ми пле́щуще све́тло, и ду́хом Боголе́пно пе́сньми почти́м.

Сла́ва Отцу́ и Сы́ну и Свято́му Ду́ху:

Чи́стая Всеблаже́нная, Всечестна́я Отрокови́це, / све́тлое Твое́ торжество́ ра́достно соверша́юще, / вели́чия Твоя́ благогове́йными мы́сльми ве́рнии вси почита́ем.

И ны́не и при́сно и во ве́ки веко́в. Ами́нь.

Мари́е Всепе́тая, Отрокови́це Де́во, / всечестну́ю па́мять Твою́ све́тло пра́зднующе, / весе́лою душе́ю сла́ву Твое́ю всеблагогове́йно ны́не воспева́ем.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Пресвята́я Богоро́дице, спаси́ на́с.

Обетова́ние предве́чное исполня́ющи, Отрокови́це Всенепоро́чная, / и от непло́дныя ма́тере, я́ко цвет произра́сши, / сме́ртным всем дарова́ла еси́ ра́дость неизглаго́ланную.

Припев: Пресвята́я Богоро́дице, спаси́ на́с.

В Рождестве́ Твое́м возра́довашася честни́и роди́тели Твои́, Отрокови́це, / Иоаки́м достохва́льный и А́нна всечестна́я : / приводя́ше же Бо́гови, Тя преда́ша ве́рно.

Сла́ва Отцу́ и Сы́ну и Свято́му Ду́ху:

Свяще́нник и проро́к Заха́риа прия́т Тя внутрь олтаря́, / свещено́сныя же де́вы све́тло стеко́шася к Созда́телю, / воспева́юще песнь благода́рственную.

И ны́не и при́сно и во ве́ки веко́в. Ами́нь.

Воспита́вшаяся во Свята́я Святы́х, Отрокови́це Всенепоро́чная, / пребыла́ еси́ вся чи́ста, и свя́та и нескве́рна: / от А́нгела бо приима́ла еси́ пи́щу небе́сную.

Песнь 4:

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди.

Припев: Пресвята́я Богоро́дице, спаси́ на́с.

Арха́нгел по́слан бысть с высоты́ небе́с, / благовеству́яй та́йну стра́шную. / Во чре́ве же Твое́м несказа́нно нося́щи и ро́ждши всех Творца́, / спасла́ еси́ челове́ка, Влады́чице.

Припев: Пресвята́я Богоро́дице, спаси́ на́с.

Безневе́стная Де́во, Честна́я Голуби́це, / Бо́га Сло́ва безнача́льнаго родила́ еси́ на земли́, / и пре́жде рождества́ Де́ва просия́вши, / по рождестве́ же вои́стину освяще́на пребы́вши, Мари́е Богоневе́сто.

Сла́ва Отцу́ и Сы́ну и Свято́му Ду́ху:

Во страну́ Еги́петскую пришла́ еси́, о Честна́я, / и чуде́с стра́шных самови́дица была́ еси́: / Сы́на же Твоего́ на дре́ве пове́шена и во гро́бе но́ве заключе́нна ви́дела еси́, воскре́сша тридне́вно.

И ны́не и при́сно и во ве́ки веко́в. Ами́нь.

Я́ко одушевле́нный обла́к и столп све́та, / Светода́вца Со́лнца показа́ла еси́ нам: / на небеса́ же преста́вилася еси́, Благослове́нная, / в позлаще́нней красоте́ преиспещре́на, сла́ва А́нгелов, Всецари́це.

Песнь 5:

Ирмос: Тво́й ми́р да́ждь на́м, Сы́не Бо́жий: ино́го бо, ра́зве Тебе́ бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Пресвята́я Богоро́дице, спаси́ на́с.

Сын у́бо Твой, Всечестна́я, / дарова́л есть ве́рным Боже́ственнаго ли́ка нерукотворе́нное изображе́ние: / Ты же, Де́во Всеблаже́нная, ми́рови честну́ю Твою́ ико́ну оста́вила еси́.

Припев: Пресвята́я Богоро́дице, спаси́ на́с.

Пречи́стую ико́ну Твою́, Ма́ти Бо́жия, / Богосве́тлыми благода́тьми облиста́ла еси́: / в цари́це же градо́в Цари́ца боже́ственных А́нгелов сию́ возложи́ла еси́.

Сла́ва Отцу́ и Сы́ну и Свято́му Ду́ху:

Боже́ственная Твоя́ ико́на, и честна́я, Всеблаже́нная, / мно́гия всечестны́я хра́мы премину́вши, / прославлена всели́ся во хра́ме Боже́ственнем сла́внаго Победоно́сца.

И ны́не и при́сно и во ве́ки веко́в. Ами́нь.

Всечестна́я ико́на Твоя́, Пречи́стая Де́во, / ца́рствующаго гра́да похвала́ есть, / и с ве́рою прибега́ющим бога́тно излива́ет оби́льную Твою́ благода́ть.

Песнь 6:

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя́, Спа́се ми́ра, зову́ща: сла́ва Тебе́.

Припев: Пресвята́я Богоро́дице, спаси́ на́с.

Проро́к помоли́вся, свободи́ся тле́ния: / мы же лобыза́юще ико́ну Твою́, честна́я Богоневе́сто, стра́шных бед ве́рою избавля́емся.

Припев: Пресвята́я Богоро́дице, спаси́ на́с.

Све́тлый Твой и честны́й пра́здник соверша́юще / и мы́сленных исто́чников реки поче́рпывающе, Всепе́тая, / Твою́ ико́ну лобыза́ем.

Сла́ва Отцу́ и Сы́ну и Свято́му Ду́ху:

Неисчерпа́емь исто́чник дарова́ний свяще́нных показу́ется / всепречи́стая ико́на ли́ка Твоего́, Всенескве́рная, / всему́ ми́ру благода́ть посыла́ющи.

И ны́не и при́сно и во ве́ки веко́в. Ами́нь.

Свята́я Твоя́ ико́на, Всеблаже́нная Чи́стая, / вели́кия и честны́я це́ркве Христо́вы блиста́ние есть ве́лие и украше́ние.

Конда́к. Глас 4

Во пра́здник Твой соше́дшеся, ве́рнии, / свяще́нное ко сла́ве Бо́жией торжество́ Твое́, Влады́чице, днесь всеблагогове́йно соверша́ем, любо́вию же чту́ще честну́ю ико́ну Твою́, / Тебе́ песносло́вим вси в ра́дости: / ра́дуйся, Де́во Честна́я Всеблаже́нная.

И́кос.

Пре́жде век от Бо́га я́сно избра́нная, и Ма́ти бы́вшая всех Царя́, Его́же незри́мый о́браз пло́тию обложи́вшая, / и зело́ помраче́нный о́браз Ада́мов неизрече́нно возобрази́вшая / и Боже́ственною си́лою нача́льника тьмы уби́вшая, / и возбра́нная Воево́да показа́вшаяся, / соблюди́ град сей и спаси́ лю́ди христоимени́тыя, Богоро́дице, ико́ну Твою́ чту́щия и вопию́щия Тебе́ те́пло: / ра́дуйся, Де́во Честна́я Всеблаже́нная.

Песнь 7:

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших.

Припев: Пресвята́я Богоро́дице, спаси́ на́с.

Име́яше у́бо пре́жде Киво́т Богода́нный ски́ния свиде́ния. / Соломо́нов же храм той унасле́дова, я́ко Боже́ственное украше́ние: Твой же о́браз, Де́во, иму́щи Христо́ва Це́рковь, све́тло весели́тся.

Припев: Пресвята́я Богоро́дице, спаси́ на́с.

Дре́вле игра́я Богооте́ц пред сенны́м ковче́гом скака́ше: / христоимени́тии же лю́дие похваля́ются, чту́ще, я́ко Киво́т святы́ни в Це́ркви Христо́вой, всечестну́ю ико́ну Твою́, Всеблаже́нная.

Сла́ва Отцу́ и Сы́ну и Свято́му Ду́ху:

Во огнь лю́тый ико́ны вверга́ху иконобо́рцы зломы́слении: / Феодо́ра же цари́ца ины́я воздвиже́, я́ко благоче́стия побе́дное зна́мение: ве́рнии же ны́не лобыза́ют свяще́нную Твою́ ико́ну, Честна́я Всеблаже́нная.

И ны́не и при́сно и во ве́ки веко́в. Ами́нь.

Ма́ти Непоро́чная, Богоро́дице Всепречи́стая, обогати́хомся ве́рнии, / изображе́ние лица́ Твоего́ я́ко вои́стину многоце́нное сокро́вище иму́ще: и́бо и мы с ве́рою чту́ще Твою́ ико́ну, чтим Первоо́бразное.

Песнь 8:

Ирмос: Его́же ужаса́ются А́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Пресвята́я Богоро́дице, спаси́ на́с.

О́бразу власти́теля нечести́ваго посмея́вшеся о́троцы, изба́вишася от пе́щи и пла́мене. / Мы же, почита́юще Твою́ ико́ну честну́ю, избавля́емся от бед вся́ческих, Богоро́дице.

Припев: Пресвята́я Богоро́дице, спаси́ на́с.

Ико́не поклоне́ние Лев царь непрекло́нно лю́дем запрети́ повеле́нием стра́шным. / Ты же, Чи́стая, дае́ши ве́рным сокро́вище, Твоего́ ли́ка, Де́во, всечестну́ю ико́ну.

Сла́ва Отцу́ и Сы́ну и Свято́му Ду́ху:

Возбра́ннии борцы́ за ико́ны Боже́ственныя го́ресть мук тя́жких претерпе́ша, / оба́че чту́щие честны́й о́браз Твой, Де́во, спаса́ются от вся́ких бед.

И ны́не и при́сно и во ве́ки веко́в. Ами́нь.

О́бразы и куми́ры служе́ния нечести́ваго тле́нием исчезо́ша. / И се уже́ благогове́йно сла́вим вси ико́ну Твою́, Пречи́стая Де́во, во вся ве́ки.

Песнь 9:

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный. Велича́ем вси́ я́ко Ма́терь Бо́га на́шего Чи́стую.

Припев: Пресвята́я Богоро́дице, спаси́ на́с.

Я́ко день лучеза́рный и све́та Ма́ти су́щи, / всем испуща́еши всесве́тло спасе́ния лучи́: / сего́ ра́ди Тя, Всепречи́стая, ны́не в пе́ниих почита́юще, све́тло веселя́щеся, вси ве́рнии соверша́ем честны́й Твой пра́здник.

Припев: Пресвята́я Богоро́дице, спаси́ на́с.

Светообра́зных А́нгел и Херуви́м Вы́сшую и Небе́с Простра́ннейшую, и Ма́терь Де́ву славосло́вяще вои́стину, / и Тя велича́юще, Всенепоро́чная, / честне́й Твое́й ико́не с любо́вию покланя́емся благоче́стно.

Припев: Пресвята́я Богоро́дице, спаси́ на́с.

К свяще́нному о́бразу Всепречи́стаго Ли́ка Твоего́, Чи́стая Всеблаже́нная, / благоче́стно припа́дающе честни́и патриа́рси и весь причт, / и ли́ки дев, и лю́дие, покланя́емся и сла́вим всех Творца́.

Припев: Пресвята́я Богоро́дице, спаси́ на́с.

Апо́столи Богоно́снии, Твое́ те́ло погреба́юще, / мир арома́ты чи́стыми пома́заша дре́вле, / ико́ну же Твою́, Чи́стая Де́во, Всецари́це, А́нгели стоя́ще незри́мо Боже́ственными пе́сньми почита́ют благогове́йно.

Сла́ва Отцу́ и Сы́ну и Свято́му Ду́ху:

Тро́ичен: Пре́жде век сый Зижди́тель всех Бо́же, / Безнача́льне О́тче, Сы́не и Ду́ше, Еди́но Божество́ и́стинное, Тро́ице Единосу́щная и Сопресто́льная, / моли́твами Всечи́стыя соблюди́ ве́рныя лю́ди Твоя́.

И ны́не и при́сно и во ве́ки веко́в. Ами́нь.

Славосло́вим, Де́во, Твое́ нетле́нное рождество́ / и благоче́стно покланя́емся честне́й Твое́й ико́не, / да изба́вимся искуше́ний и благода́ть всегда́ су́щую почерпе́м: / сего́ ра́ди Твои́ми мольба́ми покры́й, соблюди́ на Тя упова́ющих.

Молитва Пресвятой Богородице пред иконой Ея «Всеблаженной»

О, Пресвята́я Де́во, Ма́ти Го́спода Вы́шних сил, Небесе́ и земли́ Цари́це, гра́да и страны́ на́шея всемо́щная Засту́пнице! Приими́ хвале́бное пе́ние сие́ от нас недосто́йных раб Твои́х, и вознеси́ моли́твы на́ша ко престо́лу Бо́га Сы́на Твоего́, да ми́лостив бу́дет непра́вдам на́шим и проба́вит благода́ть Свою́ чту́щим всечестно́е и́мя Твое́ и с ве́рою и любо́вию покланя́ющимся пречи́стому о́бразу Твоему́. Не́смы бо досто́йни от Него́ поми́ловани бы́ти, а́ще не Ты уми́лостивиши Его́ о нас, Влады́чице, я́ко вся Тебе́ от Него́ возмо́жна суть. Сего́ ра́ди к Тебе́ прибега́ем, я́ко к несомне́нней и ско́рей Засту́пнице на́шей: услы́ши нас моля́щихся Тебе́, удиви́ над на́ми вели́кия и бога́тыя ми́лости Твоя́, яви́ нам небе́сную по́мощь Твою́ и заступле́ние, и испроси́ у Бо́га Сы́на Твоего́, па́стырем на́шим ре́вность и бде́ние о душа́х, градоправи́телем му́дрость и си́лу, судия́м пра́вду и нелицеприя́тие, наста́вником ра́зум и смиренному́дрие, супру́гом любо́вь и согла́сие, ча́дом послуша́ние, оби́димым терпе́ние, оби́дящим страх Бо́жий, скорбя́щим благоду́шие, ра́дующимся воздержа́ние; нам же всем низпосли́ дух ра́зума и благоче́стия, дух милосе́рдия и кро́тости, дух чистоты́ и пра́вды. Ей, Госпоже́ Пречи́стая! Умилосе́рдися на немощны́я лю́ди Твоя́, рассе́янныя собери́, заблу́ждшия на путь пра́вый наста́ви, неду́гующия уврачу́й, ста́рость поддержи́, ю́ныя уцелому́дри, младе́нцы воспита́й, и при́зри на всех нас призре́нием ми́лостиваго Твоего́ заступле́ния, воздви́гни нас из глубины́ грехо́вныя и просвети́ серде́чныя о́чи на́ши ко зре́нию спасе́ния. Ми́лостива нам бу́ди зде и на стра́шнем суде́ Сы́на Твоего́, преста́вльшияся же в ве́ре и покая́нии от жития́ сего́ отцы́ и бра́тию на́шу в ве́чней жи́зни со а́нгелы и со все́ми святы́ми жи́ти сотвори́. Ты бо еси́, Госпоже́, сла́ва небе́сных и упова́ние земны́х, Ты по Бо́зе на́ша Наде́жда и Засту́пница всех притека́ющих к Тебе́ с ве́рою. Тебе́ у́бо мо́лимся, и Тебе́, я́ко всемогу́щей Помо́щнице, са́ми себе́ и друг дру́га и всю жи́знь на́шу предае́м, ны́не и при́сно и во ве́ки веко́в. Ами́нь.